సింగరేణి క్రికెట్‌ టోర్నీ షురూ..

రామకృష్ణాపూర్‌: సింగరేణి సంస్థ ఆధ్వర్యాన కంపెనీ స్థాయి క్రికెట్‌ చాంపియన్‌షిప్‌ పోటీలు మంచిర్యాల జిల్లా రామకృష్ణాపూర్‌లోని ఠాగూర్‌ స్టేడియంలో బుధవారం ప్రారంభమయ్యాయి. మూడు రోజులపాటు పోటీలు జరగనుండగా, మందమర్రి – బెల్లంపల్లి సంయుక్త జట్టు, శ్రీరాంపూర్‌ జట్టు, మణుగూరు – ఇల్లెందు సంయుక్త జట్టు, కొత్తగూడెం కార్పొరేట్‌ జట్టు, ఆర్జీ–1, 2 సంయుక్త జట్టు, ఆర్జీ 3 – భూపాలపల్లి సంయుక్త జట్లు పాల్గొంటున్నాయి. మందమర్రి ఏరియా జీఎం రాధాకృష్ణ బ్యాటింగ్‌ చేసి పోటీలను ప్రారంభించి మాట్లాడారు. కోలిండియా స్థాయి పోటీల్లోనూ రాణించి సింగరేణి కీర్తి ప్రతిష్టలు చాటాలని పిలుపునిచ్చారు. కాగా, ఆర్జీ 3 – భూపాలపల్లి, ఇల్లెందు – మణుగూరు సంయుక్త జట్ల మధ్య పోటీ జరగగా, ఇల్లెందు – మణుగూరు జట్టు విజయం సాధించింది. వివిధ విభాగాల అధికారులు, నాయకులు రమేశ్‌, అశోక్‌, ఖాదిర్‌, సలెంద్ర సత్యనారాయణ, కార్తీక్‌, సురేందర్‌, అశోక్‌, నరేందర్‌రెడ్డి, శ్రీనివాస్‌ తదితరులు పాల్గొన్నారు.