లలిత కళా సమితి స్థలం.. వివాదం

● నిరుపయోగంగా ఉందని ఫిర్యాదులు ● వెనక్కి తీసుకోవాలంటున్న మహిళలు ● మహిళా సంఘం భవనానికి కేటాయించాలని విజ్ఞప్తి ● కళలు, కళాకారులను ప్రోత్సహించాలనే ఉద్దేశంతో లలిత కళా సమితికి 1981లో అప్పటి ప్రభుత్వం.. ప్రస్తుతం బల్దియాలోని 12వార్డులో విలీనమైన వెంకట్రావ్‌పేటలోని సర్వే నెంబర్‌ 305లో 19గుంటలు కేటాయించింది. ● ఇందులోని సుమారు రెండు గుంటల స్థలంలో కమర్షియల్‌ భవనాన్ని నిర్మించారు. మిగతా స్థలాన్ని అప్పటి నుంచి ఖాళీగానే వదిలేశారు. ● ఆ వార్డులో ఎక్కడా ప్రభుత్వ స్థలం అందుబాటులో లేకపోవడంతోపాటు కళాసమితికి ఇచ్చిన భూమిలో ఎక్కువ భాగం దశాబ్దాలుగా నిరుపయోగంగా ఉంటుండడంతో దానిని ప్రభుత్వం వెనక్కి తీసుకుని ఆ స్థలంలో కొంతభాగాన్ని తమ సంఘం భవనంతో పాటు అంగన్‌వాడీ కేంద్రం నిర్మాణానికి కేటాయించాలని స్థానిక మహిళలు పట్టుబడుతున్నారు. ● సోమవారం రెవెన్యూ డివిజన్‌ కార్యాలయం ఎదుట ఆందోళన చేసి తర్వాత ఆర్డీవో నర్సింహారావుకు వినతిపత్రం అందించారు. మంగళవారం తహసీల్దార్‌ ముఫ్తార్‌పాషాను కలిసి తమ సమస్యను వివరించారు. ● మరోవైపు సమితికి ప్రభుత్వం ఇచ్చిన స్థలాన్ని మహిళలు తమ సంఘం భవనానికి కేటాయించాలని ఆందోళనకు దిగడంపై సభ్యులు అభ్యంతరం వ్యక్తం చేస్తున్నారు. ● లలిత కళా సమితి స్థలాన్ని తమ సంఘానికి కేటాయించాలంటూ మహిళలు.. తమ స్థలాన్ని ఇతరులు ఆక్రమించకుండా చూడాలంటూ సమితి సభ్యులు వేర్వేరుగా అధికారులకు ఫిర్యాదు చేయడంతో ఈ వ్యవహారం స్థానికంగా చర్చనీయాంశమైంది. ఈ నేపథ్యంలో అధికారులు తీసుకునే నిర్ణయంపై సర్వత్రా అసక్తి నెలకొంది.