‘పచ్చి’దగా

సుల్తానాబాద్‌లోని ఓ రైస్‌మిల్లు ఎదుట పచ్చిధాన్యం ఆరబెడుతున్న హమాలీలు

పెద్దపల్లి: ఆరుగాలం కష్టపడి పండించిన పంటలను అమ్ముకునే సమయంలో అన్నదాతలకు వ్యాపారుల రూపంలో కొత్త కష్టాలు ఎదురవుతున్నాయి. ప్రస్తుతం వరి కోతలు ప్రారంభం కావడంతో పచ్చిధాన్యం కొనుగోళ్లపై ప్రైవేట్‌ వ్యాపారులు కన్నేశారు. ఎల్‌నినో ప్రభావంతో సన్నరకం బియ్యం ధరలు పెరుగుతాయనే అంచనాతో రైస్‌మిల్లర్లు ధాన్యాన్ని నిల్వ చేసుకునేందుకు పోటీ పడుతున్నారు. తొలుత అధిక ధరలు ప్రకటించి రైతులను ఆకర్షించిన వ్యాపారులు.. కోతలు ముమ్మరమయ్యాక సిండికేట్‌గా మారి ధరలు తగ్గిస్తున్నారనే ఆరోపణలు వినిపిస్తున్నాయి.

ప్రభుత్వ కొనుగోలు కేంద్రాలు

అందుబాటులోకి రాక..

ఉమ్మడి కరీంనగర్‌ జిల్లాలో అత్యధిక రైస్‌ మిల్లులు ఉన్న ప్రాంతం సుల్తానాబాద్‌. దీంతో పొరుగు జిల్లాల నుంచి కూడా ధాన్యం పెద్దఎత్తున ఇక్కడకు చేరుతోంది. దసరాకు ముందు క్వింటాల్‌ పచ్చివడ్లు క్వింటాల్‌కు రూ.3,200 వరకు ధర చెల్లించిన వ్యా పారులు.. పండుగ తర్వాత రూ.300 వరకు తగ్గించి రూ.2,900కే కొనుగోలు చేస్తున్నట్లు సమాచారం. ప్రభుత్వ ధాన్యం కొనుగోలు కేంద్రాలు ఇంకా ప్రా రంభం కాకపోవడంతో రైతులు ప్రత్యామ్నాయం లే క ప్రైవేట్‌ వ్యాపారులను ఆశ్రయించాల్సి వస్తోంది.

భయపెడుతున్న ఎల్‌నినో

ఎల్‌నినో ప్రభావం, భూగర్భ జలమట్టాలు పడిపోవడం, సాగు విస్తీర్ణం తగ్గడం వంటి పరిణామాలతో ఈ వానాకాలం దిగుబడులపై రైతుల్లో ఆందోళన నెలకొంది. ఈ నేపథ్యంలో పంట చేతికొచ్చే సమయంలోనే ధాన్యంధరలు తగ్గుతుండటంతో అన్నదాతలు ఆర్థికంగా నష్టపోయే ప్రమాదం ఉంది. ప్రభుత్వ కొనుగోలు కేంద్రాలు అందుబాటులోకి రాకముందే ప్రైవేట్‌ వ్యాపారులు రంగంలోకి దిగి పచ్చిధాన్యం కొనుగోళ్లను వేగవంతం చేశారు. తొలుత పోటీపడి ధరలు ప్రకటించిన వ్యాపారులు.. ఆ తర్వాత ఒకేరకమైన ధరకు పరిమితమవుతున్నారనే విమర్శలు ఉన్నాయి.

అత్యధిక మిల్లులు సుల్తానాబాద్‌లోనే..

ఉమ్మడి జిల్లాలోనే అత్యధిక రైస్‌ మిల్లులు సుల్తానాబాద్‌లో ఉన్నాయి. దీంతో చుట్టుపక్కల జిల్లాల నుంచి ధాన్యం లారీల ద్వారా ఇప్పటికే రైస్‌మిల్లులకు చేరుతోంది. భవిష్యత్తులో సన్నరకం బియ్యం ధరలు పెరుగుతాయనే అంచనాతో వ్యాపారులు సన్నరకం ధాన్యాన్ని కొనుగోలు చేసి నిల్వ చేసుకుంటున్నట్లు తెలుస్తోంది.

గ్రామాల్లో దళారుల హడావుడి

రైస్‌మిల్లర్లు నేరుగా రైతుల వద్దకు వెళ్లకుండా గ్రామాల్లోని దళారుల ద్వారా పచ్చివడ్లు కొనుగోలు చేస్తున్నారనే ఆరోపణలు ఉన్నాయి. రైతుల నుంచి సేకరించిన పచ్చిధాన్యాన్ని రైస్‌మిల్లులకు తరలించే క్రమంలో క్వింటాల్‌కు సుమారు రూ.100 వరకు కమీషన్‌ పొందుతున్నట్లు సమాచారం. దీంతో రైతుకు దక్కాల్సిన ధరలోనూ కోత పడుతోంది. మరోవైపు ప్రభుత్వ కొనుగోలు కేంద్రాలు ఆలస్యంగా ప్రారంభమైతే పచ్చిధాన్యాన్ని నిల్వ ఉంచలేని రైతులు తక్కువ ధరకే విక్రయించాల్సి వస్తోందని ఆవేదన వ్యక్తం చేస్తున్నారు.

ప్రభుత్వ కొనుగోళ్లపై రైతుల ఆశలు

ప్రైవేట్‌ వ్యాపారుల ధరల నియంత్రణకు అడ్డుకట్ట వేయాలంటే ప్రభుత్వం కొనుగోలు కేంద్రాలను త్వరగా అందుబాటులోకి తీసుకురావాలని రైతులు కోరుతున్నారు. ధాన్యంలో తేమశాతం, నాణ్యతా ప్రమాణాలపై స్పష్టత ఇవ్వడంతోపాటు మద్దతు ధర, సన్నాల బోనస్‌ ప్రయోజనాలు అర్హులైన రైతులకు అందేలా చర్యలు తీసుకోవాలని విజ్ఞప్తి చేస్తున్నారు. వ్యాపారులు సిండికేట్‌గా ఏర్పడి ధరలు తగ్గిస్తున్నారనే ఆరోపణలపై అధికారులు విచారణ చేపట్టి, రైతులకు గిట్టుబాటు ధర లభించేలా చూడాల్సిన అవసరమూ ఉంది.

క్వింటాల్‌పై రూ.300 నష్టం

ప్రభుత్వం ఈ వానాకాలానికి సాధారణ రకం ధాన్యం క్వింటాల్‌కు రూ.2,321, ఏ–గ్రేడ్‌ ధాన్యానికి రూ.2,369 మద్దతు ధర ప్రకటించింది. సన్నరకాలకు అదనంగా క్వింటాల్‌పై రూ.500 బోనస్‌ వర్తింపజేస్తోంది. దీంతో రైతులు ప్రభుత్వ కొనుగోళ్లపై ఆశలు పెట్టుకున్నారు. అయితే పచ్చిధాన్యంలో తేమశాతం, నాణ్యత, ఆరబెట్టే ఖర్చులను సాకుగా చూపుతూ వ్యాపారులు ధరలు తగ్గిస్తున్నారు. దసరాకు ముందు రూ.3,200 పలికిన క్వింటా ధర ప్రస్తుతం రూ.2,900కు పడిపోవడంతో క్వింటాకు రూ.300 చొప్పున ఆదాయం తగ్గుతోంది. దిగుబడి ఎక్కువగా ఉన్న రైతులకు ఈ వ్యత్యాసం గణనీయమైన నష్టాన్ని కలిగిస్తుందని అంటున్నారు.

దసరాకు ముందు ధర రూ.3,200

పండగ తర్వాత క్వింటాల్‌పై రూ.300 కోత

కొనుగోలు కేంద్రాలు తెరవకముందే వ్యాపారుల సిండికేట్‌

దళారుల ద్వారా యథేచ్ఛగా రైస్‌ మిల్లర్ల పచ్చివడ్ల కొనుగోలు