TV
ఇహపరాలకు ధర్మమే పట్టుగొమ్మ
ఆల్కాట్‌తోట (రాజమహేంద్రవరం రూరల్‌): ‘అర్థకామాలు కావు. ధర్మమే ఇహపరాలకు పట్టుగొమ్మ అని సమన్వయ సరస్వతి సామవేదం షణ్ముఖశర్మ అన్నారు. స్థానిక హిందూ సమాజంలో వేదవ్యాస మహాభారతం మూడో రోజు ప్రవచనాన్ని ఆయన శనివారం కొనసాగించారు. నాలుగు వేదాలు, పురాణాలన్నింటినీ చదివితే వచ్చే ఫలం ఒక్క భారత శ్రవణం, అధ్యయనాల ద్వారా లభిస్తుందని అన్నారు. భారతం మనల్ని తరింపజేసే గంగ అని, కలిదోష పరిహారానికి భారతాన్ని మించినది లేదని చెప్పారు. వేదాలకు లిఖిత రూపం లేదని, కానీ మహాభారతం లిఖిత రూపంలో లభించే కావ్యమని వివరించారు. భారత కథను ప్రారంభిస్తూ.. ‘జనమేజయుడు దీర్ఘసత్ర యాగాన్ని ప్రారంభించినప్పుడు అక్కడికి ఒక కుక్క వస్తుంది. దానిని అతడి తమ్ముళ్లు కొడతారు. ఆ కుక్క ఏడుస్తూ తల్లి వద్దకు వెళుతుంది. నీవేదో తప్పు చేసి ఉంటావు, లేకపోతే ఎందుకు కొడతారని తల్లి అంటుంది. దీంతో ఆ కుక్క హవిస్సును చూడలేదు, తాకలేదు అని బదులిస్తుంది. ఏ తప్పూ చేయని కుక్కను దండించారు కాబట్టి మీకు మహా భయం ఏర్పడుతుందని తల్లి కుక్క శపిస్తుంది. మహాభారతం ఆదిపర్వం కుక్కతో ప్రారంభమైయి, స్వర్గారోహణ పర్వంలో కుక్కతో ముగుస్తుందని సామవేదం చెప్పారు. ‘గురుభక్తికి సంబంధించిన ఉపమన్యు కథలో దేవ వైద్యులు అశ్వనీ దేవతల స్తోత్రం కనపడుతుంది. స్తోత్ర రూపంలో మనకు అందివచ్చిన వేద మంత్రాలు భారతంలో అడుగడుగునా కనపడతాయి’ అని వివరించారు. మహాభారత అర్థ గౌరవాన్ని పూర్తిగా అవగాహన చేసుకోవడం విధాతకై నా కష్టమేనని సామవేదం వివరించారు. తొలుత భాగవత విరించి డాక్టర్‌ టీవీ నారాయణరావు మంగళ శ్లోకంతో ప్రవచన యజ్ఞం ప్రారంభమైంది.
ఆన్‌లైన్‌లో సత్యదేవుని సేవా టికెట్లు
అన్నవరం: సత్యదేవుని ఆలయానికి వచ్చే భక్తులు వ్రతాలు, స్వామివారి దర్శనం, ప్రసాదం కొనుగోలు, వసతి గదుల కేటాయింపు తదితర సేవలకు ఆన్‌లైన్‌ ద్వారా కూడా టికెట్లు పొందవచ్చునని దేవస్థానం ఈఓ వీర్ల సుబ్బారావు శనివారం ఒక ప్రకటనలో తెలిపారు. దేవదాయ, ధర్మాదాయ శాఖ కమిషనర్‌ కె.రామచంద్ర మోహన్‌ ఆదేశాల మేరకు ఈ నిర్ణయం తీసుకున్నామన్నారు. స్వామివారి అన్నదానం, గో సంరక్షణ ట్రస్టులకు విరాళాలు కూడా ఆన్‌లైన్‌లో చెల్లించవచ్చునని తెలిపారు. ఆన్‌లైన్‌ టికెట్ల కోసం APTEMPLES.ORG వెబ్‌సైట్‌ ద్వారా అన్నవరం దేవస్థానాన్ని సంప్రదించాలన్నారు. అలాగే, ‘మన మిత్ర’ వాట్సాప్‌ నంబర్‌ 95523 00009 ద్వారా కూడా నిర్దేశిత మొత్తం చెల్లించి పై సేవలు పొందవచ్చని తెలిపారు. అన్నదానం, గోసంరక్షణ ట్రస్టులకు ఫోన్‌ పే, గూగుల్‌ పే, భీమ్‌ తదితర యూపీఐ యాప్‌లు, క్రెడిట్‌, డెబిట్‌ కార్డుల ద్వారా కూడా చెల్లించవచ్చని వివరించారు.
