RRR Movie Tickets Prices: ఆర్‌ఆర్‌ఆర్‌ టికెట్ల ధరలు పెంపు

Telangana Govt Permission For RRR Ticket Price Hike - Sakshi

మల్టీప్లెక్స్‌లకు రూ.100, ఏసీ థియేటర్లకు రూ. 50

10 రోజులపాటు పెంచుకొనేందుకు రాష్ట్ర ప్రభుత్వం అనుమతి

ఐదో షో ప్రదర్శనకూ ఓకే.. ఉత్తర్వులు జారీ చేసిన హోంశాఖ  

సాక్షి, హైదరాబాద్‌: రాష్ట్రంలో ఆర్‌ఆర్‌ఆర్‌ సినిమా టికెట్ల ధరలు పెంచుకొనేందుకు అనుమతిస్తూ హోంశాఖ శనివారం ఉత్తర్వులు జారీ చేసింది. ఆర్‌ఆర్‌ఆర్‌ సినీ నిర్మాణ సంస్థ డీవీవీ ఎంటర్‌టైన్‌మెంట్స్‌ ఈ నెల 18న ప్రభుత్వానికి టికెట్ల ధరల పెంపుతోపాటు ఐదో షో నిర్వహణకు అనుమతివ్వాలని దరఖాస్తు చేసుకుంది. దీనిపై సానుకూలంగా స్పందించిన హోంశాఖ... ఏసీ థియేటర్లలో ఈ నెల 25 నుంచి 27 వరకు అంటే 3 రోజులపాటు టికెట్‌పై రూ. 50 పెంచుకొనేందుకు అవకాశం కల్పించింది. అలాగే 28వ తేదీ నుంచి వచ్చే నెల 3వరకు రూ.30 పెంచుకొనేలా వెసులుబాటు కల్పించింది.

రిక్లైనర్, మల్టీఫ్లెక్స్, లార్జ్‌ స్క్రీన్‌ థియేటర్లలో ఈ నెల 25 నుంచి 27 వరకు టికెట్‌పై రూ. 100 పెంచుకొనేందుకు అంగీకరించింది. ఆ తర్వాత 28 నుంచి వచ్చే నెల 3 వరకు టికెట్‌పై రూ. 50 పెంచుకునేలా అవకాశం కల్పించినట్టు హోంశాఖ ఇన్‌చార్జి, ప్రభుత్వ ప్రత్యేక ప్రధాన కార్యదర్శి సునీల్‌శర్మ ఉత్తర్వుల్లో పేర్కొన్నారు. ఈ నెల 25 నుంచి వచ్చే నెల 3వ తేదీ వరకు రోజుకు ఐదు షోలు ప్రదర్శించేందుకు సైతం అనుమతిచ్చినట్లు ఆయన ఆదేశాల్లో పేర్కొన్నారు. ఈ మేరకు జిల్లా కలెక్టర్లు, సంబంధిత అధికారులు చర్యలు తీసుకోవాలని సూచించారు.

Read latest Telangana News and Telugu News | Follow us on FaceBook, Twitter, Telegram



 

Read also in:
Back to Top