విదేశీ బ్యాంకుల్లో సైతం జీరో బ్యాలెన్స్ అకౌంట్లు

ముంబై: మారుమూల ప్రాంతాల ప్రజలతోసహా దేశంలోని అందరికీ బ్యాంకింగ్ సేవలు అందుబాటులోకి తీసుకురావాలన్న లక్ష్య సాకారం దిశలో రిజర్వ్ బ్యాంక్ ఆఫ్ ఇండియా (ఆర్‌బీఐ) మరో కీలక నిర్ణయం తీసుకుంది. దీని ప్రకారం బలహీన వర్గాలకు చెందిన పేదలు సైతం ఇకపై విదేశీ బ్యాంకుల్లో జీరో బ్యాలెన్స్ అకౌంట్‌ను తెరవవచ్చు. ఈ మేరకు ఆర్‌బీఐ బుధవారం ఒక ప్రకటన జారీచేసింది. ‘తన బేసిక్ సేవింగ్స్ బ్యాంక్ డిపాజిట్ అకౌంట్ (బీఎస్‌బీడీఏ) మార్గదర్శకాలు భారత్‌లో బ్రాంచీలు కలిగిన విదేశీ బ్యాంకులు సహా అన్ని షెడ్యూల్డ్ కమర్షియల్ బ్యాంకులకు వర్తిస్తాయని ఆర్‌బీఐ పేర్కొంది. దీనితో పేదలు సైతం హెచ్‌ఎస్‌బీసీ, సిటీబ్యాంక్, స్టాండెర్డ్ చార్టర్డ్ బ్యాంక్ వంటి విదేశీ బ్యాంకుల్లో జీరో బ్యాలెన్స్ అకౌంట్లను ప్రారంభించి, ఉచిత ఏటీఎం కమ్ డెబిట్ కార్డ్ సౌలభ్యాన్ని పొందడానికి మార్గం సుగమం అయ్యింది.