ఆశగా సాగుతూ..

● దాళ్వాకు శ్రీకారం

● ఆకుమడులు వేస్తున్న రైతులు

● జిల్లావ్యాప్తంగా 56 వేల

హెక్టార్లలో రబీ సాగు

దేవరపల్లి: ఒకవైపు సార్వా వరి కోతలు, ధాన్యం అమ్మకాలు జరుగుతూండగానే.. మరోవైపు దాళ్వా పంట సాగుకు అన్నదాతలు సిద్ధమవుతున్నారు. డెల్టాలో కాలువల కింద, మెట్ట ప్రాంతంలో బోర్ల కింద ఆకుమడులు సిద్ధం చేస్తున్నారు. దీనికి అవసరమైన భూమిని వారం రోజులుగా దమ్ము చేసి, విత్తనాలు పోస్తున్నారు. తుపాన్లు, అధిక వర్షాల కారణంగా ఖరీఫ్‌లో వేసిన వరి పంట చేతికి వస్తుందనే నమ్మకం రైతులకు ఉండటం లేదు. దీంతో, దాళ్వాపై ఆశలు పెట్టుకుని సాగుకు ఉపక్రమిస్తున్నారు. కొవ్వూరు డివిజన్‌లోని మెట్ట ప్రాంతంలో బోర్ల కింద ముమ్మరంగా ఆకుమడులు వేస్తున్నారు.

ఖరీఫ్‌ పంట మోంథా తుపానుకు దెబ్బ తినడంతో దిగుబడులు పడిపోయాయి. సాధారణంగా ఎకరాకు 32 నుంచి 36 బస్తాల ధాన్యం దిగుబడి రావాల్సి ఉండగా.. 28 నుంచి 30 బస్తాలు మాత్రమే వస్తున్నాయి. అదే దాళ్వాలో అయితే, ఎకరాకు 55 నుంచి 60 బస్తాల వరకూ ధాన్యం దిగుబడులు వస్తున్నాయి. తొలకరి పంటలో నష్టాలు చవి చూసిన రైతులు దాళ్వా పంటకు ఆశగా ఉపక్రమిస్తున్నారు. జిల్లావ్యాప్తంగా రబీ వరి సాగు లక్ష్యం సుమారు 56 వేల హెక్టార్లుగా నిర్ధారించారు. కొవ్వూరు డివిజన్‌లో సుమారు 19,500 హెక్టార్లు, రాజమహేంద్రవరం డివిజన్‌లో 36 వేల హెక్టార్లలో దాళ్వా వరి సాగు జరగనుంది.

అధిక దిగుబడులిచ్చే వంగడాలకు మొగ్గు

దాళ్వాలో రైతులు అధిక దిగుబడులనిచ్చే వంగడాల వైపు మొగ్గు చూపుతున్నారు. 120 రోజుల కాలపరిమితితో దిగుబడినిచ్చే ఎంటీయూ–1121, ఆర్‌ఎన్‌ఆర్‌–15048, ఎంటీయూ–1156, ఎంటీయూ–1153 రకాల వంగడాలు ఎక్కువగా సాగు చేస్తున్నారు. కొంత మంది రైతులు డీసీఎంఎస్‌ ద్వారా విత్తనాలు కొనుగోలు చేస్తున్నారు. రైతులు తీసిన విత్తనాల కొనుగోలుకు ఎక్కువ మంది మొగ్గు చూపుతున్నారు. దేవరపల్లి మండలం కృష్ణంపాలెంలో రైతులే విత్తనాలు తయారు చేసి, అవసరమైన రైతులకు సరఫరా చేస్తున్నారు. సొసైటీలు, ప్రైవేటు డీలర్ల వద్ద కూడా అందుబాటులో ఉన్నప్పటికీ రైతువారీ విత్తనాల కొనుగోలుకే రైతులు ఆసక్తి చూపుతున్నారు.

విత్తనశుద్ధి తప్పనిసరి

వరి నారుమడులు వేసే రైతులు తప్పనిసరిగా 2 గ్రాముల కార్బండిజం మందును కిలో విత్తనంలో కలిపి విత్తన శుద్ధి చేసుకోవాలి. వరి నాట్లు వేసే ముందు రోజు ఆఖరి దుక్కులో ఎకరాకు 150 కిలోల సింగిల్‌ సూపర్‌ ఫాస్పేట్‌, 25 కిలోల పొటాషియం, 25 కిలోలు నత్రజని ఎరువు వేసుకుంటే చలిని తట్టుకుని పంట ఆరోగ్యంగా ఉంటుంది. విత్తన శుద్ధి వల్ల మొలక శాతం కూడా బాగుంటుందని వ్యవసాయాధికారులు చెబుతున్నారు.

రబీ ప్రణాళిక సిద్ధం

రబీ సాగు ప్రణాళిక సిద్ధం చేశాం. జిల్లావ్యాప్తంగా రబీలో అన్ని రకాల పంటలూ కలిపి సాధారణ విస్తీర్ణం 83 వేల హెక్టార్లు కాగా, ఇందులో 75 వేల హెక్టార్లలో వాస్తవ సాగు జరుగుతుంది. దీనిలో వరి 56 వేలు, మొక్కజొన్న 8 వేలు, ఇతర పంటలు 9 వేల హెక్టార్లలో సాగు చేస్తున్నారు. గోదావరి నీటిని డిసెంబర్‌ 1న విడుదల చేస్తే నారుమళ్ల ద్వారా సుమారు 60 శాతం, వెదజల్లు విధానంలో 40 శాతం వరి సాగు చేయవచ్చు. డిసెంబర్‌ మొదటి వారంలో నారు పోసుకుని, 25వ తేదీ లోగా నాట్లు వేస్తే 60 శాతం పంట మార్చి నెలాఖరుకు కోతకు వచ్చే అవకాశం ఉంటుంది. దీనివల్ల మూడో పంట వేసుకునే వీలుంటుంది. పంటలకు అన్ని రకాల ఎరువులు సిద్ధం చేశాం.

– ఎస్‌.మాధవరావు, జిల్లా వ్యవసాయాధికారి

ఆశగా సాగుతూ..