డాలర్లలో పెట్టుబడి.. కొత్త మ్యూచువల్‌ ఫండ్‌

ఇంటర్నేషనల్‌ ఫైనాన్షియల్‌ సర్వీసెస్‌ సెంటర్స్‌ అథారిటీ (ఐఎఫ్‌ఎస్‌సీఏ) నియంత్రణలో ఉండే మార్సెలస్‌ ఇన్వెస్ట్‌మెంట్‌ మేనేజర్స్‌–గిఫ్ట్‌ ఐఎఫ్‌ఎస్‌సీ తాజాగా గ్లోబల్‌ ఈక్విటీస్‌ ఫండ్‌ని ఆవిష్కరించింది. భారతీయ ఇన్వెస్టర్లు.. గ్లోబల్‌ వ్యాపారాల్లో పెట్టుబడులు పెట్టేందుకు ఇది ఉపయోగపడుతుంది. ఈ న్యూ ఫండ్‌ ఆఫర్‌ జూన్‌ 8న ప్రారంభమై జూన్‌ 19న ముగుస్తుంది.

కనీసం 5,000 డాలర్లు పెట్టుబడి పెట్టాల్సి ఉంటుంది. ఈ ఫండ్‌ ప్రధానంగా డిఫెన్స్‌–ఏరోస్పేస్, విద్యుదుత్పత్తి, లగ్జరీ కన్జంప్షన్‌ తదితర ట్రెండ్స్‌కి అనుగుణంగా ఉన్న సంస్థల్లో ఇన్వెస్ట్‌ చేస్తుంది. పెట్టుబడులను విదేశీ కరెన్సీలో రిడీమ్‌ చేసుకోవచ్చు. పాన్, ఆధార్‌ వివరాలతో ఇన్వెస్ట్‌ చేయొచ్చు. గిఫ్ట్‌ సిటీలో విడిగా బ్యాంకు ఖాతా అవసరం లేదు.