భారతీయులకు యాత్రలంటే.. తీర్థయాత్రలే!

సాక్షి, అమరావతి: ప్రేమ యాత్రలకు బృందావనమూ.. నందనవనమూ ఏలనో... అని గుండమ్మ­కథ సినిమాలో పాపులర్‌ పాట. ప్రేమయా­త్రల సంగతేమిటోగానీ  యాత్రలు అంటే తీర్థయాత్రలేనని భారతీయులు అత్యధికంగా భావిస్తున్నారు. మనదేశంలో దేశీయ పర్యాటకులు తీర్థయాత్రలకే అగ్రస్థానం ఇస్తున్నట్లు తేలింది. కేంద్రప్రభుత్వ గణాంక, కార్యక్రమాల­అమలు శాఖ దేశీయ పర్యాటక వ్యయ నివేదిక పేరుతో విడుదల చేసిన నివేదిక ఈ కీలక అంశాలను వెల్లడించింది. మొత్తం 2.46 లక్షల కుటుంబాలను సర్వేచేసి ఆ నివేదికను రూపొందించింది.

నివేదికలోని ప్రధాన అంశాలు
» దేశీయ పర్యాటకుల్లో తీర్థయాత్రలే అగ్రస్థానంలో నిలుస్తున్నాయి. 48 శాతం మంది ప్రముఖ పుణ్యక్షేత్రాలు, అధ్యాత్మిక కేంద్రాల సందర్శనకే యాత్రలు చేస్తున్నారు. పట్టణ, గ్రామీణ ప్రాంతాల ప్రజలు తీర్థయాత్రలపట్ల అత్యధికంగా మొగ్గు చూపిస్తున్నారు. 
» పర్యటనల్లో రెండోస్థానంలో వైద్యపర్యాటకం ఉంది. 29 శాతం మంది వైద్యచికిత్సలు, ఇతర ఆరోగ్య సంబంధిత అంశాలపై ఇతర ప్రాంతాల్లో పర్యటిస్తున్నారు.  
»  ఆహ్లాదకర ప్రాంతాల సందర్శన కోసం 22 శాతం మంది యాత్రలు చేస్తున్నారు.  
»  షాపింగ్‌ కోసం 0.6 శాతం మంది ఇతర ప్రాంతాల్లో పర్యటిస్తున్నారు.  
» భారతీయ దేశీయ పర్యాటకులు సగటున 5 రోజుల పాటు యాత్ర చేస్తున్నారు. 80 శాతం మంది ఏటా ఐదురోజులు యాత్రలు చేస్తున్నారు.
» గ్రామీణ ప్రాంతాల ప్రజలు 32 శాతం మంది బస్సు ప్రయాణాలపట్ల మొగ్గు చూపుతుండగా.. పట్టణ ప్రాంతాల ప్రజలు 35 శాతం మంది రైలు ప్రయాణాలకు ప్రాధాన్యమిస్తున్నారు.  
» దేశీయ పర్యాటకులను ఆకర్షించడంలో ఉత్తరప్రదేశ్‌ అగ్రస్థానంలో నిలుస్తోంది. అత్యధికంగా 15.7 శాతం మంది ఉత్తరప్రదేశ్‌ను సందర్శిస్తున్నా­రు. 10.5 శాతం మంది యాత్రి­కులతో బిహార్‌ రెండోస్థానంలో నిలవగా, 9.6 శాతం మంది యాత్రికులతో తమిళనాడు మూడోస్థానంలో ఉంది.  
»  గ్రామీణ ప్రాంతాల నుంచి ఒక కుటుంబం సగటున రూ.29,454 యాత్రల కోసం వెచ్చిస్తుండగా.. పట్టణ ప్రాంతాల్లో ఒక కుటుంబం సగటున రూ.41,649 ఖర్చు చేస్తోంది.