ఆలయాల అభివృద్ధికి ప్రభుత్వం పెద్దపీట

ఆలయాల అభివృద్ధికి ప్రభుత్వం పెద్దపీట

మంగపేట: రాష్ట్రంలోని దేవాలయాల అభివృద్ధికి సీఎం రేవంత్‌రెడ్డి ప్రభుత్వం నిధులు కేటాయిస్తుందని అర్చక ఉద్యోగ జేఏసీ చైర్మన్‌ గంగు ఉపేంద్రశర్మ అన్నారు. జిల్లా పర్యటనలో భాగంగా శుక్రవారం హేమాచల లక్ష్మీనర్సింహస్వామి ఆలయాన్ని దర్శించుకుని ప్రత్యేక పూజలు నిర్వహించారు. అలాగే అర్చక ఉద్యోగ జేఏసీ ఆధ్వర్యంలో రూపొందించిన 2025 (ఉగాది నుంచి ఉగాది) సంవత్సర డైరీని ఆవిష్కరించారు. అనంతరం ఆయన మాట్లాడుతూ రాష్ట్రం ఆధ్యాత్మిక కేంద్రంగా విరాజిల్లాలని ఆలయాలు పచ్చదనం పరిశుభ్రతతో ఉండాలనే ఆకాంక్షతో మంత్రులు కొండా సురేఖ, సీతక్క పనిచేస్తున్నారన్నారు. దేవాలయాల్లో పనిచేస్తున్న అర్చక ఉద్యోగుల సమస్యలపై త్వరలో సదస్సు నిర్వహించేందుకు సీఎం రేవంత్‌రెడ్డి అంగీకరించారని, ఆ సదస్సులో అర్చక ఉద్యోగుల దూపదీప నైవేద్యం, అర్చకుల సమస్యలు పరిష్కారం కాబోతున్నాయన్నారు. ముక్తేశ్వర స్వామి సన్నిధిలో మే 15 నుంచి 26వ తేదీ వరకు జరిగే త్రివేణి సంఘమములోని అంతర్వాహిని సరస్వతి నది పుష్కరాలను ప్రయాగ్‌రాజ్‌లో నిర్వహించిన తరహాలో వైభవంగా నిర్వహించేందుకు ప్రభుత్వం, దేవాదాయశాఖ కమిషనర్‌ శ్రీధర్‌ ప్రత్యేక చొరవతో కోట్లాది మంది హిందువులు పుణ్య స్నానాలు చేయాలనే సంకల్పంతో ఏర్పాట్లు చేస్తున్నారన్నారు. భక్తులు తరలివచ్చి పవిత్రమైన పుణ్య స్నానాలు చేయాలని కోరారు. ఈ కార్యక్రమంలో ఉమ్మడి వరంగల్‌ జిల్లా అర్చక జేఏసీ గౌరవ అధ్యక్షుడు ముక్కామల రాజశేఖర్‌ శర్మ, ఆలయ అర్చకులు కారంపుడి పవన్‌కుమార్‌, ఈశ్వర్‌చంద్‌, సిబ్బంది సుధీర్‌, అజయ్‌ పాల్గొన్నారు.

వెంకటాపురం(ఎం): రామప్ప దేవాలయంలో అర్చక ఉద్యోగ జేఏసీ చైర్మన్‌ గంగు ఉపేంద్రశర్మ, రామప్ప అర్చకులు కోమళ్లపల్లి హరీష్‌శర్మ, మోహనపు ఉమాశంకర్‌లతో కలిసి ఉగాది టు ఉగాది డైరీని ఆవిష్కరించారు. అర్చకుల సమస్యల పరిష్కారానికి సీఎం రేవంత్‌రెడ్డి సానుకూలంగా ఉన్నారని తెలిపారు.

అర్చక ఉద్యోగ జేఏసీ చైర్మన్‌

గంగు ఉపేంద్రశర్మ