TV
యశవంతపుర: టిఫిన్ బాక్స్ను శుభ్రం చేయడంపై విమానం పైలట్, క్యాబిన్ క్రూ సిబ్బందికి మధ్య జరిగిన గొడవ కారణంగా ఎయిరిండియా విమానం రెండు గంటలు ఆలస్యంగా బయల్దేరింది. సోమవారం బెంగళూరు నుంచి కోల్కతా వెళ్లాల్సిన ఏఐ–772 విమానంలో ఈ ఘటన జరిగింది. ఘటనను సీరియస్గా తీసుకున్న ఎయిరిండియా విచారణకు రావాల్సిందిగా పైలట్, సిబ్బందిని ఆదేశించింది. మొదట తెచ్చిన లంచ్ చల్లబడటం వల్ల దీనిని వేడి చేసి ఇవ్వాలని కెప్టెన్ విమానంలోని ఓ పురుష అటెండెంట్కు సూచించారు. సిబ్బంది అలాగేనని వేడి చేసి తెచ్చిచ్చారు. లంచ్ ఆరగించిన కెప్టెన్, ఖాళీ బాక్స్ను శుభ్రం చేసి ఇవ్వాలని ఓ సిబ్బందిని కోరారు. పదేపదే పనులు పురమాయిస్తున్నారంటూ సిబ్బంది కెప్టెన్తో ఘర్షణకు దిగాడు. ఇద్దరి మధ్య వాగ్వాదం తీవ్రస్థాయికి చేరింది. కెప్టెన్ అసలు పనిని వదిలేసి గొడవలో మునిగిపోవడంతో విమానం రెండు గంటలు నేలమీదనే ఉండిపోయింది.
