ఎస్పీ సుసరాపు శ్రీధర్‌ అమలాపురం టౌన్‌: జిల్లాలో సార్వత్రిక ఎన్నికల నేపథ్యంలో కేంద్రం నుంచి వచ్చిన బలగాలతో బందోబస్తు నిర్వహిస్తున్నారు. ఇప్పటికే జిల్లాకు రెండు దఫాలుగా 9 కంపెనీల కేంద్ర బలగాలు వస్తే, తాజాగా మరో 4 కంపెనీల కేంద్ర బలగాలు గురు, శుక్రవారాల్లో చేరుకున్నాయని ఎస్పీ సుసరాపు శ్రీధర్‌ వెల్లడించారు. రాజస్థాన్‌, జార్ఖాండ్‌, పశ్చిమ బెంగాల్‌ రాష్ట్రాల నుంచి ఈ బలగాలు వచ్చాయన్నారు. ఒక్కో కంపెనీకి దాదాపు 100 మంది సెక్యూరిటీ ఫోర్స్‌ ప్రతినిధులు ఉంటారన్నారు. ఈ లెక్కన జిల్లాకు కేంద్ర బలగాల ద్వారా 1,300 మంది వచ్చారు. గత నెల రోజులుగా వీరు జిల్లాలో ఎన్నికలపరంగా సమస్యాత్మక గ్రామాలు, పోలింగ్‌ కేంద్రాల ప్రాంతాల్లో స్థానిక పోలీసుల ఆధ్వర్యంలో కవాతులు నిర్వహిస్తున్నారు. ఎన్నికల్లో ఓటర్లు తమ ఓటు హక్కును నిర్భయంగా, ప్రశాంత వాతావరణంలో వినియోగించుకునేలా జిల్లా పోలీసులతోపాటు కేంద్ర బలగాలు భరోసాగా నిలుస్తున్నాయని ఎస్పీ శ్రీధర్‌ పేర్కొన్నారు. ఎన్నికల్లో ఎక్కడా అవాంఛనీయ సంఘటనలు తలెత్తకుండా ముందు జాగ్రత్తగా పటిష్టమైన ప్రణాళిక సిద్ధం చేశామని స్పష్టం చేశారు. జిల్లాలో ఎక్కడ ఏం జరిగినా పోలీసు శాఖకు క్షణాల్లో తెలిసేలా నెట్‌వర్క్‌ పనిచేస్తుందని వివరించారు. జిల్లా పోలీసు శాఖ, కేంద్ర బలగాలకు తోడు జిల్లాకు పోలీస్‌ అబ్జర్వర్‌గా నియమితులైన ఎంవీ చంద్రకాంత్‌ ఎన్నికలు సజావుగా నిర్వహించడానికి సహకారం అందిస్తున్నట్లు చెప్పారు. ఎన్నికల రోజున పోలింగ్‌ కేంద్రాల వద్ద వివాదాలు, తగాదాలు, ఘర్షణలు, తప్పిదాలు జరిగితే పోలీసులకు తక్షణమే సమాచారం ఇవ్వాలని ప్రజలకు ఎస్పీ విజ్ఞప్తి చేశారు.

జిల్లా కలెక్టర్‌ హిమాన్షు శుక్లా అమలాపురం రూరల్‌: సాధారణ ఎన్నికల నేపథ్యంలో పోలింగ్‌ ముగిసే సమయానికి 48 గంటల ముందు నుంచి ఎలక్ట్రానిక్‌ మీడియాల్లో ఎటువంటి రాజకీయ ప్రకటనలు జారీ చేయరాదని, వార్తా పత్రికల్లో రాజకీయ ప్రయోజనాల కోసం ప్రచురించదలచిన ప్రకటనలపై ఎంసీఎంసీ కమిటీ అనుమతి తప్పనిసరని కలెక్టర్‌ హిమాన్షు శుక్లా ఓ ప్రకటనలో స్పష్టం చేశారు. ఎన్నికల చివరి దశలో ప్రింట్‌ మీడియాలో అభ్యంతరకరమైన తప్పుదోవ పట్టించే ప్రకటనలు ప్రచురించరాదన్నారు. ఈ నెల 11వ తేదీ శనివారం సాయంత్రం 6 గంటల నుంచి ఎలక్ట్రానిక్‌ మీడియాలో రాజకీయ ప్రకటనలకు అనుమతులు లేవని స్పష్టం చేశారు. శాటిలైట్‌ చానళ్లు, కేబుల్‌ టీవీలు, రేడియో, బల్క్‌ మెసేజ్‌లు, ఈ– పేపర్లు, సామాజిక మాధ్యమాలు, సినిమా హాళ్లు, బహిరంగ ప్రదేశాల్లో ఉంచే ఎల్‌ఈడీ స్క్రీన్‌లు ఎలక్ట్రానిక్‌ మీడియా కిందకే వస్తాయన్నారు. పోటీ చేస్తున్న అభ్యర్థులు, వారి తరఫు వ్యక్తులు రాజకీయ ప్రయోజనం కోసం వార్తా పత్రికల్లో ఈ నెల 12, 13 తేదీల్లో ప్రచురించుకోవాలనే ప్రకటనలకు మీడియా ధ్రువీకరణ సమన్వయ కమిటీ (ఎంసీఎంసీ) వారికి రెండు రోజుల ముందుగా దరఖాస్తు చేసి అనుమతి పొందాలని ఆయన తెలిపారు. జిల్లా కలెక్టరేట్‌లో ఏర్పాటు చేసిన మీడియా సర్టిఫికేషన్‌ మానిటరింగ్‌ కమిటీని సంప్రదించి ముందస్తుగా అనుమతులు పొందాలని తెలియజేశారు. వార్తాపత్రికలు, ప్రింట్‌ మీడియా యాజమాన్యం కూడా ఈ విషయాన్ని గమనించి అభ్యర్థులు, ఇతరులు 12, 13 తేదీల్లో ఇచ్చే రాజకీయ ప్రచార ప్రకటనలు ప్రచురించే ముందు తప్పనిసరిగా ఎంసీఎంసీ నుంచి పొందిన అనుమతి ధ్రువీకరణ పత్రాన్ని పరిశీలించాలన్నారు. జిల్లా పరిధిలోని అభ్యర్థులు ఎన్నికల కమిషన్‌ మార్గదర్శకాలు కచ్చితంగా పాటించి, ఎన్నికల యంత్రాంగానికి సహకరించాలని కోరారు. దేశంలో అన్నిదశల్లో ఎన్నికలు పూర్తయ్యే వరకూ ఎగ్జిట్‌ పోల్స్‌ నిర్వహించి ప్రసారం చేయడం చట్ట రీత్యా విరుద్ధమని ఆయన తెలిపారు.

ఫ రాష్ట్ర దేవదాయ శాఖ ముఖ్య సలహాదారు శ్రీకాంత్‌ ఫ అమలాపురంలో బ్రాహ్మణుల ఆత్మీయ సమ్మేళనం అమలాపురం టౌన్‌: సీఎం జగన్‌ ప్రభుత్వంలో రాష్ట్రంలోని బ్రాహ్మణులకు రాజకీయ, సామాజిక గుర్తింపు లభించిందని రాష్ట్ర దేవదాయ శాఖ ముఖ్య సలహాదారు జ్వాలాపురపు శ్రీకాంత్‌ అన్నారు. అమలాపురం భూపయ్య అగ్రహారంలోని మంథా రాంబాబు ప్రాంగణంలో శుక్రవారం రాత్రి జరిగిన నియోజకవర్గ బ్రాహ్మణ ఆత్మీయ సమ్మేళన సభకు శ్రీకాంత్‌ ముఖ్య అతిథిగా హాజరయ్యారు. వైఎస్సార్‌ సీపీ బ్రాహ్మణ నాయకుడు మాచిరాజు రవికుమార్‌ అధ్యక్షతన జరిగిన ఈ సభకు అమలాపురం నియోజకవర్గ వైఎస్సార్‌ సీపీ అభ్యర్థి, మంత్రి పినిపే విశ్వరూప్‌, రాష్ట్ర బ్రాహ్మణ కార్పొరేషన్‌ చైర్మన్‌ పీకే రావు, రాష్ట్ర డైరెక్టర్‌ మంగళంపల్లి అంజిబాబు అతిథులుగా పాల్గొని ప్రసంగించారు. శ్రీకాంత్‌ మాట్లాడుతూ గత టీడీపీ ప్రభుత్వం బ్రాహ్మణులపై ఉక్కుపాదం మోపుతూ ఏ ఒక్క సమస్యను పరిష్కరించలేదని గుర్తు చేశారు. అదే ముఖ్యమంత్రి జగన్‌ బ్రాహ్మణుల పక్షపాతిగా 2019 ఎన్నికల్లో నలుగురు బ్రాహ్మణులకు పార్టీ టిక్కెట్లు ఇచ్చారని అన్నారు. అర్చకులకు భరోసాగా నిలిచారని చెప్పారు. ఇప్పుడు రాష్ట్రంలోని వివిధ నగరాల్లో కార్పొరేటర్లుగా, పట్టణాల్లో కౌన్సిలర్లుగా, పలు నామిటేడెడ్‌ పదవులతో ఉన్నారని గుర్తు చేశారు. జగన్‌ ఆశయంతో ముందుకు సాగుతుంటే.. చంద్రబాబు, పవన్‌కల్యాణ్‌లు ఆశతో వస్తున్నారన్నారు. ఈ తేడాను బ్రాహ్మణులు గమనించి వచ్చే ఎన్నికల్లో జగన్‌ను మరోసారి గెలిపించి ముఖ్యమంత్రిని చేయాలని శ్రీకాంత్‌ పిలుపునిచ్చారు. బ్రాహ్మణ కార్పొరేషన్‌ చైర్మన్‌ పీకే రావు, కార్పొరేషన్‌ డైరెక్టర్‌ అంజిబాబు మాట్లాడుతూ రాష్ట్రంలో బ్రాహ్మణులకు ముఖ్యంగా అర్చకులకు అందుతున్న సంక్షేమ పథకాల గురించి వివరించారు. విశ్వరూప్‌ను అత్యధిక మెజార్టీతో గెలిపించుకోవాలని పిలుపునిచ్చారు. మంత్రి విశ్వరూప్‌ మాట్లాడుతూ రూ.కోటితో అమలాపురంలో బ్రాహ్మణ కమ్యూనిటీ హాల్‌ నిర్మించనున్నట్లు వెల్లడించారు. అలాగే అమలాపురం మున్సిపాలిటీలో బ్రాహ్మణుల వాణి వినిపించేలా ఆ సామాజిక వర్గానికి కౌన్సిలర్‌, నామినేటెడ్‌, కోఆప్షన్‌ పదవులు ఇస్తానని హామీ ఇచ్చారు. బ్రాహ్మణ సమాజం తరఫున మంత్రి విశ్వరూప్‌, శ్రీకాంత్‌లను ఘనంగా సత్కరించారు. ఈ సభలో వైఎస్సార్‌ సీపీ రాష్ట్ర ప్రధాన కార్యదర్శి చెల్లుబోయిన శ్రీనివాసరావు, మున్సిపల్‌ వైస్‌ చైర్మన్‌ రుద్రరాజు నానిరాజు, వైఎస్సార్‌ సీపీ బ్రాహ్మణ నాయకులు మంథా శివ, పుట్రేవు చందు, పాలగుమ్మి వాసు, దిట్టకవి అమ్మాజీ, సంఘ ప్రతినిధులు మంథా రాంజీ, పేరి శర్మ పాల్గొన్నారు.

ఫ దాడుల నిరోధానికి ప్రత్యేక చర్యలు ఫ విజయవాడ సెంట్రల్‌ ఎమ్మెల్యే మల్లాది విష్ణు కాకినాడ: బ్రాహ్మణ సామాజికవర్గ అభివృద్ధి, సంక్షేమానికి ముఖ్యమంత్రి వైఎస్‌ జగన్‌మోహన్‌రెడ్డి గడచిన ఐదేళ్లలో ఎన్నో చర్యలు తీసుకున్నారని విజయవాడ సెంట్రల్‌ ఎమ్మెల్యే మల్లాది విష్ణు అన్నారు. స్థానిక డీ కన్వెన్షన్‌లో బ్రాహ్మణ సామాజిక వర్గానికి చెందిన కందాళ దుర్గ అధ్యక్షతన జరిగిన ఆత్మీయ సదస్సుకు సిటీ ఎమ్మెల్యే అభ్యర్థి ద్వారంపూడి చంద్రశేఖరరెడ్డి, మరో ఎమ్మెల్యే మల్లాది విష్ణు హాజరయ్యారు. రాయవరపు ప్రభాకర్‌, భమిడిపల్లి మూర్తి ఆధ్వర్యంలో ఏర్పాటైన ఈ సభలో మల్లాది విష్ణు మాట్లాడుతూ దేవాలయాలు, పురోహితులు, అర్చకులపై జరుగుతున్న దాడులను నియంత్రించేందుకు ప్రత్యేక చట్టం తీసుకొస్తామని చెప్పారు. ముఖ్యమంత్రి వైఎస్‌ జగన్‌మోహన్‌రెడ్డి పూజారుల జీతభత్యాలను రూ.5 వేల నుంచి రూ.15 వేలకు పెంచారని చెప్పారు. బ్రాహ్మణ వర్గీయులంతా వైఎస్సార్‌ సీపీ సిటీ ఎమ్మెల్యే అభ్యర్థి ద్వారంపూడి, ఎంపీ అభ్యర్థి చలమలశెట్టి సునీల్‌కు మద్దతుగా నిలవాలని కోరారు. చలమలశెట్టి సునీల్‌ మాట్లాడుతూ విజ్ఞాన వంతులైన బ్రాహ్మణులు వైఎస్సార్‌ సీపీకి అండగా నిలవాలని కోరారు. ద్వారంపూడి మాట్లాడుతూ సంప్రదాయాలకు పెద్దపీట వేస్తూ బ్రాహ్మణ వర్గాన్ని ముఖ్యమంత్రి వైఎస్‌ జగన్‌మోహన్‌రెడ్డి అక్కున చేర్చుకున్నారన్నారు. రాజకీయంగా సముచిత స్థానం కల్పించారన్నారు. బ్రాహ్మణ కల్యాణ మండపం నిర్మాణానికి చర్యలు తీసుకుంటామని హామీ ఇచ్చారు. బ్రాహ్మణ కార్పొరేషన్‌ చైర్మన్‌ కామేశ్వరరావు, సంఘ ప్రతినిధులు రాయప్రోలు కృష్ణమూర్తి, పోతాప్రగడ రవికుమార్‌, అజ్జరపు సత్యనారాయణ, శర్మ, పిండిప్రోలు రాజు పాల్గొన్నారు. బ్రాహ్మణుల సంక్షేమానికి సీఎం జగన్‌ పెద్దపీటకాకినాడ రూరల్‌: బ్రాహ్మణ సంక్షేమానికి ముఖ్యమంత్రి వైఎస్‌ జగన్‌మోహన్‌రెడ్డి పెద్దపీట వేశారని బ్రాహ్మణ కార్పొరేషన్‌ మాజీ చైర్మన్‌, విజయవాడ సెంట్రల్‌ ఎమ్మెల్యే మల్లాది విష్ణు అన్నారు. రమణయ్యపేట వైద్యనగర్‌లో వైఎస్సార్‌ సీపీ కాకినాడ రూరల్‌ ఎమ్మెల్యే అభ్యర్థి కురసాల కన్నబాబుకు మద్దతుగా ఆయన నివాసంలో సమావేశం ఏర్పాటు చేశారు. దీనికి బ్రాహ్మణ కార్పొరేషన్‌ చైర్మన్‌ పీకే రావు అధ్యక్షత వహించారు. ఈ సందర్భంగా మల్లాది విష్ణు మాట్లాడుతూ బ్రాహ్మణ సొసైటీ ద్వారా పెద్ద ఎత్తున వ్యక్తిగత, గ్రూపు రుణాలు మంజూరయ్యాయన్నారు. అర్చకులకు వంశపారంపర్య హక్కులు కల్పించి, పదవీ విరమణ తొలగించారని, తద్వారా ఓపిక ఉన్నంత వరకూ అర్చకత్వం చేసుకునే వెసులుబాటు లభించిందన్నారు. బ్రాహ్మణులకు సొసైటీ పేరిట బ్రాహ్మణ బ్యాంకు ఏర్పాటు చేసిన ఘనత వైఎస్సార్‌ సీపీ ప్రభుత్వానికే దక్కుతుందన్నారు. ఐదేళ్లలో రూ.784 కోట్లు బ్రాహ్మణ సంక్షేమానికి ఖర్చు చేశారని, టీడీపీ హయాంలో కేవలం రూ.200 కోట్లు మాత్రమే ఇచ్చారన్నారు. మృతి చెందిన కుటుంబాలకు గరుడ పథకంలో బ్రాహ్మణ కార్పొరేషన్‌ ద్వారా రూ.10 వేల ఆర్థిక సహాయం పెండింగ్‌ లేకుండా అందజేశారన్నారు. వైఎస్సార్‌ సీపీని మరోసారి గెలిపించేందుకు బ్రాహ్మణులు ఏకతాటిపైకి రావాలని కోరారు. సమావేశంలో వైఎస్సార్‌ సీపీ సీనియర్‌ నాయకుడు కురుసాల సత్యనారాయణ, బ్రాహ్మణ సంఘాల నాయకులు కందాల కనకదుర్గ, రవికుమార్‌, వరప్రసాద్‌ పాల్గొన్నారు.

వైఎస్సార్‌ సీపీ మహిళా విభాగం రాష్ట్ర అధ్యక్షురాలు కల్యాణి కాకినాడ రూరల్‌: టీడీపీకి ఓటమి భయం పట్టుకుందని, అందుకే బీసీ, ఎస్సీ, ఎస్టీ, మైనార్టీలపై దాడులకు తెగబడుతోందని వైఎస్సార్‌ సీపీ మహిళా విభాగం రాష్ట్ర అధ్యక్షురాలు, ఎమ్మెల్సీ వరుదు కల్యాణి అన్నారు. వైఎస్సార్‌ సీపీ కాకినాడ రూరల్‌ ఎమ్మెల్యే అభ్యర్థి కురసాల కన్నబాబుకు మద్దతుగా ప్రచారం చేసేందుకు వచ్చిన ఆమె శుక్రవారం మీడియాతో మాట్లాడారు. బీసీ సంఘాల నేత, రాజ్యసభ సభ్యుడు ఆర్‌.కృష్ణయ్యపై జరిగిన దాడిని ఖండిస్తున్నామన్నారు. టీడీపీ కూటమిని ఓడించేందుకు ప్రజలు డిసైడ్‌ అవ్వడంతో బాబుకు నిద్ర పట్టడం లేదన్నారు. ఇటీవలే హోం మంత్రి తానేటి వనితపై దాడి చేశారని, పిన్నెల్లి రామకృష్ణారెడ్డి సతీమణిపై దాడికి పాల్పడ్డారని చెప్పారు. విజయవాడలో బొండా ఉమా కుమారుడు దళితులపై దాడికి పాల్పడ్డారని, బనగానపల్లిలో వైఎస్సార్‌ సీపీ నేతలు, మహిళలపై టీడీపీ నాయకులు దాడికి తెగబడ్డారని గుర్తు చేశారు. టీడీపీ కూటమి ఎన్ని జిమ్మిక్కులు చేసినా ఈ సార్వత్రిక ఎన్నికల్లో వైఎస్సార్‌ సీపీ అఖండ విజయం సాధిస్తుందని కల్యాణి అన్నారు. సీఎం జగన్‌ నలుగురు బీసీలకు రాజ్యసభ సీట్లు ఇస్తే.. బాబు ఒక్క బీసీకి కూడా సీటు ఇవ్వకుండా బీసీ ద్రోహిగా నిలిచారన్నారు. నామినేటెడ్‌ పదవుల్లో 50 శాతం మహిళలకు ఇవ్వాలని సీఎం జగన్‌ చట్టం తీసుకువచ్చారన్నారు. సమావేశంలో వైఎస్సార్‌ సీపీ మహిళా విభాగం నేతలు జమ్మలమడక నాగమణి, వర్ధినీడి సుజాత తదితరులు పాల్గొన్నారు. ఆర్‌.కృష్ణయ్యపై దాడి సరికాదు రాజమహేంద్రవరం సిటీ: శ్రీకాళహస్తి నియోజకవర్గం ఏర్పేడులో ఎన్నికల ప్రచారం చేస్తున్న బీసీ సంక్షేమ సంఘం జాతీయ అధ్యక్షుడు, రాజ్యసభ సభ్యుడు డాక్టర్‌ ఆర్‌.కృష్ణయ్యపై టీడీపీ రాళ్ల దాడి చేయడం దారుణమని బీసీ సంక్షేమ సంఘ జాతీయ మహిళా అధ్యక్షురాలు డాక్టర్‌ అనుసూరి పద్మలత ఆగ్రహం వ్యక్తం చేశారు. ప్రజాస్వామ్యయుతంగా ఎన్నికల్లో గెలవాల్సిన టీడీపీ నాయకులు ప్రత్యర్థులపై భౌతిక దాడులకు దిగడం పిరికిపంద చర్య అని ఆమె మండిపడ్డారు.