వరాలిమ్ము... వరలక్ష్మి

Aug 9 2025 8:01 AM | Updated on Aug 9 2025 8:01 AM

శ్రావణ శుక్రవారం సందర్భంగా సంప్రదాయాలను అనుసరించి వరలక్ష్మి వ్రతాన్ని ఘనంగా నిర్వహించారు. శుభదాయకమైన ఈ పవిత్రమైన రోజున మహిళలు తెల్లవారుజామునే లేచి కలశాలను అలంకరించి, అష్టైశ్వర్యాలు కలిగించే అష్టలక్ష్ములను ఆరాధించారు. సంప్రదాయ వస్త్రధారణతో ఆలయాలను సందర్శించారు. నెల్లూరు నగరంలోని రాజరాజేశ్వరి ఆలయం, ఇరుకలల పరమేశ్వరి ఆలయం, ఫత్తేఖాన్‌పేటలోని మహాలక్ష్మి ఆలయం, మాగుంటలేవుట్‌లోని శ్రీ వేంకటేశ్వరస్వామి ఆలయాలు భక్తులతో కిక్కిరిసి పోయాయి. ఆలయాలన్నీ రంగురంగుల పుష్పాల తోరణాలతో అంగరంగ వైభవంగా అలంకరించారు. మహిళలు అమ్మవారికి కుంకుమ పూజలు చేసి, సువాసిత ద్రవ్యాలతో అభిషేకాలు నిర్వహించారు. ఇంటింటా వరలక్ష్మి వ్రతాన్ని ఆచరించి, కలశాలను స్వర్ణలంకారాలతో, పుష్పాలతో అలంకరించి వ్రతకథ పఠించారు. కుటుంబ శ్రేయస్సు, భర్త దీర్ఘాయువు, సంతానాభివృద్ధి కోసం మహిళలు దీక్షగా ఉపవాసం ఆచరించి అమ్మవారిని ప్రార్థించారు. పలు ఆలయాల్లో హారతులు, మంగళకరమైన భక్తిగీతాలతో ఆధ్యాత్మికత నిండిపోయింది. వరలక్ష్మి వ్రతం భక్తుల జీవితాల్లో సిరిసంపదలు నింపాలని మహిళలు ఆకాంక్షించారు.

– సాక్షి ఫొటోగ్రాఫర్స్‌, నెల్లూరు