పుష్కరాలకు ముందే అభివృద్ధి పనులు పూర్తి చేయాలి | - | Sakshi
Sakshi News home page

పుష్కరాలకు ముందే అభివృద్ధి పనులు పూర్తి చేయాలి

Nov 30 2025 7:34 AM | Updated on Nov 30 2025 7:34 AM

పుష్క

పుష్కరాలకు ముందే అభివృద్ధి పనులు పూర్తి చేయాలి

సీటీఆర్‌ఐ (రాజమహేంద్రవరం): పుష్కరాలకు ముందే అభివృద్ధి పనులు పూర్తి చేయాలని రాష్ట్ర పర్యాటక, సాంస్కృతిక, సినిమాటోగ్రఫీ శాఖల మంత్రి కందుల దుర్గేష్‌ అన్నారు. గోదావరి పుష్కరాలు–2027 ఏర్పాట్లపై జిల్లా కలెక్టర్‌ కీర్తి చేకూరి అధ్యక్షతన ప్రజాప్రతినిధులు, సమన్వయ శాఖల అధికారులతో కలెక్టరేట్‌లో శనివారం నిర్వహించిన విస్తృత స్థాయి సమీక్షా సమావేశంలో ఆయన మాట్లాడారు. ఉభయ గోదావరి జిల్లాల్లో ఆధ్యాత్మిక వాతావరణం వెల్లివిరిసేలా పుష్కరాలకు భారీ స్థాయిలో సన్నద్ధమవుతున్నామని చెప్పారు. ఇప్పటికే అన్ని శాఖల అధికారులూ క్షేత్ర స్థాయిలో పర్యటించి, అంచనాలతో వచ్చారని అన్నారు. ఎంపీ దగ్గుబాటి పురందేశ్వరి మాట్లాడుతూ, వచ్చే పుష్కరాలకు ఏడెనిమిది కోట్ల మంది భక్తులు వచ్చే అవకాశం ఉందని అన్నారు. దీనికి అనుగుణంగా రవాణా, భోజనం, తాగునీరు, శానిటేషన్‌, భద్రత వంటి అంశాల్లో ప్రత్యేక ప్రణాళికలు సిద్ధం చేయాలని సూచించారు. కలెక్టర్‌ కీర్తి మాట్లాడుతూ, పుష్కరాల ఏర్పాట్లపై అన్ని శాఖల నుంచీ హేతుబద్ధంగా పూర్తి స్థాయి నివేదికలు సిద్ధం చేస్తున్నామని వెల్లడించారు. సమావేశంలో జాయింట్‌ కలెక్టర్‌ వై.మేఘస్వరూప్‌, డీఆర్‌ఓ టి.సీతారామమూర్తి, అదనపు ఎస్పీ మురళీకృష్ణ, ఆర్‌డీఓలు రాణి సుస్మిత, ఆర్‌.కృష్ణనాయక్‌, వివిధ శాఖల అధికారులు పాల్గొన్నారు.

నేడు విద్యుత్‌ బిల్లుల వసూలు

రాజమహేంద్రవరం సిటీ: జిల్లాలోని అన్ని విద్యుత్‌ రెవెన్యూ కార్యాలయాల్లో విద్యుత్‌ బిల్లుల వసూళ్ల కౌంటర్లు ఆదివారం కూడా తెరచి ఉంటాయని ఏపీ ఈపీడీసీఎల్‌ ఎస్‌ఈ కె.తిలక్‌ కుమార్‌ శనివారం ఒక ప్రకటనలో తెలిపారు. వీటితో పాటు ఈపీడీసీఎల్‌ సెక్షన్‌ ఆఫీస్‌ కలెక్షన్‌ కౌంటర్లు, ఏటీపీ సెంటర్లలో కూడా ఆదివారం బిల్లులు చెల్లించవచ్చని పేర్కొన్నారు.

జిల్లా మీదుగా ప్రత్యేక రైళ్లు

రాజమహేంద్రవరం సిటీ: ప్రయాణికుల రద్దీని దృష్టిలో ఉంచుకుని జిల్లా మీదుగా డిసెంబర్‌ నెలలో పలు ప్రత్యేక రైళ్లు నడుపుతున్నట్లు దక్షిణ మధ్య రైల్వే అధికారులు శనివారం ఒక ప్రకటనలో తెలిపారు. సికింద్రాబాద్‌ – అనకాపల్లి (07041) రైలు డిసెంబర్‌ 7, 14, 21, 28 తేదీల్లో (ప్రతి ఆదివారం) నడుస్తుంది. అనకాపల్లి – సికింద్రాబాద్‌ (07042) రైలు డిసెంబర్‌ 8, 15, 22, 29 తేదీల్లో (ప్రతి సోమవారం) అందుబాటులో ఉంటుంది. ఈ రైళ్లు ఉమ్మడి జిల్లాలోని రాజమహేంద్రవరం, సామర్లకోట, అన్నవరం, తుని రైల్వే స్టేషన్లలో ఆగుతాయి. ఈ ప్రత్యేక రైళ్లలో ఫస్ట్‌, సెకండ్‌, థర్డ్‌ ఏసీతో పాటు స్లీపర్‌ క్లాసులు బోగీలు ఏర్పాటు చేశారు.

అన్నవరప్పాడుకు

పోటెత్తిన భక్తులు

పెరవలి: అన్నవరప్పాడు వేంకటేశ్వరస్వామి ఆలయానికి శనివారం భక్తులు వేలాదిగా పోటెత్తారు. ఆలయ ప్రాంగణం చుట్టూ బారులు తీరి స్వామివారిని దర్శించుకున్నారు. ముడుపులు, మొక్కులు చెల్లించుకున్నారు. దాత ఒబ్బిలిశెట్టి వెంకట కృష్ణారావు కుమారుడు మణికంఠ రామ కిషోర్‌ దంపతుల ఆర్థిక సహాయంతో 9 వేల మంది భక్తులకు అన్నసమారాధన నిర్వహించారు. స్వామివారికి పుష్పాలంకరణ కూడా దాతలు చేయించారని ఆలయ కార్యనిర్వహణాధికారి మీసాల రాధాకృష్ణ తెలిపారు.

తొలి తిరుపతి కిటకిట

పెద్దాపురం (సామర్లకోట): తొలి తిరుపతిగా ప్రసిద్ధి చెందిన పెద్దాపురం మండలం తిరుపతి గ్రామంలో కొలువుదీరిన శృంగార వల్లభ స్వామి ఆలయం వేలాది మంది భక్తులతో శనివారం కిటకిటలాడింది. వివిధ ప్రాంతాల నుంచి భక్తులు కాలినడకన ఆలయానికి చేరుకుని స్వామివారికి ముడుపులు, మొక్కులు చెల్లించుకున్నారు. సుమారు 16 వేల మంది భక్తులు స్వామి వారిని దర్శించుకున్నట్లు ఆలయ ఈఓ వడ్డి శ్రీనివాసరావు తెలిపారు. ప్రత్యేక దర్శనం టికెట్ల ద్వారా రూ.1,27,770, అన్నదాన విరాళాలు రూ.58,138, కేశఖండన టికెట్ల ద్వారా రూ.7,280, తులాభారం రూ.300, లడ్డూ ప్రసాదం విక్రయాలతో రూ.16,845 కలిపి మొత్తం రూ.2,10,333 ఆదాయం సమకూరిందని వివరించారు. 3,200 మంది భక్తులు అన్నప్రసాదం స్వీకరించారని తెలిపారు. అర్చకులు పెద్దింటి పురుషోత్తమాచార్యులు, నారాయణాచార్యులు పూజాది కార్యక్రమాలు నిర్వహించారు.

పుష్కరాలకు ముందే అభివృద్ధి  పనులు పూర్తి చేయాలి 1
1/1

పుష్కరాలకు ముందే అభివృద్ధి పనులు పూర్తి చేయాలి

Advertisement

Related News By Category

Related News By Tags

Advertisement
 
Advertisement
Advertisement