రోడ్డు మీద నోట్లను వెదజల్లి వృద్ధుడికి టోకరా

రోడ్డు మీద నోట్లను వెదజల్లి వృద్ధుడికి టోకరా చెరుకుపల్లి: బ్యాంకు నుంచి నగదు డ్రా చేసి తీసుకు వెళుతున్న వ్యక్తి నుంచి ఆగంతకులు దొంగిలించిన ఘటన శుక్రవారం మధ్యాహ్నం జరిగింది. తూర్పుపాలేనికి చెందిన పూషడపు నారాయణ (64) వ్యవసాయ ఖర్చుల కోసం శుక్రవారం ఉదయం గుళ్లపల్లిలోని యూనియన్‌ బ్యాంక్‌ నుంచి రూ.1,64,00 డ్రా చేసుకుని బ్యాగ్‌లో పెట్టుకుని ద్విచక్ర వాహనంపై నగరం వైపు వెళుతున్నారు. బ్యాంక్‌లో నగదు డ్రా చేసిన దగ్గర నుంచి ఆయన్ను ఇద్దరు ఆగంతకులు వాహనంపై అనుసరిస్తున్నారు. కొంత దూరం వెళ్లిన తర్వాత చిల్లర నోట్లను రోడ్డు పక్కన పడేసి, పెద్దాయనా..డబ్బులు పడిపోయాయంటూ నారాయణకు చూపించారు. ఆయన వాహనాన్ని ఆపి నోట్లను ఏరుకుంటుండగా నగదు ఉంచిన బ్యాగ్‌ను ఎత్తుకు పోయారు. నారాయణ కేకలు వేస్తుండగానే అతి వేగంగా వాహనంపై నగరం వైపునకు పారిపోయారు. ఆయన వెంటనే స్థానిక స్టేషన్‌కు వెళ్లి చోరీని పోలీసులకు ఫిర్యాదు చేశారు. ఎస్‌ఐ అ.అనిల్‌కుమార్‌ చుట్టుపక్కల పోలీసు స్టేషన్‌లకు సమాచారం అందించి అన్ని కోణాల్లో విచారణ చేపట్టారు. బేస్‌బాల్‌ పోటీలకు విద్యార్థులు ఎంపిక కర్లపాలెం: ఉమ్మడి గుంటూరు జిల్లా బేస్‌బాల్‌ జట్టుకు తమ పాఠశాల విద్యార్థులు ఎంపికయ్యారని స్థానిక హైవెండ్‌ హైస్కూల్‌ ఎండీ సాయిమహేంద్రబాబు, డైరెక్టర్‌ చాందిని తెలిపారు. శుక్రవారం హైస్కూల్‌లో క్రీడాకారులకు అభినందన సభ నిర్వహించారు. ఈ సందర్భంగా వారు మాట్లాడుతూ 69వ స్కూల్‌ గేమ్స్‌ ఫెడరేషన్‌ ఆధ్వర్యంలో పల్నాడు జిల్లా కొర్రపాడు జిల్లా పరిషత్‌ ఉన్నత పాఠశాలలో ఇటీవల బేస్‌బాల్‌ పోటీలు జరిగాయని తెలిపారు. అండర్‌–14 విభాగంలో ఆట్ల ధనుష్‌రెడ్డి, అండర్‌–17 విభాగంలో పుట్టా సాయిహర్షవర్ధన్‌రెడ్డి ప్రతిభ కనబరిచి జిల్లా జట్టుకు ఎంపికయ్యారని తెలిపారు. నవంబర్‌ 29 నుంచి డిసెంబర్‌ 1వ తేదీ వరకు చిత్తూరు జిల్లా పలమనేరులో జరిగే రాష్ట్రస్థాయిలో జరిగే పోటీల్లో జిల్లా జట్టుకు ఆడతారని తెలిపారు. ఈ సందర్భంగా విద్యార్థులను ఉపాధ్యాయులు అభినందించారు. కదులుతున్న బస్సులో నుంచి దూకిన వృద్ధురాలు చెరుకుపల్లి: భర్త ఎక్కపోవడంతో ఆయన కోసం కదుతున్న బస్సులోంచి దూకటంతో వృద్ధురాలికి తీవ్ర గాయాలైన ఘటన మండల కేంద్రంలోని సాయిబాబా ఆలయం ముందు శుక్రవారం మధ్యాహ్నం జరిగింది. స్థానికుల కథనం ప్రకారం.. అమృతలూరు మండలం గోవాడ గ్రామానికి చెందిన దావూలూరి నరసమ్మ భర్తతో కలసి చెరుకుపల్లి వచ్చింది. తిరిగి గోవాడ వెళ్లేందుకు తెనాలి బస్సు ఎక్కింది. ఇంతలో బస్సు కదిలింది. భర్త ఎక్కకపోవడంతో ఆపండీ..ఆపండీ ! అంటూ అరిచింది. డ్రైవర్‌ ఆపకపోవడంతో నరసమ్మ బస్సులో నుంచి దూకింది. ఈ క్రమంలో ఆమె ఎడమ కాలు వెనుక టైరు కింద పడి నుజ్జునుజ్జు అయింది. 108 వాహనంలో తెనాలి ప్రభుత్వ వైద్యశాలకు తరలించారు.