సీమాపురి నియోజకవర్గం

సాక్షి, న్యూఢిల్లీ: అన్నా హజారే ప్రారంభించిన అవినీతి వ్యతిరేక ఉద్యమంతో ప్రజల్లోకి వచ్చిన కేజ్రీవాల్ గతంలో సీమాపురిలో చేపట్టిన నిరాహార దీక్ష ఇప్పుడు ఆ నియోజకవర్గ ఎన్నికల సమీకరణాలనే మార్చేసింది. కాంగ్రెస్ కంచుకోటగా చెప్పుకునే ఈ నియోజకవర్గంలో బీజేపీ కూడా గట్టి పోటీనిచ్చే స్థాయిలోనే ఉండేది. ఈ రెండు పార్టీల మధ్యే పోటీ ఉంటుందని భావించినప్పటికీ కేజ్రీవాల్ దీక్ష తర్వాత ఇక్కడ పరిస్థితి మారిపోయింది. ఇప్పుడు సీమాపురిలో లక్షన్నర మంది ఓటర్లు ఏ పార్టీ అభ్యర్థిని గెలిపిస్తారన్నది ఆసక్తికరంగా మారింది. ప్రస్తుతం ఈ నియోజకవ ర్గానికి ప్రాతినిధ్యం వహిస్తున్నది కాంగ్రెస్ ఎమ్మెల్యే అయినా ఆమ్ ఆద్మీ పార్టీ రంగ ప్రవేశంతో ఈ నియోజకవర్గంలో ఆ పార్టీ గెలుపు అవకాశాలు కూడా మెరుగయ్యాయి. ఈ నియోజకవర్గంలో అభ్యర్థుల గెలుపుఓటములను జాటవ్, ముస్లిం ఓటర్లు నిర్ణయిస్తారు. అధిక విద్యుత్తు చార్జీలకు నిరసనగా ఆమ్ ఆద్మీ పార్టీ నేత అర్వింద్ కేజ్రీవాల్ ఈ నియోజకవర్గంలోనే నిరాహారదీక్ష నిర్వహించారు.