ఆవేదన వినండి.. ఆదుకోండి

బత్తలపల్లి/ముదిగుబ్బ: ‘‘తీవ్ర వర్షాభావంతో ఖరీఫ్‌ సీజన్‌లో సాగు చేసిన పంటలన్నీ ఎండిపోయాయి. పంటల సాగుకు పెట్టిన పెట్టుబడులు చేతికి అందక అప్పులపాలయ్యాం. తాగడానికి నీరు, మూగజీవాలకు మేత లేక అల్లాడిపోతున్నాం. ఆరు దశాబ్దాల కాలంలో ఇలాంటి కరవు ఎన్నడూ చూడలేదు..మా కష్టాలు కళ్లారా చూడండి...మానవత్వంతో ఆలోచించి ఆదుకోండి’’అంటూ కేంద్ర కరువు అంచనా బృందం ఎదుట రైతులు కన్నీటిపర్యంతమయ్యారు. రాష్ట్ర ప్రభుత్వం కరువు మండలాలుగా ప్రకటించిన నేపథ్యంలో వాస్తవ పరిస్థితులను పరిశీలించేందుకు కేంద్ర బృందం మంగళవారం బత్తలపల్లి మండలంలో పర్యటించింది. మండలంలోని బత్తలపల్లి, గుమ్మల్లకుంట, దంపెట్ల, రామాంజులపల్లి గ్రామాలలో కేంద్ర వ్యవసాయ, రైతు సంక్షేమ మంత్రిత్వ శాఖ జాయింట్‌ సెక్రటరీ చిన్మయ్‌ గోట్మారే ఆధ్వర్యంలో 10 మంది అధికారులు పర్యటించి రైతులతో వివరాలు సేకరించారు. వీరికి కలెక్టర్‌ శ్యాంప్రసాద్‌ ఆధ్వర్యంలో జిల్లా అధికారులు, మండల అధికారులు స్వాగతం పలికారు.

ఎండిన పంటల పరిశీలన

కేంద్ర బృందం సభ్యులు తొలుత బత్తలపల్లి వద్ద అప్పరాచెరువు గ్రామానికి చెందిన అక్కిం నాగమ్మ సాగు చేసిన ఆముదం, వేరుశనగ, కంది పొలాలను పరిశీలించారు. అదేవిధంగా గుమ్మల్లకుంట వద్ద వరిమడుగు నాగిరెడ్డి తోటలో ఎండుతున్న చీనీ చెట్లును పరిశీలించారు. దంపెట్ల వద్ద నరసింహులు సాగు చేసిన ఉలవ పంటను పరిశీలించి రైతులతో వివరాలు సేకరించారు. రామాంజులపల్లి వద్ద నీరు లేక ఎండిపోయిన చెరువును పరిశీలించారు. ఈ సందర్భంలోనే పలువురు రైతులు కేంద్ర బృందం ఎదుట కన్నీటి పర్యంతమయ్యారు. లోటు వర్షపాతంతో పెట్టుబడులు కూడా చేతికందలేదన్నారు. వేరుశనగ పంటను సాగు చేయగా రెండు నెలలు తీవ్ర వర్షాభావం కారణంగా పంట ఎండిపోయిందని, దీంతో పంటను తొలగించి ప్రత్యామ్నాయంగా ఉలవ, కంది, ఆముదం పంటలను సాగు చేసినా ఫలితం లేకపోయిందని వివరించారు. ఇక బత్తలపల్లి మండలంలో సాధారణ వర్షపాతం 321.8 మి.మీ కాగా, 2026 ఖరీఫ్‌ సీజన్‌లో 162.2 మి.మీ వర్షపాతం మాత్రమే నమోదైనట్లు వ్యవసాయశాఖ అధికారులు తెలిపారు. వర్షపాతం లోటు కారణంగా వేరుశనగ, కంది, ఆముదం, మొక్కజొన్న, ఉలవ తదితర పంటలు తీవ్రంగా దెబ్బతిన్నాయని జిల్లా వ్యవసాయ అధికారి కృష్ణయ్య కేంద్ర బృందానికి వివరించారు.

చెరువులకు నీరిచ్చి ఆదుకోండి

ధర్మవరం చెరువుతో పాటు ఇతర జలాశయాల నుంచి బత్తలపల్లి మండలంలోని చెరువులకు, చిత్రావతి నదికి నీరు విడుదల చేయించి రైతాంగాన్ని, మూగజీవాలను ఆదుకోవాలని పలువురు రైతులు కేంద్ర బృందం సభ్యులను కోరారు. దంపెట్ల సమీపంలో ఏర్పాటు చేసిన సమావేశంలో పలువురు రైతులు, గొర్రెల కాపర్లు, ఉపాధి కూలీలు నరసింహులు, వెంకటనాయుడు, చంద్రశేఖర్‌నాయుడు, వెంకటరమణ, దరూరి రామకృష్ణ, నాగప్ప, నారాయణస్వామి, రాఘవంపల్లి రామకృష్ణ మాట్లాడారు. లోటు వర్షపాతం కారణంగా చెరువులు, కుంటలలో నీరు లేక రైతులు, మూగజీవాలు తీవ్ర ఇబ్బందులు పడుతున్నట్లు వారికి వివరించారు. చివరకు తాగేందుకు కూడా నీరు లభించే పరిస్థితి లేదన్నారు. అందువల్ల హంద్రీ నీవా, చిత్రావతి రిజర్వాయర్‌ నుంచి నీరు విడుదల చేయాలని కోరారు. స్పందించిన కలెక్టర్‌ జిల్లాలో 1,180 చెరువులుంటే అందులో 160 చెరువుల్లో మాత్రమే నీరుందన్నారు. సమస్యకు పరిష్కారం చూపుతామన్నారు. వీబీజీరాంజీ పథకం ద్వారా ఇప్పటికే వంద రోజులు పనులు పూర్తి చేసిన కుటుంబాలకు అదనంగా 50 రోజులు పని దినాలు కల్పించాలని కేంద్ర బృందం సభ్యులను కోరారు. అనంతరం కేంద్రబృందం సభ్యులు మాట్లాడుతూ... ఉద్యాన తోటలు, వ్యవసాయ పంటలు, పశుగ్రాసం కొరత సంబంధించిన విషయాలు క్షేత్రస్థాయిలో పరిశీలించామని, నివేదికను కేంద్ర ప్రభుత్వానికి అందజేసి రైతులను ఆదుకోవాల్సిన ఆవశ్యకత గురించి వివరిస్తామని హామీ ఇచ్చారు. కార్యక్రమంలో వ్యవసాయ శాఖ డైరెక్టర్‌ మంజీర్‌ జిలాని సమూన్‌, మహాలనోబిస్‌ నేషనల్‌ క్రాప్‌ ఫోర్‌కాస్ట్‌ సెంటర్‌ అసిస్టెంట్‌ డైరెక్టర్‌ ప్రభాకాంతి, గ్రామీణాభివృద్ధి శాఖ అండర్‌ సెక్రటరీ వినోద్‌సామంత్‌, కేంద్ర ఆర్థిక వ్యయశాఖ డిప్యూటీ డైరెక్టర్‌ పంకజ్‌ పహాడియా, మానిటరింగ్‌ అండ్‌ అప్రైజల్‌ డైరెక్టరేట్‌ డైరెక్టర్‌ సతీష్‌ సీమకుర్తి, ఆయిల్‌ సీడ్స్‌ డెవలప్‌మెంట్‌ డైరెక్టరేట్‌ డైరెక్టర్‌ పొన్నుస్వామి, నీతి అయోగ్‌ సీనియర్‌ రీసెర్చ్‌ ఆఫీసర్‌ అనురాధ బటానా, గ్రామీణ తాగునీటి సరఫరా విభాగం ప్రతినిధి ధీరేంద్రకుమార్‌, కేంద్ర ఆహార, ప్రజా పంపిణీ శాఖ అండర్‌ సెక్రటరీ ప్రదీప్‌కుమార్‌, కేంద్ర పశుసంవర్ధక, పాడిపరిశ్రమ శాఖ అధికారి సాక్షి భదౌరియా, అధికారులు, నాయకులు పాల్గొన్నారు.

కంది, ఉలవ పంటల పరిశీలన

అనంతరం కేంద్ర బృందం సభ్యులు ముదిగుబ్బ మండలంలో పర్యటించారు. ముదిగుబ్బకు చెందిన నారాయణస్వామి సాగు చేసిన కంది, ఉలవ పంటలను పరిశీలించారు. వర్షాభావంతో 30 ఎకరాల్లో వేసిన కంది పంట ఎండిపోయిందని యాకర్లకుంటపల్లికి చెందిన రైతు కేంద్ర బృందానికి వివరించారు. వర్షాలు కురవక, బోర్లు ఎండిపోయి ఉలవ, టమాట, దానిమ్మ పంటలు తీవ్రంగా దెబ్బతిన్నాయని సంకేపల్లి చెందిన రమేష్‌నాయుడు కేంద్ర బృందం సభ్యుల దృష్టికి తీసుకొచ్చారు.

ఉపాధి కూలీలతో ముఖాముఖి

కదిరి అర్బన్‌: కరువు అంచనా వేసేందుకు జిల్లాలో పర్యటిస్తున్న కేంద్ర బృందం సభ్యులు కదిరి మండల పరిధిలోని నడింపల్లి గ్రామంలో ఉపాధి హామీ కూలీలతో ముఖాముఖి అయ్యారు. కూలీల సమస్యలను అడిగి తెలుసుకున్నారు. తమకు ఉపాధి కూలీ రోజుకు రూ. 400 ఇవ్వాలని, అలాగే పని రోజులు పెంచాలని కేంద్ర బృందాన్ని కూలీలు కోరారు.

గుమ్మల్లకుంట వద్ద ఎండిపోయిన చీనీ తోటలో రైతుతో మాట్లాడుతున్న కేంద్ర బృందం అధికారులు, రైతులనుద్దేశించి మాట్లాడుతున్న కలెక్టర్‌ శ్యాంప్రసాద్‌

ఆరు దశాబ్దాల్లో ఇలాంటి కరువు చూడలేదు

పెట్టుబడులు సైతం చేతికందక

అప్పులపాలయ్యాం

తాగేందుకు నీరు, జీవాలకు

మేత కరువైంది

కేంద్ర బృందం ఎదుట రైతుల గోడు

చెరువులకు నీరిచ్చి ఆదుకోవాలని

వేడుకోలు