మనమే ప్రతిపక్షం.. నాణేనికి రెండోవైపు చూపిద్దాం: వైఎస్‌ జగన్‌

సాక్షి, తాడేపల్లి: ప్రజా సమస్యలపై మరింత గట్టిగా పోరాడాలని పార్టీ ప్రజా ప్రతినిధులకు వైఎస్సార్‌సీపీ అధినేత వైఎస్‌ జగన్‌ సూచించారు. మండలి సమావేశాలకు సభ్యులంతా పూర్తి సన్నద్ధం కావాలన్నారు. వైఎస్సార్‌సీపీని ప్రధాన ప్రతిపక్షంగా గుర్తించడానికి ప్రభుత్వం ముందుకు రావడం లేదని తెలిపారు. అలాగే, ఏపీలో డీఎస్సీ అక్రమాలపై కచ్చితంగా సీబీఐ దర్యాప్తు జరగాలి. విద్యాశాఖ మంత్రి లోకేష్‌ బాధ్యత వహించి రాజీనామా చేయాలని వైఎస్‌ జగన్‌ డిమాండ్‌ చేశారు.

తాడేపల్లిలోని పార్టీ కేంద్ర కార్యాలయంలో పార్టీ శాసనసభ్యులు, శాసన మండలి సభ్యులతో వైఎస్‌ జగన్‌ సమావేశమయ్యారు. ఈ సందర్భంగా రాష్ట్రంలోని తాజా రాజకీయ పరిణామాలు, ప్రజా సమస్యలు, పార్టీ చేపట్టాల్సిన తదుపరి కార్యక్రమాలు తదితర కీల­క అంశాలపై వైఎస్‌ జగన్‌.. సభ్యులకు దిశానిర్దేశం చేశారు. ఈ క్రమంలో వైఎస్‌ జగన్‌ మాట్లాడుతూ..‘వైఎస్సార్‌సీపీని ప్రధాన ప్రతిపక్షంగా గుర్తిస్తే సభలో మాట్లాడేందుకు తగిన సమయం ఇవ్వాల్సి వస్తుంది. ప్రధాన ప్రతిపక్ష నాయకుడికి సభలో మాట్లాడే సమయం హక్కుగా వస్తుంది. ఆ హక్కు ఇవ్వడం చంద్రబాబుకు ఇష్టం లేకనే ప్రధాన ప్రతిపక్ష హోదా ఇవ్వడం లేదు. అందువల్ల అసెంబ్లీలో మనం చేయగలిగింది లేదు. అసెంబ్లీలో ప్రభుత్వం ప్రస్తావించే అంశాలకు ఆధారాలు, సాక్ష్యాలతో నేను ప్రెస్‌మీట్లు పెడతాను. ప్రతి అంశంలోనూ ప్రజలకు నాణేనికి రెండోవైపు చూపిస్తాం. కానీ, మండలిలో మనకు బలం ఉంది.. ప్రజల తరఫున అక్కడ గట్టిగా పోరాడాలి.

డీఎస్సీపై.. 
డీఎస్సీ లీకేజీలు, అక్రమాలపై 74 రోజులుగా దాదాపు 10 రకాల కార్యక్రమాలు చేశాం. డీఎస్సీ అక్రమాలకు బాధ్యత వహిస్తూ విద్యాశాఖ మంత్రి లోకేష్‌ రాజీనామా చేయాలి. డీఎస్సీకి సంబంధించిన ఆధారాలు, సాక్ష్యాలన్నింటినీ ఇప్పటికే ప్రజల ముందు పెట్టాం. డీఎస్సీలో పనిచేస్తున్న అవుట్‌సోర్సింగ్‌ ఉద్యోగికే ఫస్ట్‌ ర్యాంకు రావడం చూశాం. మెరిట్‌ లిస్టులు మారిన వ్యవహారాలు కూడా బయటపడ్డాయి. డీఎస్సీ లీకేజీ ఎంత దూరం వెళ్లిందో పూర్తిగా తేలాల్సిందే. సీబీఐ విచారణకు ఈ ప్రభుత్వం ముందుకు రావడం లేదు. వీళ్లుంటే నిజాలు బయటకు వస్తాయా?. డీఎస్సీ అక్రమాలపై కచ్చితంగా సీబీఐ దర్యాప్తు జరగాలి. స్పోర్ట్స్‌ కోటా పేరుతో జీవోలు జారీ చేసి అక్రమాలకు తెరతీశారు. పోటీ పరీక్ష లేకుండా, డీఎస్సీ పరీక్ష రాయకుండానే ఉద్యోగాలు ఇచ్చిన పరిస్థితి వచ్చింది. ఆ తర్వాత మళ్లీ జీవోలు మార్చారు.. అంటే ముందు చేసినది తప్పని ఒప్పుకున్నట్టే కదా?. ఇన్ని అక్రమాలు, ఆధారాలు కనిపిస్తున్నప్పుడు విద్యాశాఖ మంత్రి రాజీనామా చేయాల్సిందే. విద్యాశాఖ మంత్రి చంద్రబాబు కొడుకే అయినప్పుడు రాష్ట్ర ప్రభుత్వ విచారణలో నిష్పాక్షికత ఎక్కడ ఉంటుంది?. సీబీఐ విచారణ ద్వారానే అసలు నిజాలు బయటకు వస్తాయి.

ఫీజు రియింబర్స్‌మెంట్‌, వసతి దీవెన
13 త్రైమాసికాలుగా ఫీజు రియింబర్స్‌మెంట్‌ పెండింగ్‌లో ఉంది. ఒక్కో త్రైమాసికానికి సుమారు రూ.700 కోట్ల చొప్పున రూ.9,100 కోట్లు పెండింగ్‌. వసతి దీవెన కింద మరో రూ.3,300 కోట్లు పెండింగ్‌. ఫీజు రియింబర్స్‌మెంట్‌, వసతి దీవెన కలిపి రూ.12,400 కోట్ల మేర చెల్లించాల్సి ఉంది. ప్రభుత్వం ఇచ్చింది రూ.2,900 కోట్లే.. ఇంకా రూ.9 వేల కోట్లకు పైగా బకాయిలు ఉన్నాయి. బీసీల తలరాతలు మార్చే ఫీజు రియింబర్స్‌మెంట్‌ పథకాన్నే నిర్వీర్యం చేస్తున్నారు. ఈ బకాయిలపై మండలిలో ప్రభుత్వాన్ని గట్టిగా నిలదీయాలి. చర్చ కోసం పట్టుబట్టాలి.. విద్యార్థుల తరఫున గట్టిగా పోరాడాలి.

రైతుల సమస్యలు..
రాష్ట్రంలో రైతుల సమస్యలు తీవ్రంగా ఉన్నాయి.. ఏ పంటకూ గిట్టుబాటు ధర రావడం లేదు. పంటలు వేసుకోమని చెప్పి 40 శాతం పెట్టుబడి పెట్టిన తర్వాత నీళ్లు ఇవ్వలేమంటున్నారు. రైతులకు అండగా ఉన్న ఉచిత పంటల బీమాను కూడా ఎత్తివేశారు. రైతులు తీవ్ర సంక్షోభంలో ఉన్నారు.. వారి సమస్యలపై మండలిలో గట్టిగా పోరాడాలి. రైతులకు ఇన్‌పుట్‌ సబ్సిడీ ఇచ్చే విధానానికీ మంగళం పాడేశారు.

పీపీపీ పాలసీపై..
కొత్త పీపీపీ పాలసీ చూస్తే ‘ఆంధ్రప్రదేశ్‌ ఫర్‌ సేల్‌’ అన్నట్టుగా ఉంది. పీపీపీ ప్రాజెక్టులకు ప్రభుత్వమే Viability Gap Funding ఇస్తుందంటున్నారు. ప్రైవేటు సంస్థ తీసుకునే రుణాలకు వడ్డీ కూడా ప్రభుత్వమే చెల్లిస్తుందంటున్నారు. రాయితీలు కూడా ప్రభుత్వం ఇవ్వాలి.. ఆ తర్వాత ప్రజల నుంచి యూజర్‌ ఛార్జీలు వసూలు చేసుకోవచ్చంటున్నారు. ప్రైవేటుకు అన్ని రాయితీలు ఇచ్చి చివరకు ప్రజలపైనే ‘బాదుడే బాదుడు’. తాగునీరు, స్కూళ్లు, ఆస్పత్రులు సహా ప్రజా సేవలను PPP పరిధిలోకి తెస్తామంటున్నారు. అన్నీ ప్రైవేటుకే అప్పగిస్తే ఇక ప్రభుత్వం ఉండేది ఎందుకు?. ప్రభుత్వం ఉండేది కేవలం స్కాంలు చేసి లూటీ చేయడానికా? అని ప్రశ్నించారు.

దిశ, నిరసనలు-కేసులు..
డీఎస్సీ, రైతుల సమస్యలు, PPP, దిశ చట్టం రద్దు, బీసీ నాయకులపై కేసులు కీలక అంశాలు. గాంధీ పుట్టిన దేశంలో శాంతియుత నిరసనలు చేసినా కేసులు పెడుతున్నారు. రాష్ట్రవ్యాప్తంగా మనం శాంతియుతంగా నిరసనలు చేసినా కేసులతో అణచివేస్తున్నారు. శాంతియుతంగా నిరసన తెలిపే స్వాతంత్ర్యం కూడా లేకుండా చేస్తున్నారు. ఈ అణచివేతపై కచ్చితంగా కోర్టులను ఆశ్రయిస్తాం. ప్రభుత్వాన్ని ప్రశ్నిస్తున్నామనే కక్షతో అన్యాయమైన కేసులు పెడుతున్నారు.

బీసీ నాయకులపై కేసులు..
జరగని ఘటనను జరిగినట్టుగా వక్రీకరించి చింతాడ రవిపై అక్రమ కేసులు పెట్టి అరెస్టు చేశారు. కేసుల కోసం దొంగ సాక్ష్యాలు సృష్టిస్తున్నారు. ముస్తఫాపై తప్పుడు కేసు పెట్టారు. విరూపాక్షిపైనా అక్రమ కేసులు పెట్టారు. బీసీ నాయకులను లక్ష్యంగా చేసుకుని కక్షపూరితంగా వ్యవహరిస్తున్నారు. కారుమూరు సునీల్‌పైనా తప్పుడు కేసు పెట్టారు. ప్రశ్నించే వారందరిపైనా తప్పుడు కేసులు పెట్టి అరెస్టులు చేస్తున్నారు.

మండలికి తూమాటి మాధవరావు..
శాసనమండలిలో డిప్యూటీ ఛైర్మన్‌ పోస్టు ఖాళీగా ఉంది. డిప్యూటీ ఛైర్మన్‌ పోస్టు భర్తీ ప్రక్రియ ప్రారంభం కానుంది. డిప్యూటీ ఛైర్మన్‌గా మాధవ్‌ను ప్రతిపాదిస్తున్నాం. మాధవ్‌కు పార్టీ ఎమ్మెల్సీలంతా పూర్తి మద్దతు ఇవ్వాలి. మాధవ్‌ ఎన్నిక సాఫీగా జరిగేలా అందరూ సమన్వయంతో పనిచేయాలి. ప్రిపరేషన్‌ లేకుండా ఎవరూ మాట్లాడొద్దు. పూర్తిగా కసరత్తు చేసి మాట్లాడితేనే విషయం ప్రజలకు బలంగా చేరుతుంది. కంటెంట్‌ అనేది అత్యంత ముఖ్యమైనది. ప్రతి అంశాన్నీ ఆధారాలు, సాక్ష్యాలతో వివరించాలి. ఏ సబ్జెక్టుపై ఎవరు మాట్లాడాలో ముందుగానే నిర్ణయించి పూర్తి స్థాయిలో సిద్ధం కావాలి.

చంద్రబాబు వైట్‌పేపర్లపై.. 
చంద్రబాబు విడుదల చేస్తున్న వైట్‌పేపర్లన్నీ ‘ఎల్లో పేపర్లు’.. అబద్ధాల పత్రాలు. ఆ వైట్‌ పేపర్లలోని అబద్ధాలను ఆధారాలు, సాక్ష్యాలతో ఇప్పటికే బయటపెట్టాం. వాటికి సంబంధించిన పూర్తి వివరాలను ఎమ్మెల్యేలు, ఎమ్మెల్సీలకు అందిస్తాం. వైఎస్సార్‌సీపీ ఏది మాట్లాడినా సాక్ష్యాలు, ఆధారాలు, సోర్స్‌తో మాట్లాడుతుంది. నేనైనా, పార్టీ నాయకుడైనా మాట్లాడే ప్రతి అంశానికి సోర్స్‌ చూపిస్తాం. చంద్రబాబు మాత్రం తాను చెప్పే అంశాలకు సోర్స్‌ చెప్పడు. అబద్ధాలు చెప్పడమే ఈ ‘వెన్నుపోటు పార్టీ’ పని.

విజన్‌–2020పై
2000లో స్విస్‌ మంత్రి పాస్కల్‌ ఉమ్మడి ఆంధ్రప్రదేశ్‌కు వచ్చిన సందర్భాన్ని గుర్తుచేసిన వైఎస్‌.జగన్‌. విజన్‌-2020 పేరుతో అప్పట్లో చంద్రబాబు చెప్పినవన్నీ ‘వైట్‌ లైస్‌’ అని విమర్శించారు. చంద్రబాబు లాంటి మాటలు తమ దేశంలో చెబితే జైల్లోనో, మానసిక ఆస్పత్రిలోనో పెడతారని అప్పటి స్విస్‌ మంత్రి వ్యాఖ్యానించారు. కల్లార్పకుండా అబద్ధాలు చెప్పడంలో చంద్రబాబుకు సాటి లేరు. అదే స్థాయిలో అబద్ధాలు చెప్పేలా లోకేష్‌కు కూడా శిక్షణ ఇచ్చారు.

ఇతర ప్రజా సమస్యలు
జూనియర్‌ డాక్టర్ల సమ్మెపైనా సమావేశంలో చర్చకు వచ్చింది. రాష్ట్రంలో ఉద్యోగులు సహా ఏ వర్గమూ సంతృప్తిగా లేదు. పాత పథకాలను రద్దు చేశారు.. కొత్త పథకాలు మోసాలుగా మారాయి. మహిళలకు ఇచ్చే సున్నా వడ్డీ పథకాన్ని కూడా రద్దు చేశారు. మహిళలు, రైతులు, విద్యార్థులు, యువత.. ఏ వర్గమూ సంతోషంగా లేదు. ప్రభుత్వ స్కూళ్లు మూతపడుతున్నాయి. ప్రభుత్వ స్కూళ్లలో విద్యార్థుల సంఖ్య గణనీయంగా తగ్గుతోంది.. ఆ గణాంకాలు దిగ్భ్రాంతికరంగా ఉన్నాయి. మహిళలకు బ్యాంకుల ద్వారా అందుతున్న రుణాల సంఖ్య కూడా తగ్గుతోంది. ఎన్నికల ముందు జీవో నంబర్‌- అమలు చేస్తామని చెప్పి మేనిఫెస్టోలో పెట్టారు.. ఇప్పుడు దాని ఊసే లేదు. ఆర్టీసీని కూడా ప్రైవేటీకరించే ప్రయత్నాలు జరుగుతున్నాయి’ అని అన్నారు.