అంబర్‌పేట: నిరుద్యోగ యువతీ యువకుల కోసం ఈ నెల 31న మెగా జాబ్‌ మేళా నిర్వహించనున్నారు. పరావస్తు క్రియేటివ్‌ ఫౌండేషన్‌, రాంకీ ఫౌండేషన్‌, లయన్స్‌ క్లబ్‌ ఆఫ్‌ హైదరాబాద్‌ (గ్రీన్‌ల్యాండ్స్‌) సంయుక్తాధ్వర్యంలో జాబ్‌ మేళాను చేపట్టనున్నట్లు సంస్థ ప్రతినిధులు హరిసందీప్‌, మువ్వ రాంరెడ్డి, లక్ష్మీకుమారి బుధవారం ఒక ప్రకటనలో తెలిపారు. 10వ తరగతి, బీటెక్‌, ఎంబీఏ అర్హతగల నిరుద్యోగ యువతీ యువకులు జాబ్‌ మేళాను సద్వినియోగం చేసుకోవాలని సూచించారు. 18– 30 సంవత్సరాల వయసువారు అర్హులన్నారు. ప్రత్యేకించి ఈ జాబ్‌మేళాలో ప్రైవేటు ఉపాధ్యాయుల ఎంపిక ఉంటుందని, అర్హతను బట్టి వేతనం రూ.17 వేల నుంచి రూ.60 వేల వరకు ఉంటుందన్నారు. ఆసక్తి గలవారు రాణీగంజ్‌ గుజరాతీ హైస్కూల్‌లో శుక్రవారం ఉదయం 10 నుంచి సాయంత్రం 5 గంటల వరకు జరిగే జాబ్‌మేళాకు హాజరు కావాలన్నారు. మరిన్ని వివరాలకు పరావస్తు క్రియేటివ్‌ ఫౌండేషన్‌ వెబ్‌సైట్‌, ఫేస్‌బుక్‌, యూట్యూబ్‌లలో సంప్రదించాలన్నారు. 95424 33427కు ఫోన్‌ చేసి వివరాలు తెలుసుకోవచ్చని సూచించారు.

మంత్రి దామోదర రాజ నర్సింహ బంజారాహిల్స్‌: నగరంలో బిల్డర్లు ఎదుర్కొంటున్న సమస్యలను కచ్చితంగా పరిష్కరిస్తామని రాష్ట్ర మంత్రి దామోదర రాజనర్సింహ అన్నారు. వెస్ట్‌జోన్‌ బిల్డర్స్‌ అసోసియేషన్‌ ఎనిమిదో వార్షిక వేడుకలు జూబ్లీహిల్స్‌లోని జూబ్లీహిల్స్‌ కన్వెన్షన్‌ హాల్‌ లో బుధవారం ఘనంగా జరిగాయి. కార్యక్రమానికి హాజరైన మంత్రి మాట్లాడుతూ.. ఇది ప్రజల ప్రభుత్వమని.. ఒంటెత్తు నిర్ణయాలు తీసుకోకుండా.. ప్రజాపాలనను అందిస్తామన్నారు. త్వరలోనే సీఎం రేవంత్‌ రెడ్డి నగరంలోని బిల్డర్లతో ప్రత్యేక సమావేశం నిర్వహించి వారి సమస్యలను పరిష్కరిస్తారని పేర్కొన్నారు. ప్రభుత్వ సలహాదారు వేం నరేందర్‌ రెడ్డి మాట్లాడుతూ.. బిల్డర్లు ఎదుర్కొంటున్న నాలాకు సంబంధించిన సమస్యను త్వరలోనే పరిష్కరిస్తామన్నారు. నగరానికి వెస్ట్‌ జోన్‌ అనేది ఎంతో ముఖ్యమైనదని ఇక్కడ జరిగే అభివద్ధితో వచ్చే ఆదాయంతో ప్రభుత్వం ఎన్నో సంక్షేమ పథకాలు విజయవంతంగా నిర్వహిస్తోందని చెప్పారు. ఈ సందర్భంగా బిల్డర్స్‌ సావనీర్‌ను ఆవిష్కరించారు. సమావేశంలో శేరిలింగంపల్లి ఎమ్మెల్యే గాంధీ, సినీ నటుడు మురళీమోహన్‌, వెస్ట్‌ జోన్‌ నారేడ్కో ప్రెసిడెంట్‌ లక్ష్మీనారాయణ, వెస్ట్‌ జోన్‌ బిల్డర్స్‌ అసోసియేషన్‌ చైర్మన్‌ ఎం.ప్రేమ కుమార్‌, ప్రధాన కార్యదర్శి కేవీ ప్రసాద్‌ రావు, కోశాధికారి సుభాష్‌ తదితరులు పాల్గొన్నారు.

సాక్షి, సిటీబ్యూరో: వ్యాధుల నుంచి రక్షణ పొందేందుకు చిన్నారులతో పాటు పెద్ద వాళ్లు కూడా టీకాలు తీసుకోవాల్సిన అవసరం ఉందని వైద్య నిపుణులు సూచించారు. మాదాపూర్‌లో ఉన్న యశోద హాస్పిటల్స్‌ వయోజనుల వ్యాక్సిన్ల తయారీకి పేరొందిన ఫైజర్‌ ఇండియాతో కలిసి ప్రత్యేక సెంటర్‌ ఆఫ్‌ ఎక్సలెన్స్‌ (సీఓఈ)ని బుధవారం ప్రారంభించింది. ఈ సందర్భంగా ఏర్పాటు చేసిన సమావేశంలో హాస్పిటల్స్‌ డైరెక్టర్లు డాక్టర్‌ పవన్‌ గోరుకంటి, డాక్టర్‌ లింగయ్య మాట్లాడుతూ.. టీకాలు వేయించుకోవటం బాల్యంలో మాత్రమే కాదు, జీవితాంతం తప్పనిసరి అని స్పష్టం చేశారు. దీర్ఘకాలిక వ్యాధులతో బాధపడుతున్న వారు, రోగ నిరోధక శక్తి తక్కువగా ఉన్న వారికి టీకా ప్రయోజనకరమన్నారు. ఫైజర్‌ వ్యాక్సిన్‌న్స్‌ మెడికల్‌ అఫైర్స్‌ డైరెక్టర్‌ డాక్టర్‌ సంతోష్‌ టౌర్‌ మాట్లాడుతూ.. ఇన్ఫెక్షన్స్‌ నుంచి సమాజాన్ని కాపాడడానికి, పెద్దలలో వ్యాక్సినేషన్‌ ప్రక్రియను మరింత విస్తరించేందుకు తమ భాగస్వామ్యం ఉపకరిస్తుందని ఆశాభావం వ్యక్తం చేశారు.

బంజారాహిల్స్‌: వరల్డ్‌ నో టొబాకో డేను పురస్కరించుకుని ఈ నెల 31న ఉచిత కేన్సర్‌ స్క్రీనింగ్‌ క్యాంప్‌ నిర్వహించనున్నట్లు బంజారాహిల్స్‌ బసవతారకం ఇండో అమెరికన్‌ కేన్సర్‌ హాస్పిటల్‌ అండ్‌ రీసెర్చ్‌ ఇనిస్టిట్యూట్‌ యాజమాన్యం ప్రకటించింది. శుక్రవారం ఉదయం 10 నుంచి సాయంత్రం 4 గంటల వరకు పొగాకు వినియోగించే వారి కోసం ప్రత్యేకంగా ఉచిత కేన్సర్‌ స్క్రీనింగ్‌ క్యాంపును ఏర్పాటు చేశామన్నారు. నిపుణులైన వైద్యులు ఉచితంగా ప్రాథమిక పరీక్షలు నిర్వహించి కేన్సర్‌ లక్షణాలను నిర్ధారిస్తారని ఇనిస్టిట్యూట్‌ ప్రతినిధులు తెలిపారు. అనుమానం ఉన్న వారికి 20 శాతం రాయితీతో వ్యాధి నిర్ధారణ పరీక్షలు చేస్తారన్నారు. ఈ సదుపాయాన్ని పొగాకు వినియోగించే వారు సద్వినియోగం చేసుకోవాలని సూచించారు. వివరాలకు 040– 2355 1235, ఎక్స్‌టెన్షన్‌ 2335, 2354, 2216లలో సంప్రదించవచ్చు.

సాక్షి, సిటీబ్యూరో: వేసవి సెలవులు వచ్చాయంటే చాలు ఒకప్పటిలా అమ్మమ్మ వాళ్లింటికో, బంధువుల ఇంటికో కాకుండా దేశంలోని పర్యాటక ప్రదేశాలతో పాటు విదేశాలకు వెళ్లేందుకు ఆసక్తి చూపిస్తున్నారని ఎయిర్‌ బీఎన్‌బీ హాస్పిటాలిటీ సంస్థ వెల్లడించింది. ఇందులో భాగంగా గోవా, కేరళలోని బీచ్‌లతో పాటు వారణాసి, ఢిల్లీ వంటి చారిత్రాత్మక, సాంస్కృతికంగా ప్రాముఖ్యమున్న ప్రాంతాలను చుట్టేస్తున్నారని పేర్కొన్నారు. ఆహ్లాదం, ఆధ్యాత్మికం, అడ్వెంచర్లతో పాటు సైట్‌ విజిట్‌కు అధిక ప్రాధాన్యమిస్తున్నారు భారతీయులు. ఎయిర్‌ బీఎన్‌బీ సర్వేలో భాగంగా మిలాన్‌, టోక్యో, రోమ్‌, ఫ్రాంక్‌ఫర్ట్‌ వంటి అంతర్జాతీయం ప్రాంతాలను ఫేవరెట్‌ డెస్టినేషన్స్‌గా మార్చుకున్నారని వివరించారు. బాలీవుడ్‌ సినిమాలు, సోషల్‌ మీడియా ఇన్‌ఫ్లుయెన్సర్ల ప్రభావంతో ఈ ప్రాంతాలు ఎంచుకుంటున్నారు. సరికొత్త అనుభూతి, నూతన ప్రదేశాలను కనుగొనేందుకు ట్రెక్కింగ్‌ వంటి సాహసోపేతమైన ప్రయాణాలూ చేస్తున్నారని ఆగ్నేయాసియా దేశాల ఎయిర్‌ బీఎన్‌బీ జనరల్‌ మేనేజర్‌ అమన్‌ప్రీత్‌ సింగ్‌ బజాజ్‌ పేర్కొన్నారు.