రెవెన్యూ సేవలు సత్వరం అందించండి

రెవెన్యూ సేవలు సత్వరం అందించండి

చీరాల టౌన్‌: రెవెన్యూ సమస్యల పరిష్కారంలో అశ్రద్ధ వద్దని.. వచ్చిన ప్రతి అర్జీని నిశితంగా విచారణ చేయించాలని చీరాల ఆర్డీవో తూమాటి చంద్రశేఖర నాయుడు సూచించారు. శుక్రవారం చీరాల ఆర్డీవో కార్యాలయంలో చీరాల రెవెన్యూ డివిజన్‌ పరిధిలోని తహసీల్దార్లు, మండల సర్వేయర్లు, రీ సర్వే డీటీలతో సమీక్ష సమావేశాన్ని నిర్వహించారు. డివిజన్‌ పరిధిలోని మండలాల వారీగా పెండింగ్‌లో ఉన్న రెవెన్యూ సమస్యలు, రీ సర్వే, పీజీఆర్‌ఎస్‌ అర్జీలు, ప్రజా ప్రతినిధుల నుంచి వచ్చిన అర్జీలు, ల్యాండ్‌ కన్వర్షన్‌, నీటి తీరువా వసూళ్లపై మాట్లాడి పలు సూచనలు చేశారు. ఈ సందర్బంగా ఆర్డీఓ మాట్లాడుతూ మండలాల వారీగా అర్హత ఉండి నివేశన స్థలాలు రాని వారి వివరాల నివేదికలు అందించడంతో పాటు కావాల్సిన భూమి వివరాలు అందించాలన్నారు. మండలాల్లో నీటి తీరువా వసూళ్లకు ప్రత్యేక డ్రైవ్‌ ఏర్పాటు చేసి రైతుల నుంచి విధిగా నీటి తీరువా వసూళ్లు చేయాలన్నారు. రీ సర్వే పకడ్బందీగా చేసి రికార్డుల ప్రకారమే వివరాలను ఆన్‌లైన్‌ చేయాలన్నారు. రెవెన్యూ సమస్యలను సత్వరంగా పరిష్కరించాలని సూచించారు. అర్జీదారులకు నిర్ణీత సమయంలోగా అర్జీలు విచారించి పరిష్కారం చూపాలన్నారు. అర్జీదారులను కార్యాలయాల చుట్ట తిప్పుకోవద్దని ప్రజలకు సత్వరంగా సేవలందిస్తే మంచి అధికారులుగా గుర్తింపు వస్తుందన్నారు. ప్రజలకు జవాబుదారీతనంగా రెవెన్యూ ఉద్యోగులు పనిచేయాలని, విధుల్లో అలసత్వం వహించిన వారిపై శాఖా పరమైన చర్యలు తప్పవన్నారు. గ్రామాల వారీగా పెండింగ్‌లో ఉన్న పట్టాదారు పాస్‌ పుస్తకాలను త్వరగా అందించడంతో పాటు గ్రామాల్లో ఎక్కడా కూడా అనధికార లే అవుట్లు వేయకుండా కట్టడి చేయాలన్నారు. ఓటీసీలను త్వరగా మంజూరు చేయాలన్నారు. సమావేశంలో డివిజనల్‌ సర్వే ఇన్‌స్పెక్టర్‌ ముసలయ్య, తహసీల్దార్లు గోపికృష్ణ, ప్రభాకరరావు, నాగరాజు, రీసర్వే డీటీలు, మండలాల సర్వేయర్లు బసవాచారి, శ్రీను. లోకేష్‌, ఇతర రెవెన్యూ అధికారులు, సిబ్బంది పాల్గొన్నారు.

చీరాల ఆర్డీవో తూమాటి

చంద్రశేఖర నాయుడు