ఈ ఫోన్... ఆటవస్తువు కూడా!

స్మార్ట్‌ఫోన్లు వచ్చాక, వాటిలో ఒక్కో సౌకర్యం ఒక్కొక్కరికి నచ్చుతోంది. కానీ, స్మార్ట్‌ఫోన్‌లలో ఉండే ఆటలాడుకొనే వసతి మాత్రం చాలామందికి నచ్చే విషయం. కాస్తంత ఖాళీగా ఉండి, విసుగు అనిపిస్తే చాలు - ఫోన్ తీసుకొని, ఆటలు ఆడుకొనేవారు చాలామంది. పిల్లలకు వినోదం కోసం ఈ మధ్య స్మార్ట్‌ఫోన్లు ఇచ్చి  గేమ్స్ తెరిచి ఇవ్వడం పెద్దలకు అలవాటుగా మారింది. మరి, ఇంతకీ స్మార్ట్‌ఫోన్లలో గేమ్స్ ఎక్కువగా ఆడేది ఎవరనుకుంటున్నారు? సాధారణంగా ఎవరమైనా సరే ‘ఏముంది! పిల్లలే!’ అని జవాబిస్తాం. కానీ, అసలు నిజం వేరు. ప్రపంచవ్యాప్తంగా ఈ ఫోన్లను గేమ్స్ కోసం ఎక్కువగా వినియోగిస్తున్నది - ఆడవాళ్ళట! ఈ సంగతి తాజా సర్వేలో వెల్లడైంది. ప్రపంచం నలుమూలల్లోని 12 దేశాల్లో ఫేస్‌బుక్ వాళ్ళు సర్వే చేసి మరీ, ఈ సంగతి బయటపెట్టారు.

ఇలా ఫోన్లను గేమ్స్‌కి వాడుతున్నవాళ్ళలో 47 శాతం మంది స్త్రీలే అట! ఫేస్‌బుక్‌కు చెందిన డేటా ఎనాలసిస్ టీమ్ ‘ఫేస్‌బుక్ ఐ.క్యు’ వాళ్ళు ఒక మార్కెట్ టీమ్ ద్వారా ఈ సర్వే చేయించారు. ఉత్తర అమెరికా, లాటిన్ అమెరికా, యూరప్, మధ్య ప్రాచ్యం, ఆసియాలలో పద్ధెనిమిదేళ్ళ పైబడిన వాళ్ళలో ఈ సర్వే చేశారు. గమ్మత్తేమిటంటే, స్మార్ట్‌ఫోన్లు వాడేవారిలో 71 శాతం మంది దాన్ని గేమింగ్ డివైజ్‌గా వాడుతున్నట్లు ఈ సర్వేలో తేలింది.