TV
రైల్వేస్టేషన్(విజయవాడపశ్చిమ): విజయవాడ రైల్వేస్టేషన్లో గుర్తు తెలియని మహిళ మృతిచెందిన ఘటనపై ప్రభుత్వ రైల్వే పోలీసులు (జీఆర్పీ) కేసు నమోదు చేశారు. పోలీసులు తెలిపిన వివరాల ప్రకారం ఒకటో నంబర్ ప్లాట్ఫాం, ఆర్పీఎఫ్ పోలీస్ స్టేషన్ సమీపంలో మంగళవారం ఉదయం నాలుగు గంటల సమయంలో గుర్తు తెలియని మహిళ మృతిచెందింది. దీన్ని గుర్తించిన సిబ్బంది జీఆర్పీ పోలీసులకు సమాచారం అందించడంతో హెడ్ కానిస్టేబుల్ వెంకటస్వామి సిబ్బందితో కలిసి ఘటనా స్థలానికి చేరుకుని వివరాలు సేకరించారు. మృతురాలి వయస్సు సుమారు 35 ఏళ్లు ఉంటుందని, ఒంటిపై బ్రౌన్ కలర్ నైటీ, ఎరుపు రంగు లంగా ధరించి, మెడలో పసుపు తాడు, సూత్రం, రోల్డ్ గోల్డ్ చెవి దిద్దులు, మట్టిగాజులు ధరించి ఉందని, కుడి చేతిపై స్వస్తిక్ పచ్చబొట్టు ఉందన్నారు. ఇతర ఎటువంటి ఆధారాలు లభ్యం కాలేదని తెలిపారు. మృతదేహాన్ని ప్రభుత్వ ఆసుపత్రికి తరలించి అనుమానాస్పద మృతిగా కేసు నమోదు చేసి దర్యాప్తు చేపట్టారు. మృతురాలి ఆచూకి తెలిసిన వారు 0866–2768630, 91103 64646ల ద్వారా జీఆర్పీ పోలీసులకు సమాచారం అందించాల్సిందిగా కోరారు.
కంచికచర్ల: తోటి స్నేహితులతో కలసి మునేరులో ఈతకు వెళ్లిన రియల్ ఎస్టేట్ వ్యాపారి రాళ్ల మధ్యలో చిక్కుకుని ఊపిరాడక మృతిచెందిన సంఘటన మంగళవారం చోటు చేసుకుంది. ఎస్ఐ పి. విశ్వనాథ్ తెలిపిన కథనం మేరకు.. కంచికచర్ల మండలం గొట్టుముక్కల గ్రామానికి చెందిన గొట్టపు రామకృష్ణ(34) రియల్ ఎస్టేట్ వ్యాపారం చేస్తుంటాడు. అయితే తన ఇద్దరు స్నేహితులతో కలసి మండలంలోని కీసర మునేటిలో ఈత కొట్టేందుకు వెళ్లారు. మునేరులో లోతు ఎక్కువగా ఉండటంతో పాటు పెద్ద బండరాళ్లు నీళ్లలో ఉండటంతో ఆ రాళ్లలో చిక్కుకుని పోయాడు. గమనించిన తోటి స్నేహితులు రామకృష్ణను బయటకు తీసేందుకు ప్రయత్నించారు. అప్పటికే ఊపిరాడక రామకృష్ణ మృతిచెందాడు. మృతునికి భార్య కుమారుడు, కుమార్తె ఉన్నారు. మృతదేహాన్ని పోస్టుమార్టం నిమిత్తం నందిగామ ప్రభుత్వ ఆస్పత్రికి తరలించారు. కేసు నమోదు చేసి దర్యాప్తు చేస్తున్నట్లు ఎస్ఐవిశ్వనాథ్ తెలిపారు.
