దారుణం: ప్రేమ పేరుతో మృగ చేష్టలు

ప్రతీకాత్మక చిత్రం

శ్రీకాకుళం రూరల్‌: శ్రీకాకుళం మండల పరిధిలోని గూడేం గ్రామానికి చెందిన ఓ యువతిపై అదే గ్రామానికి చెందిన నలుగురు లైంగికదాడికి పాల్పడిన ఘటన ఆలస్యంగా సోమవారం వెలుగు చూసింది. విశ్వస నీయ సమాచారం ప్రకారం.. ఈ యువతి గూడేం గ్రామానికే చెందిన ఓ యువకుడితో ప్రేమలో ఉంది. కొద్ది రోజుల కిందట ఆమె బంధువుల ఇంటికి వెళ్లేందుకు బయల్దేరుతూ.. ఆ సంగతిని తన ప్రేమికుడికి చెప్పింది.

తాను డ్రాప్‌ చేస్తానని చెప్పిన యువకుడు తన స్నేహితులు ముగ్గురితో కలిసి వెళ్లాడు. యువతిని పికప్‌ చేసుకుని కొంత దూరం వెళ్లాక నలుగురూ కలిసి ఆమెను బలవంతంగా పొదల్లోకి లాక్కెళ్లి లైంగిక దాడికి పాల్పడ్డారు. ఈ నలుగురిలో ఒక మైనర్‌ ఉన్నట్లు తెలిసింది. ప్రస్తుతం బాధితురాలు రిమ్స్‌లో చికిత్స పొందుతోంది. ఆస్పత్రిలో ఎంఎల్‌సీ(మెడికో లీగల్‌ కేసు) నమోదు కావడంతో రూరల్‌ పోలీసులు రేప్‌ అండ్‌ కిడ్నాప్‌ కింద కేసు నమోదు చేసినట్లు సమాచారం. నిందితులను కూడా అదుపులోకి తీసుకున్నట్లు భోగట్టా.