'మోదీ ఇంటర్వ్యూ మేం ప్రచురించం'

ప్రధాని నరేంద్రమోదీ ఇంటర్వ్యూ ప్రచురించేందుకు ప్రముఖ ఫ్రెంచి పత్రిక లీ మాండె తిరస్కరించింది. ప్రశ్నలకు సమాధానాలు రాసి పంపుతారు తప్ప.. నేరుగా సమాధానాలు ఇవ్వబోరని మోదీ ప్రతినిధి చెప్పడంతో ఆ పత్రిక ఈ నిర్ణయం తీసుకుంది. ఈ విషయాన్ని లీ మాండె దక్షణాసియా కరస్పాండెంట్ జూలియన్ బోయిసూ ట్వీట్ చేశారు. దానికి బదులు లీ ఫిగారోతో ఈ మెయిల్ ఇంటర్వ్యూ కోసం ప్రధానమంత్రి కార్యాలయం చర్చలు జరిపినట్లు తెలుస్తోంది.

మూడు దేశాల పర్యటనలో భాగంగా ప్రధాని మోదీ గురువారం రాత్రి ఫ్రాన్సు వెళ్లారు. నాలుగు రోజుల ఈ పర్యటనలో ఆయన అధ్యక్షుడు ఫ్రాంకోయిస్ హోలండ్తో సమావేశమవుతారు, వ్యాపారవేత్తలతోనూ భేటీ అవుతారు. ఈ పర్యటనలో ప్రధాని ఫ్రెంచి అధ్యక్షుడితో కలిసి సియెన్ నదిలో బోటులో షికారుచేస్తూ చర్చిస్తారు. దీన్ని 'నావ్ పే చర్చా' అని చెబుతున్నారు. ఫ్రాన్సు పర్యటన పూర్తయిన తర్వాత ఆయన జర్మనీ, కెనడా దేశాల్లో పర్యటిస్తారు.