ఉద్యాన రాయితీలను వినియోగించుకోవాలి

పాన్‌గల్‌: రాష్ట్ర ప్రభుత్వం ఆయిల్‌పాం, పండ్ల తోటల పెంపకం, పందిరి సాగు, మల్చింగ్‌, డ్రిప్‌, కూరగాయాల నారు తదితర పథకాలకు రాయితీలను అందిస్తోందని.. రైతులు సద్వినియోగం చేసుకోవాలని జిల్లా ఉద్యాన అధికారి విజయభాస్కర్‌, కేవీకే శాస్త్రవేత్త డా. రాజేందర్‌రెడ్డి కోరారు. మంగళవారం మండలంలోని తెల్లరాళ్లపల్లిలో ఉద్యానశాఖ ఆధ్వర్యంలో నిర్వహించిన రైతు అవగాహన సదస్సుకు వారు ముఖ్యఅతిథులుగా హాజరై మాట్లాడారు. వాతావరణ మార్పులు, అధిక ఉష్ణోగ్రత్తలు, అసమాన వర్షపాతం పరిస్థితుల్లో మామిడి తోటలను కాపాడుకోవడానికి రైతులు ముందస్తు ప్రణాళికతో యాజమాన్య పద్ధతులు పాటించాలని, అందుబాటులో ఉన్న నీటిని పొదుపుగా వినియోగించుకోవాలని సూచించారు. అవసరానికి మించి నత్రజని ఎరువులు వినియోగించకుండా సమతుల పోషక యాజమాన్యం పాటించాలన్నారు. పలువురు మామిడి రైతులు తమ సమస్యలను అధికారుల దృష్టికి తీసుకరాగా శాసీ్త్రయ పరిష్కారాలను సూచించారు. కార్యక్రమంలో ఉద్యాన అధికారులు కృష్ణయ్య, బాలప్రకాశ్‌, డెవలప్‌మెంట్‌ కో–ఆర్డినేటర్‌ రవికుమార్‌ పాల్గొన్నారు.