క్రాప్‌ హాలిడే

క్రాప్‌ హాలిడే

● యాసంగి సాగుకు రైతులు దూరం

● జూరాల జలాశయంలో తగ్గుతున్న నీటిమట్టం

● గతేడాది అతి కష్టం మీద సరఫరా

●

అమరచింత: ప్రియదర్శిని జూరాల జలాశయంలో నిల్వనీటి మట్టం రోజురోజుకు తగ్గుతుండటంతో ప్రాజెక్టుతో పాటు దానిపై ఆధారపడిన ఎత్తిపోతల పథకాల ఆయకట్టుకు యాసంగిలో సాగునీరు అందించలేమని అధికారులు ఆదేశాలు జారీ చేశారు. దీంతో అమరచింత, చంద్రగఢ్‌ ఎత్తిపోతల ఆయకట్టులో యాసంగి సాగుకు బ్రేక్‌ పడింది. గతేడాది యాసంగిలో అతికష్టం మీద సాగునీటిని పొందిన ఆయకట్టు రైతులు ఈసారి ముందస్తుగానే సాగునీటిని ఇవ్వలేమని ఇరిగేషన్‌ అధికారులు ప్రకటించడంతో రైతులు తమ వ్యవసాయ పనులు వదులుకున్నారు. యాసంగి సాగుకు నీరు అందితే వరి వేద్దామనుకున్న ఆయకట్టు రైతుల ఆశలు అడియాశలయ్యాయి. గతంతో రెండు పంటలకు సాగునీరు పొందిన రైతులు ఈసారి వానాకాలం పంటకు మాత్రమే నీరందింది. ప్రాజెక్టుకు వరదలు వచ్చినప్పుడు ఒడిసి పట్టుకునేందుకు వీలైనన్ని రిజర్వాయర్లు లేకపోవడంతో ప్రతి ఏటా యాసంగిలో సాగు, తాగునీటి ఇబ్బందులు ఎదుర్కోవాల్సి వస్తోంది. ప్రస్తుత పాలకులు జూరాలపై మరిన్ని రిజర్వాయర్లు నిర్మించి వరద నీరు కిందకు వెళ్లకుండా ఇక్కడే అడ్డుకట్ట వేస్తే ఆయకట్టుకు సమృద్ధిగా సాగునీరు అందుతుందని రైతులు అభిప్రాయపడుతున్నారు.

జూరాల ప్రధాన ఎడమ కాల్వకు అనుసంధానంగా అమరచింత ఎత్తిపోతల పథకం కొనసాగుతోంది. ఈ లిఫ్ట్‌ ఆయకట్టు 2,400 ఎకరాలు ఉండగా.. మూలమళ్ల, మస్తీపురం, అమరచింత, సింగంపేట, ఖానాపురం, పాంరెడ్డిపల్లి గ్రామాల్లోని 1,090 మంది రైతుల భాగస్వామ్యంతో 23 ఏళ్లుగా సజావుగా కొనసాగుతోంది. ప్రతి ఏటా లిఫ్ట్‌ ద్వారా 1,200 ఎకరాలకు నీరు అందుతుండగా.. రైతులు పంటలు సాగు చేస్తున్నారు. జూరాల ప్రధాన ఎడమ కాల్వ పరిధిలో 85 వేల ఎకరాల ఆయకట్టు ఉండగా..

● ప్రస్తుత యాసంగిలో రామన్‌పాడ్‌ రిజర్వాయర్‌ వరకు కేవలం 20 వేల ఎకరాలకు మాత్రమే సాగునీరు అందిస్తామని అధికారులు ప్రకటించారు. దీంతో అమరచింత ఎత్తిపోతలకు నీటి సరఫరా నిలిచిపోవడంతో ఆయకట్టు రైతులు తమ పంటల సాగుకు విరామం ప్రకటించారు. చంద్రగఢ్‌ ఎత్తిపోతల పథకం జూరాల బ్యాక్‌వాటర్‌పై ఆధారపడటంతో అధికారులు యాసంగిలో ముందస్తుగా నీటి సరఫరా నిలిపివేశారు. ఈ పథకం ద్వారా 15 వేల ఎకరాలకు సాగునీరు అందించేందుకు ప్రణాళిక సిద్ధం చేసి పైప్‌లైన్‌ పనులు పూర్తి చేశారు. లిఫ్ట్‌ను చంద్రగఢ్‌, బెక్కర్‌పల్లి, నాగిరెడ్డిపల్లి ఎత్తిపోతల పథకాలుగా విభజించి ఒక్కో లిఫ్ట్‌ ద్వారా 5 వేల ఎకరాల ఆయకట్టుకు నీరందించాలని నిర్ణయించారు. ప్రస్తుతం ఎత్తిపోతల నిర్వహణ సరిగా లేకపోవడంతో పాటు యంత్రాలు కాలిపోవడంతో కేవలం 5 వేల ఎకరాలు మాత్రమే సాగవుతుంది. ఈ ఆయకట్టుకు కూడా యాసంగి సాగుకు నీటి సరఫరా నిలిచిపోవడంతో వ్యవసాయ బోరుబావుల వద్ద ఉన్న కొంతమేర వరిసాగు చేసుకుంటున్నారు.

1/2

క్రాప్‌ హాలిడే

2/2

క్రాప్‌ హాలిడే