జూన్‌లోనే రుణాలు అందజేయాలి

రైతు సంక్షేమ సమితి రాష్ట్ర అధ్యక్షుడు   చంద్రకుమార్

జన్నారం : జూన్‌లోనే రుణాలు అందజేసి రైతులకు చేయూతనివ్వాలని రిటైర్డ్ హైకోర్టు న్యాయమూర్తి, తెలంగాణ రాష్ట్ర రైతు సంక్షేమ సమితి అధ్యక్షుడు చంద్రకుమార్ డిమాండ్ చేశారు. శనివారం మండలంలోని తిమ్మాపూర్‌లో రైతు సదస్సు ఏర్పాటు చేశారు. ఈ సదస్సులో ఆయన మాట్లాడుతూ రైతులకు రుణమాఫీ పూర్తిగా చేస్తేనే బ్యాంకర్లు రుణాలిస్తామని షరతులు విధిస్తున్నందున ప్రభుత్వం జూన్‌లోనే రుణాలందేలా చర్యలు చేపట్టాలన్నారు.

సబ్సీడి విత్తనాలు కూడ రైతులకు జూన్‌లోనే అందేలా చూడాలన్నారు. సమావేశంలో రిటైర్డ్ న్యాయమూర్తి కే. రాజన్న, సర్పంచులు అల్లం వెంకటరాజం, వెంకటస్వామి, నాయకులు ప్రకాశ్‌నాయక్, ప్రభుదాస్, బాపన్న, వెంకట్ పాల్గొన్నారు.