స్వర్ణం నెగ్గిన షూటర్‌ ఇలవేనిల్‌ 

జూనియర్‌ ప్రపంచకప్‌ షూటింగ్‌ టోర్నమెంట్‌లో భారత యువ షూటర్‌ ఇలవేనిల్‌ వలారివాన్‌ స్వర్ణ పతకం సాధించింది. జర్మనీలో జరుగుతున్న ఈ టోర్నీలో ఆమె మహిళల 10 మీటర్ల ఎయిర్‌ రైఫిల్‌ ఈవెంట్‌లో చాంపియన్‌గా నిలిచింది. ఫైనల్లో ఆమె 251.7 పాయింట్లు స్కోరు చేసింది. ఓవరాల్‌గా ఈ టోర్నీలో భారత్‌కిది మూడో స్వర్ణం కావడం విశేషం. క్వాలిఫయింగ్‌లో ఇలవేనిల్‌ 630.5 పాయింట్లతో టాపర్‌గా నిలిచింది. భారత్‌కే చెందిన మెహులీ ఘోష్‌ ఫైనల్‌ చేరినా ఆమె ఆరో స్థానంతో సరిపెట్టుకుంది.