మన స్టాక్స్... అండర్‌వెయిట్

న్యూఢిల్లీ: ప్రస్తుతం స్టాక్ మార్కెట్లు లాభాల బాటలో సాగుతున్నప్పటికీ గోల్డ్‌మన్ శాక్స్ మాత్రం ఈక్విటీలకు అండర్‌వెయిట్ రేటింగ్‌ను ఇచ్చింది. వెరసి రానున్న ఏడాది కాలంలో నేషనల్ స్టాక్ ఎక్స్ఛేంజీ ప్రధాన సూచీ ‘నిఫ్టీ’ లక్ష్యాన్ని 5,700 పాయింట్లుగా పేర్కొంది. ప్రస్తుతం నిఫ్టీ 5,900 స్థాయిలో కదులుతున్న సంగతి తెలిసిందే. మరోవైపు స్టాక్ మార్కెట్ల ప్రామాణిక సూచీ సెన్సెక్స్ 20,000 పాయింట్ల సమీపానికి చేరినప్పటికీ ఇండియా స్థూల ఆర్థిక పరిస్థితులు సంక్లిష్టంగా ఉన్నాయంటూ అంతర్జాతీయ ఫైనాన్షియల్ సర్వీసుల దిగ్గజం గోల్డ్‌మన్ వ్యాఖ్యానించింది. ఆర్థిక వ్యవస్థ పలు సవాళ్లను ఎదుర్కొంటున్నదని, కఠిన ఆర్థిక విధానాల కారణంగా ఈక్విటీల రేటింగ్‌ను తగ్గించామని వివరించింది. కాగా, జూలై చివర్లోనూ దేశీయ ఈక్విటీలకు అండర్‌వెయిట్ రేటింగ్‌ను ప్రకటించింది. దేశీయ వృద్ధి అవకాశాలు బలహీనంగా ఉన్నాయంటూ గోల్డ్‌మన్ అప్పట్లో పేర్కొంది. అప్పటినుంచీ పరిస్థితుల్లో పెద్దగా మార్పులేవీ రాలేదంటూ తాజాగా వివరణ ఇచ్చింది. ఈ ఆర్థిక సంవత్సరంలో కంపెనీల ఆర్జన గతేడాదితో పోలిస్తే 5% పాయింట్లు తక్కువగా 8% వృద్ధికి పరిమితం కావచ్చునని అంచనా వేసింది.