8 శాతం పెన్షన్‌ స్కీమ్‌ లాంచ్‌, కేవలం వారికే..

ప్రధాన్‌ మంత్రి వయా వందన యోజన(పీఎంవీవీవై) పెన్షన్‌ స్కీమ్‌ను ఆర్థికమంత్రి అరుణ్‌జైట్లీ శుక్రవారం అధికారికంగా ప్రారంభించారు. ఈ స్కీమ్‌ కేవలం 60ఏళ్లు, ఆపైబడిన సీనియర్‌ సిటిజన్లకు మాత్రమే. ఈ స్కీమ్‌ కింద సీనియర్‌ సిటిజన్లకు(60ఏళ్లు, ఆపైబడిన వారికి) ప్రభుత్వం 10ఏళ్ల పాటు గ్యారెంటీ వడ్డీని ఇవ్వనుంది. ప‌దేళ్ల కాలం పాటు ఉండే ఈ పాల‌సీలో పాలసీదారు కోరుకున్న విధంగా ఒక నెల‌, మూడు నెల‌లు, ఆరు నెల‌లు, ప‌న్నెండు నెల‌ల ప‌ద్ధ‌తిలో పెన్షన్‌ అందుతుంది. 2017 మే 4 నుంచి ఈ స్కీమ్‌ ఆఫర్‌ చేయడాన్ని ఎల్‌ఐసీ ప్రారంభించింది. 2018 మే 3 వరకు ఇది అందుబాటులో ఉంటుంది. ఎల్‌ఐసీ ద్వారా ఆఫ్‌లైన్‌ లేదా ఆన్‌లైన్‌లోనూ ఈ స్కీమ్‌ను కొనుగోలుచేసుకోవచ్చు. ఈ స్కీమ్‌లో ఏడాది పెన్షన్‌ ప్లాన్‌ను ఎంపికచేసుకుంటే, కనీసం 1,44,578 రూపాయలను ఇన్వెస్ట్‌ చేయాల్సి ఉంటుంది. గరిష్టంగా రూ.7,22,892ను ఇన్వెస్ట్‌ చేయాలి. నెలవారీ పెన్షన్‌ ప్లాన్‌ను ఎంపికచేసుకున్న పక్షంలో కనీసం రూ.1,50,000, గరిష్టంగా రూ.7,50,000 పెట్టుబడులుగా పెట్టాలి.