ఆ సినిమాలో నటిస్తే బాగుండేది: క్రికెటర్

ఆ సినిమాలో నటిస్తే బాగుండేది: క్రికెటర్

క్రికెట్ నేపథ్యంగా తాజాగా తమిళంలో వచ్చిన సినిమా చెన్నై 28. గల్లీ క్రికెట్ నేపథ్యంగా యువత జీవితాల్లో ఈ క్రీడ ఎలా భాగమయిందో వివరిస్తూ రూపొందిన ఈ సినిమాపై టీమిండియా క్రికెటర్ రవిచంద్రన్ అశ్విన్ మనస్సు పడ్డాడు. ఇటీవల ఐసీసీ క్రికెటర్ ఆఫ్ ది ఇయర్ గా నిలిచిన అశ్విన్ ఈ సినిమాపై ప్రశంసల జల్లు కురిపించాడు.

'చెన్నై 28 (2) చాలా మంచి సినిమా. నా జీవితం మొత్తాన్ని తిప్పి చూసుకున్నట్టు ఉంది ఈ సినిమాను చూస్తే. ఈ సినిమాలో నేను కూడా భాగమై ఉంటే బాగుండేది అనిపించింది' అని అశ్విన్ ట్వీట్ చేశాడు. 2007లో వచ్చిన చెన్నై-28 సినిమాకు ఈ సినిమా సీక్వెల్. ఈ సినిమాలో అశ్విన్ తో అతిథి పాత్ర చేయించాలని తాము కూడా అనుకున్నామని, అది కుదరలేదని, మూడో పార్టు గనుక తీస్తే అందులో అశ్విన్ ను తీసుకుంటామని చిత్ర దర్శకుడు వెంకట్ ప్రభూ తెలిపారు.