సత్తెనపల్లి: మాజీ సీఎం, వైఎస్సార్‌సీపీ అధినేత వైఎస్‌ జగన్‌ సత్తెనపల్లి పర్యటన విజయవంతం కావడంతో ప్రభుత్వం కక్షసాధింపు చర్యలకు పాల్పడుతోంది. సత్తెనపల్లి మండలం నందిగామ అడ్డరోడ్డు సమీపంలోని డంపింగ్‌ యార్డ్‌ కేంద్రంలో బీసీ కార్పొరేషన్‌ ఆధ్వర్యంలో ప్రభుత్వం మహిళలకు ఉచిత టైలరింగ్‌ శిక్షణ ఇస్తోంది. సత్తెనపల్లి మండలం లక్కరాజుగార్లపాడు గ్రామానికి చెందిన కనుమూరు వనజ, నర్రా మల్లేశ్వరి ఈ శిక్షణకు వెళుతున్నారు. అయితే గురువారం వైఎస్‌ జగన్‌ సత్తెనపల్లి పర్యటనలో వారి భర్తలు కనిపించారంటూ టీడీపీ నాయకులు ఫిర్యాదు చేశారు.దీంతో ఇకపై శిక్షణకు రావద్దు అంటూ నిర్వాహకులు నాగదుర్గ, ఈశ్వరి ఆదేశించారు. దీంతో వారు తీవ్ర మనస్తాపానికి గురయ్యారు. మల్లేశ్వరి కంటతడి పెట్టుకుని వెళ్లిపోగా, వనజ మాత్రం న్యాయ పోరాటానికి దిగింది. జరిగిన విషయాన్ని భర్త విశ్వేశ్వరరావుకు చెప్పి, శుక్రవారం సత్తెనపల్లి ఎంపీడీవో బండి శ్రీనివాసరెడ్డిని కలిసి వినతి పత్రం అందజేసింది. తాము ప్రారంభం నుంచి శిక్షణకు హాజరవుతున్నామని, ఏ ఉద్దేశంతో శిక్షణకు రావద్దని చెప్పారో తెలపాలని, న్యాయం చేయాలని కోరింది. బీసీ కార్పొరేషన్‌ జిల్లా అధికారులతో పాటు కలెక్టర్‌ను కూడా కలిసి సమస్య విన్నవించుకుంటానని, అసలు ఈ విషయంలో రాజకీయ పారీ్టల జోక్యం ఏంటని నిలదీసింది. న్యాయం జరిగే వరకూ పోరాడతానని స్పష్టం చేసింది.

ఇప్పడంతా ఆన్‌లైన్‌ పుణ్యామా అని డోర్‌డెలివరీలకే ప్రాధాన్యత ఇస్తున్నారు. ఆహారం, షాపింగ్‌, కిరాణ సరుకులు వరకు అన్ని ఆన్‌లైన్‌లోనే ఆర్డర్‌ పెట్టుకోవడం..నేరుగా ఇంటికే డెలివరీ అవ్వడం టకటక జరిగిపోతోంది. చెప్పాంలటే..పెద్దపెద్ద బడా కంపెనీలన్నీ ఇంటివద్దకే వచ్చి సేవలందించే బాటలోకి వచ్చేశాయి. ఆ కోవలోకి టైలరింగ్‌ వంటి సేవలు కూడా వస్తే..ఇక పని మరింత సులవు కదూ..!. అలాంటి వినూత్న ఆలోచనకు కార్యరూపం ఇచ్చి..హాయిగా జీవనం సాగిస్తూ..అందర్నీ ఆశ్చర్యపరుస్తున్నాడు ఆంద్రప్రదేశ్‌లోని కృష్ణాజిల్లాకు చెందిన 58 ఏళ్ల దర్జీ ఎస్.కె. కలీషా. అతడికి ఈ ఆలోచన ఎలా వచ్చింది..?. ఈ ఆలోచనతో పూర్తి స్థాయిలో సక్సెస్‌ అయ్యాడా అంటే..ఆంధ్రప్రదేశ్‌ కృష్ణా జిల్లా పెనమలూరు మండలం వణుకూరు గ్రామంలో నివాసం ఉండే ఎస్.కె. కలీషా తొలుత గ్రామంలో ఓ దుకాణాన్ని అద్దెకు తీసుకుని టైలరింగ్ చేసేవారు. దశాబ్ద కాలం వరకూ కుటుంబ పోషణకు ఏ మాత్రం ఇబ్బంది పడేవారు కాదు. ఇద్దరు పిల్లలతో హాయిగా జీవించారు. అలాగే అక్కడ గ్రామస్థులు కూడా కాలేషా దుకాణం వద్దకు వచ్చి బట్టలు కుట్టించుకునేవారు. అయితే కాలం మారి రెడీమేడ్‌ ట్రెండ్‌ కావడం, యువత ఆ దుస్తులకే ప్రాధాన్యం ఇవ్వడంతో కలిషాకి బతుకుదెరువు భారంగా మారింది. ఇలా లాభం లేదనుకుని ఎలాగైనా తనకు తెలిసిన ఈ వృత్తి ద్వారానే అధిక ఆధాయం ఆర్జించాలని స్ట్రాంగ్‌గా డిసైడయ్యారు కలిషా. అలా పుట్టుకొచ్చింది ఇంటివద్దకే టైలరింగ్‌ సేవలందించాలనే ఆలోచన. ఎందుకంటే ప్రస్తుతం పలు రకాల సేవలూ ఇంటి వద్దకే వస్తున్నాయి. ప్రజలకు సౌకర్యవంతంగా ఉండటం తోపాటు కొన్ని సంస్థలు ఈ తరహాలో లాభాలను ఆర్జిస్తున్న విధానాన్ని తెలుసుకుని ఆ పంథాలోకే తన వృత్తిని పట్టాలెక్కించారు కలీషా. ఇక తాను కూడా ఇంటి వద్దకే సేవలందించి ఆదాయాన్ని మరింతగా పెంచుకోవాలనుకున్నారు. అందుకు నాలుగు చక్రాల వాహనం అవసరమవుతుంది. కానీ అదికొనే స్థోమత లేకపోవడంతో ఓ రిక్షాను కొని దానికి కుట్టుమిషన్​ను అనుసంధానించారు. ఎక్కడికైనా తీసుకుని వెళ్లేందుకు అనుగుణంగా మార్పులు చేశారు. తొలుత తన గ్రామంలోని కాలనీల్లో తిరిగి ఇంటివద్దకే వెళ్లి పాత, చిరిగిన బట్టలు కుట్టడం ప్రారంభించారు. దీంతో అతని ఆదాయం కూడా పెరిగింది, కుటుంబ పోషణ కూడా హాయిగా సాగిపోయింది. అయితే రానురాను ఆ రిక్షా తొక్కుకుంటూ వెళ్లడం కష్టమైపోవడంతో..కుటుంబ సన్నిహితులు, స్నేహితుల సాయంతో టీవీఎస్ కస్టమ్‌ ద్విచక్ర వాహనాన్ని కొనుగోలు చేసి, దానికి మొబైల్ టైలరింగ్‌ దుకాణంగా సవరించి సేవలందించడం ప్రారంభించానని చెప్పుకొచ్చారు. పెనమలూరు మండలంలో రోజుకో గ్రామం చొప్పున తిరుగుతూ ఉపాధి పొందుతున్నట్లు తెలిపారు. అవసరం ఉన్న వాళ్లు నేరుగా కాలేషాకు ఫోన్ చేసి మరీ పిలింపించుకుని బట్టలు కుట్టించుకుంటారట. అలా రోజుకు నాలుగు వందల నుంచి ఐదు వందల వరకు సంపాదిస్తున్నట్లు తెలిపారు. ఈ మొబైల్ టైలరింగ్ వల్ల అప్పులు బాధలు ఉండవని, ఆదాయం నేరుగా జేబులోకి వస్తోందని అంటున్నారు షేక్ కాలేషా. ప్రస్తుతం ఆయన పెనమలూరు, పోరంకి, వనకూరు ప్రాంతాల వరకే తన టైలరింగ్‌ సేవలు పరిమితం చేశానని అన్నారు. ఎందుకంటే ఈ వయసులో ఈ ప్రాంతాలను దాటి వెళ్లడం తనకు కష్టంగా ఉందని చెప్పుకొచ్చారు. చివరగా ఆయన.. ఎవ్వరూ కూడా తాము చేపట్టిన వృత్తిని ఆదరించడం లేదని ఆందోళన చెందకూడదని, వినూత్నంగా ఆలోచించి సేవలందిస్తే.. సత్ఫలితాలు వస్తాయని యువతకు చక్కటి సందేశాన్ని ఇచ్చారు కలేషా. అదే బాటలో మరో జంట..తిరువనంతపురంకు చెందిన అనిష్ ఉన్నికృష్ణన్ గాయత్రి కృష్ణ దంపతులు తమ "సీవ్ ఆన్ వీల్జ్" అనే వెంచర్‌తో మొబైల్‌​ టైలరింగ్‌ సేవలందిస్తున్నారు. ఆ దంపతులు దీన్ని టెంపో ట్రావెలర్ సాయంతో నిర్వహిస్తున్నారు. వాళ్లు పెళ్లికూతురు దుస్తుల నుంచి అల్టరేషన్‌ వరకు అన్ని రకాల సేవలందిస్తారు. సాధారణంగా టైలర్లు ఆల్టరేషన్ పనులు చేపట్టడానికి ఇష్టపడరు , అయితే ఈ దంపతులు ఆల్టరేషన్‌ పనే ప్రధానంగా.. సేవలందించి కస్టమర్ల మన్ననలను అందుకుంటున్నారు.ఇదంతా చూస్తుంటే ముందు ముందు..ఇంటి వద్ద టైలరింగ్‌ సేవలు పొందొచ్చన్నమాట. అటు వారికి ఆదాయం, మనకు సమయం ఆదా అవ్వడమేగాక, నచ్చిన విధానంగా కుట్టించుకునే వెసులబాటు దొరుకుతుందన్న మాట. అంతేగాదు పరిస్థితులు సవాలుగా మారినప్పుడూ.. అవకాశాలను దొరకబుచ్చుకోవటం అంటే ఈ కలీషా, ఉన్ని కృష్ణన్‌ దంపతుల సక్సెస్‌ని చూస్తుంటో తెలుస్తోంది కదూ..!.(చదవండి: ఆధ్యాత్మికత నుంచి.. ఏకంగా కంపెనీ సీఈవోగా ప్రస్థానం..)

తొలుత రూ.వంద కోట్లతో మాత్రమే ప్రతిపాదన..! ఆపై అంచనాలు అమాంతం రూ.257 కోట్లకు పెంపు..! టెండర్‌ నుంచి శిక్షణ వరకు దోపిడీకి వీలుగా పథకం..! అనంతరం పదుల సంఖ్యలో కూడా లేని లబ్ధిదారులను భారీగా ఉన్నట్టు చూపించి.. అరకొరగా శిక్షణ కేంద్రాలను ఏర్పాటు చేసి.. వారికి పరికరాలు, మెషిన్‌ ఇవ్వకుండానే ఇచ్చినట్టు చెప్పుకొంటూ చంద్రబాబు ప్రభుత్వం భారీ కుంభకోణానికి తెరలేపింది. దాదాపు రూ.154 కోట్లకు పైగా దండుకోవడానికి సిద్ధమైంది. కంకిపాడు నుంచి సాక్షి ప్రతినిధి: చంద్రబాబు ప్రభుత్వం తన అవినీతికి కాదేదీ అనర్హం అన్నట్టు వ్యవహరిస్తోంది. బీసీలు, ఆర్ధికంగా వెనుకబడిన వర్గాలు (ఈడబ్ల్యూఎస్‌), కాపు మహిళలకు ఇచ్చే కుట్టు శిక్షణలోనూ రూ.154 కోట్లకు పైగా కొల్లగొట్టడానికి పథకం వేసింది. రాష్ట్రంలో 1,02,832 మంది మహిళలకు టైలరింగ్‌లో శిక్షణ ఇచ్చి కుట్టు మిషన్లు అందించే పేరుతో చేపట్టిన స్కీమ్‌లో దోపిడీకి తెగబడుతోంది. ముఖ్య నేత సమక్షంలో జరిగిన ముందస్తు ఒప్పందాలతోనే ఈ స్కీమ్‌ను తెరమీదకు తెచ్చారని తెలుస్తోంది. ఇందులో ముఖ్య నేత నుంచి సంబంధిత శాఖ మంత్రి, అధికారుల వరకు ఎవరి వాటా ఎంత అనేది ఒప్పందాలు కుదుర్చుకున్నారనే ఆరోపణలు వెల్లువెత్తుతున్నాయి. మహిళలకు కుట్టు శిక్షణ పథకానికి సంబంధించి ‘సాక్షి’ క్షేత్ర స్థాయి పరిశోధనలో విస్మయకర అంశాలు వెలుగుచూశాయి. – అంతర్జాతీయ మహిళా దినోత్సవం మార్చి 8న రాష్ట్రంలో లక్ష మందికి పైగా మహిళలకు శిక్షణ ఇచ్చి ఉచితంగా కుట్టు మిషన్లు అందిస్తామని సీఎం చంద్రబాబు ప్రకటించారు. 175 నియోజకవర్గాల్లోనూ మూడు నుంచి ఐదు కేంద్రాలు ఏర్పాటు చేస్తామని ఎంపిక చేసిన మహిళలకు శిక్షణ ఇస్తామన్నారు. ఇది జరిగి 45 రోజులు దాటినా 50 నియోజకవర్గాల్లో కూడా శిక్షణ మొదలుకాలేదు. ఆ పేరుతో రూ.వంద కోట్లకుపైగా కొల్లగొట్టే కార్యక్రమం మాత్రం నిర్విఘ్నంగా సాగుతోంది.టెండర్ల దశ నుంచే మాయాజాలంటెండర్లలో తక్కువ మొత్తానికి కోట్‌ చేసిన సంస్థకు కాంట్రాక్టును ఖరారు చేస్తారని తెలిసిందే. కానీ, అందుకు విరుద్ధంగా.. తక్కువ కోట్‌ చేసినవారితో పాటు అంతకంటే ఎక్కువకు కోట్‌ చేసిన మరో రెండు సంస్థలను కలిపి రంగంలోకి దించారు. ప్రి బిడ్‌లో మొత్తం 65 కంపెనీలు పాల్గొంటే 56 సంస్థలను ముందే తిరస్కరించారు. విచిత్రం ఏమంటే.. కుట్టు శిక్షణలో విశేష అనుభవంతో పాన్‌ ఇండియా కంపెనీగా గుర్తింపున్న ఐసీఏ కూడా ఇందులో ఉండడం. మిగిలిన 9 కంపెనీల్లో ఆరు సంస్థల టెండర్లను తెరవకముందే తమదైన శైలిలో పక్కకు తప్పించేశారు. అంటే.. మొత్తం 65 కంపెనీల్లో 62ను తొలగించేశారు. ఇది కేంద్ర ప్రభుత్వ నిబంధనలకు విరుద్ధం కావడం గమనార్హం.ఎల్‌1కు 5 శాతమే పని.. చంద్రబాబు ప్రభుత్వం తమవారికి శిక్షణ కాంట్రాక్టు అప్పగించడానికి ఇన్ని అడ్డంకులు పెట్టినా తట్టుకుని.. శ్రీ టెక్నాలజీ తక్కువ మొత్తానికి కోట్‌ చేసి ఎల్‌1గా నిలిచింది. కానీ, దానిని బెదిరించి 5 శాతం పని మాత్రమే అప్పగించారు. కీలక నేత ప్రమేయంతో.. ఎల్‌2, ఎల్‌3గా నిలిచిన సంస్థలకు మాత్రం 95 శాతం పని ఇచ్చారు. ఈ రెండు సంస్థలు (ఎల్‌2, ఎల్‌3) సిండికేట్‌ కావడం మరో ట్విస్ట్‌.శిక్షణ ముసుగులో..ఒక్కో మహిళ (యూనిట్‌) శిక్షణకు రూ.21,798 కేటాయించారు. ఇందులో టైలరింగ్‌లో శిక్షణ, టైలరింగ్‌ కేంద్రానికి అద్దె, మహిళకు కుట్టు మిషన్, ఇతర పరికరాల పంపిణీ వంటివి ఉన్నాయి. ఒక్కో మహిళకు 360 గంటల పాటు ఉచిత శిక్షణ ఇవ్వాలి. రోజుకు 4 గంటలు చొప్పున 90 రోజులు, 6 గంటలు చొప్పున 60 రోజులు, 8 గంటలు చొప్పున 45 రోజులు శిక్షణ ఇవ్వాల్సి ఉంది. కానీ, ఎక్కడా ఇది అమలవడం లేదు. పైగా శిక్షణకు అవసరమైన టేప్, కత్తెర, స్కేల్‌ తదితర పరికరాల కిట్‌ను కూడా లబ్ధిదారులనే తెచ్చుకోమంటున్నారు.–కుట్టు మిషన్లు కూడా ప్రముఖ కంపెనీలైన ఉషా, మెరిట్, సింగార్, పూజా తదితర కంపెనీలవి కాకుండా అతి తక్కువ ధరకు గుజరాత్‌లో తయారు చేసినవి అంటగడుతున్నారు. ఈ మొత్తాన్ని కాంట్రాక్టర్లే మిగుల్చుకుంటున్నారు.–శిక్షణ కేంద్రాలను ప్రభుత్వ భవనాల్లోనే ఏర్పాటు చేశారు. కానీ, వాటిని అద్దెకు తీసుకుని నడుపుతున్నట్లు చెబుతూ కాంట్రాక్టర్లు భారీగా వెనకేసుకుంటున్నారు. శిక్షణ కేంద్రాల్లో మహిళలకు తాగు నీరు, బాత్‌రూమ్‌ కూడా లేవు. –శిక్షణ చాలాచోట్ల శిక్షణ అంతంతమాత్రంగానే జరుగుతోంది. శిక్షకులు లేరనో.. లబ్ధిదారులు తగినంతమంది లేరనో చెబుతున్నారు. వాస్తవం ఏమంటే.. అరకొర సెంటర్లు ఏర్పాటు చేసి, అంతంతమాత్రంగా శిక్షణ ఇచ్చి ప్రభుత్వ ధనాన్ని కొల్లగొట్టడమే లక్ష్యంగా కాంట్రాక్టర్లు కథ నడిపిస్తున్నారు.ప్రముఖ సంస్థలను తోసిరాజని..కుట్టు శిక్షణ ఇచ్చేందుకు సొసైటీ ఫర్‌ ఎంప్లాయ్‌మెంట్‌ జనరేషన్‌ అండ్‌ ఎంటర్‌ప్రైజ్‌ డెవలప్‌మెంట్‌ ఇన్‌ ఆంధ్రప్రదేశ్‌ (సీడాప్‌), ఆంధ్రప్రదేశ్‌ పారిశ్రామిక, సాంకేతిక కన్సల్టెన్సీ సంస్థ (ఏపీఐటీసీవో)తో పాటు కేంద్ర సంస్థ దీన్‌దయాళ్‌ ఉపాధ్యాయ గ్రామీణ్‌ కౌశల్‌ యోజన (డీడీయూజీకేవై) ఉన్నాయి. వీటికి శిక్షణ కేంద్రాలు, శిక్షణ భాగస్వాములు ఉన్నారు. స్కిల్‌ పోర్టల్స్, అన్ని జిల్లాల్లో పర్యవేక్షణ వ్యవస్థ, సిబ్బంది సైతం ఉన్నారు. అయినా వాటిని కాదని ఆంధ్రప్రదేశ్‌ బీసీ సహకార ఆర్థిక సంస్థ ద్వారా స్కీమ్‌ను చేపట్టడం భారీ స్కామ్‌కు మార్గం సుగమం చేసుకోవడమేననే ఆరోపణలు వస్తున్నాయి.ప్రభుత్వ వైఫల్యం.. నిర్లక్ష్యానికి నిలువుటద్దం–సాక్షి క్షేత్ర స్థాయి పరిశీలనలో తేటతెల్లంకృష్ణా జిల్లా కంకిపాడులోని మహిళా శిశు సంక్షేమ శాఖ (ఐసీడీఎస్‌) ప్రాజెక్ట్‌ కార్యాలయం పై అంతస్తులోని టైలరింగ్‌ శిక్షణ కేంద్రాన్ని ‘సాక్షి’ పరిశీలించింది. ఇక్కడ 140 మందిని ఎంపిక చేసి ఉదయం 70, మధ్యాహ్నం 70 మందికి శిక్షణ ఇస్తున్నట్టు చెబుతున్నారు. ‘సాక్షి’ ప్రతినిధి ఏప్రిల్‌ 19న ఉదయం 11 గంటలకు వెళితే 16 మందే ఉన్నారు. మిషన్లు కూడా 20 మాత్రమే. బాగా పాతవైన ఇవి తుప్పుపట్టాయి. వచ్చినవారిలో ముగ్గురు అరగంటలోనే వెళ్లిపోయారు. మరో అరగంటకు 9 మంది వచ్చారు. శిక్షణ లేకపోవడంతో కబుర్లు చెప్పుకొంటూ కనిపించారు. కనీసం క్లాత్‌ కటింగ్‌కు బల్ల కూడా లేదు. కోలవెన్ను నుంచి రోజూ ఆటోలో వచ్చి వెళ్లడానికి రూ.వంద అవుతోందని పలువురు వాపోయారు. – కృష్ణా జిల్లా బంటుమిల్లిలో 138 మందిని ఎంపిక చేసినట్టు చెబుతున్నా.. కనీసం కుట్టు మిషన్లు కూడా లేవు. ఈ సెంటర్‌కు ఒక శిక్షకురాలితో పాటు వచ్చింది ఇద్దరే. మచిలీపట్నంలో మరీ చిత్రం ఐదు సెంటర్లు ఏర్పాటు చేసినట్లు అధికారులు చెబుతున్నప్పటికీ ఏ ఒక్క కేంద్రంలోనూ శిక్షణ మొదలులేదు.ఎమ్మెల్యే కార్యాలయంలోనే శిక్షణ కేంద్రం పెనమలూరు టీడీపీ ఎమ్మెల్యే బోడే ప్రసాద్‌ ఏకంగా తన కార్యాలయంలోనే దర్జీ శిక్షణ కేంద్రం పెట్టుకున్నారు. శిక్షణ ఇవ్వకున్నా ఎవరూ అడగరని, తమ పార్టీ వాళ్లకే ఉచితంగా కుట్టు మిషన్లు ఇవ్వొచ్చని ఇలా చేశారని అంటున్నారు. కుట్టు శిక్షణ కేంద్రం ఎక్కడుందని పెనమలూరు ఎంపీడీవో బండి ప్రణవిని వివరణ కోరగా ఎమ్మెల్యే కార్యాలయంలో అని చెప్పడం గమనార్హం.రూ.257 కోట్లు స్కీ (స్కా)మ్‌ ఇలా.. –మొదట యూనిట్‌కు రూ.25 వేలు చొప్పున మొత్తం రూ.257 కోట్లు ప్రతిపాదించారు–టెండర్‌లో యూనిట్‌కు రూ.21,500 వంతున 1,02,832 మంది మహిళలకు మొత్తం రూ.221,08,88,000–ఇందులో ఒక్కో కుట్టు మిషన్‌ రూ.4,300 లెక్కన: రూ.44,21,77,600–ఒక్కొక్కరికి శిక్షణ కోసం రూ.3 వేలు చొప్పున: రూ.30,84,96,000–ఒక్కొక్కరికి కుట్టు మిషన్, శిక్షణ కలిపి: రూ.7,300. ఈ ప్రకారం మొత్తం అయ్యేది 75,06,73,600.–రూ.221,08,88,000 కోట్లలో రూ.75,06,73,600 కోట్లు పోగా 146,02,14,400 స్కామ్‌ ఒక్క కుట్టు మిషన్‌కు ఏ సంస్థ ఎంతకు కోట్‌ చేసిందంటే..?–శ్రీ టెక్నాలజీ ఇండియా(ఎల్‌ఎల్‌పీ)–హైదరాబాద్‌ రూ.21,798–సోషల్‌ ఏజెన్సీ ఫర్‌ పీపుల్స్‌ ఎంపవర్‌మెంట్‌–హైదరాబాద్‌ రూ.23,400–సెంటర్‌ ఫర్‌ అర్బన్‌ అండ్‌ రూరల్‌ డెవలప్‌మెంట్‌–హైదరాబాద్‌ రూ.23,500మొబిలైజేషన్‌ అడ్వాన్స్‌ ఇవ్వండి.. పంచుకుందాంనిబంధనలకు విరుద్ధంగా కాంట్రాక్టర్లకు ముందస్తు చెల్లింపునకు సిద్ధంఒప్పందంలో లేకున్నా రూ.25 కోట్ల అడ్వాన్సులకు ప్రతిపాదనలుమంత్రి సంతకం మాత్రమే మిగిలింది.. తర్వాత పంచుకు తినడమే శిక్షణ పేరుతో 50 రోజుల్లోనే మొత్తం దండుకునేందుకు సిద్ధంరాష్ట్రవ్యాప్తంగా ఇంకా పూర్తిస్థాయిలో కుట్టు శిక్షణే ప్రారంభం కాలేదు. మొబిలైజేషన్‌ అడ్వాన్సు కింద రూ.25 కోట్లను కాంట్రాక్టర్లకు దోచిపెట్టేందుకు రంగం సిద్ధమవుతోంది. స్కీమ్‌కు సంబంధించి టెండర్‌ ఖరారై ఒప్పందం కుదిరిన మరుక్షణం నుంచే అడ్వాన్సుల కోసం ప్రయత్నాలు మొదలయ్యాయి. తొలుత రూ.60 కోట్ల అడ్వాన్సుల కోసం ప్రయత్నించి భంగపడిన కాంట్రాక్టర్లు తాజాగా రూ.25 కోట్లను రాబట్టుకోబోతున్నారు. ఈ మేరకు కాంట్రాక్టర్లు పొలిటికల్‌ బాస్‌కు రాయబారం పంపి అనుకున్నది సాధించారు. తద్వారా తమ వాటాల వసూలుకు ముఖ్య నేతలు మార్గం సుగమం చేసుకుంటున్నారని సమాచారం. నీకింత.. నాకింత తరహాలో పంచుకోవడానికి కాంట్రాక్టర్లతో కలిసి ముఖ్య నేతలు సిద్ధమయ్యారనే ఆరోపణలు వస్తున్నాయి. నిబంధనలకు విరుద్ధంగా అడ్వాన్సులిస్తే తమ మెడకు చుట్టుకుంటుందని అధికారులు ససేమిరా అంటున్నా.. వారిని దారికి తెచ్చుకుని పని చక్కబెట్టడానికి ‘పొలిటికల్‌ బాస్‌’ సరే అన్నారని సమాచారం. టెండర్‌ నిబంధనలకు విరుద్ధంగా..వాస్తవానికి బీసీ, ఈడబ్ల్యూఎస్, కాపు మహిళలకు టైలరింగ్‌ శిక్షణ ప్రారంభమైన 15 రోజులకు 33 శాతం, 30 రోజులకు మరో 33 శాతం, 50 రోజులకు మిగిలిన 33 శాతం బిల్లులు చెల్లించేలా టెండర్‌లో పేర్కొన్నారు. అంటే.. శిక్షణ పేరుతో 50 రోజుల్లోనే మొత్తం బిల్లులు కింద లాగేసేందుకు పథకం రూపొందించారు. పై నుంచి ఆమోదం లభించడంతో బీసీ, కాపు కార్పొరేషన్ల అధికారులు మొబిలైజేషన్‌ అడ్వాన్సుల కోసం ఫైల్‌ పెట్టారు. ఉన్నతాధికారులు సైతం రూల్‌ పొజిషన్‌కు సంబంధించి ఏ కామెంట్లు లేకుండానే యథాతథంగా మంత్రి సవితకు పంపారు. ఆమె సంతకం చేస్తే కాంట్రాక్టర్లకు మొబిలైజేషన్‌ అడ్వాన్సులు చెల్లిస్తారు. ఇక నీకింత.. నాకింత అని పంచుకోవడమే అని పలు శాఖల సిబ్బంది చెబుతున్నారు.

సాక్షి, అమరావతి: స్కీముల పేరుతో స్కామ్‌లకు కూటమి ప్రభుత్వం తెర తీసింది. అసలు ఇంతవరకు లబ్దిదారుల ఎంపికే జరగలేదు. కానీ శిక్షణ పూర్తైనట్లు రూ.60 లక్షలు నిధులు మాత్రం విడుదల చేసేశారు. కుట్టు పనుల్లో శిక్షణ (టైలరింగ్‌), మిషన్ల పంపిణీ పేరుతో రూ.255 కోట్లతో చేపట్టిన స్కీమ్‌లో రూ.వంద కోట్లకుపైగా కొట్టేసేందుకు స్కెచ్‌ వేశారు. వా­టాలు కుదరడంతో నిబంధనలకు విరుద్ధంగా టెండర్‌ ఖరారు చేశారు. అసలు శిక్షణ ప్రక్రియే చేపట్టకుండా 1.02 లక్షల మంది మహిళలకు సీఎం చంద్రబాబు నేడు కుట్టు మిషన్లు పంపిణీకి సిద్ధమయ్యారు. బీసీ సంక్షేమ శాఖలో అవినీతి బాగోతం ఇదీ! మూడేళ్లలో రూ.300 కోట్లు! మార్కెట్‌లో కుట్టు మిషన్లు రూ.5 వేల నుంచి రూ.13 వేల లోపే దొరుకుతున్నాయి. నాణ్యమైన మిషన్‌ అందచేసినా రూ.13 వేలు లెక్కన రాష్ట్రంలో 1,02,832 మంది మహిళా లబ్దిదారులకు అందించాలంటే రూ.1,33,68,16,000 వ్యయం అవుతుంది. కానీ ప్రభుత్వం ఖరారు చేసిన టెండర్‌ లెక్కలో మాత్రం మిషన్ల కొనుగోలుకు రూ.224,05,03,616 ఖర్చు చూపించారు. అంటే రూ.133.68 కోట్లు వ్యయం అయ్యే వాటిని ప్రభుత్వం రూ.224.05 కోట్లకు కట్టబెట్టింది. ఈ స్కామ్‌లో ఈ ఏడాది దాదాపు రూ.వంద కోట్లు స్వాహా చేసేలా పథకం రూపొందించారు. మూడేళ్లలో రూ.300 కోట్లకుపైగా ప్రజా ధనాన్ని కాజేసేందుకు ప్లాన్‌ వేశారు. వ్యయం పెంచేసి.. నైపుణ్య శిక్షణ ఇచ్చేందుకు ప్రత్యేకంగా సొసైటీ ఫర్‌ ఎంప్లాయిమెంట్‌ జనరేషన్‌ అండ్‌ ఎంటర్‌ప్రైజ్‌ డెవలప్‌మెంట్‌ ఇన్‌ ఆంధ్రప్రదేశ్‌ (సీడాప్‌) అనే విభాగం ఉంది. దాన్ని కాదని ఆంధ్రప్రదేశ్‌ బీసీ సహకార ఆర్థిక సంస్థ (ఏపీబీసీసీఎఫ్‌సీఎల్‌) ద్వారా కుట్టు మిషన్ల స్కామ్‌కు శ్రీకారం చుట్టారు. మొదట రూ.వంద కోట్లతో చేసిన ప్రతిపాదనలను కొనుగోలు, శిక్షణ, పంపిణీ పేరుతో రూ.255 కోట్లకు పెంచారు. మొత్తం 46,044 మంది బీసీ మహిళలు, 45,772 మంది ఈడబ్ల్యూఎస్, 11,016 మంది కాపు మహిళా లబ్దిదారులను ఎంపిక చేయాల్సి ఉంది. 90 రోజుల పాటు శిక్షణ ఇచ్చాక ఉచితంగా కుట్టు మిషన్‌ అందించాల్సి ఉంటుంది. ముందస్తు ఒప్పందంతోనే టెండర్‌ ఖరారు.. ఏ టెండర్‌ పిలిచినా తక్కువ మొత్తానికి కోట్‌ చేసిన సంస్థకు ఖరారు చేయాలి. బీసీ కార్పొరేషన్‌ ద్వారా ఉచిత శిక్షణ, కుట్టు మిషన్ల పంపిణీకి గతేడాది డిసెంబర్‌ 18న ఆన్‌లైన్‌ బిడ్‌లను పిలిచారు. అదే నెల 31న టెక్నికల్‌ బిడ్‌లను తెరిచి మూడు సంస్థలకు అర్హత ఉన్నట్లు ఖరారు చేశారు. తాజాగా ఆ మూడు సంస్థలకు ఫెనాన్షియల్‌ బిడ్‌లలో టెండర్‌ కట్టబెడుతూ ఆమోద ముద్ర వేశారు. యూనిట్‌ (ఒక్కో కుట్టు మిషన్‌) రూ.21,788 చొప్పున సరఫరాకు శ్రీటెక్నాల­జీ ఇండియా (ఎల్‌ఎల్‌పి, హైదరాబాద్‌) ముందుకు రాగా సోషల్‌ ఏజెన్సీ ఫర్‌ పీపుల్‌ ఎంపవర్‌మెంట్‌ రూ.23,400 చొప్పున సమకూర్చనున్నట్లు తెలిపింది. సెంటర్‌ ఫర్‌ అర్బన్‌ అండ్‌ రూరల్‌ డెవలప్‌మెంట్‌ రూ.23,500 చొప్పున సరఫరా చేస్తామని బిడ్‌లు దాఖలు చేసింది. ఈ మూడు సంస్థలకు ఎంపానల్‌మెంట్‌ చేస్తూ ప్రభుత్వం టెండర్‌ ఖరారు చేయడం గమనార్హం.తక్కువ ధరకే కుట్టు మిషన్‌ సరఫరా చేస్తామని బిడ్‌ వేసిన సంస్థకు టెండర్‌ ఇవ్వాల్సి ఉండగా, ఎక్కువ ధర కోట్‌ చేసిన మరో రెండు సంస్థలకు కూడా అవకాశం ఇవ్వడం వెనుక ఏం జరిగిందనేది బహిరంగ రహస్యమే! మరో చిత్రం ఏమిటంటే ఎక్కువ మొత్తానికి బిడ్స్‌ వేసిన రెండు సంస్థలు ఒకే సిండికేట్‌ కావడం గమనార్హం. శిక్షణ ఇవ్వలేదుగానీ నిధులిచ్చేశారు.. ప్రభుత్వం టెండర్‌లో పొందుపరిచిన ప్రమాణాలను పరిగణలోకి తీసుకుంటే ఒక్కో కుట్టుమిషన్‌ కేవలం రూ.5 వేల నుంచి రూ.13వేల లోపు మాత్రమే పలుకుతోంది. కుట్టు మిషన్‌తోపాటు శిక్షణ కూడా అందించేలా ఒక్కో యూనిట్‌కు రూ.25 వేలు చొప్పున ప్రభుత్వం నిర్ణయించింది. ఇక ఎక్కడైనా సరే టెండర్‌ దక్కించుకున్నవారు పనులు మొదలుపెట్టి తరువాత బిల్లులు సమర్పిస్తారు. కానీ ఇక్కడ మాత్రం టెండర్‌ ఖరారు కాగానే ఆర్డర్‌ ఇవ్వకముందే మొబిలైజేషన్‌ అడ్వాన్స్‌ పేరుతో రూ.60 కోట్లు (టెండర్‌ మొత్తంలో 25 శాతం) ఇచ్చేలా ప్రభుత్వ పెద్దల డైరెక్షన్‌లోనే ఆగమేఘాలపై ఫైల్‌ కదిలింది. లబ్దిదారుల ఎంపిక, శిక్షణ కార్యక్రమాలను చేపట్టకుండానే ఎంటర్‌ప్రైజర్‌ డెవలప్‌మెంట్‌ ప్రోగ్రాం (ఈడీపీ) పేరుతో ఏకంగా రూ.60 లక్షలను సూక్ష్మ, చిన్న, మధ్యతరహా పరిశ్రమల (ఎంఎస్‌ఎంఈ) సంస్థకు ఇచ్చేయడం అనుమానాలకు తావిస్తోంది. టెండర్‌ ఖరారయ్యాక జిల్లాల వారీగా లబ్దిదారుల నుంచి దరఖాస్తులు స్వీకరించి శిక్షణ పూర్తయ్యాక ఇవ్వాల్సిన నిధులను ముందుగానే విడుదల చేయడంతో అవి ఎవరి జేబులోకి చేరాయనే ప్రశ్నలు ఉత్పన్నమవుతున్నాయి.

మహిళలకు ఉపాధి దానివల్ల వారికి ఆర్థిక స్వావలంబన సమాజంలో లైంగిక వివక్షను చెరపగలదు. కాని స్త్రీ, పురుషులకు ఉపాధి కల్పించడంలో వివక్ష కొనసాగుతూనే ఉంది. తమ జీతభత్యాల బేరసారాల్లో స్త్రీల గొంతు బలపడుతున్నా వారు పొందుతున్నది తక్కువే. ఇక పనిచోట వారి శ్రమదోపిడి తీవ్రం. తమిళనాడులో విస్తారంగా ఉన్న రెడిమేడ్‌ దుస్తుల రంగంలో స్త్రీల పని పరిస్థితులు ఒక నమూనా. శ్రమ తప్ప ఆదాయం లేని ఉపాధి స్త్రీలకు కొనసాగాల్సిందేనా? స్త్రీలు ఉపాధి పొందాలంటే అంత సులభమా? చెంగల్పట్టులో ఉన్న అనేక ఎక్స్‌పోర్ట్‌ గార్మెంట్స్‌ మాన్యుఫ్యాక్చర్‌ కంపెనీల్లో ఆ చుట్టుపక్కల పల్లెల్లోని స్త్రీలు వేలాదిగా పని చేస్తారు. వారంతా ఉదయం నాలుగున్నరకే లేచి ఇంట్లో వంట చేసి పిల్లలకు క్యారేజీలు కట్టి తాము టిఫిన్, లంచ్‌ కట్టుకుని ఏడూ ఏడున్నరకంతా కంపెనీ బస్సు కోసం నిలుచోవాలి. 9 గంటలకు ఫ్యాక్టరీలో డ్యూటీ ఎక్కితే తిరిగి సాయంత్రం 6 గంటల వరకూ నిలుచునే పని చేయాలి. మళ్లీ బస్సెక్కి ఇల్లు చేరి రాత్రి వంటకు పూనుకోవాలి. ఇంతా చేసి వారికి నెలకు దక్కేది ఎంతో తెలుసా? 9,500 రూపాయలు. సీనియర్లకైతే 10,500 రూపాయలు. ట్రాన్స్‌పోర్ట్‌ కటింగు, ఫ్యాక్టరీలో ఇచ్చిన టీ, బిస్కెట్ల కటింగు పోను వచ్చే జీతం ఇంతే. కాని వీరు తయారు చేసిన బట్టలు పోలో, ఇండియన్‌ టెరైన్‌ వంటి బ్రాండ్లుగా యూరప్, జపాన్, కెనడా, అమెరికాల్లో ఖరీదైన వెలకు అమ్ముడుపోతాయి. తమిళనాడులో గార్మెంట్‌ ఫ్యాక్టరీల్లో 5 లక్షల మంది స్త్రీలు పని చేస్తున్నారు. మొత్తం ఆ రాష్ట్రంలో 18 లక్షల మంది టైలరింగ్‌ ఉపాధిలో ఉంటే వారిలో 60 శాతం మంది మహిళలు. తమిళనాడులో వ్యవసాయం తగ్గాక రైతు కూలీలుగా పని చేసే స్త్రీలు ఫ్యాక్టరీల వైపు అడుగులు వేస్తున్నారు. కాని వారి శ్రమను దోచుకునే సమస్త ఏర్పాట్లు ఇదివరకే జరిగిపోయి ఉన్నాయి. అందుకే ఇటీవల చెన్నైలో ఈ ఫ్యాక్టరీలలో పనిచేసే స్త్రీలు నిరసన వ్యక్తం చేశారు. కోర్టులు కూడా వీరి జీతం పెంచమని చెప్పినా తమిళనాడులోని 500 మంది గార్మెంట్‌ ఫ్యాక్టరీల యజమానులు జీతాలు పెంచితే ఖర్చు పెరిగి ఆర్డర్లు తగ్గుతాయని, దుస్తుల కంపెనీలు ఆర్డర్లను శ్రీలంక, బంగ్లాదేశ్, పాకిస్తాన్‌ వంటి దేశాలకు చీప్‌ కూలీల కోసం తరలిస్తాయని అభ్యంతరం చెబుతున్నారు. అయితే ఆ మాటలన్నీ సాకులే అని ప్రత్యేకంగా చెప్పక్కర్లేదు. కొత్త జీతాలైనా ఎంతని? 15,000 మాత్రమే. ఆ 15 వేలు కూడా ఇవ్వం అంటున్నారు. స్త్రీలు ఉపాధి పొందితే ఆ ఆర్థిక స్వావలంబనతో వారిలో ఆత్మవిశ్వాసం కలుగుతుంది. కుటుంబ అవసరాలు, పిల్లల చదువులు వారి అభిలాషల మేరకు నెరవేర్చుకోవచ్చు. భర్తమీద ఆధారపడవలసిన పని లేకుండా నిర్ణయాలు తీసుకోవచ్చు. కాని వారికి లభిస్తున్న ఉపాధి వారికి ఏ ఆదాయమూ మిగల్చనిది అయితే ఆ శ్రమకు అర్థం లేదు. జీతాలు ఎప్పుడూ పురుషుల కోసమే అనే మైండ్‌సెట్‌ సమాజంలో పోలేదు. స్త్రీల జీతం కోసం పెంపునకు యోగ్యమైనదే అని గ్రహించినప్పుడే పరిస్థితిలో కొద్దిగానైనా మార్పు వస్తుంది. ఇవి చదవండి: మీ అమ్మాయికి చెప్పండి!

‘ఏ వయసులో అయినా సరే ఎవ్వరిపైనా ఆధారపడకూడదు’ అని టైలరింగ్‌ చేస్తూ తన రెక్కల కష్టం మీదే బతుకుతోంది 70 ఏళ్ల లచ్చుమమ్మ. కామారెడ్డి జిల్లా సదాశివనగర్‌ మండలంధర్మారావు పేట గ్రామంలో ఉండే లచ్చుమమ్మ ఐదు దశాబ్దాలుగా పాత కాలం నాటి రవికల నుంచి నేటి మోడ్రన్‌ డ్రెస్సుల వరకు  తన కుట్టుపనితనంతో మెప్పిస్తోంది. ఆ ఊళ్లో అందరూ ‘లచ్చుమమ్మను చూసి నేర్చుకోవాలె’ అని అంటుంటారు. ఏడు పదుల వయసులో కూడా లచ్చుమమ్మ ఆధునిక డిజైన్లలో బ్లౌజులు, డ్రెస్సులు కుట్టడం చూసి కాలానికి తగినట్టు పని తనాన్ని మెరుగుపరుచుకుంటుంది అని కూడా అంటుంటారు. యాబై ఏళ్లుగా అలుపెరగకుండా బట్టలు కుడుతూ జీవనం సాగిస్తున్న లచ్చుమమ్మ అసలు పేరు గజవాడి లక్ష్మి. ధర్మారావుపేట గ్రామంలో అందరూ లచ్చుమమ్మ అని పిలుస్తారు. లచ్చుమమ్మకు 14వ ఏట ధర్మరావుపేటకు చెందిన బాలవీరయ్యతో వివాహం జరిగింది. వాళ్లకు ఐదుగురు కూతుళ్లు. ఉన్న ఊళ్లో ఉన్నంతలో చదివించారు. వాళ్లను పెంచి పెద్ద చేసి పెళ్లిళ్లు చేసి, అత్తవారిళ్లకు పంపించారు. వాళ్లకు పిల్లలు. లచ్చుమమ్మకు పన్నెండు మంది మనుమలు, మనుమరాళ్లు. వాళ్లు కూడా పెద్దోళ్లయ్యారు. నాటి విషయాల గురించి ప్రస్తావిస్తూ ‘ఐదుగురు ఆడపిల్లల్ని పెంచి, పెళ్లిళ్లు చేయడం అంటే సవాలే..’ అంటూ తమ కష్టాన్ని వివరిస్తుంది. లచ్చుమమ్మ భర్త బాలవీరయ్య చిన్న చిన్న వ్యాపారాలు చేసి కుటుంబాన్ని నెట్టుకొచ్చేవాడు. భర్త కష్టానికి చేదోడుగా ఉంటుందని యాబై ఏళ్ల కిందటే లచ్చుమమ్మ సొంతంగా బట్టలు కుట్టడం మొదలుపెట్టింది. అప్పుడు ఆ ఊళ్లోకి ఇంకా టైలరింగ్‌ మిషన్లు రాలేదు. దాంతో బట్టలు కత్తిరించి సూదీదారంతోనే కుట్టేది. గ్రామంలో నాటి తరం మహిళలు ధరించే రవికలను బాగా కుడుతుందనే పేరు లచ్చుమమ్మకి. ఆడపిల్లలకు గౌన్లు, లంగా, జాకెట్లు కుట్టడమూ సొంతంగానే నేర్చుకుంది. అందరి ఇళ్లల్లోనూ ఆమె కుట్టిన బట్టలు ఉంటాయి.  ఆధునిక డిజైన్లు సైతం లచ్చుమమ్మ చేతికుట్టు బాగుంటుందని చాలా మంది ఆమె దగ్గరే కుట్టించుకునేవారు. నిన్న మొన్నటి వాళ్లే కాదు, ఈ తరం అమ్మాయిలు కూడా లచ్చుమమ్మ దగ్గరకు వచ్చి బ్లౌజులు కుట్టించుకుంటారు. మొదట్లో సాదా రవిక కుట్టడానికి 30 పైసలు, గుండీల రవిక కుట్టడానికి 50 పైసలు తీసుకునేదట. ఇప్పుడు సాధారణ బ్లౌజ్‌కు రూ. 65, లైనింగ్‌ బ్లౌజ్‌కు రూ.130 తీసుకుంటుంది. ‘అప్పట్లో రోజుకు పది నుంచి ఇరవై దాకా బ్లౌజులు, గౌన్లు కుట్టేదాన్ని. పండుగల సీజన్లో అయితే రాత్రి, పగలు తేడా ఉండేది కాదు. ఇప్పుడు కూడా రోజూ రెండు మూడు బ్లౌజులు కుడతా’ అని చెబుతోంది లచ్చుమమ్మ. పదేళ్ల క్రితం భర్త వీరయ్య చనిపోయాడు. ఇప్పుడు లచ్చుమమ్మ ఒక్కత్తే ఉంటుంది. తన పోషణార్థం కుట్టుపనినే నమ్ముకుంది. ఏళ్లుగా ఆమె దగ్గర రవికలు కుట్టించుకున్న నాటి తరం వాళ్లంతా ఇప్పటికీ లచ్చుమమ్మ దగ్గరికే వస్తుంటారు. వయసు మీద పడి, నెమ్మదిగా కుట్టినా చెప్పిన మాట ప్రకారం కుట్టి ఇస్తుందని నమ్మకం ఎక్కువ. ఏ సమయంలో ఆమె ఇంటికి వెళ్లినా.. కూర్చుని బట్టలు కత్తిరించడమో, లేదంటే మిషన్‌ మీద కుట్టడమో చేస్తూ కనిపిస్తుందని గ్రామస్తులు చెబుతున్నారు. యాబై ఏళ్లుగా కుడుతున్నా.. పద్నాలుగేళ్ల వయసులో పెళ్లయ్యి ఈ ఇంటికి వచ్చా. ఇద్దరు కూతుళ్లు పుట్టిన తరువాత కుటుంబ అవసరాల కోసం ఏదైనా పని చేయాలనుకున్నా. మా అమ్మ మాకు చిన్నప్పుడు చేతితోనే బట్టలు కుట్టేది. ఇంటి అవసరాలు పెరిగిన ప్పుడు నేను కూడా బట్టలు కుట్టాలని, చేతికుట్టుతో రవికలు కుట్టడం మొదలుపెట్టాను. ఒక్కొక్కరుగా రావడం మొదలై ఊళ్లో ఉన్న ఆడవాళ్లందరూ రవికలు కుట్టించుకునేవారు. ముప్పయి ఏళ్ల పాటు చేతికుట్టుతోనే కుట్టేదాన్ని. కుట్టు మిషన్లు వచ్చిన తరువాత ఓ మిషన్‌ తీసుకున్నా. కొన్ని రోజుల్లోనే మిషన్‌ కుట్టు నేర్చుకొని, సొంతంగానే కుట్టడం మొదలుపెట్టిన. పిల్లలు వద్దంటరు కానీ, చేతనైనన్ని రోజులు పనిచేసుకొని బతకాలి, ఎవరి మీదా ఆధారపడవద్దని ఈ పని వదలడం లేదు. – గజవాడ లక్ష్మి – ఎస్‌.వేణుగోపాల్‌ చారి,  సాక్షి, కామారెడ్డి

కావల్సినన్ని వనరులు సమకూరినప్పుడు కూర్చుని సేద తీరుదామనుకుంటారు చాలామంది. తమ చుట్టూ ఉన్న నలుగురికైనా వారి స్వశక్తిని నమ్ముకునేలా  చేయూతనిద్దాం అనుకుంటారు అతి కొద్దిమంది. అలాంటివారిలో కొత్తమాసు కృష్ణవేణి ఒకరు.  సికింద్రాబాద్‌లోని టెలికాం కాలనీ, కానాజీగూడలో ఉంటున్న ఈ గృహిణి తన ఇంటినే సేవాకేంద్రంగా మలిచి పదేళ్లుగా మహిళలకు ఉపాధి శిక్షణా కార్యక్రమాలను ఉచితంగా అందిస్తున్నారు.  మహిళలకు శిక్షణ ఇస్తూ బిజీగా ఉన్న కృష్ణవేణిని కలిసినప్పుడు, ఆమె సేవామార్గం వివరాలను ఇలా పంచుకున్నారు..  ‘‘పదిహేనేళ్ల క్రితం మావారు రంగారావు సత్యసాయి సేవాకార్యక్రమాలలో పాల్గొనేవారు. నేనూ ఆ కార్యక్రమాలకు వారి వెంట వెళ్లేదాన్ని. ఆ సమయంలోనే గ్రామాలలోని మహిళలకు స్వయం ఉపాధికి పనికి వచ్చే కార్యక్రమాలు చేస్తే బాగుంటుందనుకున్నాను. అప్పుడే మల్లాపూర్‌ గ్రామంలో మొట్ట మొదటిసారిగా నాకు వచ్చిన కుట్టు పనులను అక్కడి మహిళలకు నేర్పించి, వారికి ఆదాయ మార్గం  చూపటం సంతృప్తినిచ్చింది. ఇంటి వద్ద నుంచి..  సేవా కార్యక్రమాలు ఎలా చేయచ్చో ఆ ఆడుగులు ఎలాగూ నేర్పించాయి. ఇంట్లో మా వారికి చెప్పి పైన ఓ గదిని ఏర్పాటు చేశాను. ఇంట్లోనే ఉంటాను కాబట్టి మహిళలకు టైలరింగ్, సాయంకాలాలు పేద పిల్లలకు ట్యూషన్లు చెప్పేదాన్ని. ఇక్కడ ఒక్కచోటే సేవ చేస్తూ ఉంటే కాదు, మరికొందరికి ఉపాధిని అందిస్తే బాగుంటుందనే ఉద్దేశ్యంతో గ్రామాలకి వెళ్లడం ్రపారంభించాను. వెళ్లిన ఊళ్లో ముందుగా అక్కడ అనువైన స్థలం చూసుకొని, ఒక టీచర్‌ని ఏర్పాటు చేసి, నేర్చుకునేవారిని ఎంపిక చేసేదాన్ని. సాయిసంస్థ ద్వారానే రెండు నెలల పాటు 200 మందిని 10 బృందాలుగా చేసి, స్వయంగా శిక్షణ ఇచ్చాను.  గృహిణిగా ఇంటి పనులు చేసుకుంటూ ఉండే నేను అలా ఒక్కో ఏడాది దాటుతూ సేవాకార్యక్రమాల్లో  తీరికలేకుండా అయిపోవడం ఎంతో సంతృప్తినిచ్చింది. స్వచ్ఛంద సంస్థలతో కలిసి..  ఈ 10 ఏళ్లలో తెలంగాణ, ఆంధ్రప్రదేశ్, కర్ణాటక రాష్ట్రాలలోని 300 గ్రామాలలో దాదాపు çపన్నెండు వేల మంది గ్రామీణ మహిళలకు కుట్టు మిషను, మెహెందీ, ఫ్యాషన్‌ డిజైనింగ్, ఎంబ్రాయిడరీ, మగ్గం వర్క్, పేపర్‌ వర్క్, ఫ్యాషన్‌ జ్యువెలరీ తయారీ, బ్యూటీషియన్‌ .. వంటి శిక్షణా కార్యక్రమాలను ఉచితంగా నిర్వహించాం. ఆ తర్వాత ఈ సేవామార్గంలో కొన్ని స్వచ్ఛంద సంస్థల వాళ్లు పరిచయమయ్యారు. అలా మేధా చారిటీ, అభయ ఫౌండేషన్‌ స్వచ్ఛంద సంస్థలతోనూ కలిసి గ్రామీణ మహిళలకు ఎనిమిది వేల కుట్టుమిషన్లు, ఇతర ఉపాధులకు అవసరమయ్యే పని ముట్లను ఏర్పాటు చేశాం. పిల్లలకు  ఫ్రీ ట్యూషన్లు కరోనా తర్వాత పిల్లలకు చదువులు బాగా తగ్గిపోయాయి. డల్‌గా ఉన్న స్టూడెంట్స్‌ మరీ వెనకబడిపోకుండా ఆర్థిక స్తోమత లేని విద్యార్థులకు ఫ్రీ ట్యూషన్స్‌ ఏర్పాటు చేశాం. ఇందుకు ప్రభుత్వ స్కూల్‌ విద్యార్థులనే ఎంచుకుంటాం.  ఉపాధికి దారులు అపార్ట్‌మెంట్లు, గేటెడ్‌ కమ్యూనిటీలలో తెలిసినవారి నుంచి ఇక్కడి మహిళలకు ఆర్డర్‌ మీద వర్క్స్‌ ఇప్పిస్తుంటాను. ఈ ఆర్డర్లు తెచ్చుకోవడానికి ఈ బృందంలోని వారి నుంచి కొందరిని నియమిస్తాను. అమెరికాలో, దూర్రపాంతాల్లో తెలిసినవారుంటే వారికి మావాళ్లు చేసిన వర్క్స్‌ ఫోన్ల ద్వారా చూపించి, ఆర్డర్స్‌ తెప్పిస్తుంటాం. వారికి కొరియర్‌ ద్వారా పంపిస్తుంటాం. దీని ద్వారా ఈ మహిళలకు కొంత ఆదాయం లభిస్తుంది. కోర్సు తర్వాత వారి ఇంటి వద్దనే నేర్చుకున్న పనిని కొనసాగించేలా కూడా చూస్తున్నాం’’ అని కృష్ణవేణి వివరించారు. – నిర్మలారెడ్డి

‘నీ విద్య నువు సరిగా నేర్చుకో... డబ్బు, గుర్తింపు అవే వస్తాయి’ అంటోంది ఈ టైలరమ్మ. బట్టలు కొత్తగా కుట్టడం కూడా లక్షలు తెచ్చి పెడతాయా? .. పెడతాయి. పల్లెటూళ్లో వ్యవసాయం చేసుకుంటూ రాత్రిళ్లు కుట్టు పని చేసిన ధోలీ  యూ ట్యూబ్‌లో అందరూ టాలెంట్‌ ప్రదర్శించడం చూసి తను కూడా టైలరింగ్‌ను యూ ట్యూబ్‌లో చూపెట్టింది. రకరకాల స్త్రీల దుస్తులను కట్‌ చేసి కెమెరా ముందు కుడుతుండేసరికి లక్షల మంది ఫాలోయెర్లు ఏర్పడ్డారు. కుట్టడానికి ఆర్డర్లు వచ్చిపడుతున్నాయి. యూ ట్యూబ్‌ నెల తిరిగే సరికి చెక్‌ పంపుతోంది. అవార్డులు కూడా మొదలయ్యాయి. కత్తెర, టేప్‌తో ఒక మహిళ సాధించిన విజయం ఇది. నవ్యమైన ఐడియానే ఆమె విజయానికి కారణం. ‘కొందరు విధిని నమ్ముకుని కూచుంటారు. కొందరు మాత్రం తమ విధిరాతను తామే రాసుకుంటారు’  అంటుంది ధోలి. ఈమె ఇప్పుడు  రాజ్‌ మసంద్‌లో ఉంటుంది. ఇది రాజస్థాన్‌లోని ఒక మోస్తరు సిటీ. కాని అక్కడి నుంచే దేశం మొత్తానికి తెలిసింది. ఇంకా చెప్పాలంటే ఎక్కడెక్కడైతే భారతీయులు ఉన్నారో అక్కడి వారికి కూడా తెలిసింది. దానికి కారణం బట్టలు కుట్టడంలో ధోలికి ఉండే విశేష ప్రతిభ, సృజనాత్మకత. వేగం. కొత్తదనం. స్త్రీలు ధరించే అన్ని రకాల వస్త్రాలను మరింత కొత్తగా ఎలా చేయవచ్చో, ఎలా ఆకర్షణీయంగా మలచవచ్చో ధోలి చేసే వీడియోల్లో చూడొచ్చు. కొందరు విద్యను దాచుకుంటారు. కాని ధోలి తనలాంటి స్త్రీలు టైలరింగ్‌ నేర్చుకుని తమ కాళ్ల మీద తాము నిలబడాలని తెలిసిందంతా చెప్పేస్తుంది. అందుకే ఆమెకు అంత ప్రచారం. మన్నన. బాల్య వివాహం  చేసుకుని ధోలిది రాజస్థాన్‌లోని భరత్‌పూర్‌. తండ్రి వ్యవసాయం చేసేవాడు. వెనుకబడిన ్రపాంతం కావడంతో 10 సంవత్సరాలకే పెళ్లి చేసి ఈడేరాక అత్తారింటికి పంపాడు. 18 ఏళ్లు వచ్చేసరికి ధోలి ముగ్గురు పిల్లల తల్లి. అత్తారింటిలో పెద్ద కోడలు కావడం వల్ల బండెడు చాకిరీ ఉండేది. పగలు పొ లంలో కూలి పని చేసేది. పాలు పితికి అమ్మేది. చిన్నప్పటి నుంచి టైలరింగ్‌ అంటే ఆసక్తి ఉండటం వల్ల నేర్చుకోవడంతో రాత్రిళ్లు కరెంటు లేని ఇంట్లో కిరోసిన్‌ దీపం కింద కుట్టేది. కాని బతుకు మాత్రం ఎక్కడ వేసిన గొంగళి అన్నట్టుగానే ఉండేది.  సిటీకి మారాక కొన్ని కారణాల వల్ల పట్నమైన రాజ్‌ మసంద్‌కు ధోలి కాపురం మార్చింది. అక్కడ టైలరింగ్‌ మొదలెట్టింది. 2016లో యూట్యూబ్‌ ఆమె దృష్టికి వచ్చింది. అందులో రకరకాల వ్యక్తులు తమకు తెలిసిన విద్యలు వీడియోలు చేసి పెట్టడం గమనించింది. ‘నేనెందుకు నా టైలర్‌ విద్యను ప్రదర్శించకూడదు’ అని వీడియోలు చేసి  పెట్టింది. రోడ్డు మీద ఉండే తన ఇంటిలో రోడ్డు రణగొణ ధ్వనుల మధ్య ఆ వీడియోలు చేసి అప్‌లోడ్‌ చేసింది. కాని అంతగా గుర్తింపు రాలేదు. ధోలి ఆగలేదు. వీడియోలు బాగా గమనించి ఎలా చేయాలో తెలుసుకుని 2017లో ‘ఘోరి ఫ్యాషన్‌ డిజైనర్‌’ పేరుతో యూట్యూబ్‌ చానల్‌ తెరిచింది. 27 కోట్ల వ్యూస్‌ టైలరింగ్‌ పని నేర్చుకోవాలని చాలా మంది స్త్రీలకు ఉంటుంది. కొత్త కొత్త ఫ్యాషన్స్‌ ఫాలో కావాలని మరికొంత మంది స్త్రీలకు ఉంటుంది. వీరంతా వెంటనే ధోలి చేస్తున్న వీడియోలను ఇష్టపడి చానల్‌కు సబ్‌స్క్రయిబ్‌ చేశారు. ఏ బట్టను ఏ మోడల్‌తో ఎలా కుట్టాలో ధోలి చకచకా చెప్తూ కుట్టి చూపుతుంది కాబట్టి వాటిని ఫాలో కాసాగారు. కుర్తీలు, అనార్కలి డ్రస్సులు, బ్లౌజ్‌లు... ఒకటని ఏముంది చాలా కొత్తరకంగా ధోలి డిజైన్లు ఉంటాయి. యూ ట్యూబ్‌ నుంచి తొలి పారితోషికంగా 11 వేల రూపాయలు వచ్చాయి. ఇప్పుడు ఆమెకు 16 లక్షల మంది సబ్‌స్క్రయిబర్లు ఉన్నారు. ఇప్పటికి 700 వీడియోలు చేసి అప్‌లోడ్‌ చేసింది. వీటికి 27 కోట్ల వ్యూస్‌ వచ్చాయి. యూ ట్యూబ్‌ నుంచి నెలకు లక్షకు పైగా పారితోషికం అందుతోంది. అంటే ధోలి ఎంత సక్సెస్‌ఫుల్‌ టైలరమ్మో అర్థం చేసుకోవచ్చు. తన ప్రచారం కోసం ఫేస్‌బుక్‌లోనూ ఇన్‌స్టాలోనూ అకౌంట్లు తెరిచింది. రోజుకు 20 రూపాయల నుంచి ఒకప్పుడు పల్లెటూళ్లో రాత్రిళ్లు బట్టలు కుడితే అతి కష్టమ్మీద రోజుకు 20 రూపాయలు వచ్చేవి. ఇవాళ ధోలి కేవలం తన ప్రతిభ, సృజనాత్మకతతో పాటు సోషల్‌ మీడియా సహాయంగా పెద్ద సంపాదన చూస్తోంది. రాజ్‌ మసంద్‌లో మంచి ఇల్లు ఏర్పాటు చేసుకుంది. ఆమెను పిలిచి అవార్డులు ఇచ్చి గౌరవిస్తున్నారు. ‘ఎదుటి వారిని ఓడించడం కంటే మనం గెలవడం ముఖ్యం అనుకోవాలి. మనలోని ప్రతికూల భావాలను తీసేస్తే తప్పకుండా విజయం సాధిస్తాం’ అంటుంది ధోలి.  

సాక్షి, హైదరాబాద్‌: టైలరింగ్‌కు వెళ్లిన యువతి అదృశ్యమైన సంఘటన ఆదివారం అఫ్జల్‌గంజ్‌ పోలీస్‌ స్టేషన్‌ పరిధిలో చోటు చేసుకుంది. పోలీసుల కథనం మేరకు వివరాలిలా ఉన్నాయి. కిషన్‌గంజ్‌ ఉస్మాన్‌షాహి ప్రాంతానికి చెందిన కుష్బూ కుమారి అశోక్‌ బజార్‌లోని టైలరింగ్‌ సెంటర్‌కు ట్రైనింగ్‌ నిమిత్తం వెళ్లేది. శుక్రవారం టైలరింగ్‌కు వెళ్లిన కుష్బూ ఇంటికి తిరిగి రాకపోవడంతో ఆందోళనకు గురైన తల్లిదండ్రులు ఆమె కోసం గాలించినా ప్రయోజనం లేకపోవడంతో అఫ్జల్‌గంజ్‌ పోలీస్‌ స్టేషన్‌లో ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేపట్టారు. 

సాక్షి, బనశంకరి(కర్ణాటక): పట్టపగలు ఇంట్లోకి చొరబడిన దుండగుడు ఒంటరి మహిళను కత్తెరతో పొడిచి చంపాడు. ఈ ఘటన బనశంకరిపోలీస్‌స్టేషన్‌ పరిధిలో చోటుచేసుకుంది. యారబ్‌నగర 16 వ క్రాస్‌ నివాసి టైలరింగ్‌ చేస్తున్న అఫ్రినా ఖానం (28) హతురాలు. భర్త లాలూఖాన్‌ తో జీవిస్తోంది. ఆమెకు ఐదు, మూడేళ్లు వయసు గల ఇద్దరు పిల్లలు ఉండగా వీరిని తమ పుట్టింటికి పంపించింది. భార్య ప్రవర్తనపై అనుమానం వచ్చిన భర్త గొడవపడేవాడు. ఇతడు ఒక టింబర్‌డిపోలో పనిచేసేవాడు. మంగళవారం సైతం గలాటా జరిగింది. భర్త పనికి వెళ్లిపోయిన కొంతసేపటికి ఒక వ్యక్తి వచ్చి అఫ్రినాతో గొడవకు దిగాడు. కొంతసేపటికి అక్కడే ఉన్న కత్తెర తీసుకుని ఆమె పొడవడంతో తీవ్రగాయాలతో చనిపోయింది. దుండగుడు ఆమె మృతదేహంపై బట్టలు కుప్పగా వేసి నిప్పంటించి వెళ్లిపోయాడు. మంగళవారం సాయంత్రం ఇంట్లో నుంచి పొగలు వస్తుండగా స్థానికులు చూసి ఆమె సోదరికి, భర్తకు ఫోన్‌ చేశారు. వారు వచ్చి తలుపులు పగులగొట్టి ఇంట్లోకి వెళ్లగా పరుపు, మృతదేహంపై బట్టలు కాలిపోయాయి. బనశంకరి పోలీసులు చేరుకుని పరిశీలించారు. హంతకుని ఆచూకీ లభించిందని త్వరలోనే అరెస్ట్‌చేస్తామని దక్షిణ డీసీపీ హరీశ్‌ పాండే తెలిపారు.   

సంప్రదాయ దుస్తులు, చీరల విభాగంలో ఆదిత్య బిర్లా ఫ్యాషన్‌ రిటైల్‌ (ఏబీఎఫ్‌ఆర్‌ఎల్‌), టాటా గ్రూప్‌నకు చెందిన తనిష్క్‌ తదితర సంస్థలకు పోటీగా రిలయన్స్‌ రిటైల్‌ కూడా రంగంలోకి దిగుతోంది. కొత్తగా అవంత్రా పేరిట స్టోర్స్‌ చెయిన్‌ను ప్రారంభించనుంది. ప్రైవేట్‌ లేబుల్స్‌ను విక్రయించడంతో పాటు ప్రాంతీయంగా వీవర్‌ క్లస్టర్లతో పాటు నల్లి సిల్క్స్‌ .. పోతీస్‌ వంటి థర్డ్‌ పార్టీ బ్రాండ్లతో కూడా అవంత్రా జట్టుకట్టనుంది. ఆభరణాలు, యాక్సెసరీలు, టైలరింగ్‌ సరీ్వసులు కూడా అందించనుందని సంబంధిత వర్గాలు తెలిపాయి. తొలి స్టోరు బెంగళూరులో ఏర్పాటవుతుందని, ఆ తర్వాత కర్ణాటకలోని మిగతా ప్రాంతాల్లో, ఆంధ్రప్రదేశ్‌లో ప్రారంభించవచ్చని వివరించాయి. ఆభరణాల బ్రాండ్‌ అయిన తనిష్క్‌ సంప్రదాయ దుస్తుల్లోకి అడుగుపెట్టడం, ఏబీఎఫ్‌ఆర్‌ఎల్‌ కూడా సవ్యసాచి, తరుణ్‌ తహిలియాని వంటి దేశీ డిజైనర్‌ వేర్‌ బ్రాండ్స్‌లో వాటాలు కొనుగోలు చేసిన నేపథ్యంలో రిలయన్స్‌ అవంత్రా స్టోర్స్‌ ఏర్పాటు చేస్తుండటం గమనార్హం.

షబ్నమ్‌. వయసు 17. ఈ వయసు పిల్లలు అడిగినట్లు ‘నాన్నా! పండక్కి నాకు కొత్త బట్టలు కొనివ్వు, నాన్నా పది రూపాయలివ్వు జడ పిన్నులు కొనుక్కుంటాను’ అని అడగడంలేదీ అమ్మాయి. రివర్స్‌లో ఆ తండ్రే ‘నువ్వు నా కంటే ఎక్కువ సంపాదిస్తున్నావు బిడ్డా’ అని మురిసిపోతున్నాడు. ఆ తండ్రి.. కూతుర్ని పెద్ద ముందుచూపుతో నడిపించిన దార్శనికుడేమీ కాదు. ‘ఆడపిల్లవు ఊరు దాటి మూడు కిలోమీటర్లు నడిచి వెళ్లి చదువుకుంటావా, వద్దే వద్దు. ఊళ్లో బడిలో ఉన్నంత వరకు ఏడు తరగతులు చదివావు ఇక చాలు’ అనేశాడు ఐదేళ్ల కిందట. ఆడపిల్లకు వంట వండటం నేర్పించి పెళ్లి చేయడమే అమ్మానాన్నల బాధ్యత అన్నట్లు రెండేళ్ల కిందట ఓ పెళ్లి సంబంధం కూడా తెచ్చాడు.  కూతురు తల వంచలేదు! బడి మాన్పిస్తే చేసేదేమీ లేక ఊరుకుంది. కానీ పెళ్లి చేసి పంపించేస్తానంటే ఊరుకోనంటే ఊరుకోనని మొండికేసింది షబ్నమ్‌. ‘ఆడపిల్లలు 18 ఏళ్లకంటే ముందు పెళ్లి చేసుకోకూడదట’ అని కూడా వాదించింది. పిల్ల సంతోషంగా తల వంచితే తాళి కట్టించాలి తప్ప మెడలు వంచి కట్టించకూడదని షబ్నమ్‌ నానమ్మ నచ్చచెప్పడంతో ఆ ప్రయత్నం మానుకున్నాడా తండ్రి.కూతురికి లోకజ్ఞానాన్నంతా నూరిపోశాడని టైలరింగ్‌ టీచర్‌ను మాత్రం బాగానే తిట్టుకున్నాడు.  తండ్రి తల ఎత్తుకున్నాడు ఉత్తర్‌ప్రదేశ్‌లోని బరైచ్‌ జిల్లా, రాయ్‌పూర్‌ షబ్నమ్‌ ఊరు. అక్కడ ఓ ఎన్జీవో నిర్వహించిన టైలరింగ్‌ సెంటర్‌లో మూడు నెలలపాటు దుస్తులు కుట్టడం నేర్చుకుంది. అదే ఆమె జీవితానికి పెద్ద  మలుపు అవుతుందని అప్పట్లో ఎవరూ అనుకోలేదు. కానీ ఇప్పుడామె నెలకు రెండు మూడు వేలు సంపాదిస్తోంది. రంజాన్, దసరా వంటి పండుగ సీజన్‌లలో నాలుగైదు వేలు సంపాదిస్తోంది. ఇంట్లో కొంత ఇచ్చి మిగిలిన డబ్బును బ్యాంకులో దాస్తోంది. ఆమె బ్యాంకు అకౌంట్‌లో డబ్బుని చూసి ఆ తండ్రి పుత్రికోత్సాహంతో ఇప్పుడు మురిసిపోతున్నాడు.  రాయ్‌పూర్‌ ‘రోల్‌ మోడల్‌’! షబ్నమ్‌ తాను టైలరింగ్‌ క్లాస్‌లో నేర్చుకున్న మోడల్స్‌ దగ్గర ఆగిపోలేదు. అదే బ్లవుజ్‌లు, లెహెంగాలు కుడుతూ ఉంటే ఈ రోజు ఇంతలా చెప్పుకోవడానికి పెద్దగా ఏమీ ఉండకపోయేది. ఆమె వాల్‌పోస్టర్‌ మీద హీరోయిన్‌ డ్రస్‌ చూస్తే అది ఏ ప్యాటర్న్‌ అయి ఉంటుందో ఊహించగలుగుతుంది. సినిమాకు వెళ్తే హీరోయిన్‌ వేసుకున్న డ్రస్‌లు మైండ్‌లో ప్రింట్‌ అయిపోతాయి. సినిమా నుంచి వచ్చాక వాటిని పేపర్‌ మీద గీసుకుంటుంది. అలా పెద్ద నోట్స్‌ తయారు చేసుకుంది. ఆ మోడల్స్‌ని రాయ్‌పూర్‌ వాసులకు అందుబాటులోకి తెచ్చింది. తండ్రి స్నేహితుని కూతురికి పెళ్లి డ్రస్‌ కుట్టిచ్చింది. ఆ పెళ్లిడ్రస్‌ షబ్నమ్‌ పనితీరుకు ఓ ప్రచారాస్త్రంగా మారింది.  చదువుకుంటూ, నేర్పిస్తోంది షబ్నమ్‌ సాధించిన మరో విజయం ఏమిటంటే.. ఏడవ తరగతి తర్వాత ‘చదువు కోసం మరొక ఊరికి పోవడమా... వీల్లేదంటే వీల్లేదు’ అన్న తండ్రిని ఒప్పించి కాలేజ్‌లో చేరడం. నాన్‌ఫార్మల్‌ ఎడ్యుకేషన్‌లో బ్రిడ్జి కోర్సు పూర్తి చేసి నిషార్‌ షరీఫ్‌ అహ్మద్‌ ఇంటర్‌ కాలేజ్‌లో చేరింది. తానింకా పెద్ద చదువులు చదువుతానంటున్న షబ్నమ్‌ టైలరింగ్‌ను కొనసాగిస్తూనే ఉంది. కొత్త మోడల్స్‌ నేర్పించమని వచ్చిన తోటి అమ్మాయిలకు మెళకువలు నేర్పిస్తోంది.  – మంజీర


 చండీగఢ్‌: చేతులు లేనివారు కాళ్లతోని ఇంటి పనులు, వంట పనులు చేసుకోవడం, కాళ్లతోనే పరీక్షలు రాయడం, కాళ్లతోని బొమ్మలు గీయడం లాంటివి మనం అప్పుడప్పుడు పత్రికల్లో చూస్తుంటాం. కానీ హర్యానాలోని మదన్‌లాల్‌ అనే 45 ఏళ్ల వ్యక్తి కాళ్లతోని టైలరింగ్‌  చేయడం ఎక్కడా చూసి ఉండం. బట్టల కొలతలు తీసుకోవడం, వాటిని పొందికగా కావాల్సిన తీరులో కత్తిరించడం, కుట్టు చెదరకుండా వాటిని కుట్టడం చేతులున్న వారికే కష్టమైన పని. ఈ మూడు పనులను అతి నైపుణ్యంతో చేస్తూ గ్రామ ప్రజల మనసులను, మన్ననలను దోచుకుంటున్నారు మదన్‌లాల్‌.
 
 ఆయన రెండు చేతుల్లేకుండానే పుట్టారు. ఏ బడికెళ్లిన దివ్యాంగుడివి, చదువు నేర్చుకోవడం రాదంటూ తిప్పి పంపించారట. దివ్యాంగులను కూడా చేర్చుకునే పట్నం బడులకు వెళ్లేంత స్థోమత ఆయన కుటుంబానికి లేకపోవడం వల్ల ఇక చదువుకోవలనే ఆశను చంపుకున్నారు. నానమ్మ, తాతయ్యలకు చేదోడు, వాదోడుగా ఇంట్లో పనులు చేస్తూ వచ్చారు. 23 ఏళ్ల ప్రాయంలో ఏదైనా వృత్తిలో స్థిరపడి సంపాదించాలనుకున్నారు. అందుకు టైలరింగ్‌ నేర్చుకోవాలనుకున్నారు. ఊరు, వాడా తిరిగారు. టైలరింగ్‌ నేర్పేందుకు ఎవరూ ఒప్పుకోలేదు. పైగా గేలిచేసి పంపించారు. చివరకు పొరుగునున్న ఫతేహబాద్‌కు వెళ్లారు.
 
 ఎంతో నచ్చచెప్పగా అక్కడ ఓ టైలర్‌ శిక్షణ ఇవ్వడానికి ముందుకొచ్చారు. ఆయన వద్ద టైలరింగ్‌ నేర్చుకొని కొంతకాలం అక్కడే గడిపిన మదన్‌లాల్‌ చివరకు తన ఊరుకు వచ్చి ఓ టైలరింగ్‌ షాపు పెట్టుకున్నారు. వచ్చేవారికి, పోయే వారికి తన నైపుణ్యం గురించి చెబుతూ వచ్చారు. మొదట ఎవరూ నమ్మలేదు. ఆయన వద్ద బట్టలు కుట్టించుకునేందుకు ధైర్యం చేయలేదు.
 తాను ఎలా కుడతానో ప్రాక్టికల్‌గా కుట్టి చూపించగా అప్పటి నుంచి గిరాకీ రావడం మొదలైంది. ఇప్పుడు ఆయన టైలరింగ్‌ షాపు సంతప్తికరంగా నడుస్తోంది. మదన్‌లాల్‌ తన వంట తానే చేసుకోవడంతోపాటు తీరక వేళల్లో కాళ్లతోనే చీట్ల పేక ఆడతారు. ఆత్మవిశ్వాసం, అందుకుతగ్గ కషి ఉండాలిగానీ అనుకున్నది దేన్నైనా సాధించవచ్చని మదన్‌లాల్‌ తన అనుభవపూర్వకంగా చెబుతున్నారు.


 డాక్టరా? టైలరా? రెండూ! మిస్టర్‌ అలినీ కలిస్తే మీరు ఈ ఇద్దరినీ కలిసినట్టే. ఇద్దర్నే కాదు. ఇంకా చాలామందిని కలిసినట్టు. అంతేకాదు, దేశదేశాల వాళ్లని కలిసినట్టు. అలీ మొదట డాక్టర్‌. నాడి చూడ్డం, మందు చీటీలు రాయడం బోర్‌ కొట్టేసి, టైలరింగ్‌లోకి వచ్చేశారు. వయసు 86. వేషాలు 365. అలీ ఏడాదంతా రోజుకో డ్రెస్‌తో స్టెయిల్‌గా కనిపిస్తారు. ఆ డ్రెస్‌ చూసి అదిరిపోయి, అపరిచితులు కూడా ఆయనకు విష్‌ చేస్తుంటారు. అంత రిచ్‌గా ఉంటుంది అలీ లుక్‌. ఈయన్ది జర్మనీ.
 
 నాలుగేళ్ల క్రితం జో స్పాటన్‌ అనే లేడీ ఫొటోగ్రాఫర్‌ అలీని గమనించి, ‘వావ్‌’ అనుకుని, ‘వండర్‌ఫుల్‌’ అనుకుని  ఫొటోలు తీసుకుంది. వాటిని తన బ్లాగులో పెట్టుకుంది. అలీ ఫేమస్‌ అయిపోయారు. అంతకన్నా కూడా ఆయనలోని ఉత్సాహం ఫేమస్‌ అయిపోయింది. జర్మనీ నుంచి టర్కీ వరకు అలీ నాలుగు దశాబ్దాల పాటు దేశాలన్నీ తిరిగారు. రోజుకో డ్రెస్‌లో ఆయన్ని చూస్తే, రోజుకో దేశాన్ని చూసినట్టు ఉంటుంది. ఎనర్జిటిక్‌ కదా!


 ► ప్రాణ త్యాగానికి పాల్పడిన ఓ మాతృమూర్తి
 ► పట్టెడన్నం కూడా పెట్టలేమన్న ప్రబుద్ధులు
  
  
 వినుకొండ రూరల్ : కన్న కొడుకులకు భారంగా మారానన్న ఆవేదనతో ఓ మాతృమూర్తి ప్రాణ త్యాగానికి పాల్పడింది. రెండస్థుల మేడపై నుంచి దూకి ఆత్మహత్య చేసుకుంది. పోలీసులు తెలిపిన వివరాలిలా ఉన్నాయి.. వినుకొండ 21వ వార్డులోని సట్టు బజారుకు చెందిన షేక్  బషీరూన్ (55) కు ఇద్దరు కొడుకులు. భర్త చనిపోయి పదేళ్లు దాటింది. అప్పటి నుంచి ఇద్దరు కొడుకుల వద్ద వంతులవారీగా ఉంటూ రోజులు నెట్టుకొస్తోంది. ఈ క్రమంలో కొడుకులు రెండు రోజులుగా.. నేను చూడనంటే, నేను చూడనంటూ వాదనకు దిగారు. దీంతో ఆ తల్లి హృదయం గాయపడింది. తాను చనిపోవడమే సమస్యకు పరిష్కారం అనుకుంది. ఆలోచన వచ్చిన వెంటనే ఒక్క ఉదుటున పరుగు పరుగున వెళ్లి ఎదురుగా ఉన్న రెండస్థుల భవనంపైకి ఎక్కి దూకేసింది. తలకు తీవ్ర గాయమై అక్కడికక్కడే చనిపోయింది. పోలీసులు కేసు నమోదు చేసుకుని దర్యాప్తు చేస్తున్నారు.
 
 
 కన్న తల్లికి పట్టెడన్నం కూడా..  
 నవమాసాలు మోసి ప్రాణాలు ఫణంగా పెట్టి బిడ్డలకు జన్మనిచ్చిన తల్లికి పెరిగి పెద్దయిన కొడుకులు పట్టెడన్నం కూడా పెట్టకుండా రోజులు, నెలలు అంటూ వంతులు వేసుకోవటం ఆ మాతృమూర్తి మనస్సును కలచివేసింది. ఇంట్లో ఒక్కరికే అన్నం ఉంటే నాకు ఆకలిగా లేదు.. అని చెప్పే తల్లి మాటలు ఒక్కసారి కూడా గుర్తుకు తెచ్చుకోలేని కొడుకులు ఉన్నా లేనట్లేనని చుట్టుపక్కల వారు చీత్కరించుకుంటున్నారు. బషీరూన్‌కు ఇద్దరు కొడుకులు. పెద్ద కుమారుడు కరిముల్లా వాటర్ సర్వీసింగ్ పని చేస్తుంటాడు. చిన్న కుమారుడు కాలేషా టైలరింగ్ చేస్తుంటాడు. భర్త మృతి చెందటంతో బషీరూన్ పూర్తిగా కొడుకుల సంపాదనపైనే ఆధారపడాల్సిన స్థితి ఏర్పడింది. అప్పటి నుంచి కొడుకులు ఇద్దరూ తల్లికి అన్నం పెట్టేందుకు వంతులు వేసుకున్నారు.
 
 నెలకు ఒకరు చొప్పున ఒప్పందం కుదుర్చుకున్నారు. అయితే ఇటీవల ఒప్పందం ప్రకారం కూడా అన్నం పెట్టలేమని తేల్చటంతో విరక్తి చెందిన ఆ మాతృమూర్తి ప్రాణ త్యాగానికి పాల్పడింది. ఈ ఘటన ఆ ప్రాంతంలో విషాదాన్ని నింపింది.
  


 గుంటూరు : సాక్షి మైత్రి మహిళ ఆధ్వర్యంలో బుధవారం నుంచి వచ్చే నెల 9 వరకు చిలకలూరిపేటలోని న్యూ ఏంజెల్స్ బ్యూటీ క్లినిక్ ఎన్‌ఆర్‌టీ సెంటర్‌లో శిక్షణ కార్యక్రమాలు నిర్వహించనున్నారు. ఆదివారాలు మినహా మిగిలిన రోజుల్లో ఉదయం పది గంటల నుంచి మధ్యాహ్నం 12.30 గంటల వరకు శిక్షణ కొనసాగుతుంది.  మంగళవారం  వరకు అభ్యర్థుల నుంచి శిక్షణకు రిజిస్ట్రేషన్‌‌స స్వీకరిస్తారు.
  
 శిక్షణలో నేర్పించే అంశాలు : బేబి ఫ్యాబ్రిక్, అంబ్రెల్లా ఫ్రాక్స్, శారీ పెట్టీకోట్, డ్రెస్ పెట్టీకోట్, ప్లెయిన్ బ్లౌజ్, క్రాస్ కటింగ్ బ్లౌజ్, సింగిల్ కటోరి బ్లౌజ్, స్మాకింగ్ ప్యాచ్ బ్లౌజ్, కాలర్ బ్లౌజ్, ప్యాటర్‌‌న బ్లౌజ్, నెక్ డిజైన్‌‌స, స్లీవ్ డిజైన్‌‌స, కుర్తీ, సల్వార్, సెమి పటియాల, చుడిదార్, కలీస్ డ్రెస్, లాంగ్ టాప్, మెథడ్ ఆఫ్ కటింగ్, మెథడ్ ఆఫ్ స్టిచింగ్ చేర్పిస్తారు. వివరాలకు ఫోన్ నెంబరు 9666372301లో సంప్రదించాలి. శిక్షణకు వచ్చే వారు తమ వెంట పెద్ద స్కేల్, టేప్, కత్తెర, మార్కర్, దారం రీలు, సూదులు, క్లాత్, (2మీ), న్యూస్ పేపర్సు, నోట్‌బుక్స్ పెన్ వెంట తెచ్చుకోవాలి. శిక్షణలో పాల్గొన్నవారికి సర్టిఫికెట్లు అందజేస్తారు.


 వెంగళ్రావ్ పెట్టె సర్దుకుంటుంటే అడుగున ఒక స్లిప్పు కనిపించింది. అది ఐదు సంవత్సరాల క్రితం టైలరింగ్ షాపులో బట్టలు కుట్టడానికి ఇచ్చిన బట్టల తాలూకు రసీదు.
 
 ఆ స్లిప్పు తీసుకుని టైలర్ దగ్గరకు వెళ్లి, తన బట్టలు ఇమ్మని అడిగాడు వెంగళ్రావ్. టైలర్ ఆ స్లిప్పు పట్టుకుని లోపలికి వెళ్లి, అరగంట తర్వాత తిరిగొచ్చి చెప్పాడు...  ‘‘సార్.. మీ బట్టలకు ఇంకా చిన్న చిన్న పనులున్నాయి. రెండ్రోజుల్లో రండి’’.
  


 నెల్లూరు (పొగతోట) : జిల్లా పరిషత్ తరఫున స్త్రీ,శిశు సంక్షేమ నిధులతో రాబోయే ఐదేళ్లలో 50 వేల మంది మహిళలకు టైలరింగ్‌పై ఉచిత శిక్షణ ఇచ్చేందుకు ప్రణాళిక సిద్ధం చేశామని జిల్లా పరిషత్ చైర్మన్ బొమ్మిరెడ్డి రాఘవేంద్రరెడ్డి చెప్పారు. మంగళవారం తన చాంబర్‌లో ఏర్పాటు చేసిన విలేకరుల సమావేశంలో చైర్మన్ మాట్లాడారు. టైలరింగ్‌కు మంచి డిమాండ్ ఉందన్నారు. టైలరింగ్ శిక్షణ కోసం గ్రామీణ  మహిళలు జిల్లా కేంద్రానికి రాలేక ఇబ్బందులు పడుతున్నారన్నారు.
 
 శిక్షణకు వచ్చే మహిళలు 3 నెలల పాటు జిల్లా కేంద్రంలోనే ఉండాల్సి వస్తుందన్నారు. ఆ సమయంలో మహిళలు పలు ఇబ్బందులకు గురవుతున్నారు. మహిళల ఆర్థిక పరిస్థితి మెరుగుపడేలా ప్రతి మండల కేంద్రంలో టైలరింగ్ శిక్షణ కేంద్రాన్ని ఏర్పాటు చేస్తున్నామన్నారు. ఒక్కొక్క కేంద్రంలో 5 నుంచి 10 కుట్టుమిషన్లు ఏర్పాటు చేస్తామన్నారు. శిక్షణ పూర్తి చేసిన మహిళలకు బ్యాంకర్లతో సంప్రదించి కుట్టుమిషన్లు కొనుగోలుకు రుణాలు మంజూరు చేసేలా చర్యలు తీసుకుంటామన్నారు.
 
 నిరుపేద మహిళలకు కుట్టుమిషన్ కొనుగోలుకు జెడ్పీ నిధుల్లో రూ.1000 మంజూరు చేస్తామన్నారు. మిగిలిన మొత్తం బ్యాంక్‌ల ద్వారా రుణంగా మంజూరు చేసేలా చర్యలు తీసుకుంటామన్నారు. తొలివిడతగా వచ్చే నెలలో 10 మండలాల్లో టైలరింగ్ శిక్షణ కేంద్రాలు ప్రారంభిస్తామన్నారు. దశల వారీగా జిల్లాలోని అన్ని మండలాల్లో కేంద్రాలు ప్రారంభిస్తామమన్నారు. శిక్షణ తరగుతుల నిర్వహణ, కుట్టు మిషన్ల కొనుగోలు తదితర కార్యక్రమాలకు రూ.కోటి ఖర్చవుతుందన్నారు.
 
 శిశుగృహకు సొంత భవనం నిర్మించేందుకు రూ.10 లక్షలు కేటాయించామన్నారు. నగరంలోని మహిళ ప్రాంగణానికి ప్రహరి నిర్మించేందుకు నిధుల కేటాయించడానికి ప్రతిపాదనలు సిద్ధం చేశామన్నారు. నూతన జిల్లా పరిషత్ భవానాన్ని అధునాతన హంగులతో డిసెంబర్ లేదా జనవరిలో ప్రారంభించేలా చర్యలు తీసుకుంటున్నామన్నారు. జిల్లా పరిషత్ అనుబంధ శాఖలన్నీ ఒకే ప్రారంగణంలో ఉంటాయన్నారు. రూ. 20 లక్షల ఖర్చుతో జిల్లా పరిషత్ గెస్ట్‌హౌస్‌ను సిద్ధం చేస్తున్నామన్నారు. ప్రభుత్వ హస్టల్స్, పాఠశాలల దత్త ప్రక్రియ వేగంగ జరుగుతుందన్నారు. 


 * పెళ్లి చేసుకుంటానని మోసం
 * గర్భిణి అని తెలియడంతో తప్పించుకునే యత్నం
 * గర్భస్రావం చేసుకుంటేనే పెళ్లంటూ ఒత్తిడి
 * చివరికి ప్రాణాలు కోల్పోయిన బాలిక
  
 విజయవాడ, న్యూస్‌లైన్ : ప్రేమించానని వెంటబడ్డాడు.. పెళ్లి చేసుకుంటానని నమ్మించి లొంగదీసుకున్నాడు.. తీరా ఆమె ఐదు నెలల గర్భిణి అని తెలియడంతో ముఖం చాటేశాడు. అదేమంటే ముందు గర్భస్రావం చేయించుకో.. అప్పుడు పెళ్లి చేసుకుంటానన్నాడు. దీంతో సరేనని అతనిచ్చిన మాత్రలు మింగిన ఆమె అర్ధంతరంగా ప్రాణాలు కోల్పోయింది. విషాదకరమైన ఈ ఘటనపై పోలీసులు, కుటుంబసభ్యులు తెలిపిన వివరాలివీ... స్థానిక రామరాజ్యనగర్ కొండ ప్రాంతానికి చెందిన బోయి అప్పలస్వామి రిక్షా నడుపుతుండగా, భార్య మణి షాపుల్లో చిన్నపాటి పనులు చేస్తుంది. వీరి కుమార్తె నందిని (17) టైలరింగ్ నేర్చుకొని ఇంటివద్దే ఉంటుండగా.. కుమారుడు దుర్గారెడ్డి (15) పదో తరగతి చదువుతున్నాడు.
 
 భార్యాభర్తలు ఉదయం వెళ్లి రాత్రికి తిరిగి వస్తుంటారు. కొడుకు చదువుకునేందుకు వెళ్లి     సాయంత్రం వస్తాడు. దీన్ని అవకాశంగా చేసుకుని సమీపంలో నివాసముండే ఆటో డ్రైవరు నెర్సు దుర్గారావు (23) ఆమెను లోబరుచుకున్నాడు. పెళ్లి చేసుకుంటానని నమ్మించి గర్భవతిని చేశాడు. ఈ నేపథ్యంలో ఆమె పెళ్లి కోసం ఒత్తిడి తెస్తుండటంతో తనకు రూ.3 లక్షల కట్నం ఇచ్చేందుకు సంబంధం వచ్చిందని దుర్గారావు చెప్పాడు. ఈ వ్యవహారంలో వారి మధ్య కొద్దిరోజులుగా ఘర్షణ జరుగుతోంది.
  
 గర్భస్రావం చేయించుకుంటే.. పెళ్లి చేసుకుంటానన్నాడు..
 
 వివాదం పెరుగుతుండటంతో ఇక లాభం లేదనుకున్న దుర్గారావు గర్భస్రావం చేయించుకుంటే పెళ్లి చేసుకుంటానని చెప్పాడు. అతని మాటలను మరోసారి విశ్వసించిన నందిని గురువారం రాత్రి దుర్గారావు తెచ్చిన మాత్రలు వేసుకుంది. ఉదయం లేచేసరికే తీవ్ర అస్వస్థతకు లోనైంది. కంగారుపడిన తల్లిదండ్రులు ఆమెను ఆస్పత్రికి తీసుకెళతామన్నారు. విషయం బయటపడితే కుటుంబ సభ్యులు ఏమంటారోననే ఆందోళనతో ఆమె నిరాకరించింది. దీంతో మందుల షాపులో మాత్రలు తెచ్చిచ్చారు.
 
 అయినా నొప్పి తగ్గకపోవడంతో ఆర్‌ఎంపీ వైద్యుని వద్దకు తీసుకెళ్లారు. అతను ప్రభుత్వాస్పత్రికి తీసుకెళ్లాలని సూచించడంతో అక్కడినుంచి పాత ప్రభుత్వాస్పత్రికి తరలించారు. మార్గమధ్యంలో జరిగిన విషయాన్ని బాధితురాలు తన తల్లిదండ్రులకు తెలిపింది. ఆస్పత్రిలో ఆమెను పరీక్షించిన వైద్యులు ఐదు నెలల గర్భిణిగా తేల్చారు. ఆమెను బతికించేందుకు వారు చేసిన ప్రయత్నాలు ఫలించలేదు. నందిని మృతితో హతాశులైన కుటుంబ సభ్యులు మృతదేహాన్ని తీసుకుని వన్‌టౌన్ పోలీస్‌స్టేషన్‌కి వెళ్లి న్యాయం చేయాలంటూ అక్కడే బైఠాయించారు. న్యాయం చేస్తామని వారు హామీ ఇవ్వడంతో మృతదేహాన్ని పోస్టుమార్టానికి తరలించారు.
  
 నెలసరి నొప్పి అని సరిపెట్టుకున్నా...
 
 అప్పుడప్పుడు కడుపు నొప్పి అనేది. నెలసరి నొప్పేమో అని మందుల షాపు నుంచి బిళ్లలు తెచ్చిచ్చేవాళ్లం. మరీ నొప్పి అంటే ఆస్పత్రికెళదామన్నా ఒప్పుకొనేది కాదు. ముందే చెప్పి ఉంటే ఇంతవరకు రానిచ్చేవాళ్లం కాదు. చెప్పి మమ్మల్ని బాధపెట్టకూడదని.. తాను మాత్రం ప్రాణాలు తీసుకుంది.. అంటూ నందిని తల్లి మణి పడే వేదన చూపరుల హృదయాలను ద్రవింపజేసింది.
  
  వేణ్ణీళ్లెవరు పెడతారు...
 
  ఉదయం వెళితే రాత్రికి గాని ఇంటికి రాను. రాగానే ఆప్యాయంగా పలకరించేది. వెంటనే స్నానానికి వేణ్ణీళ్లు పెట్టేది. స్నానం చేసిన తర్వాత ‘కష్టపడి వచ్చావు నాన్నా’ అంటూ ఒళ్లంతా కొబ్బరి నూనె రాసి మర్దనా చేసేది. ఇకపై నాకు వేణ్ణీళ్లు ఎవరు పెడతారంటూ అప్పారావు కన్నీరుమున్నీరుగా రోదించడం పోలీసులను సైతం చలింపజేసింది.
  


 సాక్షి ప్రతినిధి, అనంతపురం : ఉప్పు దగ్గర నుంచి సబ్బు వరకు దేన్నీ ఆమె వదల్లేదు.. సరుకులను రవాణా చేసే కాంట్రాక్టర్లతో కుమ్మక్కయ్యారు. సరఫరా చేసిన సరుకులు తక్కువగా ఉన్నా ఎక్కువగా ఉన్నట్లు నకిలీ రికార్డులు సృష్టించి.. ప్రజాధనాన్ని కాంట్రాక్టర్లకు దోచిపెట్టారు. దోచిపెట్టిన సొమ్ములో వాటాలు దండుకుని కోట్లకు పడగలెత్తారు. విద్యార్థుల నోళ్లు కొట్టి.. విలాసాలకు మరిగారు.
  
  కోట్లకు పడగలెత్తిన ఆ అక్రమాధికారిణే సాంఘిక సంక్షేమశాఖ గురుకుల పాఠశాల, కళాశాల ప్రిన్సిపాల్ అరుణకుమారి. అవినీతి నిరోధకశాఖ దర్యాప్తులో అరుణకుమారి అక్రమాల బాగోతం మొత్తం బహిర్గతమవుతోంది. ఇప్పటికే ఏసీబీ దర్యాప్తులో రూ.నాలుగు కోట్ల విలువైన అక్రమాస్తులు వెలుగుచూడగా.. మరో రూ.ఎనిమిది కోట్ల విలువైన అక్రమాస్తులు బహిర్గతమయ్యే అవకాశం ఉందని ఏసీబీ వర్గాలు వెల్లడించాయి.
  
  హిందూపురంలో సాంఘిక సంక్షేమ శాఖ బాలికల గురుకుల పాఠశాల, కళాశాల ప్రిన్సిపల్‌గా విధులు నిర్వహిస్తోన్న అరుణకుమారి.. జిల్లాలో ఉన్న 13 సాంఘిక సంక్షేమ గురుకుల పాఠశాల, కళాశాలకు కన్వీనర్‌గా అదనపు బాధ్యతలు నిర్వహిస్తున్నారు. టైలరింగ్ పనుల కాంట్రాక్టర్ సుస్మిత తరఫున లక్ష్మిరెడ్డి నుంచి రూ.ఐదు వేలు లంచం తీసుకుంటుండగా అక్టోబరు 26న ఏసీబీ అధికారులు దాడి చేసి, ఆమెను అదుపులోకి తీసుకున్న విషయం విదితమే. అదే రోజున ఆమె నివాసంలో జరిపిన సోదాల్లో రూ.4.47 లక్షల నగదు, 18 తులాల బంగారాన్ని ఏసీబీ అధికారులు స్వాధీనం చేసుకున్నారు. ఆ సోదాల్లో ఆమెకు రెండు బ్యాంకుల్లో ఉన్న లాకర్లకు సంబంధించిన తాళాలు, విలువైన డాక్యుమెంట్లు కూడా బయటపడ్డాయి. వాటి ఆధారంగా వారం రోజులుగా ఏసీబీ అధికారులు తనిఖీలు చేస్తున్నారు. శనివారం అనంతపురంలో కరూర్ వైశ్యా బ్యాంకులో ఆమెకు సంబంధించిన లాకర్‌ను తెరిచారు.
  
  ఇందులో రూ.40 లక్షల నగదు, ఆరు తులాల బంగారం ఉన్నట్లు గుర్తించి, స్వాధీనం చేసుకున్నారు. సోమవారం హిందూపురం ఆంధ్రప్రగతి గ్రామీణ బ్యాంకులో మరో లాకర్‌ను తెరిచారు. అందులోంచి రూ.పది లక్షలు, రూ.27 తులాల బంగారాన్ని స్వాధీనం చేసుకున్నారు. వాటితోపాటూ అనంతపురంలో 17 పోర్షన్లతో కూడిన ఐదు భవనాలను ఏసీబీ అధికారులు గుర్తించారు. అనంతపురం, హిందూపురం, బెంగళూరులలో విలువైన ఇంటి స్థలాలు ఉన్నట్లు తేల్చారు. వాటి విలువ రూ.నాలుగు కోట్లకుపైగానే ఉంటుందని ఏసీబీ డీఎస్పీ భాస్కర్‌రెడ్డి చెప్పారు.
  
  మరో రూ.ఎనిమిది కోట్ల ఆస్తులు
  అత్యంత విలువైన ఇళ్లు, భూములకు సంబంధించిన డాక్యుమెంట్లు, భారీ ఎత్తున బంగారు అభరణాలు నిల్వ చేసిన బ్యాంకు లాకర్ తాళం అరుణకుమారి తన సమీప బంధువుల ఇళ్లలో దాచినట్లు ఏసీబీ అధికారులకు ఫిర్యాదు అందింది. అనంతపురంలో ప్రస్తుతం వెలుగుచూసిన ఐదు భవనాలు కాకుండా మరో ఎనిమిది భవంతులు ఉన్నట్లు ఆ ఫిర్యాదులో పేర్కొన్నారు.
  
  అనంతపురంలోని ఓ జాతీయ బ్యాంకులో అరుణకుమారికి లాకర్ ఉందని.. అందులో భారీ ఎత్తున బంగారు అభరణాలు దాచారని కూడా ఆ ఫిర్యాదులో స్పష్టం చేస్తూ వివరాలను పొందుపరిచారు. ఈ ఫిర్యాదు అరుణకుమారి సమీప బంధువులే చేయడంతో ఏసీబీ అధికారులు దానిపై ప్రత్యేకంగా దృష్టి సారించారు. ఆ ఫిర్యాదులో పేర్కొన్న ఆస్తుల విలువను పరిగణనలోకి తీసుకుంటే మరో రూ.ఎనిమిది కోట్లు ఉంటుందని లెక్క వేస్తున్నారు. అరుణకుమారి సమీప బంధువులు ఇచ్చిన సమాచారం ఆధారంగా రెండు రోజులుగా ఏసీబీ అధికారులు దర్యాప్తును ముమ్మరం చేశారు.
  
  ఆమె అక్రమాస్తులపై వారం రోజుల్లోగా స్పష్టమైన ప్రకటన చేస్తామని ఏసీబీ అధికారులు వెల్లడించారు. అరుణకుమారి భారీ ఎత్తున అక్రమాస్తులను కూడబెట్టడం అధికారవర్గాల్లో కలకలం రేపింది. గతంలో అరుణకుమారి అక్రమాలపై ఉన్నతాధికారులకు ఫిర్యాదులు చేసినా చూసీచూడనట్లు వ్యవహరించారని సాంఘిక సంక్షేమశాఖ వర్గాలు వెల్లడించాయి. సంపాదించిన ప్రతి పైసాలోనూ ఉన్నతాధికారులకు ఆమె వాటాలు అప్పగించడం వల్లే.. ఆ శాఖలో ఆమె మాటకు ఎదురులేకుండా పోయిందని సిబ్బంది వాపోతున్నారు.