TV
సాక్షి,విజయవాడ: రాష్ట్ర ఎన్నికల సంఘం కార్యాలయం ఎదుట నిరసన కార్యక్రమం చేపట్టిన వైఎస్సార్‌సీపీ నేతలపై విజయవాడ పోలీసులు కేసులు నమోదు చేశారు. ఎస్‌ఈసీ కార్యాలయ ప్రాంగణంలో నిబంధనలకు విరుద్ధంగా ఆందోళన నిర్వహించారన్న ఫిర్యాదు మేరకు ఈ చర్యలు తీసుకున్నట్లు పోలీసులు వెల్లడించారు.
ఈ నిరసన కార్యక్రమంలో పాల్గొన్న ఎమ్మెల్సీలు లెళ్ల అప్పిరెడ్డి, తొట్టెంపూడి కల్పలతారెడ్డి, మురుగుడు హనుమంతరావు, రుహుల్లాతో పాటు మొత్తం 14 మందిపై ఈ కేసులు నమోదైనట్లు అధికారిక వర్గాలు తెలిపాయి.
ఎస్‌ఈసీ కార్యాలయ ప్రాంగణంలో జరిగిన ఈ నిరసన వ్యవహారంపై ఎస్‌ఈసీ జాయింట్ డైరెక్టర్ రామారావు సూర్యారావుపేట పోలీసులకు అధికారికంగా ఫిర్యాదు చేశారు. ఆయన ఇచ్చిన ఫిర్యాదు ఆధారంగా పోలీసులు వివిధ సెక్షన్ల కింద కేసులు నమోదు చేశారు.
బీఎన్ఎస్-2023 (BNS) చట్టంలోని 329(4), 126(2), 189(2), 190, 292, R/W 3(5) సెక్షన్లతో పాటు, ఐపీసీలోని 448, 341, 143, 149, 290 R/W 34 సెక్షన్ల కింద కేసులు నమోదు చేసినట్లు సూర్యారావుపేట పోలీసులు తెలిపారు.
ఇదీ చదవండి : మున్సిపల్ ఎన్నికల్లో అక్రమాలపై వైఎస్‌ జగన్ ఆగ్రహం
