'మెస్సీ గోల్స్ చేయకపోయినా సంతోషంగా ఉంది'

కాన్సెప్సియన్ (చిలీ):కోపా అమెరికా ప్రపంచకప్ లో అర్జెంటీనా ఫైనల్ కు చేరడం పట్ల కోచ్ జెరార్డో మార్టిన్ సంతోషం వ్యక్తం చేశాడు. మంగళవారం పరాగ్వేతో జరిగిన సెమీ ఫైనల్ పోరులో మెస్సీ చెలరేగడంతో అర్జెంటీనా తుదిపోరుకు అర్హత సాధించింది. అయితే ఈ మ్యాచ్ లో మెస్సీది కీలకపాత్రే కానీ వ్యక్తిగతంగా గోల్స్ మాత్రం అతని ఖాతాలో లేవు. జట్టు సహచరులకు పాస్ లను అందిస్తూ జట్టు ఐదు గోల్స్  సాధించడంలో మాత్రం ప్రముఖ పాత్ర పోషించాడు. దీనిపై ఆ జట్టు కోచ్ మార్టిన్ తనదైన శైలిలో స్పందించాడు.

 

తమ స్టార్ ఆటగాడు గోల్స్ చేయకపోయినా తనవంతు పాత్రను సమర్ధవంతంగా నిర్వర్తించాడని కొనియాడాడు. డీప్ ఫార్వర్డ్ లో విఫలమైన మెస్సీ ఆ తరువాత మిడ్ ఫీల్డ్ కు వెళ్లాడని.. ఆ క్రమంలోనే బంతిని ప్రత్యర్థి జట్టుకు అందనీయకుండా పాస్ లు అందించిన తీరు అమోఘమన్నాడు. దీంతో మెస్సీ గోల్స్  చేయడంలో ప్రత్యక్ష పాత్ర పోషించకపోయినా..  తమకు సంతోషాన్నిచ్చాడని మార్టిన్ పేర్కొన్నాడు.  శనివారం జరిగే తుదిపోరులో చిలీతో అర్జెంటీనా ఆమీతుమీ తేల్చుకోనుంది.