PODCAST
ఫస్ట్‌ టైమ్‌ ఎక్కువగా డ్యాన్స్‌ చేశా!
– నివేదా పేతురాజ్‌
‘‘ఒక హీరో నిర్మాతగా చేయడం వేరు. కానీ, హీరోగా నటిస్తూనే దర్శకత్వం చేయడం గ్రేట్‌. ‘దాస్‌ కా ధమ్కీ’కి హీరో, నిర్మాత, డైరెక్టర్‌.. ఇలా మూడు బాధ్యతలని విశ్వక్‌ చక్కగా నిర్వర్తించారు. నేను పని చేసిన దర్శకుల్లో త్రివిక్రమ్‌ శ్రీనివాస్‌గారి తర్వాత అంత ఎనర్జీ ఉన్న దర్శకుడిని విశ్వక్‌లో చూశాను’’ అని హీరోయిన్‌ నివేదా పేతురాజ్‌ అన్నారు. విశ్వక్‌ సేన్‌ హీరోగా నటించి, దర్శకత్వం వహించడంతో పాటు నిర్మించిన చిత్రం ‘దాస్‌ కా ధమ్కీ’. ఈ సినిమా రేపు (బుధవారం) విడుదలవుతోంది. ఈ సందర్భంగా నివేదా పేతురాజ్‌ మాట్లాడుతూ– ‘‘విశ్వక్‌తో ‘పాగల్‌’ మూవీ చేశాను. ఆ తర్వాత ‘దాస్‌ కా ధమ్కీ’ కథ యూనిక్‌గా అనిపించడంతో ఓకే చెప్పాను. మాస్‌ కమర్షియల్‌ ఎంటర్‌టైనర్‌ చిత్రమిది.
నా కెరీర్‌లో తొలిసారి ఈ చిత్రంలో గ్లామరస్‌ రోల్‌తో పాటు ఎక్కువగా డ్యాన్స్‌ చేశాను. విశ్వక్‌లో అద్భుతమైన ఐడియాలు ఉన్నాయి. అయితే తానే నటుడిగా నటిస్తూ డైరెక్షన్‌ చేయడం కాకుండా వేరే హీరోలని డైరెక్ట్‌ చేస్తే బావుంటుందని నా అభిప్రాయం. తన కెరీర్‌లో ‘దాస్‌ కా ధమ్కీ’ ఒక మైలురాయిగా నిలుస్తుంది. నేను కేవలం సినిమాలపైనే ఆధారపడటం లేదు. చెన్నైలో రెస్టారెంట్, ఫ్లవర్‌ షాప్‌ వ్యాపారాలు చేస్తున్నాను. దర్శకత్వం చేయాలని ఉంది కానీ, అందుకు ఇంకా టైమ్‌ పడుతుంది. నిర్మాతల కష్టాలు కళ్లారా చూసిన నాకు సినిమా నిర్మించే ఆలోచన లేదు. ప్రస్తుతం సుస్మితగారు నిర్మిస్తున్న ఓ సినిమా, హిందీలో టీ సిరీస్‌ వారి సినిమా చేస్తున్నాను’’ అన్నారు.
