Sanjay Jaju

సాక్షి, హైదరాబాద్‌: రాష్ట్రంలోని 365 మండలాల్లో కరువు పరిస్థితులు ఏర్పడ్డాయి. ప్రభుత్వం ఈ మేరకు అధికారికంగా నిర్ధారించింది. రాష్ట్రంలోని 31 జిల్లాల పరిధిలోని 365 మండలాల్లో కరువు పరిస్థితులు ఏర్పడ్డాయని ప్రకటించింది. వర్షాభావ పరిస్థితులతో 18 జిల్లాల్లోని 111 మండలాల్లో తీవ్ర కరువు పరిస్థితులుండగా, 27 జిల్లాల్లోని 254 మండలాల్లో ఓ మోస్తరు కరువు ఉందని తెలిపింది. జిల్లాల వారీగా కరువు మండలాల జాబితాను విపత్తు నిర్వహణ శాఖ పక్షాన రాష్ట్ర ప్రభుత్వ ప్రధాన కార్యదర్శి సంజయ్‌జాజు విడుదల చేశారు. మంగళవారం రాత్రి జీవో ఎంఎస్‌ నం:3 ద్వారా రాష్ట్రంలోని ఏయే జిల్లాల్లో కరువు మండలాలున్నాయి? అందులో తీవ్రంగా కరువున్న మండలాలేవి? ఓ మోస్తరు మండలాలేవి? జిల్లా కలెక్టర్లు ఏం చేయాలి? కరువుతో సంబంధమున్న పలు శాఖల తక్షణ కర్తవ్యమేంటనే వివరాలను వెల్లడించారు. ఆ జీవో ప్రకారం.. శాస్త్రీయ అంచనాలతో.. 2026 ఖరీఫ్‌ సీజన్‌కు గాను అక్టోబర్‌ 30లోగా కరువును నోటిఫై చేయాల్సి ఉంది. ఈ ఏడాది సెప్టెంబర్‌ 18న రాష్ట్ర అసెంబ్లీలో చేసిన తీర్మానం మేరకు రాష్ట్రంలోని అన్ని మండలాల్లో బహుళ ప్రాతిపదికన శాస్త్రీయ అంచనాలు నిర్వహించాం. టెలీమెట్రీ పద్ధతిలో జూన్‌1 నుంచి సెప్టెంబర్‌ 30 వరకు వచ్చిన వర్షపాతాన్ని లెక్కించాం. వ్యవసాయ సాగులో తగ్గుదల, భూమితో తేమ శాతం, భూగర్భ జలాలు, రిమోట్‌ సెన్సింగ్‌ అనే నాలుగు రకాలుగా ఈ అంచనా వేశాం. ప్రతి మండలంలోని 10 శాతం గ్రామాల్లో భూగర్భ పరిస్థితులను శాంపిల్‌ సర్వే ద్వారా నిర్ధారించిన మీదట అన్ని శాఖల అంచనాల మేరకు రూపొందించిన జాబితాను కేబినెట్‌ సబ్‌ కమిటీ ముందుంచాం. అక్టోబర్‌ 23న జరిగిన ఈ సమావేశం 31 జిల్లాల్లోని 365 మండలాలను కరువు మండలాలుగా ప్రకటించేందుకు ప్రభుత్వానికి సిఫారసు చేసింది. ఆ మేరకు వాటిని కరువు మండలాలుగా ప్రకటిస్తున్నాం. ఈ మేరకు విడుదల చేసే నోటిఫికేషన్‌ ఆరు నెలల పాటు అమల్లో ఉంటుంది. కలెక్టర్లు గెజిట్‌ నోటిఫికేషన్‌ చేయాలి ప్రస్తుత జాబితాలో లేని మండలాల్లో పరిస్థితులను ఎప్పటికప్పుడు గమనిస్తూ అవసరమైతే మలి జాబితాను కూడా విడుదల చేస్తాం. ఈ వివరాలను అన్ని జిల్లాల కలెక్టర్లు గెజిట్‌ నోటిఫికేషన్‌ చేయాలి. జిల్లా యంత్రాంగాలు వెంటనే ఇన్‌పుట్‌ సబ్సిడీ చెల్లింపు, భూగర్భజలాల పెంపుదలకు తీసుకోవాల్సిన చర్యలు, గడ్డి ఏర్పాట్లు, పశు శిబిరాలు నిర్వహించడం, వీబీజీ రాంజీ చట్టానికి అనుగుణంగా ఉపాధి కల్పన లాంటి ఉపశమన చర్యలు తీసుకోవాలి. రిజర్వు బ్యాంకు నిబంధనలకు అనుగుణంగా వ్యవసాయ రుణాల రీస్ట్రక్చర్, రుణాల రికవరీ కోసం ఒత్తిడి తేకుండా ఉండడం లాంటి చర్యలు తీసుకోవాలి. తీవ్ర కరువు పరిస్థితులు ఉన్న మండలాల్లో అవసరమైన చర్యలు తీసుకునేందుకు గాను అన్ని వివరాలను ప్రణాళిక శాఖ ఏడు రోజుల్లో కేంద్ర వ్యవసాయ, హోంశాఖలకు నివేదిక రూపంలో పంపాలి. కరువు ఉపశమన చర్యలకు సంబంధించిన అన్ని వివరాలను, లబ్ధిదారులు, ఖర్చు గణాంకాలతో సహా ప్రతి రోజూ ప్రగతి నివేదికలను వ్యవసాయ, పశు సంవర్ధక శాఖ డైరెక్టర్, పౌరసరఫరాల శాఖకు పంపాల్సి ఉంటుంది. కరువు పరిస్థితులకు సంబంధించి కేంద్ర హోం మంత్రిత్వ శాఖకు పూర్తి సవివర నివేదికను పంపిచండంతో పాటు, త్వరగా కేంద్ర బృందం రాష్ట్రంలో పర్యటించేలా విజ్ఞప్తి చేసేలా ప్రణాళిక శాఖ నివేదికను పంపించాలి. ఓ మోస్తరు కరువున్న మండలాలివే.. ఆదిలాబాద్‌లో 16, భద్రాద్రి కొత్తగూడెంలో 12, హనుమకొండలో 14, జగిత్యాలలో 3, జనగామలో 3, భూపాలపల్లిలో 5, కామారెడ్డిలో 4, కరీంనగర్‌ 3, ఖమ్మంలో 7, ఆసిఫాబాద్‌లో 5, మహబూబాబాద్‌లో 7, మహబూబ్‌నగర్‌లో 11, మంచిర్యాలలో 11, మెదక్‌లో 1, మేడ్చల్‌ మల్కాజ్‌గిరిలో 6, ములుగులో 4, నాగర్‌కర్నూల్‌లో 3, నల్లగొండలో 8, నిర్మల్‌లో 8, నిజామాబాద్‌లో 18, రాజన్న సిరిసిల్లలో 2, రంగారెడ్డిలో 13, సంగారెడ్డిలో 26, సిద్దిపేటలో 7, సూర్యాపేటలో 19, వికారాబాద్‌లో 9, వనపర్తిలో 5, వరంగల్‌లో 8, యాదాద్రి భువనగిరిలో 16 మండలాల్లో మోస్తరు కరువు పరిస్థితులున్నాయి.

సాక్షి, హైదరాబాద్‌: తెలంగాణ సంస్కృతికి అద్దం పట్టే బతుకమ్మ పండుగను ఈ నెల 10 నుంచి 18 వరకు అత్యంత వైభ­వంగా నిర్వహించేందుకు ఏర్పాట్లు చేస్తున్నట్టు రాష్ట్ర ప్రభుత్వ ప్రధాన కార్యదర్శి సంజయ్‌ జాజు వెల్లడించారు. వేడుకల ఏర్పాట్లపై శనివారం ఉన్నతస్థాయి సమీక్ష సమావేశం నిర్వహించారు. ఈ సమావేశంలో వివిధ శాఖల కార్యదర్శులు, పోలీస్‌ అధికారు­లు పాల్గొన్నారు. 18న ట్యాంక్‌బండ్‌పై సద్దుల బతుకమ్మను ఘనంగా నిర్వహిస్తున్నట్టు సీఎస్‌ తెలిపారు.ఆరోజు సాయంత్రం 4 గంటలకు సచివాలయం ఎదురుగా ఉన్న అమరవీరుల స్మారక కేంద్రంనుంచి వేలాది మంది మహిళలు బతుకమ్మలతో ఊరేగింపుగా వచ్చి ట్యాంక్‌బండ్‌ చేరుకుంటారని చెప్పారు. వీరితోపాటు వంద­లాది మంది కళాకారులు తమ కళారూపాలతో ర్యాలీగా వస్తారని వివరించారు. ట్యాంక్‌బండ్‌­పై ఏర్పాటు చేసే ప్రత్యేక వేదిక వద్ద జరిగే ఈ బతుకమ్మ ఉత్సవాలకు ప్రజాప్రతినిధులు సై­తం హాజరవుతారన్నారు. పండుగ శోభ సంతరించేలా నగరంలోని ప్రధాన కూడళ్లలో బతుకమ్మలను ఏర్పాటు చేయడమే కాకుండా.. పలు జంక్షన్లు, అన్ని ప్రధాన కార్యాలయాల వద్ద వి­ద్యుద్దీపాలతో అలంకరించాలని అధికారుల­ను సీఎస్‌ ఆదేశించారు.

సాక్షి, హైదరాబాద్‌: నానాటికీ పెరుగుతున్న వాహనాలు, ట్రాఫిక్‌ రద్దీ ఇబ్బందులు, రోడ్డు ప్రమాదాల నివారణే ధ్యేయంగా రాష్ట్ర ప్రభుత్వం ఒక విప్లవాత్మక నిర్ణయం తీసుకుంది. రాష్ట్రవ్యాప్తంగా శాస్త్రీయ పద్ధతుల్లో ట్రాఫిక్‌ నిర్వహణను మెరుగుపరచడానికి, రహదారులపై నిఘాను బలోపేతం చేయడానికి, రైలు ప్రయాణాల భద్రతను అత్యున్నత ప్రమాణాలతో పర్యవేక్షించడానికి ప్రత్యేక విభాగాన్ని ఏర్పాటు చేసింది. ఈ మేరకు ప్రభుత్వ ప్రధాన కార్యదర్శి సంజయ్‌ జాజు ఉత్తర్వులు జారీ చేశారు. ఈ విభాగానికి ’తెలంగాణ ట్రాఫిక్‌ మేనేజ్‌మెంట్, రోడ్డు, రైలు భద్రతా బ్యూరో’ అని నామకరణం చేశారు. ఇది రాష్ట్ర పోలీస్‌ శాఖ పరిధిలో ప్రత్యేక విభాగంగా పూర్తి అధికారాలతో పనిచేస్తుంది.ఈ విభాగం చేతుల్లోనే.. : రాష్ట్రంలో 32 వేల కి.మీ. కంటే ఎక్కువ నిడివి గల రహదారుల నెట్‌వర్క్‌ ఉంది. అలాగే రిజిస్టర్‌ అయిన వాహనాల సంఖ్య 1.80 కోట్లు దాటిపోయింది. ఇంత పెద్దఎత్తున విస్తరిస్తున్న రవాణా వ్యవస్థకు అనుగుణంగా ట్రాఫిక్‌ విభాగాలు ఒకే విధమైన ప్రమాణాలు, సాంకేతికత, శిక్షణ, విశ్లేషణలతో పనిచేయడం అత్యంత ఆవశ్యకంగా మారింది. ఈ నేపథ్యంలోనే అత్యున్నత న్యాయస్థానం ఆదేశాల మేరకు ఎలక్ట్రానిక్‌ పద్ధతుల్లో నిఘా పెంచడానికి, ప్రయాణాలను సురక్షితం చేయడానికి ఈ సమగ్ర విభాగాన్ని ప్రభుత్వం ప్రవేశపెట్టింది. హైదరాబాద్‌ కేంద్రంగా పనిచేసే ఈ విభాగానికి అదనపు డీజీపీ లేదా ఐజీ హోదా కలిగిన సీనియర్‌ ఐపీఎస్‌ అధికారి డైరెక్టర్‌గా వ్యవహరిస్తారు. రాష్ట్రంలోని అన్ని పోలీస్‌ కమిషనరేట్లు, జిల్లాల పరిధిలోని ట్రాఫిక్‌ పోలీస్‌ స్టేషన్లపై ఈ విభాగానికి పూర్తి పర్యవేక్షణ, నియంత్రణ అధికారాలు ఉంటాయి.ఈ బ్యూరోలోని రెండు ముఖ్యమైన విభాగాలు ట్రాఫిక్‌ విభాగం: రాష్ట్రంలోని అన్ని రహదారులపై ట్రాఫిక్‌ క్రమబద్ధీకరణ, ఆధునిక సంకేతాల నిర్వహణ, భారీ వేడుకలు, పండుగల సమయంలో ట్రాఫిక్‌ ప్రణాళికలు, రహదారులపై ఆటంకాల తొలగింపు, వర్షా్షకాలంలో అత్యవసర చర్యలను పర్యవేక్షిస్తుంది. రోడ్డు, రైలు భద్రతా విభాగం: ఇది ఎల్రక్టానిక్‌ పద్ధతుల్లో రోడ్డు నియమాల ఉల్లంఘనలను గుర్తించడం, జాతీయ రహదారులపై గస్తీ నిర్వహించడం, ప్రమాదాలపై శాస్త్రీయ, ఫోరెన్సిక్‌ దర్యాప్తు చేయడం, డేటా విశ్లేషణ, మెట్రో రైలుతో సహా అన్ని రకాల రైలు ప్రయాణాల భద్రతను పర్యవేక్షించడం వంటి విధులను నిర్వర్తిస్తుంది.ప్రత్యేక గస్తీ బృందాలు.. 50 కి.మీ. కంటే ఎక్కువ పొడవున్న జాతీయ లేదా రాష్ట్ర రహదారుల పరిధిలోని ప్రతి పోలీస్‌ స్టేషన్‌లో ఒక ప్రత్యేక గస్తీ బృందాన్ని, అలాగే ఓ వాహనాన్ని కేటాయిస్తారు. ఈ బృందంలో ఒక హెడ్‌ కానిస్టేబుల్, ఒక కానిస్టేబుల్‌ ఉంటారు. ఈ వాహనాలకు ఆధునిక నిఘా కెమెరాలు, నంబర్‌ ప్లేట్లను గుర్తించే పరికరాలు, వేగాన్ని కొలిచే యంత్రాలు అమర్చి ఉంటాయి. ప్రమాదాలు జరిగిన వెంటనే స్పందించి, బాధితులను సకాలంలో ఆసుపత్రికి చేర్చడం, రహదారులపై నిలిచిపోయిన వాహనాలను తొలగించడం వీరి ముఖ్య విధి. ఆర్థికంగా ఈ విభాగం స్వయంసమృద్ధి సాధించడానికి ’ట్రాఫిక్‌ మేనేజ్‌మెంట్‌ ఫండ్‌’ పేరిట ప్రత్యేక నిధిని ఏర్పాటు చేస్తున్నారు. ట్రాఫిక్‌ నిబంధనలు ఉల్లంఘించిన వారి నుంచి వసూలు చేసే జరిమానాలో 40 శాతం నిధులను ఈ బ్యూరో ఖాతాకు జమ చేస్తారు. ఈ నిధులను సాంకేతిక పరికరాల కొనుగోలు, కెమెరాల ఏర్పాటు, శరీరానికి ధరించే కెమెరాలు, సిబ్బంది శిక్షణ, రహదారుల అత్యవసర మరమ్మతులకు మాత్రమే ఉపయోగించాలి.

సాక్షి, హైదరాబాద్‌: రాష్ట్రంలో జనగణన వివరాల సేకరణకు సంబంధించిన ఉత్తర్వులు వెలువడ్డాయి. రాష్ట్ర ప్రభుత్వ ప్రధాన కార్యదర్శి సంజయ్‌జాజు గురువారం జీఓ 124 జారీ చేశారు. జనగణన–2027కు సంబంధించి కేంద్ర ప్రభుత్వం ఈ నెల 14న గెజిట్‌ నోటిఫికేషన్‌ జారీ చేసిన సంగతి తెలిసిందే. 40 రకాల ప్రశ్నలకు సంబంధించిన సమాచారాన్ని సేకరించాలని కేంద్ర ప్రభుత్వం గెజిట్‌లో పేర్కొంది. తాజాగా ఈ గెజిట్‌కు సంబంధించి రాష్ట్రంలో వివరాల నమోదుకుగాను రాష్ట్ర ప్రభుత్వం ఉత్తర్వులు జారీ చేసింది.ఎన్యూమరేటర్లు సేకరించే వివరాలివి1. వ్యక్తి పేరు; 2. కుటుంబ పెద్దతో సంబంధం3. లింగం; 4. పుట్టిన తేదీ, వయసు (నిండిన సంవత్సరాలు)5. ప్రస్తుత వైవాహిక స్థితి; 6. వివాహ సమయానికి వయసు (నిండిన సంవత్సరాలు) 7. జీవిత భాగస్వామి పేరు; 8. జాతీయత; 9. మతం10. షెడ్యూల్డ్‌ కులం(ఎస్సీ)/షెడ్యూల్డ్‌ తెగ(ఎస్టీ)/కులం11. తండ్రి వివరాలు;12. తల్లి వివరాలు 13. డిజెబిలిటీ; 14. మాతృభాష, తెలిసిన ఇతర భాషలు15. అక్షరాస్యత; 16. డిజిటల్‌ అక్షరాస్యత స్థితి17. విద్యాసంస్థలో చదువు/హాజరు స్థితి18. అత్యున్నత విద్యార్హత, విభాగం/విద్యాశాఖ19. గత సంవత్సరంలో ఎప్పుడైనా పని చేశారా?20. ఆర్థిక కార్యకలాపాల కేటగిరీ; 21. వృత్తి22. పరిశ్రమ/వ్యాపారం/సేవ స్వభావం; 23. కార్మికుల వర్గం24. ఆర్థికేతర కార్యకలాపం (పాక్షికంగా పనిచేసేవారు, స్వల్పంగా పనిచేసేవారు, పనిచేయనివారి కోసం)25. పని కోసం వెతుకుతున్నారా/పని చేయడానికి అందుబాటులో ఉన్నారా?26. పనిచేసే ప్రదేశానికి ప్రయాణ వివరాలు27. జన్మస్థలం; 28. చివరిగా నివసించిన ప్రదేశం29. వలస రావడానికి కారణం30. చివరి వలస తర్వాత ఈ గ్రామం/పట్టణంలో ఉంటున్న కాలం; 31. శాశ్వత నివాస చిరునామా32. ప్రస్తుతం జీవించి ఉన్న పిల్లల సంఖ్య (ప్రస్తుతం వివాహిత, వితంతు, విడాకులు పొందిన లేదా విడిపోయిన మహిళలకు మాత్రమే)33. ఇప్పటివరకు సజీవంగా జన్మించిన పిల్లల సంఖ్య (ప్రస్తుతం వివాహిత, వితంతు, విడాకులు పొందిన లేదా విడిపోయిన మహిళలకు మాత్రమే)34. గత ఒక సంవత్సరంలో సజీవంగా జన్మించిన పిల్లల సంఖ్య (ప్రస్తుతం వివాహిత మహిళలకు మాత్రమే)35. కోవిడ్‌–19 టీకా తీసుకున్న ప్రదేశం36. మొత్తం బ్యాంకు ఖాతాల సంఖ్య37. మొబైల్‌ నంబర్‌ (అందుబాటులో ఉంటే)38. ఆధార్‌ నంబర్‌ (అందుబాటులో ఉంటే)39. ఓటరు గుర్తింపు కార్డు నంబర్‌ (అందుబాటులో ఉంటే); – పాస్‌పోర్ట్‌ నంబర్‌(భారతీయ పాస్‌పోర్ట్‌ కలిగి ఉంటే)40. డ్రైవింగ్‌ లైసెన్స్‌ అందుబాటులో ఉందా?

సాక్షి, హైదరాబాద్‌: ఆర్టీసీ తరహాలో మెట్రో రైళ్లలోనూ నెలవారీ, మూడు నెలల పాస్‌లను ప్రవేశపెట్టేందుకు హైదరాబాద్‌ మెట్రోరైల్‌ లిమిటెడ్‌ సిద్ధమవుతోంది. ప్రయాణికుల సంఖ్యను పెంచుకోవడానికి సదుపాయాలను మరింత మెరుగుపరుచుకోవాలని.. ఆకర్షణీయమైన పథకాలను ప్రవేశపెట్టాలని ఇటీవల జరిగిన సంస్థ పాలకమండలి సమావేశంలో ప్రభుత్వ ప్రధాన కార్యదర్శి సంజయ్‌ జాజు ఆదేశించారు. విద్యార్ధులు, ఉద్యోగుల ప్రయోజనాలకు అనుగుణంగా పాస్‌లను ప్రవేశపెట్టాలని సూచించారు. దీంతో ఆర్టీసీ అధికారులతో త్వరలో సంప్రదింపులు జరపనున్నట్లు మెట్రో అధికారులు తెలిపారు. ఆర్టీసీలో ఉన్న వివిధ పాస్‌లు, వాటి ధరలు, ప్రయాణికుల ఆదరణ వంటి అంశాలను పరిశీలించి మెట్రో రైళ్లలో పాస్‌లను ప్రవేశపెట్టేందుకు విధివిధానాలను సిద్ధం చేయనున్నారు. ఇప్పటివరకు కొన్ని రకాల రాయితీ టికెట్లను ఎల్‌ అండ్‌ టీ మెట్రో రైల్‌ అందుబాటులోకి తెచ్చింది. ప్రయాణికుల నుంచి వాటికి ఆదరణ కూడా లభించింది. కానీ అప్పట్లో వరుస నష్టాలను దృష్టిలో ఉంచుకొని రాయితీలను విరమించారు. ప్రస్తుతం ప్రభుత్వం హెచ్‌ఎంఆర్‌ఎల్‌ నిర్వహణలోకి రావడంతో ప్రయాణికుల అవసరాలకు తగ్గట్లుగా పాస్‌లను ప్రవేశపెట్టాలని భావిస్తోంది. ప్రయాణికులు పెరిగేలా... ప్రస్తుతం రోజుకు 4.70 లక్షల నుంచి 4.80 లక్షల మంది మెట్రో రైళ్లలో ప్రయాణిస్తున్నారు. దాదాపు రెండేళ్లుగా ప్రయాణికుల సంఖ్య స్థిరంగా కొనసాగుతోంది. పండుగలు, వరుస సెలవులు, వారాంతాల్లో మాత్రం రద్దీ అనూహ్యంగా నమోదవుతోంది. ఈ క్రమంలో పాస్‌లను ప్రవేశపెట్టడం వల్ల ప్రయాణికుల సంఖ్యను పెంచుకోవడంతోపాటు ఆదాయాన్ని పెంచుకోవడానికి కూడా అవకాశం లభిస్తుందని అధికారులు అంచనా వేస్తున్నారు. ఇప్పటికే ప్రయాణికుల డిమాండ్‌ మేరకు అదనపు కోచ్‌లను ప్రవేశపెట్టేందుకు అధికారులు కార్యాచరణ చేపట్టారు. ఆర్టీసీలో ఇలా... ఆర్టీసీలో 7 రకాల పాస్‌లు జారీ అవుతున్నాయి. అన్ని రకాల పాస్‌లు కలిపి 2 లక్షలకుపైగా ఉన్నట్లు అధికారులు తెలిపారు. 24 గంటల ప్రయాణానికి వినియోగించే ట్రావెల్‌ యాజ్‌ యూ లైక్‌ (టీఏవైఎల్‌) టికెట్లను రోజుకు 80 వేలకుపైగా విక్రయిస్తున్నారు. అలాగే సాధారణ నెలవారీ పాస్‌లు 75 వేలకుపైగా ఉన్నాయి. ఆర్డినరీ, మెట్రో ఎక్స్‌ప్రెస్, మెట్రో డీలక్స్‌ బస్సుల కోసం వివిధ ధరల్లో వాటిని విక్రయిస్తున్నారు. అలాగే రాయితీలపై సుమారు లక్ష మంది విద్యార్ధులు పాస్‌లను వినియోగిస్తున్నారు. ఆర్టీసీ తరహాలోనే మెట్రో రైళ్లలోనూ పాస్‌లను ప్రవేశపెడితే లక్షన్నర మందికిపైగా ప్రయాణికులు వాటిని వినియోగించుకుంటారని అధికారులు అంచనా వేస్తున్నారు.

భోపాల్‌: తెలంగాణ ప్రభుత్వ నూతన ప్రధాన కార్యదర్శి (సీఎస్) సంజయ్ జాజుకు శుభాకాంక్షలు చెబుతూ మధ్యప్రదేశ్‌కు చెందిన ఒక దినపత్రికలో ప్రచురితమైన ప్రకటన ఇప్పుడు వివాదాస్పదంగా మారింది. ఈ ప్రకటనలో ఆయన మధ్యప్రదేశ్ ముఖ్యమంత్రి డాక్టర్ మోహన్ యాదవ్‌తో కలిసి ఉన్న ఒక ఫొటో ‍ప్రచురితమయ్యింది. ప్రస్తుతం తెలంగాణలో కాంగ్రెస్ ప్రభుత్వం, మధ్యప్రదేశ్‌లో బీజేపీ ప్రభుత్వం అధికారంలో ఉండటంతో ఈ ఫొటోపై సోషల్ మీడియాలో రకరకాల చర్చలు నడుస్తున్నాయి.1992 బ్యాచ్‌కు చెందిన సీనియర్ ఐఏఎస్ అధికారి సంజయ్ జాజు జూన్ 26న తెలంగాణ రాష్ట్ర నూతన ప్రభుత్వ ప్రధాన కార్యదర్శిగా బాధ్యతలు స్వీకరించారు. మధ్యప్రదేశ్‌కు చెందిన ఆయన కుటుంబం ప్రస్తుతం భోపాల్‌లో ఉంటోంది. ఆయన సీఎస్‌గా అత్యున్నత పదవిని చేపట్టిన తరుణంలో ఆయన బంధువులు, కుటుంబ సభ్యులు స్థానిక పత్రికలో శుభాకాంక్షల ప్రకటనను ఇచ్చారు.ఇది సాధారణ ప్రకటనలా కనిపించినప్పటికీ, అందులో కనిపిస్తున్న ఫొటో చర్చకు దారితీసింది. ఆ ఫొటో ఏ ప్రభుత్వ కార్యక్రమానికి సంబంధించినదో ప్రకటనలో పేర్కొనలేదు. అలాగే ఈ ఫొటో ఎంపికలో సంజయ్ జాజు ప్రమేయం ఉందా లేదా అనే విషయం తెలియరాలేదు. రాష్ట్రంలో అత్యున్నత పరిపాలనా పదవిలో ఉన్న అధికారి రాజకీయాలకు అతీతంగా, తటస్థంగా కనిపించాలని కొందరు అభిప్రాయపడుతుండగా, ప్రభుత్వ కార్యక్రమంలో సీఎంతో కలిసి ఫొటో దిగడం సాధారణ పరిపాలనా ప్రక్రియేనని మరికొందరు అంటున్నారు.

సాక్షి, హైదరాబాద్: తెలంగాణ సీఎస్‌గా సంజయ్ జాజు ఈ రోజు ( మంగళవారం) బాధ్యతలు స్వీకరించారు. సరిగ్గా 2 గంటల 15 నిమిషాల సమయంలో ముహూర్తం చూసుకొని సచివాలయంలోని ప్రధాన కార్యదర్శి సీటులో కూర్చున్నారు. మాజీ ‍ప్రధాన కార్యదర్శి రామకృష్ణారావు పదవీకాలం నేటితో ముగియడంతో ఆయన స్థానంలో సంజయ్‌ జాజు బాధ్యతలు స్వీకరించారు. 2029 ఫిబ్రవరి వరకూ ఆయన ఈ పదవిలో కొనసాగనున్నారు. సంజయ్ జాజు నేపథ్యంప్రభుత్వ ప్రధాన కార్యదర్శి సంజయ్ జాజు 1992 బ్యాచ్‌కు చెందిన ఈ సీనియర్ ఐఏఎస్ అధికారి, ఉమ్మడి ఆంధ్రప్రదేశ్‌లో పలు కీలక బాధ్యతలు నిర్వర్తించారు. హైదరాబాద్, విశాఖపట్నం మున్సిపల్ కమిషనర్‌గా, ఐటీ శాఖ కార్యదర్శిగా పనిచేశారు. అదేవిధంగా రెండు తెలుగురాష్ట్రాలలో ఎంతో ప్రాముఖ్యత చెందిన మీ సేవ రూపకర్తలలో ఆయన ఒకరు. ఈ ప్రాజెక్టు రూపకల్పన, అమలులో ఆయన కీలక పాత్ర పోషించారు.ప్రత్యేక రాష్ట్రం ఏర్పడినప్పటి నుండి కేంద్ర సర్వీసుల్లో ఆయన డిప్యూటేషన్‌పై ఉన్నారు. నేషనల్ హైవేస్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ (NHIDCL) డైరెక్టర్‌గా, కేంద్ర సమాచార, ప్రసార శాఖ కార్యదర్శిగా పనిచేశారు. కేంద్ర సర్వీసుల్లో ఉన్న ఆయనను, తెలంగాణ ప్రభుత్వం ప్రత్యేక అభ్యర్థన మేరకు రాష్ట్రానికి రప్పించి ప్రభుత్వ ప్రధాన కార్యదర్శిగా నియమించింది.

సాక్షి, హైదరాబాద్‌: తెలంగాణ సీఎస్‌గా సంజయ్‌ జాజును నియమిస్తూ ప్రభుత్వ ఉత్తర్వులు జారీ చేసింది. 1992 బ్యాచ్‌కు చెందిన సీనియర్‌ ఐఏఎస్‌ అధికారి, ప్రస్తుతం కేంద్ర సర్వీసుల్లో ఉన్న సంజయ్‌ జాజు తెలంగాణకు తిరిగి వచ్చారు. ప్రస్తుతం సీఎస్‌గా ఉన్న కె. రామకృష్ణారావు పదవీకాలం ఈ నెలాఖరుతో ముగియనుంది. సంజయ్‌ జాజు ప్రస్తుతం ఈశాన్య ప్రాంత అభివృద్ధి మంత్రిత్వ శాఖ కార్యదర్శిగా పనిచేస్తున్నారు.మూడు రోజుల కిందట ఆయన కేంద​ సర్వీసుల నుంచి రిలీవ్‌ అయ్యారు. ఆయన అంతకుముందు సమాచార, పౌర సంబంధాల శాఖ కార్యదర్శిగా బాధ్యతలు నిర్వహించారు. ఉమ్మడి రాష్ట్రంలో ఐటీ ముఖ్యకార్యదర్శిగా, జీహెచ్‌ఎంసీ కమిషనర్‌గా, విశాఖపట్టణం కమిషనర్‌గా, పౌరసరఫరాల శాఖ కమిషనర్‌గా, సహాయ పునరావాస శాఖ కమిషనర్‌గా, నీటిపారుదల ఆయకట్టు ప్రాంత అభివృద్ధి శాఖ కమిషనర్‌గా, ఏపీఐఐసీ వీసీ అండ్‌ ఎండీగా పనిచేశారు.

సాక్షి, హైదరాబాద్‌: రాష్ట్ర తదుపరి ప్రభుత్వ ప్రధాన కార్యదర్శి ఎవరనే అంశంపై ఉత్కంఠ నెలకొన్న వేళ కీలక పరిణామం చోటుచేసుకుంది. 1992 బ్యాచ్‌కు చెందిన సీనియర్‌ ఐఏఎస్‌ అధికారి, ప్రస్తుతం కేంద్ర సర్వీసుల్లో ఉన్న సంజయ్‌ జాజు తెలంగాణకు తిరిగి రానున్నారు. ఆయనను తెలంగాణ కేడర్‌కు పంపాలన్న రాష్ట్ర ప్రభుత్వ అభ్యర్థనను కేంద్రం ఆమోదించింది. ఈ మేరకు కేంద్ర సిబ్బంది, శిక్షణ శాఖ మంగళవారం ఉత్తర్వులు జారీ చేసింది. ఈ పరిణామంతో సంజయ్‌ జాజు సీఎస్‌గా నియమితులు కానున్నారని ఉన్నతస్థాయి వర్గాలు పేర్కొంటున్నాయి, ప్రస్తుతం సీఎస్‌గా ఉన్న కె. రామకృష్ణారావు పదవీకాలం ఈ నెలాఖరుతో ముగియనుంది. సీఎస్‌ పదవి కోసం మొన్నటి వరకు 1992 బ్యాచ్‌కు చెందిన సీనియర్‌ ఐఏఎస్‌లు అయిన ప్రభుత్వ ప్రత్యేక ప్రధాన కార్యదర్శులు జయేశ్‌ రంజన్‌ (పురపాలక శాఖ), వికాస్‌రాజ్‌ (ఆర్‌అండ్‌బీ) పోటీపడ్డారు. వారిద్దరి మధ్యనే పోటీ ఉంటుందని భావించారు. అయితే అనూహ్యంగా రాష్ట్ర ప్రభుత్వమే తాజాగా సంజయ్‌ జాజును తెలంగాణ కేడర్‌కు తిరిగి పంపించాలని కేంద్రాన్ని కోరడంతో దాదాపు 12 ఏళ్ల తర్వాత ఆయన తిరిగి సొంత కేడర్‌ అయిన తెలంగాణకు వస్తున్నారు. సంజయ్‌ జాజును కేడర్‌కు పిలిపించుకోవడం ద్వారా ప్రభుత్వం ఒక బలమైన సంకేతాన్ని పంపిందనే చర్చ మొదలైంది. వచ్చే కొన్ని రోజుల్లో తెలంగాణ పాలనా యంత్రాంగంలో కీలక మార్పులు చోటుచేసుకోనున్నాయి. సంజయ్‌ జాజు ప్రస్తుతం ఈశాన్య ప్రాంత అభివృద్ధి మంత్రిత్వ శాఖ కార్యదర్శిగా పనిచేస్తున్నారు. ఆయన అంతకుముందు సమాచార, పౌర సంబంధాల శాఖ కార్యదర్శిగా బాధ్యతలు నిర్వహించారు. ఉమ్మడి రాష్ట్రంలో ఐటీ ముఖ్యకార్యదర్శిగా, జీహెచ్‌ఎంసీ కమిషనర్‌గా, విశాఖపట్టణం కమిషనర్‌గా, పౌరసరఫరాల శాఖ కమిషనర్‌గా, సహాయ పునరావాస శాఖ కమిషనర్‌గా, నీటిపారుదల ఆయకట్టు ప్రాంత అభివృద్ధి శాఖ కమిషనర్‌గా, ఏపీఐఐసీ వీసీ అండ్‌ ఎండీగా పనిచేశారు. తెలంగాణ రాష్ట్రం ఏర్పడ్డాక ఆయన అక్టోబర్‌లో కేంద్ర సర్వీసులకు వెళ్లారు. ప్రభుత్వ ప్రధాన కార్యదర్శిగా బాధ్యతలు స్వీకరిస్తే ఆయన 2029 ఫిబ్రవరి వరకు ఆ పదవిలో కొనసాగే అవకాశం ఉంది. సీఎస్‌గా సంజయ్‌ జాజు రాకను ప్రభుత్వంలోని ఉన్నతస్థాయి వర్గాలు సైతం ధ్రువీకరించాయి.

కృత్రిమ మేథ (ఏఐ)లాంటి టెక్నాలజీలు మీడియా, వినోద రంగంపై (ఎంఅండ్‌ఈ) పెను ప్రభావం చూపుతున్నాయని కేంద్ర సమాచార, ప్రసార (ఐఅండ్‌బీ) శాఖ కార్యదర్శి సంజయ్‌ జాజు చెప్పారు. ఈ నేపథ్యంలో సాంకేతికతను పూర్తి స్థాయిలో వినియోగించుకోవడంపై మరింతగా దృష్టి పెట్టాలని ఆయన సూచించారు. డైరెక్ట్‌ టు మొబైల్‌ బ్రాడ్‌కాస్టింగ్‌ ప్రాజెక్టుపై ఐఐటీ కాన్పూర్‌లో పరిశోధనలు జరుగుతున్నాయని సీఐఐ బిగ్‌ పిక్చర్‌ సమిట్‌ 2025లో పాల్గొన్న సందర్భంగా ఆయన పేర్కొన్నారు. ఏఐ వల్ల టెక్నాలజీలో మరిన్ని మార్పులు రాబోతున్నాయని, వాటిలో సానుకూలాంశాలను ఉపయోగించుకోవాలని జాజు తెలిపారు. దీని వల్ల పెద్ద ఎత్తున ఉద్యోగాల కల్పన జరుగుతుందని, ఉత్పాదకత పెరుగుతుందని పేర్కొన్నారు. వందలో ఒక్క వంతు ఖర్చుతో పదిలో ఒక వంతు సమయంలో ఏదైనా పని పూర్తయితే, ఉత్పాదకత తప్పకుండా పెరుగుతుందని జాజు చెప్పారు.కార్యక్రమంలో పాల్గొన్న సందర్భంగా 2030 నాటకి మీడియా, వినోద రంగం (ఎంఅండ్‌ఈ) భవిష్యత్‌ పరిస్థితుల గురించి రూపొందించిన సీఐఐ శ్వేతపత్రాన్ని ఆయన ఆవిష్కరించారు. ప్రభుత్వం, పరిశ్రమ అంచనాల ప్రకారం ఈ పరిశ్రమ ఏటా 7 శాతం వృద్ధితో 2030 నాటికి 100 బిలియన్‌ డాలర్లకు చేరనుందని జాజు చెప్పారు. ఆహారం, నీడ, దుస్తుల్లాగే వినోదమనేది నాగరికత మూల స్తంభాల్లో ఒకటని, ఆర్థిక వృద్ధితో పాటు సమాజ శ్రేయస్సుకు కూడా కీలకమని పేర్కొన్నారు. భారతదేశపు క్రియేటివ్‌ ఎకానమి ప్రస్తుతం 1 కోటి మందికి పైగా జవనోపాధి కల్పిస్తోందని, రూ. 3 లక్షల కోట్ల మేర స్థూల దేశీయోత్పత్తికి దోహదపడుతోందని ఆయన చెప్పారు.ఇంతటి కీలకమైన వినోద రంగాన్ని ఏఐ మార్చివేస్తున్న తరుణంలో కొత్త టెక్నాలజీలను అందిపుచ్చుకోకపోతే అంతర్జాతీయంగా మన వాటా తగ్గిపోతుందన్నారు. వర్ధమాన ఆర్థిక శక్తిగా భారతదేశ గాథలను ప్రపంచానికి వినిపించాల్సిన, చూపించాల్సిన అవసరం ఉందన్నారు. ఇందుకోసం ప్రభుత్వం తన వంతు సహాయాన్ని పరిశ్రమకు అందిస్తుందని చెప్పారు.

హైదరాబాద్‌: ప్రభుత్వం ఎన్ని చర్యలు తీసుకుంటున్నా జీహెచ్‌ఎంసీ పరిదిలో కరోనా కేసులు భారీగా నమోదవుతున్నాయి. ఇప్పడు జీహెచ్‌ఎంసీ ప్రధాన కార్యాలయంలో మరో కరోనా కేసు నమోదైంది. మేయర్‌ పేషీలో పనిచేస్తున్న అటెండర్‌కు కరోనా పాజిటివ్‌ వచ్చినట్లు అధికారులు గుర్తించారు. ఈ పరిణామంతో మేయర్‌ ఛాంబర్‌ను సిబ్బంది మూసివేసి శానిటైజ్‌ చేశారు. మరోవైపు కరోనా వ్యాప్తిని అరికట్టేందుకు తీసుకుంటున్న చర్యల గురించి జీహెచ్ఎంసీ కమీషనర్, హైదరాబాద్ కలెక్టర్, ఇతర అధికారులతో కేంద్ర ప్రభుత్వ సంయుక్త కార్యదర్శి సంజయ్ జాజు చర్చించారు. ఇప్పటికే జీహెచ్‌ఎంసీ ఆఫీస్‌లో ఒక పాజిటివ్ కేసు నమోదయింది. రెండు రోజుల క్రితం జీహెచ్‌ఎంసీలో పనిచేసే జూనియర్‌ అసిస్టెంట్‌కు కరోనా పాజిటివ్‌ నిర్దారణ అయిన విషయం తెలిసిందే. కాగా జీహెచ్‌ఎంసీ కార్యాలయంలోనే కాక అనేక ప్రభుత్వ ఆఫీసులలో కరోనా కేసులు నయోదవుతున్నాయి. చదవండి: న్యూజిలాండ్‌తో సహా 9 దేశాల్లో జీరో కేసులు


 సాక్షి, విశాఖపట్నం: ఆంధ్రప్రదేశ్‌ను ఐటీ రంగంలో అగ్రగామిగా తీర్చిదిద్దేందుకు తమవంతు సహకారం అందిస్తామని పలువురు ఐటీ రంగ ప్రముఖులు ప్రకటించారు. ఐటీ కంపెనీల సీఈవోలలో విశాఖపట్నంలో సోమవారం నిర్వహించిన సదస్సులో రాష్ట్రాన్ని డిజిటలైజ్ చేయడానికి గూగుల్ సంస్థ సహకారం అందించేందుకు ఒప్పందం కుదుర్చుకుంది. విప్రో(రూ.150కోట్లు), టెక్ మహీంద్ర (రూ.250కోట్లు), సమీర్(రూ.80కోట్లు), టెస్సాల్వ్( రూ.250కోట్లు)  పెట్టుబడులు పెట్టేందుకు రాష్ట్ర ప్రభుత్వంలో ఒప్పందం కుదుర్చుకున్నాయి.
 
 ఈమేరకు రాష్ట్ర ప్రభుత్వం తరపున ఐటీ శాఖ కార్యదర్శి సంజయ్ జాజు, ఆయా సంస్థల తరపున వాటి ప్రతినిధులు ఒప్పంద పత్రాలపై సంతకాలు చేశారు. అదే విధంగా రాష్ట్ర ప్రభుత్వం మరో 16 సంస్థలకు విశాఖపట్నం, విజయవాడలలో కంపెనీలు ప్రారంభించేందుకు వీలుగా భూ కేటాయింపులు, ఇంక్యుబేషన్ సెంటర్‌లో స్థలాలు కేటాయించింది. ఈ సందర్భంగా  ఐటీ రంగ ప్రముఖులు పలువురు తమ అభిప్రాయాలను ఇలా వెల్లడించారు.
 
  గ్రామీణ ప్రాంతాల నుంచి నిపుణులు రావాలి
  గ్రామీణ ప్రాంతాల నుంచి ఐటీ రంగ నిపుణులు, పారిశ్రామికవేత్తలను రూపొందించాలి. స్టార్ట్ అప్ విలేజ్‌లు ఒక అద్భుత ప్రయోగం. దీన్ని పూర్తిగా సద్వినియోగం చేసుకోవాలి. అప్పుడే విశాఖపట్నంతోపాటు ఏపీ అభివృద్ధి పథంలో సాగుతుంది. - క్రిష్ గోపాలకృష్ణన్, ఇన్ఫోసిస్ సహ వ్యవస్థాపకుడు
 
  ఉపాధి అవకాశాలు కల్పించే స్థాయికి చేరుకోవాలి
 మన యువత ఉపాధి అవకాశాల కోసం ఎదురుచూడకుండా ఉపాధి అవకాశాలు కల్పించేస్థాయికి చేరుకోవాలి. విద్యార్థులు పారిశ్రామికవేత్తలుగా ఎదిగేందుకు పాఠ్యాంశాలలో మార్పులు అవసరం. ఐటీ రంగంలో రాష్ట్రం వృద్ధికి కాస్మోపాలిటన్ నగరంగా ఉన్న విశాఖ మెట్రోపాలిటన్ నగరంగా ఎదగాలి. - బీవీ మోహన్‌రెడ్డి, నాస్కామ్ ఉపాధ్యక్షుడు
 
  ప్రపంచస్థాయి స్టార్ట్ అప్ ఎకోసిస్టమ్
  ఇంక్యుబేటర్ విధానం ఐటీ రంగంలో విప్లవాత్మకమైన మార్పులు తీసుకువచ్చింది. విద్యార్థులు పారిశ్రామికవేత్తలుగా ఎదిగేందుకు దోహదపడింది. కేరళలో విజయవంతమైన ఈ విధానాన్ని విశాఖపట్నం కేంద్రంగా ఏపీలో అమలు చేస్తాం. స్టార్ట్ అప్ విలేజ్ విధానంతో విద్యార్థుల్లోని నైపుణ్యాన్ని వెలికితీసి వారిని పారిశ్రామికవేత్తలుగా తీర్చిదిద్దుతాం.
  - సంజయ్ విజయ్‌కుమార్, సీఈవో, మోబ్‌మీ
  
 ఏపీ డిజిటలైజ్‌కు కార్యాచరణ
 ఏపీనీ డిజిటలైన్ చేసేందుకు 4 ప్రధాన అంశాలతో కార్యాచరణ ప్రణాళిక చేపట్టాం. మొదటగా ఇంటర్‌నెట్ సేవలను తెలుగులో అందుబాటులోకి తెస్తాం. ఈ ప్రక్రియలో తెలుగు పత్రికలు, మ్యాగజైన్లను భాగస్వాములుగా చేసుకుంటాం. 2. చిన్న, మధ్య తరహా వ్యాపారాలను ఆన్‌లైన్  విధానంలోకి తీసుకువస్తాం. రానున్న రెండేళ్లలో లక్ష చిన్న, మధ్యతరహా వ్యాపార సంస్థలను ఆన్‌లైన్ విధానంలోకి తీసుకురావాలన్నది లక్ష్యం. 3. వినియోగదారులను ప్రత్యేకించి మహిళా వినియోగదారులను ఆన్‌లైన్ విధానంలోకి తీసుకువస్తాం.  4. అన్ని ప్రభుత్వ వెబ్‌సైట్లు, ఇతరవాటిని మోబైల్ డివైజస్‌లోకి అందుబాటులోకి తెస్తాం. - రాజన్ అనందన్, గూగుల్ సంస్థ ఎండీ


 విశాఖపట్నం: రాష్ట్రంలో ఐటీ రంగానికి పెద్దదిక్కుగా ఉన్న విశాఖ ప్రస్తుతం భవిష్యత్తు ప్రయాణం ఎటో తేల్చుకోలేకపోతోంది. నగరాన్ని ఐటీ రాజధానిగా తీర్చుదిద్దుతామని చెబుతున్న ప్రభుత్వం ఆచరణలో స్పష్టత ఇవ్వకపోవడంతో కంపెనీలు గందరగోళానికి గురవు తున్నాయి. ఒకపక్క సమస్యలతో మనుగడ కష్టంగా మారగా, మరోపక్క పభుత్వం మొక్కుబడి వ్యవహారంతో అయోమయానికి గురవుతున్నాయి. కంపెనీల విస్తరణ, ఉద్యోగ నియామకాల విషయంలో ముందడుగు వేయడానికి సంశయిస్తున్నాయి. ఉన్న సంక్షోభ పరిస్థితులు చక్కదిద్దకుండా హడావుడి చేస్తుండడంతో మొదట్లో కాస్తోకూస్తో ఆశగా ఉన్న యాజమాన్యాలు క్రమక్రమంగా నిరుత్సాహానికి లోనవుతున్నాయి. సోమవారం విశాఖలో ఐటీశాఖ అత్యున్నతస్థాయి విధానపరమైన సమీక్ష జరుగుతుండడంతో తాడోపేడో తేల్చుకోవడానికి సమాయత్తమవుతున్నాయి.
  
 ఐటీ రాజధానిగా చేస్తారా? 
 విభజనకు ముందు హైదరాబాద్ తర్వాత రాష్ట్రంలో ఐటీ రంగంలో విశాఖది రెండోస్థానం. అక్కడ మొత్తం 2,500 కంపెనీలు పనిచేస్తుండగా,  వార్షిక టర్నోవర్ రూ.60,200 కోట్లు. విశాఖలో కార్యకలాపాలు నిర్వహిస్తోన్న మొత్తం 70 కంపెనీల టర్నోవర్ రూ.1450 కోట్లు. కానీ విడిపోయిన తర్వాత రాష్ట్రంలో విశాఖ ఐటీ రంగం కేవలం మూడుశాతమే మిగిలింది. దీంతో విశాఖను ఐటీ రాజధానిగా తీర్చిదిద్దుతామని ప్రభుత్వం అదే పనిగా ప్రకటిస్తోంది. కానీ ఇక్కడ సమస్యల పరిష్కారానికి చర్యలు తీసుకోలేదు. ఇటీవల హైదరాబాద్‌కు వెళ్లి సీఎం చంద్రబాబు, ఐటీ మంత్రిని కలిసి సమస్యలు వివరించినా పెద్దగా స్పందన లేకపోవడంతో భవిష్యత్తుపై ఆశలు వదిలేసుకుంటున్నాయి.
 
 ప్రస్తుతం నగరంలో 70 ఐటీ కంపెనీలు, నాలుగు ఎస్‌ఈజెడ్‌లున్నాయి. ఇవన్నీ అనేక పురిటినొప్పులు పడుతున్నాయి. ఎస్‌ఈజెడ్‌లకు కేటాయించిన భూముల్లో సగానికిపైగా కంపెనీలు నిర్మాణాలు చేపట్టకుండా భూములు ఖాళీగా ఉంచాయి. నిర్మాణం పూర్తిచేసుకున్న కంపెనీలకు అనుమతులు, మౌలిక సదుపాయాలు లేక పాడుబడ్డ భవనాలుగా మారాయి.  ఐటీకి పవర్‌హాలీడే విధిస్తుండడంతో ఆర్థికంగా సంక్షోభంలో కూరుకుపోయాయి. ప్రభుత్వం ఇవేమీ పట్టించుకోకుండా ఏదో చేస్తామని యాజమాన్యాలను ఊరించే ప్రయత్నం చేస్తోంది. ఈ నెల 16న ఐటీశాఖ నుంచి మంత్రి పల్లె రఘునాథరెడ్డి, ప్రభుత్వ ఐటీ సలహాదారు జె.సత్యనారాయణ, పరిశ్రమలశాఖ ముఖ్య కార్యదర్శి జె.ఎస్.వి.ప్రసాద్, ఐటీఈ అండ్ సీ సెక్రటరీ సంజయ్‌జాజూ, పరిశ్రమల అభివృద్ధి ఫోరం చైర్మన్ జె.ఎ.చౌదరి తదితరులు నగరానికి వస్తున్నారు.
 
 రాష్ట్రంలో విశాఖను ఐటీ రాజధానిగా ఏవిధంగా తీర్చిదిద్దాలి? సమస్యలు? వంటివాటిపై విధానపరమైన సమీక్ష జరపనున్నారు. ఇందులో ఐటీ సమస్యలను ఏకరువుపెట్టడానికి కంపెనీలు సిద్ధమవుతున్నాయి. ఇక్కడ ఐటీ కంపెనీల సమావేశాలు, ఇతరత్రా అవసరాలను తీర్చేందుకు రూ.20 కోట్లతో చేపట్టిన ఇంక్యుబేషన్ సెంటర్ రెండేళ్లవుతున్నా నిర్మాణం పూర్తవలేదు. రెండో ఇంక్యుబేషన్ కేంద్రానికి మరో రూ.23 కోట్లు నిధులు సిద్ధంగా ఉన్నా భూములే లేవు. దీనిపై కంపెనీల యాజమాన్యాలు ప్రభుత్వాన్ని నిలదీయాలని భావిస్తున్నాయి.
 
 ఐటీ కంపెనీలకు కనీసం బస్సు సౌకర్యం, తాగునీటి వసతి ఇలా ప్రాథమికంగా ఏవీ లేవు. ముందు ఈ సౌకర్యాలు కల్పించి ఆ తర్వాత ఐటీ రాజధానిగా తీర్చిదిద్దాలని డిమాండ్ చేయనున్నట్లు రుషికొండ ఐటీ పార్క్స్ అసోసియేషన్ ఉపాధ్యక్షుడు ఒ.నరేష్‌కుమార్ ‘సాక్షి’కి తెలిపారు. రూ.50 వేల కోట్లతో 10వేల ఎకరాల్లో విశాఖకు ఐటీఐఆర్ వస్తుందని గత ప్రభుత్వంతోపాటు సీఎం చంద్రబాబు కూడా హామీ ఇచ్చారు. ఈ ప్రాజెక్టుకు ఇప్పటికే 4 వేల ఎకరాల భూములు కూడా సిద్ధం చేసి ఉంచారు. ఐటీఐఆర్‌ను ఇస్తామని చెబుతున్న ప్రభుత్వం ఇప్పుడు ఈ భూములను వెనక్కి తీసుకుని వేరే కంపెనీలకు ఇవ్వడానికి ప్రయత్నాలు చేస్తోంది. దీనిపైనా తాము ప్రశ్నిస్తామని నరేష్‌కుమార్ చెప్పారు.