నేడు ఈదురు గాలులతో కూడిన వర్షం

సాక్షి, హైదరాబాద్‌: రాష్ట్రంలో వర్షాలు ఇంకా ఊపందుకుంటున్నాయి. శనివారం ఉరుములు, మెరుపులతో పాటు తీవ్రమైన ఈదురుగాలులు వీస్తాయని హైదరాబాద్‌ వాతావరణ కేంద్రం హెచ్చరించింది. దాంతో పాటు మోస్తరు నుంచి భారీ వర్షాలు కురిసే అవకాశముందని పేర్కొంది. అన్ని జిల్లాల్లోనూ ఈ పరిస్థితి ఉంటుందని తెలిపింది.

కాగా, గత 24 గంటల్లో సంగారెడ్డిలో 5 సెంటీమీటర్ల వర్షం కురిసింది. పర్వతగిరి, నాగర్‌ కర్నూలు, భీంగల్, శాయంపేట, ఘన్‌పూర్, జఫర్‌ఘడ్‌లో 4 సెంటీమీటర్ల చొప్పున వర్షం కురిసింది. నారాయణపేట్, మహబూబాబాద్, పెద్దెముల్, బూర్గుంపాడు, సరూర్‌నగర్, సదాశివనగర్, వెంకటాపూర్, ధర్‌పల్లి, భీమదేవరపల్లిలో 3 సెంటీమీటర్ల చొప్పున వర్షపాతం నమోదైంది.