తూర్పు.. కొత్త కూర్పు

● పెద్ద జిల్లాగా ఏర్పడనున్న తూర్పు గోదావరి

● మండపేట విలీనంతో

8 నియోజకవర్గాలకు విస్తరణ

● మండలాలు 19 నుంచి 22కు పెరుగుదల

● గెజిట్‌ విడుదల

సాక్షి, రాజమహేంద్రవరం: జిల్లాల పునర్విభజన అంశం ఎట్టకేలకు కొలిక్కి వచ్చింది. కొత్త జిల్లాల ఏర్పాటు, రెవెన్యూ డివిజన్లు, మండలాలు, గ్రామాల ఏర్పాటు, సరిహద్దుల మార్పులపై మంత్రివర్గ ఉపసంఘం మూడు సమావేశాల అనంతరం పునర్విభజనకు చంద్రబాబు ప్రభుత్వం గ్రీన్‌సిగ్నల్‌ ఇచ్చింది. దీని ప్రకారం ఇప్పటి వరకూ డాక్టర్‌ బీఆర్‌ అంబేడ్కర్‌ కోనసీమ జిల్లాలో ఉన్న మండపేట నియోజకవర్గాన్ని రాజమహేంద్రవరం రెవెన్యూ డివిజన్‌ పరిధిలోకి తీసుకు వస్తున్నారు. దీంతో, మండపేట, రాయవరం, కపిలేశ్వరపురం మండలాలు రాజమహేంద్రవరం రెవెన్యూ డివిజన్‌లో కలవనున్నాయి. ఈ మేరకు జిల్లా కలెక్టర్‌ గెజిట్‌ విడుదల చేశారు. కొత్త ప్రతిపాదనలపై సంబంధిత ప్రజలు తమ అభ్యంతరాలు, సూచనలు రాతపూర్వకంగా తెలపాలని పేర్కొన్నారు. అభ్యంతరాలు ఆంగ్లం, తెలుగు భాషల్లో 30 రోజుల్లోగా తూర్పు గోదావరి జిల్లా కలెక్టర్‌ కార్యాలయానికి పంపాలని కోరారు. నిర్దేశిత సమయంలోగా అన్ని సూచనలూ అందితే ప్రభుత్వం వాటిని పరిశీలిస్తుందని తెలిపారు. వచ్చే జనవరి 1 నుంచి మండపేట నియోజకవర్గం తూర్పు గోదావరి జిల్లాలో పూర్తిగా విలీనం అవుతుంది. ఇకపై ఆ నియోజకవర్గ పరిధి కార్యకలాపాలన్నీ రాజమహేంద్రవరం నుంచే జరుగుతాయి.

అతి పెద్ద జిల్లాగా..

మండపేట విలీనం అనంతరం తూర్పు గోదావరి రాష్ట్రంలోనే అతి పెద్ద జిల్లాగా అవతరించనుంది. జిల్లాలో ప్రస్తుతం 7 నియోజకవర్గాలు (రాజమండ్రి సిటీ, రాజమండ్రి రూరల్‌, రాజానగరం, అనపర్తి, కొవ్వూరు, నిడదవోలు, గోపాలపురం) 19 మండలాలు, 2 రెవెన్యూ డివిజన్లు ఉన్నాయి. సుమారు 16 లక్షల మందికి పైగా ఓటర్లు ఉన్నారు. ఇప్పుడు మండపేట కూడా కలిపితే జిల్లా 8 నియోజకవర్గాలకు విస్తరించనుంది. మండలాలు 22కు పెరుగుతాయి. 2 లక్షల మందికి పైగా ఓటర్లు ఈ జిల్లాలో కలిసే అవకాశం ఉంది. కోనసీమ జిల్లాలో ప్రస్తుతం సుమారు 15.90 లక్షల మంది ఓటర్లున్నారు. ఇప్పటి వరకూ 22 మండలాలు, 7 నియోజకవర్గాలు ఉన్నాయి. మండపేట ‘తూర్పు’లో విలీనం కానుండటంతో కోనసీమ 6 నియోజకవర్గాలకు, 19 మండలాలకే పరిమితం కానుంది. కాకినాడ జిల్లా 7 నియోజకవర్గాలతో కొనసాగనుంది. రాజమహేంద్రవరం – మండపేట మధ్య దూరం 35 కిలోమీటర్లు. ఈ నేపథ్యంలో ఆ నియోజకవర్గాన్ని తూర్పు గోదావరిలో కలపాలనే డిమాండ్‌ మొదటి నుంచీ ఉంది. దీనిపై, గతంలో ఆందోళనలు సైతం చేపట్టారు. అయితే, నీతి అయోగ్‌ సూచనల ప్రకారం అప్పట్లో ప్రతి పార్లమెంటరీ నియోజకవర్గాన్ని ఒక జిల్లాగా ఏర్పాటు చేశారు.

ప్రత్యేక జిల్లాగా రంపచోడవరం

జిల్లాల పునర్విభజన జరిగితే రంపచోడవరం నియోజకవర్గం తూర్పు గోదావరి జిల్లాలో కలిసే అవకాశం ఉంటుందన్న ఆ నియోజకవర్గ ప్రజల ఊహాగానాలకు తెర పడింది. రంపచోడవరం, దేవీపట్నం, వై.రామవరం, గుర్తేడు, అడ్డతీగల, గంగవరం, మారేడుమిల్లి, రాజవొమ్మంగి, చింతూరు, ఎటపాక, కూనవరం మండలాలతో ప్రత్యేకంగా పోలవరం జిల్లా ఏర్పాటు చేస్తున్నారు.

ఆ మండలాలు యథాతథం

● అనపర్తి నియోజకవర్గం ప్రస్తుతం తూర్పు గోదావరి జిల్లాలో ఉంది. అందులోని పెదపూడి మండలం మాత్రం కాకినాడ జిల్లాలో ఉంది. జిల్లాల పునర్విభజన జరిగితే దీనిపై కూడా నిర్ణయం తీసుకునే అవకాశం ఉందన్న వాదన బలంగా వినిపించింది. చివరకు పెదపూడిపై చంద్రబాబు సర్కారు ఎటువంటి నిర్ణయ మూ తీసుకోకుండా అపరిష్కృతంగా వదిలేసింది.

● గోపాలపురం నియోజకవర్గం కూడా ప్రస్తుతం తూర్పు గోదావరి జిల్లాలోనే ఉండగా.. అందులోని ద్వారకా తిరుమల మండలం మాత్రం ఏలూరు జిల్లాలో ఉంది. పునర్విభజనలో ఈ నియోజకవర్గాన్ని ఏలూరు జిల్లాలో కలపాలనే ప్రతిపాదన కూడా వచ్చింది. కానీ, దీనిపై కూడా ప్రభుత్వం ఏ నిర్ణయమూ తీసుకోలేదు.

ప్రస్తుత తూర్పు గోదావరి జిల్లా మ్యాప్‌

మండపేట

నియోజకవర్గ మ్యాప్‌

ప్రస్తుత తూర్పు గోదావరి జిల్లా ముఖచిత్రం

జిల్లా కేంద్రం రాజమహేంద్రవరం

విస్తీర్ణం 2,560.7 చదరపు కిలోమీటర్లు

అటవీ ప్రాంతం 89.9 చదరపు కిలోమీటర్లు

రెవెన్యూ డివిజన్లు 2

మండలాలు 19

మున్సిపల్‌ కార్పొరేషన్‌ రాజమహేంద్రవరం

మున్సిపాలిటీలు కొవ్వూరు, నిడదవోలు

రెవెన్యూ గ్రామాలు 272

గ్రామ పంచాయతీలు 300

మండపేట నియోజకవర్గం

మండలాలు 3

జనాభా సుమారు 2.46 లక్షలు

ఓటర్లు సుమారు 2.14 లక్షలు

గ్రామ పంచాయతీలు 43

మున్సిపాలిటీ మండపేట 1

వార్డులు 30

‘పచ్చ’ ప్రయోజనాలే లక్ష్యంగా..

తమ రాజకీయ ప్రయోజనాలే లక్ష్యంగా కూటమి ప్రభుత్వం రాష్ట్రవ్యాప్తంగా జిల్లాల పునర్విభజన అంశాన్ని తెర పైకి తెచ్చిందన్న ఆరోపణలు వెల్లువెత్తుతున్నాయి. ఇందులో భాగంగానే రెవెన్యూ డివిజన్లు, మండలాలు, గ్రామ సరిహద్దుల మార్పుల అంశానికి నాంది పలికినట్లు విమర్శలున్నాయి. టీడీపీ నేతల లబ్ధి కోసమే జిల్లాల పునర్విభజన చేపట్టినట్లు ఆరోపణలు వస్తున్నాయి. ఈ నేపథ్యంలో ఈ ప్రక్రియ పూర్తి స్థాయిలో చేయకుండా తమకు రాజకీయంగా అనువైన ప్రాంతాల్లోనే మార్పులు చేపట్టినట్లు సమాచారం. మండపేట నియోజకవర్గం పౌల్ట్రీ, రైస్‌ మిల్లులకు పెట్టింది పేరు. ఆర్థికంగా స్థితిమంతమైన నియోజకవర్గం. టీడీపీ సానుభూతిపరులు ఎక్కువగా ఉన్న ప్రాంతం. దీనిని ‘తూర్పు’లో కలిపితే మరింతగా బలపడవచ్చనే ఉద్దేశంతోనే ఈ విలీనం చేపట్టారని రాజకీయ విశ్లేషకులు భావిస్తున్నారు.