TV
కరన్‌కోట్‌లో కంగుతిన్న కారు
తాండూరు రూరల్‌: ఉమ్మడి రంగారెడ్డి జిల్లాలోనే పెద్ద పంచాయతీ అయిన కరన్‌కోట్‌లో బీఆర్‌ఎస్‌కు ఎదురుదెబ్బ తగిలింది. ఈగ్రామం ప్రస్తుత ఎన్నికల్లో జనరల్‌కు రిజర్వ్‌ అయింది. ఇక్కడ కాంగ్రెస్‌ బలపర్చిన సర్పంచ్‌ అభ్యర్థి రాజ్‌కుమార్‌ శనివారం తన ప్యానెల్‌కు చెందిన 14 మంది వార్డు సభ్యులతో కలిసి నామినేషన్‌ వేశారు. బీఆర్‌ఎస్‌ బలపర్చిన అభ్యర్థి హేమంత్‌కుమార్‌ శనివారం నామినేషన్‌ వేయాల్సి ఉంది. గతంలో తన సతీమణిని సర్పంచ్‌గా గెలిపించుకోవడంతో పాటు మాజీ ఉప సర్పంచ్‌గా పని చేసిన అనుభవం ఉన్న, బలమైన నాయకుడు కావడంతో పోటీ రసవత్తరంగా ఉంటుందని అంతా భావించారు. ఏం జరిగిందో ఏమో కానీ చివరి నిమిషంలో నామివేషన్‌ వేసేందుకు హేమంత్‌కుమార్‌ ససేమిరా అన్నారు. ఊహించని ఈ పరిణామంతో బీఆర్‌ఎస్‌ శ్రేణులు, మద్దతుదారులు కంగుతిన్నారు. మాజీ ఎమ్మెల్యే రోహిత్‌రెడ్డి నచ్చజెప్పినా వినకపోవడంతో హడావుడిగా అశోక్‌కుమార్‌తో పాటు మరో ఇద్దరితో నామినేషన్‌ వేయించారు. ఇదిలా ఉండగా అధికార పార్టీకి చెందిన కొంతమంది నేతలు బెదిరించడంతోనే హేమంత్‌ వెనక్కి తగ్గాడని బీఆర్‌ఎస్‌ నాయకులు బోయ అశోక్‌కుమార్‌, సుధకర్‌గౌడ్‌, స్వామి తదితరులు ఆరోపించారు. ఇదిలా ఉండగా కరన్‌కోట్‌లో సీసీఐ ఫ్యాక్టరీతో పాటు పదుల సంఖ్యలో నాపరాతి గనులు ఉన్నాయి. దీంతో పంచాయతీకి మంచి ఆదాయం ఉంటుంది. ఇక్కడ 10 వేల మందికిపైగా జనాభా, 7,354 మంది ఓటర్లు ఉన్నారు.
నామినేషన్‌కు నిరాకరించినహేమంత్‌కుమార్‌
మాజీ ఎమ్మెల్యే రోహిత్‌రెడ్డి నచ్చజెప్పినా వినని వైనం
కాంగ్రెస్‌ నేతలు బెదిరించారని గులాబీ శ్రేణుల ఆరోపణ
