ప్రారంభించి.. పాతరేసి!

బషీరాబాద్‌: పత్రి గింజను కొంటామన్న ప్రభుత్వ పెద్దల మాటలు నీటి మీద రాతలుగా మారాయి. ధాన్యం కొనుగోలు కేంద్రాలను ఏర్పాటు చేసి పట్టించుకోకపోవడంతో అన్నదాతలు కలవరపాటు గురవుతున్నారు. మండలంలోని కాశీంపూర్‌ వరి కొనుగోలు కేంద్రంలో ధాన్యం భారీగా చేరుతుంది. ఈ సెంటర్‌ ప్రారంభించి 12 రోజులు గడిచినా ఐకేపీ సిబ్బంది తూకాలు ప్రారంభించక పోవడంతో వడ్ల రాశులు పేరుకుపోయాయి. దీంతో రైతులు చలికి వణుకుతూ రాత్రింబవళ్లు కాపల కాస్తున్నారు. మండలంలోని మంతట్టి, రెడ్డిఘణాపూర్‌, కాశీంపూర్‌, బాద్లాపూర్‌, కుప్పన్‌కోట్‌, గొట్టిగ తదితర గ్రామాల్లో గత 15 రోజులుగా వరి కోతలు ప్రారంభించారు. విక్రయం కోసం రైతులు ధాన్యం బస్తాలు కేంద్రం దగ్గర నిల్వ చేశారు. చలికి వడ్లు మరింత తేమ పెరగడంతో పగటి పూట ఎండకు ఆరబెట్టి రాత్రికి టార్పలిన్లు కప్పుతున్నారు. తూకాలు వేయమని ఐకేపీ సిబ్బందికి అడిగితే రేపు, మాపు అంటూ కాలయాపన చేస్తున్నారని అన్నదాతలు మండిపడుతున్నారు.

కన్నెత్తి చూడని అధికారులు

గ్రామ శివారులోని ఓ పొలంలో ఈ నెల 16న కొనుగోలు కేంద్రం ప్రారంభించారు. ఈ కేంద్రాన్ని కాశీంపూర్‌ ఐకేపీ సంఘం ఆధ్వర్యంలో నిర్వహిస్తున్నారు. అయితే కేంద్రం ప్రారంభించిన నాటి నుంచి ఐకేపీ అధికారులు కన్నెత్తి కూడా చూడలేదని రైతులు చెబుతున్నారు. గ్రామ సంఘం నాయకులు లారీలు లేవు, అధికారులు ఏం చెప్పలేదని సాకులు చెబుతూ కాలం వెల్లదీస్తున్నారు. దీంతో కేంద్రంలో 500 బస్తాల ధాన్యం పేరుకుపోయింది.

12 రోజులైనా తూకాలు వేయని ఐకేపీ

కాశీంపూర్‌ కొనుగోలు కేంద్రంలో ధాన్యం రాశులు

చలిలో సెంటర్ల వద్ద రైతుల పడిగాపులు

పట్టించుకోని అధికారులు

లేబర్‌ లేక ఇబ్బంది

ధాన్యం తూకాలు వేసిన వెంటనే మిల్లులకు రవాణా చేయడానికి ఇంకా లారీలు రాలేవు. పనిచేసే లేబర్‌ కూడా లేరు. రైతులు నాలుగైదు రోజుల నుంచే ధాన్యం తీసుకువస్తున్నారు. రెండు రోజుల్లో తూకాలు ప్రారంభిస్తాం. రైతులకు ఇబ్బంది రానివ్వకుండా కృషి చేస్తాం.

– పద్మరావు, ఏపీఎం, బషీరాబాద్‌

అమ్ముకోవడం కష్టమైంది

ఐదు రోజుల కిందట 140 బస్తాల ధాన్యం అమ్మడానికి తీసుకు వచ్చాను. తూకాలు వేయాలని అధికారులకు అడిగితే రేపు మాపు అంటున్నారు. చాలా మంది రైతులం రాత్రికి చలిలో ధాన్యం దగ్గర పడుకుంటున్నాం. పంట పండించడం కంటే అమ్ముకోవడం కష్టమైంది. – ఈరప్ప, రైతు, మంతట్టి

ప్రారంభించి.. పాతరేసి!

ప్రారంభించి.. పాతరేసి!