Manipal Hospital

సాక్షి, అమరావతి: అనంతపురం జిల్లా రాప్తాడులోని జిల్లా పరిషత్‌ ఉన్నత పాఠశాలలో ఉన్మాది దాడిలో తీవ్రంగా గాయపడిన బాలికను వైఎస్సార్‌సీపీ అధ్యక్షుడు, మాజీ ముఖ్యమంత్రి వైఎస్‌ జగన్‌మోహన్‌ రెడ్డి పరామర్శించారు. బెంగళూరులోని మణిపాల్‌ ఆస్పత్రిలో చికిత్స పొందుతున్న బాలికను వైఎస్‌ జగన్‌ పరామర్శించారు.ఈ క్రమంలోనే డాక్టర్లతో మాట్లాడిన వైఎస్‌ జగన్‌.. బాలిక ఆరోగ్య పరిస్థితిని అడిగి తెలుసుకున్నారు. ఆమెకు అందిస్తున్న వైద్య సేవల వివరాలను వైఎస్‌ జగన్‌ తెలుసుకున్నారు. అనంతరం బాలిక కుటుంబ సభ్యులను కూడా పరామర్శించి, వారికి ఆయన ధైర్యం చెప్పారు. ఇదీ చదవండి: ఆసుపత్రి బెడ్‌పై రాక్షసుడు.. ఆ యోచనలో వైద్యులు..!

భారతీయ సినీ పరిశ్రమలో అద్భుతమైన, సహజమైన నటనతో ప్రేక్షకుల్లో తనకంటూ ప్రత్యేక గుర్తింపు తెచ్చుకున్న ప్రముఖ నటుడు నానా పాటేకర్‌ (75) ఇకలేరు. గోవాలోని డోనా పౌలాలో ఉన్న తన నివాసంలో అపస్మారక స్థితిలో కనిపించిన ఆయన్ని వెంటనే మణిపాల్‌ ఆసుపత్రికి తీసుకెళ్లారు. ఆయన్ని కాపాడేందుకు వైద్యులు సీపీఆర్‌ చేసినప్పటికీ ఆ ప్రయత్నాలు ఫలించలేదు. నానా పాటేకర్‌కి దాదాపు 45 నిమిషాలు సీపీఆర్‌ చేసినప్పటికీ ఆయన నుంచి ఎలాంటి స్పందన రాలేదని, ఉదయం 5:20 గంటల సమయంలో కార్డియాక్‌ అరెస్ట్‌ (గుండెపోటు) కారణంగానే తుది శ్వాస విడిచారని మణిపాల్‌ హాస్పిటల్‌ ఆంకాలజీ విభాగం చీఫ్‌ శేఖర్‌ సల్కర్‌ తెలిపారు. నానా పాటేకర్‌ 1951 జనవరి 1న జన్మించారు. ఆయన అసలు పేరు విశ్వనాథ్‌ పాటేకర్‌. ముజాఫర్‌ అలీ దర్శకత్వం వహించిన ‘గమన్‌’ అనే హిందీ సినిమాతో ఆయన చిత్ర పరిశ్రమలోకి అడుగుపెట్టారు. హిందీతో పాటు మరాఠీ సినిమాల్లో ఎన్నో గుర్తుండిపోయే పాత్రలు పోషించారాయన. ‘పరిందా, ప్రహార్, అంగార్, తిరంగా, క్రాంతివీర్, ఖామోషి’ వంటి చిత్రాలు ఆయన కెరీర్‌లో ప్రత్యేకమైనవిగా నిలిచాయి. 1978లో మరాఠీ సినీ నటి, నిర్మాత నీల్‌కాంతిని నానా పాటేకర్‌ పెళ్లి చేసుకున్నారు. వీరిద్దరి మధ్య తలెత్తిన విభేదాల కారణంగా ఇద్దరూ విడివిడిగా ఉంటున్నప్పటికీ విడాకులు తీసుకోలేదు. వీరికి ఇద్దరు కుమారులు కాగా ఒక అబ్బాయి పుట్టిన రెండేళ్లకే అనారోగ్య కారణాలతో చనిపోయాడు. మరో అబ్బాయి మల్హర్‌ అసిస్టెంట్‌ డైరెక్టర్‌గా పని చేస్తున్నారు. ఇదిలా ఉంటే... నానా పాటేకర్‌ మృతిపై పోలీసులు మెడికో లీగల్‌ కేసు నమోదు చేసినట్లు తెలుస్తోంది. ఆయన ఆకస్మిక మరణం పట్ల పలువురు సినీ ప్రముఖులు, రాజకీయ నాయకులు తమ సంతాపం తెలిపారు. స్నేహితుడికి చివరి సందేశం... నానా పాటేకర్‌ బుధవారం అర్ధరాత్రి దాటిన తర్వాత సుమారు 2:30 గంటల ప్రాంతంలో ‘నాకు ఆరోగ్యం ఏమాత్రం బాగాలేదు’ అంటూ తన మిత్రుడుకి సందేశం పంపించారు. అయితే ఆ టైమ్‌లో గాఢమైన నిద్రలో ఉండడంతో ఆలస్యంగా ఆ మెసేజ్‌ చూసుకున్న స్నేహితుడు కంగారుగా తెల్లవారుజామున 4 గంటల సమయంలో ఆయన నివాసానికి చేరుకున్నారు. అప్పటికే నానాకు విపరీతంగా చెమటలు పడుతున్నాయని, ఆయన నెమ్మదిగా స్పృహ కోల్పోవడం గమనించి, వెంటనే కేర్‌ టేకర్‌కు సమాచారం ఇచ్చారు. ఆ తర్వాత ఆస్పత్రి ఎమర్జెన్సీ బృందానికి ఫోన్‌ చేశారు. సమాచారం అందుకున్న వెంటనే మెడికల్‌ టీమ్‌ నానా పాటేకర్‌ నివాసానికి చేరుకుంది. కానీ, అప్పటికే ఆయన శరీరం నుంచి ఎలాంటి స్పందన లేదు. దీంతో ప్రాథమిక చికిత్స అందిస్తూనే అత్యవసర వైద్యం కోసం గోవాలోని మణిపాల్‌ ఆస్పత్రికి తరలించారు.ముంబైలో ఒక ప్రొడ్యూసర్‌ నానా పాటేకర్‌ ఇంటికి వచ్చాడు. సినిమాలో వేషం ఉందని చెప్పాడు. ‘కోటి రూపాయలు ఇస్తే చేస్తాను’ అన్నాడు నానా పాటేకర్‌. ‘కోటి రూపాయలా?’... క్యారెక్టర్‌ ఆర్టిస్ట్‌కు అంత ఇవ్వడం అసంభవం. కాని ఆ క్యారెక్టర్‌ నానా వేస్తేనే పండుతుంది. ప్రొడ్యూసర్‌ కాసేపు గుటకలు మింగి ‘సరే నానా’ అన్నాడు. ‘వెరీగుడ్‌. నీకు కంచాలు కడగడం వచ్చా?’ అని అడిగాడు నానా. ‘ఎందుకు?’ అన్నాడు ప్రొడ్యూసర్‌. ‘అన్నం వండుతాను. కలిసి భోంచేద్దాం. తర్వాత నీ కంచం నువ్వు కడిగి పెట్టి వెళ్లాలి’.... కోట్లు పెట్టి సినిమా తీస్తున్న సంగతి మర్చి కంచం కడగడానికి ఉపక్రమించాడు ఆ నిర్మాత. హిందీ సినిమాల్లో క్యారెక్టర్‌ ఆర్టిస్టులకు రెమ్యూనరేషన్‌ పెంచినవాళ్లు ఇద్దరే... ఒకరు గబ్బర్‌ సింగ్‌ అను అంజాద్‌ ఖాన్‌. మరొకరు నానా పాటేకర్‌. ఇలాగే నానా పాటేకర్‌ ఇంటికి మరో ప్రొడ్యూసర్‌ వచ్చి కోట్లు, లక్షల వ్యవహారం మాట్లాడుతున్నాడు. నానా తల్లి వచ్చి ‘పిండి గిర్నీ నుంచి పిండి తీసుకురా పోరా’ అంది. నానా ప్రొడ్యూసర్‌తో ‘ఒక నిమిషం ఉండు’ అని వీధి చివర పిండి గిర్నీకి వెళ్లి పిండి తీసుకొచ్చి తల్లికి ఇచ్చి మళ్లీ మాటల్లో పడ్డాడు. ‘ఏంటి నానా ఇది’ అనడిగితే ‘అవునయ్యా... ఇంట్లో మా అమ్మ, నేను ఉంటాం. ఆమె నాకు కాకపోతే పని ఎవరికి చెప్తుంది?’ అన్నాడతడు. నానా అన్ని మంచి గుణాలు ఉన్న వ్యక్తి. అనేక అసంబద్ధతలు ఉన్న వ్యక్తి కూడా. నానాది మహారాష్ట్రలోని రాయ్‌గఢ్‌ జిల్లా మురుద్‌–జంజీరా అనే తీర్రపాంత గ్రామం. నానా అక్కడే ఏడో క్లాస్‌ వరకూ చదువుకున్నాడు. తండ్రి ముంబైలో చిన్న వ్యాపారం చేసేవాడు. తల్లి, పిల్లలు ఊళ్లో ఉండేవారు. నానా అందరిలోకి చిన్నవాడు. చామన ఛాయ. తన రంగు కారణంగా తండ్రి తనను ప్రేమించడం లేదనే సందేహం నానాలో ఉండేది. ఆ ప్రేమ రాహిత్యం వల్ల క్లాసులో బాగా అల్లరి చేసేవాడు. తను స్కూల్‌ నాటకంలో పాత్ర వస్తే తండ్రి ముంబై నుంచి ప్రత్యేకంగా వచ్చి చూసి మెచ్చుకున్నాడు. తండ్రి ప్రేమ పొందడానికి నాటకం ఒక మార్గం అని నానా చిన్నారి మనసులో ముద్రపడింది. నానా తండ్రి వ్యాపారం నానా ఎనిమిదో క్లాసు వచ్చేసరికి దివాలా తీసింది. కుటుంబం ఊరు ఖాళీ చేసి ముంబైలోని దాదర్‌లో తల దాచుకుంది. 13 ఏళ్ల వయసున్న నానా ఒకవైపు చదువుకుంటూ మరో వైపు స్కూల్‌ నుంచి వచ్చి ఇంటికి 8 కిలోమీటర్ల దూరంలో ఉన్న ఇటుక బట్టీలో పని చేసేవాడు. నెలకు 35 రూపాయల జీతం, రాత్రి భోజనం పెట్టేవారు. ఆ రోజుల్లో ఆ 35 రూపాయలు నానా కుటుంబాన్ని నిలబెట్టాయి. నానా మంచి ఆర్టిస్ట్‌. లెటరింగ్, బ్రష్‌ వర్క్‌ బాగా చేస్తాడు. అందువల్ల సిటీలో జీబ్రా క్రాసింగ్‌కి రంగులు వేసే పని వచ్చేది. రాత్రంతా ఆ పని చేసి డబ్బు సంపాదించేవాడు. ఎస్‌ఎస్‌ఎల్‌సి తర్వాత ముంబై జెజె స్కూల్‌ ఆఫ్‌ ఆర్ట్స్‌లో నాలుగేళ్ల డిగ్రీలో చేరాడు నానా. 120 రూపాయల ఫీజు కట్టడానికి డబ్బు ఉండేది కాదు. నాటకాల్లో నటిస్తే చిల్లర డబ్బులు దొరికేవి. డిగ్రీ అయ్యాక వెంటనే అడ్వర్‌టైజ్‌మెంట్‌ కంపెనీలో మంచి ఉద్యోగం దొరికినా నాటకం కోసం వదిలేసి చాలీచాలని జీవితంవైపు వచ్చాడు. అతని భార్య నీల్‌కాంతి నాటకాలు వేసేది. అయితే ఆమెకు అది హాబీ. ఆమె బ్యాంక్‌ ఆఫీసర్‌. ‘నువ్వు నాటకాల్లో వెళ్లు. నేను సంపాదిస్తాను’ అని చెప్పింది. వాళ్లు పెళ్లి చేసుకున్నారు. అలా నానా నాటకం కొనసాగింది. నానా పాటేకర్‌కు మొదటి అవకాశం ఇచ్చిన వాడు దర్శకుడు ముజఫర్‌ అలీ (ఉమ్రావ్‌జాన్‌ ఫేమ్‌). సినిమా పేరు ‘గమన్‌’. ఆ సినిమాలో స్మితా పాటిల్‌ ఉంది. ఆమె ఇతడి ప్రతిభను గుర్తించి బి.ఆర్‌. చోప్రా కొడుకు రవి చోప్రా తీస్తున్న ‘ఆజ్‌ కి ఆవాజ్‌’లో విలన్‌ వేషం ఇప్పించింది. ఆ తర్వాత దర్శకుడు ఎన్‌. చంద్ర ‘అంకుశ్‌’ తీయడంతో నానా కొద్దిగా తెలిశాడు. అదే ఎన్‌.చంద్ర మన ‘ప్రతిఘటన’ రీమేక్‌ ‘ప్రతిఘాత్‌’లో నానాకు సుత్తి వేలు వేషం ఇచ్చాడు. 1988లో ‘సలామ్‌ బాంబే’ వచ్చింది. 1990లో ‘పరిందా’తో నానా పాటేకర్‌ మొత్తం దేశానికి తెలిసిపోయాడు. ‘పరిందా’లో నానా వేసిన ‘అన్నా’ పాత్ర నానా జీవితాన్నే కాదు భారతీయ సినిమాను కూడా మలుపు తిప్పింది. పార్లల్‌ సినిమాలు దేశంలో మొదలై నసీరుద్దీన్‌ షా, ఓంపురి, షబానా ఆజ్మీ, స్మితా పాటిల్‌... వీళ్లంతా ఒక బృందంగా సినిమాలు చేస్తూ ఉన్నా నానా వీళ్లలో కలవలేదు. ‘నా దారి వేరే’ అన్నట్టుగా ఉండిపోయాడు. అతడు తయా రైంది పూణె యాక్టింగ్‌ స్కూల్‌లో కాదు. స్టేజ్‌ మీద. మరాఠీ నాటకం విస్తృతంగా చేశాడు. ‘పురుష్‌’ అనే నాటకాన్ని తెలుగులో ‘రక్తకన్నీరు’లాగా 1600 ప్రదర్శనలు ఇచ్చాడు. ముంబైలోని నాటక దిగ్గజం విజయ మెహతా అతడికి నాటకాల్లో అవకాశం ఇవ్వడమే కాదు తల్లిలా ఆదరించింది. నిజానికి నానా కేవలం నాటకాల్లోనే ఉండిపోదామనుకున్నాడు. అయితే సినిమాయే అతణ్ణి వెతుక్కుంది.బాలీవుడ్‌లో ‘యాంగ్రీ యంగ్‌మేన్‌’ అంటే అమితాబ్‌ బచ్చన్‌. కోపంగా ఉండే హీరోగా మొదట ‘జంజీర్‌’లో కనిపించాడు. అతడి హవా కొనసాగుతూ ఉండగానే నానా పటేకర్‌ మరో యాంగ్రీ యంగ్‌మేన్‌గా తెర మీదకు వచ్చాడు. సమాజంలోని సమస్త అడ్డదిడ్డాల మీద అసహనం వ్యక్తం చేసే హీరోగా, నటుడిగా నానా ముద్ర వేయగలిగాడు. 1993లో వచ్చిన ‘తిరంగా’లో నానా పోషించిన ఇన్‌స్పెక్టర్‌ శివాజీరావ్‌ పాత్రే దీనికి నిదర్శనం. ఈ సినిమాలో నానా తన పాత్రను నిలబెట్టుకోవడమే కాదు.. అదే సినిమాలో ఉన్న సీనియర్‌ నటుడు రాజ్‌కుమార్‌ తనను మింగేయకుండా కాపాడుకున్నాడు. రాజ్‌ కుమార్‌ను ఢీ కొడుతూ నటించాడంటే వీడెంత మొనగాడు... అనుకున్నారు జనం. 1992 డిసెంబర్‌లో ముంబై అల్లర్లు జరిగాయి. దాని కొనసాగింపుగా 1993 పేలుళ్లు జరిగాయి. రెండూ నానా పటేకర్‌ను బాగా డిస్ట్రబ్‌ చేశాయి. హిందూ ముస్లింల మధ్య అభద్రత ఉన్న ఆ సందర్భంలో నానా తన జీప్‌లో ఒక్కడే తిరుగుతూ సామరస్యం కోసం ప్రయత్నించాడు. అనేక రాత్రిళ్లు పక్కన ఒక వాటర్‌ బాటిల్‌ పెట్టుకుని తిరిగేవాడు. పోలీసులు కూడా అతణ్ణి ఏమీ అనేవారు కాదు. అప్పుడు గమనించిన విషయాలన్నీ అతడు ‘క్రాంతివీర్‌’ సినిమాలో ఆవేశంగా చెప్పాడు. ప్రజలతో ఆడుకునే స్వార్థ రాజకీయాల వల్లే ఇదంతా అని ఆగ్రహంతో అరిచి అరిచి చెప్పాడు. ఆ సినిమాలో నానా మాట్లాడే ప్రతి మాట సూపర్‌హిట్‌ అయ్యింది. దీని కొనసాగింపుగా వచ్చిన ‘అగ్నిసాక్షి’ (1996), ‘ఖామోషి’ (1996), ముస్తఫా (1997) సూపర్‌హిట్స్‌గా నిలిచాయి. ‘యశ్వంత్‌’లో నానా చెప్పిన ‘సాలా... ఏక్‌ మచ్ఛర్‌ ఆద్మీకో హిజ్‌డా బనాదేతా హై’... మాస్‌లో పంచ్‌ డైలాగ్‌లా మిగిలింది. నానా మన తెలుగు దర్శకులతో పని చేశాడు. రామ్‌గోపాల్‌ వర్మ ‘అబ్‌ తక్‌ చప్పన్‌’ నానాకు చాలా పేరే తెచ్చింది. అదే రామ్‌గోపాల్‌ వర్మ తీసిన ‘ది అటాక్స్‌ ఆఫ్‌ 26/11’లో పోలీస్‌ ఆఫీసర్‌గా నటించాడు. కృష్ణవంశీ ‘అంతఃపురం’ హిందీలో ‘శక్తి’గా రీమేక్‌ అయితే ప్రకాశ్‌ రాజ్‌ పాత్రను నానా పోషించాడు. 2007లో వచ్చిన ‘వెల్‌కమ్‌’ నానా ఇమేజ్‌ను పూర్తిగా మార్చేసింది. ‘మంచి ఇమేజ్‌’ కోసం పాకులాడే డాన్‌గా ఆ సినిమాలో ఆయన నటన జనాన్ని తెగ నవ్వించింది. ఆ పాత్రను కాపీ చేస్తూ తెలుగులో అనేక సినిమాలు వచ్చాయి. నానా పాటేకర్‌ నటించిన ‘ట్యాక్సీ నంబర్‌ 9211’ తెలుగులో మోహన్‌బాబు, విష్ణుల కాంబినేషన్‌లో ‘గేమ్‌’గా రిలీజ్‌ అయ్యింది. రజనీకాంత్‌ హీరోగా వచ్చిన ‘కాలా’లో నానా విలన్‌గా నటించడమే కాదు తమిళంలో డబ్బింగ్‌ చెప్పారు. ‘హౌస్‌ఫుల్‌ 5’ ఆయన నటించిన భారీ ఆఖరు సినిమా. నానా పాటేకర్‌ మరాఠిలో నటించిన ‘నటసామ్రాట్‌’ నానా ఎందుకు నటసామ్రాటో నిరూపిస్తుంది. మరాఠీలో చాలాకాలంగా నాటకంగా ప్రసిద్ధమైన ఈ కథను దర్శకుడు మహేశ్‌ మంజ్రేకర్‌ నానా పాటేకర్‌తో మరాఠీలో తీస్తే సూపర్‌ డూపర్‌ హిట్‌ అయ్యింది. నాటక రంగం నుంచి నిష్క్రమించిన గొప్ప నటుడు జీవన నాటక రంగంలో చేష్టలుడిగి, డైలాగుల్లేని పాత్రగా ఎలా మిగిలాడో ఈ సినిమా చూపుతుంది. సినిమా మొదలైనప్పటి నుంచి ముగిసే వరకూ నానా విశ్వరూపం చూడొచ్చు. ఈ సినిమా తెలుగులో ‘రంగమార్తాండ’గా కృష్ణవంశీ రీమేక్‌ చేశారు. చూడండి తమాష. అంతఃపురంలో ప్రకాశ్‌ రాజ్‌ చేసిన పాత్రను హిందీలో నానా చేస్తే మరాఠీలో నానా చేసిన పాత్రను తెలుగులో ప్రకాశ్‌ రాజ్‌ చేశాడు. నిజానికి ఇప్పుడే నానా చేయాల్సిన పాత్రలు పెరిగాయి. ఈ లోపే ఆయన మనకు దిగ్భ్రాంతి మిగిల్చాడు. నానాకు నటనలో ఎంత పట్టు ఉందో క్రికెట్, రైఫిల్‌ షూటింగ్‌ల్లోనూ అంతే గ్రిప్‌ ఉంది. నానా మంచి ‘ఆఫ్‌స్పిన్‌’ బౌలర్‌. రైఫిల్‌ షూటింగ్‌లో నేషనల్‌ రైఫిల్‌ అసోసియేషన్‌ ఆఫ్‌ ఇండియా నుండి ఋరెనౌండ్‌ షాట్‌’గా గుర్తింపు ఉంది. ఆర్థిక ఇబ్బందుల వల్ల వెనుకబడుతున్న ఎంతోమంది యువ షూటర్ల శిక్షణా వ్యయాలను నానా తన సొంత డబ్బుతో ప్రోత్సహించాడు. తెరపై విప్లవాలు మాట్లాడటం వేరు... తెర వెనుక మానవీయమూర్తిగా ఉండటం వేరు. 2015లో మహారాష్ట్రలోని విదర్భా, మరాఠ్వాడా ప్రాంతాలు కరువు బారిన పడి ఆత్మహత్యలకు నిలయాలుగా మారాయి. వర్షాలు లేక అన్నదాతలు ప్రాణాలు విడుస్తుంటే, వారి వెనుక మిగిలిన కుటుంబాల దిక్కుతోచని స్థితి నానా గుండెను మెలిపెట్టింది. ఆయన కేవలం సంతాప సందేశాలతో సరిపెట్టుకోలేదు. తన మిత్రుడు మకరంద్‌ అనాస్పురేతో కలిసి ‘నామ్‌ ఫౌండేషన్‌’ స్థాపించి ఒక నిశ్శబ్ద కారుణ్య విప్లవానికి తెరతీశాడు. ఆత్మహత్య చేసుకున్న 500 మంది రైతుల భార్యలకు తండ్రిలా, అన్నలా అండగా నిలిచాడు. ఛత్రపతి శంభాజీనగర్‌ (ఔరంగాబాద్‌)లోని కార్పొరేట్‌ ఆసుపత్రులతో స్వయంగా మాట్లాడి, ఆ కుటుంబాలకు పూర్తిగా వైద్యసేవలు అందేలా చూశాడు. అంతటితో ఆగకుండా, ఆ రైతు బిడ్డల చదువుల బాధ్యతను భుజాలపై వేసుకున్నాడు. తెరపై మిలటరీ దుస్తులు వేసి డైలాగులు చెప్పే నటులను చూశాం... కానీ దేశం కోసం నిజంగానే తుపాకీ పట్టి, బంకర్లలో పడుకుని, ప్రాణాలకు తెగించి సరిహద్దుకు వెళ్లిన ఏకైక నటుడు నానా పాటేకర్‌!1999లో కార్గిల్‌ యుద్ధం జరుగుతున్న సమయం... దేశమంతా రేడియోలు, టీవీల ముందు కూర్చుని సరిహద్దుల్లో ఏం జరుగుతుందోనని ఆందోళన చెందుతోంది. ఆ సమయంలో నానా పాటేకర్‌ మాత్రం ఏమాత్రం ఆలోచించకుండా యుద్ధంలో దూకాడు. సివిలియన్‌కు ప్రవేశం లేదు అని మిలటరీ నిరాకరించినా ఏకంగా రక్షణ శాఖా మంత్రి జార్జ్‌ ఫెర్నాండెజ్‌తో చెప్పించి బయల్దేరి వెళ్లాడు. అప్పటికే ‘ప్రహార్‌’ సినిమా కోసం మూడు సంవత్సరాల పాటు కఠినమైన ఆర్మీ శిక్షణ తీసుకుని, టెరిటోరియల్‌ ఆర్మీలో గౌరవ కెప్టెన్ గా ఉన్న నానా దాదాపు రెండున్నర నెలల పాటు కార్గిల్‌లో ‘క్విక్‌ యాక్షన్‌ టీమ్‌’లో పని చేశాడు. ‘75 కేజీల బరువుతో వెళ్లి 55 కిలోల బరువుతో తిరిగి వచ్చాను’ అని తెలిపాడాయన. నానా చుట్టూ ఎన్నో వివాదాలున్నాయి. దర్శకులు విధు వినోద్‌ చోప్రా , సంజయ్‌ లీలా బన్సాలీ లాంటి వాళ్లతోనే సెట్‌లో పేచీ పడ్డాడు. చాలామంది నటీనటులతో నానాకు పడదు. నానాకు అవార్డులు రాకుండా చూసే పెద్ద పటాలమే ఈ కారణంగా తయారై ఉంది. నానా వ్యక్తిగత జీవితంలో కూడా సమస్యలు ఉన్నాయి. అతని మొదటి కొడుకు శారీరక అవకరాలతో పుట్టడం నానాను బాగా డిస్ట్రబ్‌ చేసింది. ‘నా కొడుకు ఇలా పుట్టడమా’ అని షాక్‌లో ఆ పిల్లాణ్ణి దగ్గరకే తీయలేదు. ఆ తర్వాత తీసినా రెండేళ్ల వయసులోనే ఆ బాబు చనిపోయాడు. ఆ తర్వాత మళ్లీ కొడుకు పుట్టాడు. అతని పేరు మల్హార్‌. అయితే ‘ఖామోషీ’, ‘అగ్నిసాక్షి’ చేస్తుండగా మనీషా కొయిరాలాతో ఏర్పడిన బంధం నానాను భార్యకు దూరం చేసిందని అంటారు. కొడుకు తల్లితో వెళ్లిపోయాడు. ఆ తర్వాత ఆయేషా జుల్కాతో రిలేషన్‌ వల్ల మనీషాతో కూడా తెగదెంపులయ్యాయని కథనం. 2008 నాటి ‘హార్న్‌ ఓకే ప్లీజ్‌’ సినిమా పాట చిత్రీకరణ సమయంలో నానా తన పట్ల అసభ్యంగా ప్రవర్తించారని నటి తనుశ్రీ దత్తా ఆరోపించింది. అయితే నానా ఈ ఆరోపణలను పూర్తిగా ఖండించారు. నానా రైతులా బతకడానికి ఇష్టపడ్డాడు. ‘నాకు నా పల్లెటూరే ప్రశాంతతను ఇస్తుంది. నేను ఇప్పుడు పల్లెటూరి వాడినే’ అని తరచూ చెబుతుండేవాడు. పుణే సమీపంలోని ఖడక్‌వాస్లాలో నిర్మించుకున్న 27 ఎకరాల ఫామ్‌హౌస్‌ కట్టుకున్నాడు. వీకెండ్‌లో సరదాగా గడపడానికి కాకుండా నానా ఇక్కడే ఉంటూ వ్యవసాయం చేసేవాడు. స్థానిక రైతులతో కలిసి ఈ 27 ఎకరాల్లో వరి, గోధుమలు, సజ్జలు, ఉల్లిపాయలు, వెల్లుల్లి పండించేవాడు. వ్యవసాయం ద్వారా వచ్చే ఆదాయాన్ని పొలంలో పని చేసే పేద కూలీలకు, స్థానిక రైతులకు సమానంగా పంచేసేవాడు. లాక్‌డౌన్‌ సమయంలో ఆయన ఇక్కడే గడిపాడు. ఫామ్‌హౌస్‌లో పెంచుకునే కుక్కలు, ఆవులు, రెండు ఎడ్ల బండ్లు ఆయనకు తోడుగా ఉండేవి. తెరపై నానా ఒక ప్రశ్న. జవాబు దొరకని ప్రశ్న. నిజ జీవితంలో కూడా మన జీవనంలోని నిజాయితీని, విలువలు, మనలోని నిష్క్రియను ప్రశ్నించిన గొంతు. ఆయన లేకున్నా ఆయ గొంతు మనల్ని వెంటాడుతుంది.అవార్డులు అరల్లో ఉంటాయి. సినిమాలు యూట్యూబ్‌లో ఉంటాయి. కానీ కార్గిల్‌ బంకర్‌లో జవాన్ల పక్కన తుపాకీ పట్టుకున్న నటుడు, మరాఠ్వాడా పొలాల్లో రైతు భుజం మీద చేయి వేసిన మనిషి – తెరపై కాదు, జనం గుండెల్లో బతుకుతాడు.నానా పాటేకర్‌ చనిపోలేదు. అలాంటి మనుషులు చనిపోరు. తెర దించి పునఃయశస్సుకు ఆరంభం పలుకుతారు.

సాక్షి, విజయవాడ: ఏపీ గవర్నర్ అబ్దుల్ నజీర్ అస్వస్థతకు గురయ్యారు. నజీర్‌ కడుపు నొప్పితో బాధపడుతుండటంతో ఈరోజు తెల్లవారుజామున ఆసుపత్రిలో చేర్చించారు. ప్రస్తుతం ఆయన ఆరోగ్యం నిలకడగానే ఉన్నట్టు సమాచారం.వివరాల మేరకు.. గవర్నర్‌ అబ్దుల్‌ నజీర్‌ నిన్న(శుక్రవారం) బెంగళూరు నుంచి విజయవాడకు రావాల్సి ఉంది. రాత్రి 12 గంటలకు బెంగళూరు నుంచి రావాల్సిన గవర్నర్ విమానం ఆలస్యమైంది. దీంతో, అర్ధరాత్రి రెండు గంటలకు ఆయన విజయవాడ చేరుకున్నారు. ఈ క్రమంలో శనివారం తెల్లవారుజామున 4:30 గంటలకు నజీర్‌ కడుపులో నొప్పి బాధపడ్డారు. అనంతరం, గవర్నర్‌ను మణిపాల్‌ ఆసుపత్రికి తరలించారు. వైద్యులు ఆయనకు చికిత్స అందించినట్టు తెలిసింది.

ఆసుపత్రుల దిగ్గజం మణిపాల్‌ హెల్త్‌ ఎంటర్‌ప్రైజెస్‌ పబ్లిక్‌ ఇష్యూ బాట పట్టింది. ఇందుకు అనుగుణంగా క్యాపిటల్‌ మార్కెట్ల నియంత్రణ సంస్థ సెబీకి ముసాయిదా ప్రాస్పెక్టస్‌ దాఖలు చేసింది. వీటి ప్రకారం రూ. 8,000 కోట్ల విలువైన ఈక్విటీని కొత్తగా జారీ చేయనుంది. అంతేకాకుండా వీటికి జతగా మరో 4,32,27,668 షేర్లను ప్రమోటర్లు, ప్రస్తుత వాటాదారులు విక్రయానికి ఉంచనున్నారు.పీఈ దిగ్గజం టెమాసెక్‌కు పెట్టుబడులున్న సంస్థ ఈక్విటీ జారీ నిధుల్లో మణిపాల్‌ హాస్పిటల్స్‌కు చెందిన రుణ చెల్లింపులకు రూ. 5,378 కోట్లు వెచ్చించనుంది. అనుబంధ కంపెనీ సహ్యాద్రి హాస్పిటల్స్‌లో మైనారిటీ వాటా కొనుగోలు, సాధారణ కార్పొరేట్‌ అవసరాలకు రూ. 574 కోట్లు వినియోగించనుంది.ఐపీవోకంటే ముందుగా రూ. 1,600 కోట్ల షేర్ల విక్రయ యోచనలో ఉంది. ఇది జరిగితే ఐపీవోలో ఈక్విటీ జారీ పరిమాణాన్ని కుదించనుంది. కార్డియాలజీ, అంకాలజీ, న్యూరోసర్జరీ, ఆర్థోపెడిక్స్, కిడ్నీ మార్పిడి తదితర పలు స్పెషాలిటీలు కలిగిన మల్టీస్పెషాలిటీ ఆసుపత్రులను దేశవ్యాప్తంగా కంపెనీ నిర్వహిస్తోంది. 2025 సెప్టెంబర్‌కల్లా 38 ఆసుపత్రుల ద్వారా 10,761 పడకలను కలిగి ఉంది. గతేడాది(2024–25)లో ఆదాయం రూ. 8,242 కోట్లను అధిగమించగా.. దాదాపు రూ. 1,082 కోట్ల నికర లాభం ఆర్జించింది.

తాడేపల్లి రూరల్‌: తాడేపల్లి పట్టణ పరిధిలోని మణిపాల్‌ హాస్పిటల్‌లో మొట్టమొదటి సారిగా తొలి గుండె మార్పిడి శస్త్ర చికిత్స విజయవంతమైనట్లు మణిపాల్‌ హాస్పిటల్‌ డైరెక్టర్‌ జి.రామాంజనేయ రెడ్డి తెలిపారు. శనివారం ఏర్పాటు చేసిన విలేకరుల సమావేశంలో ఆయన మాట్లాడారు. మణిపాల్‌ ఫౌండేషన్, ముఖ్యమంత్రి సహాయనిధి సహకారంతో విజయనగరం జిల్లాకు చెందిన యువతి కె.సత్యవతికి పునర్జన్మ ప్రసాదించినట్లయిందని పేర్కొన్నారు. కన్సల్టెంట్‌ సీటీవీఎస్‌ డాక్టర్‌ దిలీప్‌ రత్తి మాట్లాడుతూ.. సత్యవతి డైలేటెడ్‌ కార్డియో వయోపతి అనే తీవ్రమైన గుండె సమస్యతో బాధపడుతూ తమ ఆసుపత్రిలో చేరారని అన్నారు. హార్ట్‌ ఫెయిల్యూర్‌ దశకు చేరుకున్న ఆమెకు సమగ్ర ట్రాన్స్‌ప్లాంట్‌ ఈవేల్యూషన్‌ చేశామని పేర్కొన్నారు. ఐదేళ్లుగా గుండె వ్యాధితో బాధపడుతున్నాని.. చికిత్సను విజయవంతంగా పూర్తి చేసినందుకు మణిపాల్‌ వైద్య బృందానికి రుణపడి ఉంటానని సత్యవతి తెలిపారు. సమావేశంలో జీవన్‌ దాన్‌ రాష్ట్ర కోఆర్డినేటర్‌ కె.రాంబాబు, డాక్టర్లు వరుణ్‌ పామిడి, శంకరరావు, అనిల్‌కుమార్, ఏవీఎస్‌ఎస్‌ఎన్‌ శ్రీధర్, ఎన్‌.మురళీకృష్ణ తదితరులు పాల్గొన్నారు.

న్యూఢిల్లీ: ప్రమాదంలో ఎడమ మోచేతి తెగిపోయి రక్తమోడుతున్న ఒక యువకుడికి మళ్లీ మోచేయిని అతికించి వైద్యులు అతనికి ఒకరంగా నూతన జీవితాన్ని ప్రసాదించారు. గురుగ్రామ్‌లోని మణిపాల్‌ ఆస్పత్రి వైద్యులు ఈ ఘనత సాధించారు. దాదాపు 9 గంటలపాటు అత్యంత క్లిష్టమైన శస్త్రచికిత్స చేసి 28 ఏళ్ల యువకుడి మోచేయిని విజయవంతంగా అతికించారు. అరుదైన కాస్మొటిక్‌ శస్త్రచికిత్స చేసిన తీరును ఆస్పత్రి శనివారం ఒక ప్రకటనలో వివరించింది. ‘‘ప్రమాదవశాత్తు అతని ఎడమ మోచేయి తెగిపడింది. అయితే వెంటనే తెగిన మోచేతిని సమీప ఆస్పత్రిలో భద్రపరిచారు. రక్తమోడుతున్న అతడిని మా ఆస్పత్రికి హుటాహుటిన తీసుకొచ్చారు. చేతిని సైతం వెంటనే తరలించారు. అప్పటికే అతడు చాలా రక్తం కోల్పోవడంతో ఆరోగ్య పరిస్థితి దిగజారింది. వెంటనే శస్త్రచికిత్స వైద్యులు శరీరం తెగిన చోట శుభ్రంచేసి విరిగిన ఎముకలను సరిచేశారు. అక్కడ చిధ్రమైన కండను సైతం పునరుద్ధరించారు. ఎముక, కండ సమీపంలోని స్నాయువులను సరిచేశారు. సూక్ష్మదర్శిని ద్వారా పరిశీలిస్తూ జాగ్రత్తగా రక్తనాళాలను తెగిపోయిన మోచేయిలోని రక్తనాళాలతో అనుసంధానంచేశారు. దీంతో శరీరం నుంచి మళ్లీ ఆ చేతిలోకి రక్తసరఫరా మొదలైంది. ఈ మొత్తం ప్రక్రియకు దాదాపు ఎనిమిది, తొమ్మిది గంటలు పట్టింది. ప్లాస్టిక్, కాస్మొటిక్‌ సర్జరీ నిపుణుడు డాక్టర్‌ ఆశిష్‌ ధింగ్రా సారథ్యంలోని బృందం సంక్లిష్టమైన ఆపరేషన్‌ను పూర్తిచేసింది’’ అని ఆస్పత్రి తెలిపింది. ‘‘ మొత్తం తెగిపోయిన శరీరభాగాన్ని అతికించడం చాలా చాలా కష్టం. అయితే తెగిపోయిన భాగాన్ని తడితగలకుండా, స్టెరిలైజ్‌చేసి భద్రపరిచి ఆస్పత్రికి తీసుకొస్తే అతికించడం సాధ్యమే. ఆలస్యమయ్యే కొద్దీ ఆపరేషన్‌ విజయావకాశాలు తగ్గుతూపోతాయి. మారుమూల ప్రాంతంలో ఈ ఘటన జరిగినా వెంటనే పేషెంట్, చుట్టుపక్కల వాళ్లు స్పందించి, అప్రమత్తంగా వ్యవహరించడంతో రీప్లాంటేషన్‌ సర్జరీ విజయవంతమైంది’’ అని వైద్యుడు ధింగ్రా వ్యాఖ్యానించారు.

ఎడ్‌టెక్ దిగ్గజం బైజూస్ న్యూయార్క్‌కు చెందిన ఇన్వెస్ట్‌మెంట్ మేనేజర్ డేవిడ్‌సన్ కెంప్‌నర్ క్యాపిటల్ మేనేజ్‌మెంట్‌తో కొనసాగుతున్న రుణ వివాదానికి పరిష్కారం అంచున ఉంది. మణిపాల్‌ ఎడ్యుకేషన్‌ అండ్‌ మెడికల్‌ గ్రూప్‌ చైర్మన్‌ రంజన్‌ పాయ్‌ బైజూస్‌లో దాదాపు రూ. 2,500 కోట్ల పెట్టుబడులు పెట్టే అవకాశం ఉందని నివేదికలు చెబుతున్నాయి.  ఈ ఏడాది ప్రారంభంలో డేవిడ్‌సన్ కెంప్‌నర్ నుంచి బైజూస్ తీసుకున్న రూ.800 కోట్ల రుణాన్ని సెటిల్ చేసేందుకు రంజన్ పాయ్ రూ.1,400 కోట్లు చెల్లించనున్నట్లు సమాచారం. ఈ  నేపథ్యంలో ఎవరీ డాక్టర్‌ రంజన్‌ పాయ్‌.. ఆయన బిజినెస్‌.. నెట్‌వర్త్‌ వంటి విషయాలు ఈ కథనంలో తెలుసుకుందాం. ఎవరీ డాక్టర్‌ రంజన్‌ పాయ్‌? 1972 నవంబర్ 11న జన్మించిన డాక్టర్ రంజన్ పాయ్ ఒక అర్హత కలిగిన వైద్యుడు, వ్యాపారవేత్త. మణిపాల్ ఎడ్యుకేషన్ అండ్ మెడికల్ గ్రూప్ (MEMG) ఛైర్మన్. ఈ గ్రూప్‌ ప్రపంచవ్యాప్తంగా ఆరు విశ్వవిద్యాలయాలు, 28 ఆసుపత్రులను నడుపుతోంది. రంజన్ పాయ్ తండ్రి పద్మభూషణ్ అవార్డు గ్రహీత రాందాస్ పాయ్. మణిపాల్ అకాడమీ ఆఫ్ హయ్యర్ ఎడ్యుకేషన్ (MAHE)కి రాందాస్ పాయ్ ఛాన్సలర్‌గా ఉన్నారు. రంజన్ పాయ్ మణిపాల్‌లోని కస్తూర్బా మెడికల్ కాలేజీ నుంచి గ్రాడ్యుయేషన్ చేసి, యూఎస్‌ వెళ్లి హాస్పిటల్ అడ్మినిస్ట్రేషన్‌లో ఫెలోషిప్ పూర్తి చేశారు. అద్దె ఇంట్లో ప్రారంభం డాక్టర్ రంజన్ పాయ్ మలేషియాలోని మెలక మణిపాల్ మెడికల్ కాలేజీకి మేనేజింగ్ డైరెక్టర్‌గా తన వృత్తి జీవితాన్ని ప్రారంభించారు. 2000 సంవత్సరంలో రంజన్ పాయ్ బెంగళూరులోని అద్దె ఇంట్లో మణిపాల్ ఎడ్యుకేషన్ అండ్ మెడికల్ గ్రూప్‌ను ప్రారంభించారు.  కేవలం 2 లక్షల డాలర్లతో వ్యాపారాన్ని మొదలు పెట్టారు.  ఇప్పుడు దీని విలువ సుమారు 3 బిలియన్‌ డాలర్లు ( దాదాపు రూ. 25,000 కోట్లు). నెట్‌వర్త్‌ ఫోర్బ్స్ ప్రకారం డాక్టర్ రంజన్ పాయ్ నెట్‌వర్త్‌ 2.8 బిలియన్‌ డాలర్లు (దాదాపు రూ. 23,000 కోట్లు). మణిపాల్ గ్లోబల్ ఎడ్యుకేషన్ సర్వీసెస్‌కు ఇప్పుడు మలేషియా, ఆంటిగ్వా, దుబాయ్, నేపాల్‌ దేశాల్లో  కూడా క్యాంపస్‌లు ఉన్నాయి.  ఇదే కాకుండా డాక్టర్‌ రంజేన్‌ పాయ్‌కి మణిపాల్ సిగ్నా హెల్త్ ఇన్సూరెన్స్ అనే సంస్థ కూడా ఉంది.

కోల్‌కతా/న్యూఢిల్లీ: హెల్త్‌కేర్‌ సంస్థ మణిపాల్‌ హాస్పిటల్స్‌ తాజాగా ఇమామీ గ్రూప్‌ సంస్థ ఆమ్రి హాస్పిటల్స్‌లో 84% వాటాను సొంతం చేసుకుంది. సింగపూర్‌ కంపెనీ టెమాసెక్‌ హోల్డింగ్స్‌కు 59% వాటాగల మణిపాల్‌ ఇందుకు రుణాలుసహా రూ. 2,300 కోట్లు చెల్లించినట్లు తెలుస్తోంది. ఆమ్రి హాస్పిటల్స్‌లో 15% వాటాతో ఎఫ్‌ఎంసీజీ దిగ్గజం ఇమామీ గ్రూప్‌ ఇన్వెస్టర్‌గా కొనసాగనుంది. తాజా కొనుగోలుతో మణిపాల్‌ హాస్పిటల్స్‌ దేశ తూర్పు ప్రాంతంలో కార్యకలా పాలు విస్తరించనుంది. సంయుక్త సంస్థ దేశవ్యాప్తంగా 17 పట్టణాలు, నగరాలలో 9,500 పడకలతో 33 ఆసుపత్రులను నిర్వహించనుంది. వెరసి దేశీయంగా రెండో పెద్ద హెల్త్‌కేర్‌ సేవల సంస్థగా ఆవి ర్భవించనుంది. సంబంధిత వర్గాల సమా చారం ప్రకారం ఆమ్రి రుణ భారం రూ.1,600 కోట్లు కాగా.. రూ.2,400 కోట్ల ఎంటర్‌ప్రైజ్‌ విలువలో డీల్‌ జరిగినట్లు తెలుస్తోంది. క్లినికల్‌ నైపుణ్యాలు, మౌలిక సదుపాయాలుగల ఆమ్రి హాస్పిటల్స్‌ను జత కలుపుకోవడం ద్వారా భారీ నెట్‌వర్క్‌కు తెరలేవనున్నట్లు మణిపాల్‌ పేర్కొంది. తద్వారా దేశ తూర్పుప్రాంతంలో అత్యంత నాణ్యమైన ఆరోగ్యపరిరక్షణ సేవలకు పెరుగుతున్న డిమాండుకు అనుగుణమైన సేవలు అందించేందుకు వీలు చిక్కనున్నట్లు తెలియజేసింది. అయితే మణిపాల్‌ 2021లో కోల్‌కతాలోని కొలంబియా ఏషియా హాస్పిటల్స్‌ను కొనుగోలు చేయడం ద్వారా తూర్పు భారతంలో కార్యకలాపాలు ప్రారంభించింది. కాగా.. హెల్త్‌కేర్‌ రంగ మరో దిగ్గజం అపోలో హాస్పిటల్స్‌ 10,000 పడకల సామర్థ్యంతో 64 ఆసుపత్రులను నిర్వహిస్తోంది.  

సాక్షి, గుంటూరు: ఆంధ్రప్రదేశ్‌ గవర్నర్‌ జస్టిస్‌ అబ్దుల్‌ నజీర్‌ను రాష్ట్ర ముఖ్యమంత్రి వైఎస్‌ జగన్‌మోహన్‌రెడ్డి పరామర్శించారు. మంగళవారం మధ్యాహ్నం తాడేపల్లిలోని మణిపాల్‌ ఆస్పత్రికి వెళ్లి గవర్నర్‌ ఆరోగ్య స్థితిని స్వయంగా అడిగి తెలుసుకున్నారాయన.   తీవ్ర కడుపు నొప్పితో సోమవారం మణిపాల్‌ ఆస్పత్రిలో గవర్నర్‌ నజీర్‌ చేరిన సంగతి తెలిసిందే. ఆపై వైద్య పరీక్షల్లో అపెండిసైటిస్‌గా నిర్ధారణ కావడంతో వైద్యులు సర్జరీ చేశారు. ఆపై ఆయన ఆరోగ్యం నిలకడగానే ఉందని బులిటెన్‌ విడుదల చేశారు వైద్యులు.  ఇక తిరుమల బ్రహ్మోత్సవాలతో పాటు తిరుపతిలో పలు అభివృద్ధి పనుల్లో సోమవారం బిజీగా ఉన్న సీఎం జగన్‌.. అధికారుల ద్వారా ఎప్పటికప్పుడు గవర్నర్‌ నజీర్‌ ఆరోగ్యంపై ఆరా తీస్తూ వచ్చారు. ఈ క్రమంలో ఇవాళ డోన్‌ పర్యటన ముగించుకుని నేరుగా ఆస్పత్రికే చేరుకున్నారాయన.

సాక్షి, గుంటూరు: ఆంధ్రప్రదేశ్‌ గవర్నర్‌ జస్టిస్‌ అబ్దుల్‌ నజీర్‌(65) సోమవారం అస్వస్థతకు గురయ్యారు. దీంతో ఆయన్ని తాడేపల్లిలోని మణిపాల్‌ ఆస్పత్రిలో చేరారు. అయితే వైద్య పరీక్షల అనంతరం.. గవర్నర్‌కు అపెండిసైటిస్‌గా వైద్యులు ధృవీకరించారు. గవర్నర్‌ అస్వస్థత గురించి రాజ్‌భవన్‌ అధికారుల నుంచి సమాచారం అందుకున్న వైద్యులు తొలుత విజయవాడకే వచ్చి గవర్నర్‌కు పరీక్షలు చేశారు. ఆస్పత్రిలో చేరాలని ఆయనకు సూచించారు. వైద్య నిపుణుల సూచన మేరకు ఆస్పత్రిలో చేరిన గవర్నర్‌కు వైద్య పరీక్షలు నిర్వహించారు. పరీక్షల అనంతరం.. అపెండిసైటిస్‌గా తేల్చారు.  వెంటనే గవర్నర్‌ నజీర్‌కు రోబోటిక్ విధానం ద్వారా సర్జరీ చేసినట్లు తెలుస్తోంది. ప్రస్తుతం ఆయన ఆరోగ్యం నిలకడగా ఉందని ఆస్పత్రి వర్గాలు వెల్లడించాయి.  రేపు డిశ్చార్జ్ ఆయన అయ్యే అవకాశాలు కనిపిస్తున్నాయి.  గవర్నర్‌ ఆరోగ్య పరిస్థితిపై సీఎం జగన్‌ ఆరా గవర్నర్‌ అబ్దుల్ నజీర్‌ ఆరోగ్య పరిస్థితిపై.. సీఎం వైఎస్‌ జగన్‌ ఆరా తీశారు. ఆయన త్వరగా కోలుకోవాలని ఆకాంక్షించారు. ప్రస్తుతం ముఖ్యమంత్రి తిరుపతి, తిరుమల పర్యటనలో ఉన్న సంగతి తెలిసిందే. గవర్నర్‌ అస్వస్థత సమాచారం అందుకున్న వెంటనే.. సీఎం జగన్‌ అధికారులతో మాట్లాడారు.గవర్నర్‌ త్వరగా కోలుకోవాలని సీఎం జగన్‌ ఆకాంక్షించారు.

న్యూఢిల్లీ: మణిపాల్‌ హాస్పిటల్స్‌లో మెజారిటీ వాటాలు దక్కించుకునే దిశగా షియర్స్‌ హెల్త్‌కేర్‌ ఇండియా ఒప్పందం కుదుర్చుకున్నట్లు సమాచారం. హెల్త్‌కేర్‌ రంగంలో ఇదే అతిపెద్ద ప్రైవేట్‌ ఈక్విటీ డీల్‌ కాగలదని పరిశ్రమవర్గాలు తెలిపాయి. డీల్‌పై వచ్చే వారం అధికారిక ప్రకటన చేసే అవకాశం ఉందని వివరించాయి. ఒప్పందం ప్రకారం మణిపాల్‌ హాస్పిటల్స్‌ విలువ సుమారు రూ.40,000 కోట్లు – రూ.42,000 కోట్లుగా మదింపు చేసినట్లు పేర్కొన్నాయి. ప్రమోటర్‌ కుటుంబం, ఇతర ఇన్వెస్టర్లయిన టీపీజీ, ఎన్‌ఐఐఎఫ్‌ నుంచి వాటాలు కొనుగోలు చేయడం ద్వారా తన వాటాను పెంచుకునేందుకు షియర్స్‌ ప్రయత్నాల్లో ఉన్నట్లు వార్తలు వచ్చాయి. మిగతా ఇన్వెస్టర్ల నుంచి 41 శాతం వాటాను కొనుగోలు చేయడం ద్వారా షియర్స్‌ తన మొత్తం వాటాను 59 శాతానికి పెంచుకునే అవకాశం ఉందని సంబంధిత వర్గాలు వివరించాయి. మణిపాల్‌ గ్రూప్‌నకు 28 ఆస్పత్రులు, 8,000 పడకలు ఉన్నాయి.   సింగపూర్‌కు చెందిన ప్రైవేట్‌ ఈక్విటీ దిగ్గజం టెమాసెక్‌కు సంబంధించిన హెల్త్‌కేర్‌ డెలివరీ అసెట్లను షియర్స్‌ నిర్వహిస్తోంది. షియర్స్‌కు మణిపాల్‌ హాస్పిటల్స్‌లో ప్రస్తుతం 18 శాతం వాటాలు ఉన్నాయి. దానితో పాటు అమెరికన్‌ ప్రైవేట్‌ ఈక్విటీ సంస్థ టీపీజీకి 21%, భారత సార్వభౌమ వెల్త్‌ఫండ్‌ నేషనల్‌ ఇన్‌ఫ్రాస్ట్రక్చర్‌ ఇన్వెస్ట్‌మెంట్‌ ఫండ్‌ (ఎన్‌ఐఐఎఫ్‌)కు 8 శాతం వాటాలు ఉన్నాయి. కోల్‌కతాకు చెందిన హాస్పిటల్‌ చెయిన్‌ మెడికా సినర్జీ, మెడాంటా హాస్పిటల్స్‌ ఆపరేటర్‌ గ్లోబల్‌ హెల్త్‌లోనూ షియర్స్‌ వాటాదారుగా ఉంది. 

బెంగుళూరు: కర్ణాటక మాజీ ముఖ్యమంత్రి ఎస్‌ఎం కృష్ణ బెంగుళూరులోని మణిపాల్‌ ఆస్పత్రిలో చేరినట్లు ఆస్పత్రి వర్గాలు పేర్కొన్నాయి. ఆయన శ్వాస సంబంధిత వ్యాధులతో బాధపడతున్నట్లు వెల్లడించాయి. ఆయన వైద్యుల ఆధ్వర్యంలో చికిత్స పొందుతున్నట్లు పేర్కొంది. ప్రస్తుతం ఆయన శ్వాస సంబంధిత మిషన్‌​ సాయంతో కాస్త హాయిగా శ్వాస తీసుకుంటున్నారని, త్వరితగతిన పూర్తిగా కోలుకుంటారని తెలిపింది. కర్ణాటక రాష్ట్ర ఆరోగ్య మంత్రి డాక్టర్‌ కే సుధాకర్‌ దగ్గరుండి మరీ మాజీ ముఖ్యమంత్రి ఆరోగ్య పరిస్థితిని పర్యవేక్షిస్తున్నారు. (చదవండి: ఏడాది వయసు కొడుకుతో ఈ రిక్షా నడుపుతున్న మహిళ: వీడియో వైరల్‌)

సాక్షి, తాడేపల్లి రూరల్‌:  సీఎం పీఏనంటూ ఓ కార్పొరేట్‌ ఆస్పత్రి ఎండీకి ఫేక్‌ మెసేజ్‌ పంపి డబ్బులు డిమాండ్‌ చేసిన గుర్తుతెలియని వ్యక్తిపై గుంటూరు జిల్లా తాడేపల్లి పోలీసులు బుధవారం కేసు నమోదు చేశారు. సీఐ శేషగిరి తెలిపిన వివరాల ప్రకారం సీఎం పీఏ నాగేశ్వరరెడ్డినంటూ మణిపాల్‌ ఆస్పత్రి ఎండీకి ఓ మెసేజ్‌ పంపించాడు. ఆ మెసేజ్‌లో ఇంటర్నేషనల్‌ ఫస్ట్‌క్లాస్‌ క్రికెట్‌లో ఆంధ్రాకు చెందిన రుక్కిబుయ్‌ అనే యువకుడు సెలెక్ట్‌ అయ్యాడని, అతడికి ఇంటర్నేషనల్‌ క్రికెట్‌ కిట్‌ అవసరమయ్యిందని, దానిని కొనుగోలు చేసేందుకు రూ.10,40,440ను పంపించాలని మెసేజ్‌ పెట్టాడు. బెంగళూరులో ఉన్న మణిపాల్‌ హాస్పిటల్స్‌ ఎండీ  తాడేపల్లిలోని మణిపాల్‌ అసోసియేట్‌ డైరెక్టర్‌ జక్కిరెడ్డి రామాంజనేయరెడ్డికి ఆ మెసేజ్‌ను పంపించి పరిశీలించాలని ఆదేశించారు. అది ఫేక్‌ మెసేజ్‌గా గుర్తించి జరిగిన ఘటనపై రామాంజనేయరెడ్డి ఫిర్యాదు చేయడంతో కేసు నమోదు చేశారు. మణిపాల్‌ హాస్పిటల్‌ వారు ఇచ్చిన ఫిర్యాదు మేరకు మెసేజ్‌ పెట్టిన సెల్‌ఫోన్‌ నంబర్‌ ఆధారంగా పోలీసులు ముమ్మరంగా దర్యాప్తు ప్రారంభించారు. కాగా, సదరు ఫేక్‌మెసేజ్‌ పెట్టిన వ్యక్తి ఉమ్మడి ఏపీలో పలువురు ప్రముఖుల పేర్లతో కార్పొరేట్‌ కంపెనీలకు ఫోన్‌ చేసి డబ్బులు వసూలు చేసిన  ఘటనలపై ఆరు కేసులు నమోదైనట్లు విశ్వసనీయ సమాచారం. ఈ మధ్యకాలంలో నెల్లూరులో ఓ మంత్రి పీఏ నంటూ ఫోన్‌ చేయడంతో అతడ్ని అదుపులోకి తీసుకుని అరెస్ట్‌ చేసినట్లు తెలుస్తోంది.  చదవండి: (దుష్ట చతుష్టయం ఎన్ని కుట్రలు చేసినా ఫలితం ఉండదు: అంబటి రాంబాబు)

సాక్షి, అమరావతి: సీఎం వైఎస్‌ జగన్‌మోహన్‌రెడ్డి శుక్రవారం తాడేపల్లిలోని మణిపాల్‌ ఆస్పత్రిలో వైద్యపరీక్షలు చేయించుకున్నారు. ఇటీవల ఇంట్లో వ్యాయామం చేస్తున్న సమయంలో ఆయన కుడికాలుకు గాయం అయింది. ఈ నేపథ్యంలో శుక్రవారం మళ్లీ వాపు రావటంతో వైద్యుల సలహా మేరకు ఆస్పత్రికి వెళ్లారు. ప్రముఖ ఆర్థోపెడిక్‌ వైద్యనిపుణులు డాక్టర్‌ అనిల్‌కుమార్, మణిపాల్‌ ఆస్పత్రి వైద్యుల పర్యవేక్షణలో సీఎం జగన్‌కు సాధారణ వైద్యపరీక్షలు, స్కానింగ్‌ నిర్వహించారు. అనంతరం ఆయన తాడేపల్లిలోని ఇంటికి చేరుకున్నారు.  

తాడేపల్లిరూరల్‌: మణిపాల్‌ హాస్పిటల్స్‌లో ఆరోగ్యశ్రీ కింద బోన్‌మారో ట్రాన్స్‌ప్లాంటేషన్స్‌ను చేస్తున్నట్లు హాస్పిటల్‌ డైరెక్టర్‌ డాక్టర్‌ కంటిపూడి సుధాకర్‌ తెలిపారు. మంగళవారం ఏర్పాటు చేసిన విలేకరుల సమావేశంలో ఆయన మాట్లాడుతూ.. మణిపాల్‌లో ఇప్పటివరకు 50 బోన్‌మారో ట్రాన్స్‌ప్లాంటేషన్స్‌ను విజయవంతంగా పూర్తి చేసినట్లు చెప్పారు. క్లిష్టతరమైన, ఖర్చుతో కూడుకున్న ఈ చికిత్సను ఆరోగ్యశ్రీ పరిధిలోకి తీసుకురావటం అభినందించదగ్గ విషయం అన్నారు. బోన్‌మారో ట్రాన్స్‌ప్లాంట్‌ ఫిజీషియన్‌ డాక్టర్‌ జి.కృష్ణారెడ్డి మాట్లాడుతూ.. ఈ తరహా క్లిష్టమైన చికిత్సల కోసం హైదరాబాద్, చెన్నై, బెంగళూరు వంటి ప్రాంతాలకు వెళ్లనవసరం లేకుండా మణిపాల్‌లో అద్భుతమైన చికిత్స లభిస్తోందని తెలిపారు. అంకాలజిస్ట్‌ డాక్టర్‌ మాధవ్‌ దంతాల మాట్లాడుతూ.. బోన్‌మారో ట్రాన్స్‌ప్లాంటేషన్‌ రెండు రకాలని, వాటిలో ఒకటి ఆటోలోగస్‌ ట్రాన్స్‌ప్లాంటేషన్‌ అని, రెండవది అల్లోజెనిక్‌ ట్రాన్స్‌ప్లాంటేషన్‌ అని వివరించారు. ఈ కార్యక్రమంలో డాక్టర్‌ బి.శ్రావణ్‌కుమార్, డాక్టర్‌ సీహెచ్‌ మనోజ్‌కుమార్‌ తదితరులు పాల్గొన్నారు. 

సాక్షి, బెంగళూరు: పెజావర మఠాధిపతి విశ్వేశతీర్థ స్వామి (88) కన్నుమూశారు.మణిపాల్‌ కస్తూర్భా హాస్పిటల్‌లో చికిత్స పొందిన స్వామీజీ అపస్మారక స్థితికి చేరడంతో డాక్టర్లు తెల్లవారుజామున మఠానికి తరలించారు. అక్కడే చివరివరకు చికిత్సను అందజేశారు. అశేష భక్తులను దుఃఖసాగరంలో ముంచుతూ శివైక్యం చెందారు స్వామి విశ్వేశతీర్థ. స్వామీజీ తుదిశ్వాస విడిచినట్టు ఉడిపి ఎమ్మెల్యే కె.రఘుపతి భట్ ప్రకటించారు. కేంద్ర మాజీ మంత్రి ఉమాభారతి ఉదయమే శ్రీకృష్ణమఠానికి చేరుకున్నారు. ఉడిపి అష్ట మఠాల్లో పెజావర మఠం ఒకటి. కాగా శ్వాస పీల్చుకోవడం ఇబ్బందులు తలెత్తడంతో ఈ నెల 20న విశ్వేశ తీర్ధ స్వామీజీని ఆసుపత్రికి తరలించారు. తొలుత న్యుమోనియా సమస్యలకు చికిత్స అందించినట్టు వైద్యులు తెలిపారు. ఆయన ఆరోగ్యం మరింత విషమంగా మారిందని, బ్రెయిన్ డిస్‌ఫంక్షన్ అని పరీక్షలో తేలిందని, ఇంకా స్పృహలోకి రాలేదని చెప్పారు. ఈ నేపథ్యంలో స్వామీజీ అభిమతం మేరకు లైఫ్ సపోర్ట్‌తోనే ఉదయం మఠానికి తరలించారు.    పెజావర మఠాథిపతి విశ్వేశ తీర్ధ స్వామీజీ మరణం పట్ల ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి దిగ్భ్రాంతి వ్యక్తం చేశారు. ఆయన ఆత్మకు శాంతి చేకూరాలని ఆకాంక్షించారు.ప్రధాని నరేంద్ర మోదీ, కర్ణాటక ముఖ్యమంత్రి బీఎస్ యడియూరప్ప స్వామీజీ మృతిపై తీవ్ర విచారం వ్యక్తంచేశారు. ఈ విషాదం నుంచి స్వామీజీ అశేషభక్తులు కోలుకునేలా మానసిక స్థైర్యం కలిగించాలని ఆ కృష్ణ భగవానుని కోరుకుంటున్నానని అన్నారు.  విశ్వేశ తీర్థ పరమపదించడం హిందూ జాతికి తీరని లోటు ఉడిపిలో పెజావర్ మఠాధిపతి విశ్వేశ తీర్థ పరమపదించడం పట్ల విశాఖ శారదా పీఠాధిపతులు స్వరూపానందేంద్ర, స్వాత్మానందేంద్ర విచారం వ్యక్తం చేశారు. విశ్వేశ తీర్థ మరణం హిందూ జాతికి తీరని లోటన్నారు. హిందూ సమాజం గర్వించదగ్గ మత గురువుల్లో ఆయన ఒకరని గుర్తు చేసారు. శ్రీమద్వాచార్యుని ప్రధాన శిష్యులు అధోక్షజ తీర్థ నుంచి వేదాంతంపై సంపాయించిన పట్టుతో హిందూ ధర్మ పరిరక్షణకు విశ్వేశ తీర్థ పాటుపడ్డారని కొనియాడారు. బెంగుళూరులో పూర్ణప్రజ్ఞ విద్యాపీఠాన్ని ఏర్పాటు చేసి 63 సంవత్సరాలుగా వేదాంతంలో ఎంతోమంది స్కాలర్స్ ను తయారు చేసారని, శ్రీ మద్వాచార్యులు స్థాపించిన ద్వైత పాఠశాలతోనూ విశ్వేశ తీర్థకు అనుబంధముందని గుర్తు చేసుకున్నారు.

సాక్షి, బెంగళూరు: పెజావర మఠాధిపతి విశ్వేశతీర్థ స్వామి ఆరోగ్యం క్షీణిస్తోంది. మణిపాల్‌ కేఎంసీ ఆస్పత్రిలో ఆయనకు వెంటిలేటర్‌పై చికిత్సనందిస్తున్నారు. కోలుకునే అవకాశాలు లేవని వైద్యులు తేల్చడంతో ఆదివారం ఆయనను మఠానికి తరలించనున్నారు. మఠంలోనే తుది శ్వాస వదలాలని స్వామీజీ  చెబుతుండేవారు. మరోవైపు స్వామీజీ త్వరగా కోలుకోవాలని రాష్ట్ర వ్యాప్తంగా పూజలు, హోమాలు చేస్తున్నారు. ఈ తరుణంలో సీఎం యొడియూరప్ప శనివారం హుటాహుటినా ఉడుపికి బయలుదేరారు. సాయంత్రం 5.30 గంటలకు ఆస్పత్రికి చేరుకుని వైద్యులతో స్వామిజీ ఆరోగ్యంపై చర్చించారు. సీఎం ఆదివారం శివమొగ్గ జిల్లా పర్యటనను రద్దు చేసుకుని  ఉడుపిలోనే ఉండనున్నారు.   మఠానికి తరలింపు    ఆదివారం పేజావర స్వామీజీని ఉడుపి మఠానికి తరలించినట్లు సీనియర్‌ స్వామిజీ విశ్వప్రసన్న తీర్థ తెలిపారు. స్వామీజీ కోసం మఠంలోనే ప్రత్యేకంగా వెంటిలేటర్లను ఏర్పా టు చేస్తున్నట్లు తెలిపారు. భక్తులెవ్వరూ మఠానికి వచ్చి ఇబ్బందులు పెట్టవద్దని, శీఘ్రంగా కోలుకోవాలని ప్రార్థించాలని కోరారు. మరోవైపు కేంద్ర మాజీమంత్రి ఉమాభారతి ఉడుపి చేరుకున్నారు. పెజావర స్వామిని చూసేందుకు ఆమె ఇవాళ ఉదయం మఠానికి వచ్చారు.

సాక్షి, గుంటూరు: ఆ చిన్నారి కష్టం పగవాడికి కూడా రాకూడదు..బుడిబుడి అడుగులు వేసే మూడేళ్ల  వయస్సులోనే దాదాపు 45 రోజులుగా క్షణం క్షణం నరకం చవిచూస్తోంది. శరీరం వెనుక భాగంలో తీవ్రంగా కాలిన గాయాల బాధతో కొట్టుమిట్టాడుతున్న చిన్నారికి ఎన్టీఆర్‌ వైద్య సేవ ద్వారా ఉచితంగా వైద్యం చేసే వీలున్నప్పటికీ.. ఇప్పటికే బకాయిలు అధికంగా ఉండడంతో ప్రైవేటు వైద్యులు ఎవరూ ముందుకు రాని దుర్భర పరిస్థితి నెలకొంది. వివరాల్లోకి వెళితే.. గుంటూరు జిల్లా వినుకొండ పాత క్రిస్టియన్‌పాలెంలో నివాసం ఉంటున్న యెలికపాటి ఆదయ్య, కీర్తి దంపతుల చిన్న కుమార్తె అమూల్య తోటి పిల్లలతో ఆడుకుంటూ ప్రమాదవశాత్తు గౌనుకు నిప్పంటుకుని వీపు నుంచి కింది భాగమంతా పూర్తిగా కాలిపోయింది. నవంబరు 14వ తేదీన ఘటన జరగడంతో తల్లిదండ్రులు వినుకొండలోని ఓ ప్రైవేటు ఆస్పత్రిలో కొద్దిరోజులు చికిత్స చేయించారు. అక్కడ రూ.50 వేలు ఖర్చు కావడంతో నిరుపేద కుటుంబం కావడంతో అప్పు తేలేక, ఆస్పత్రి నుంచి అమూల్యను ఇంటికి తీసుకెళ్లి మందులు వాడుతున్నారు. అయితే వైద్యుల పర్యవేక్షణ లేకపోవడంతో గాయం మానకుండా పెద్దది అవుతూ వచ్చింది. దీంతో  గురువారం తాడేపల్లిలోని మణిపాల్‌ ఆస్పత్రి, మంగళగిరిలోని ఎన్నారై ఆస్పత్రులకు అమూల్యను తీసుకెళ్లారు. ఎన్టీఆర్‌ వైద్య సేవ కార్డు ఉందని,  దాని ద్వారా ఉచితంగా వైద్య సేవలు అందించాలని కోరారు. అయితే ఎన్టీఆర్‌ వైద్య సేవలో ఉచితంగా చేసే వీలు ఉన్నప్పటికీ అనుమతులు వచ్చే వరకు అయ్యే ఖర్చు భరించాలని, అనుమతులు రాకపోతే పూర్తిగా డబ్బులు ఖర్చు పెట్టుకోవాల్సి ఉంటుందని వైద్యులు తేల్చి చెప్పారు. ఆర్థిక స్థోమత లేని ఆదయ్య దంపతులు అమూల్యను తీసుకుని సాయంత్రం 5.30 గంటల సమయంలో జీజీహెచ్‌కు వెళ్లారు. జీజీహెచ్‌లో బర్న్స్‌ వార్డు లేదని, చిన్న పిల్లల వార్డులో ఉంచితే ఇన్‌ఫెక్షన్‌ వచ్చి ఇంకా ఎక్కువ ఇబ్బంది జరుగుతుందంటూ అక్కడి వైద్యులు చెప్పడంతో  చేసేది లేక ఇంటికి బయల్దేరారు. వారి సమీప బంధువు సోషల్‌ మీడియాలో ఈ వ్యవహారం అంతా పోస్ట్‌ చేయడంతో వైరల్‌ అయింది. దీన్ని గమనించిన జీజీహెచ్‌ అధికారులు ఆదయ్యకు ఫోన్‌ చేసి వెనక్కు రావాలని కోరారు. దీంతో  గురువారం రాత్రి జీజీహెచ్‌కు తీసుకొచ్చి అమూల్యను అడ్మిట్‌ చేశారు. ప్రస్తుతం అమూల్య జీజీహెచ్‌లో చికిత్స పొందుతోంది. అయితే జీజీహెచ్‌లో దీనికి సంబంధించి ఎటువంటి మందులూ లేకపోవడం గమనార్హం.   బర్న్స్‌ వార్డు నిర్మాణానికి రూ. 8 కోట్లు కేంద్రం మంజూరు చేసినట్లు జారీ చేసిన జీవో  బర్న్స్‌ వార్డుకు కేంద్రం నిధులిచ్చినా పట్టించుకోని రాష్ట్ర ప్రభుత్వం..  గుంటూరు జీజీహెచ్‌కు కోస్తాంధ్రలోని ఆరు జిల్లాల నుంచి రోగులు వస్తుంటారు. ఆరు జిల్లాల్లో ఎక్కడ అగ్ని ప్రమాదం జరిగినా వైద్యులు ఇక్కడకు రిఫర్‌ చేస్తుంటారు. అయితే ఇంత పెద్ద ఆస్పత్రిలో బర్న్స్‌ వార్డు లేకపోవడంతో కాలిన గాయాలతో వచ్చిన అనేకమంది రోగులు ప్రాణాలు కోల్పోతున్న దుర్భర స్థితి నెలకొంది. రాజధాని ప్రాంతంలో ఉన్న పెద్ద ఆస్పత్రిలో సైతం బర్న్స్‌ వార్డు నిర్మాణానికి రాష్ట్ర ప్రభుత్వం నిధులు మంజూరు చేయని పరిస్థితి. కాలిన గాయాల నివారణ, నియంత్రణ జాతీయ కార్యక్రమం (ఎంపీపీఎంబీఐ)లో భాగంగా ఆంధ్రప్రదేశ్‌లోని ఐదు బోధనా ఆస్పత్రుల్లో బర్న్స్‌ వార్డుల నిర్మాణానికి ఏడాది క్రితం కేంద్ర ప్రభుత్వం రూ.40 కోట్లు మంజూరు చేసింది. గుంటూరు జీజీహెచ్‌కు సైతం రూ.8 కోట్ల నిధులు మంజూరు చేస్తూ జీవో జారీ చేసినప్పటికీ కనీసం టెండర్లు కూడా పిలిచిన దాఖలాలు లేవు. బర్న్స్‌ వార్డు నిర్మాణానికి నిధులు ఉన్నా నిర్మించేందుకు రాష్ట్ర ప్రభుత్వం సుముఖత చూపకపోవడంపై తీవ్ర విమర్శలు వ్యక్తమవుతున్నాయి.  డబ్బు చెల్లించమని చెప్పిన మాట వాస్తవమే..  కాలిన గాయాలతో అమూల్య అనే చిన్నారిని తీసుకుని మా వద్దకు వచ్చారు. అయితే ఎన్టీఆర్‌ వైద్య సేవ ట్రస్టుకు అనుమతి కోసం పంపుతామని, అనుమతి వచ్చే వరకు డబ్బు చెల్లించాల్సి ఉంటుందని చెప్పాం. అనుమతి వస్తే ఉచితంగా వైద్య సేవలు అందిస్తామని తెలిపాం. అయితే వారు ఆస్పత్రిలో చేర్చకుండా వెళ్లిపోయారు. ఎన్టీఆర్‌ వైద్యసేవలో ఎక్కువగా కాలిన గాయాలు ఉంటే మాత్రమే అనుమతి వస్తుంది. అందుకే ముందుగా ఎన్టీఆర్‌ వైద్య సేవలో చేర్చుకోలేకపోయాం. – రామాంజనేయులు,ఎన్నారై ఆస్పత్రిలో ఎన్టీఆర్‌ వైద్య మిత్ర 

న్యూఢిల్లీ: ఫోర్టిస్‌ హెల్త్‌కేర్‌ కంపెనీ హాస్పిటల్‌ వ్యాపారాన్ని మణిపాల్‌ హాస్పిటల్‌ ఎంటర్‌ప్రైజెస్‌ కొనుగోలు చేయనుంది. ఫలితంగా ఏర్పడే సంస్థ విలువ రూ.15,000 కోట్లుగా ఉంటుందని ఫోర్టిస్‌ హెల్త్‌కేర్‌ సీఈఓ భవదీప్‌ సింగ్‌ తెలిపారు. ఈ విలీన ప్రక్రియ 10–12 నెలల్లో పూర్తవుతుందని పేర్కొన్నారు.కంపెనీ ప్రమోటర్లు సింగ్‌ సోదరుల ద్వయం నిధుల దుర్వినియోగానికి పాల్పడ్డారన్న అంశంపై సీరియస్‌ ఫ్రాడ్‌ ఇన్వెస్టిగేషన్‌ ఆఫీస్‌(ఎస్‌ఎఫ్‌ఐఓ) దర్యాప్తునకు సహకరిస్తున్నామని తెలిపారు. ఈ దర్యాప్తునకు, ఈ డీల్‌కు ఎలాంటి సంబంధం లేదని వివరించారు. ఫోర్టిస్‌ హెల్త్‌కేర్‌ కంపెనీకి చెందిన హాస్పిటల్‌ వ్యాపారాన్ని డీమెర్జ్‌ చేయడానికి ఫోర్టిస్‌ హెల్త్‌కేర్‌ కంపెనీ డైరెక్టర్ల బోర్డ్‌ మంగళవారం ఆమోదం తెలిపింది. ఈ హాస్పిటల్‌ వ్యాపారంతో పాటు డయాగ్నస్టిక్స్‌ చెయిన్‌ ఎస్‌ఆర్‌ఎల్‌లో 20 శాతం వాటాను కూడా మణిపాల్‌ హాస్పిటల్స్, టీపీజీ క్యాపిటల్‌లు కొనుగోలు చేస్తాయి. ఈ విక్రయ వార్తలతో ఫోర్టిస్‌ హెల్త్‌కేర్‌ షేర్‌ భారీగా నష్టపోయింది. ఇంట్రాడేలో 15 శాతం పతనమైన ఈ షేర్‌ చివరకు 13 శాతం నష్టంతో రూ.123 వద్ద ముగిసింది.


 ♦ గుంటూరు నుంచి విజయవాడకు వెళుతుండగా బోల్తా పడిన కారు
 ♦ రోడ్డుప్రమాదంలో మంత్రి కొల్లు రవీంద్ర కు స్వల్పగాయాలు
 ♦ తాడేపల్లిలో మణిపాల్‌ ఆస్పత్రిలో చికిత్స
 ♦ ప్రమాదంలో రవీంద్ర సహా నలుగురికి గాయాలు
 
 గుంటూరు: ఆంధ్రప్రదేశ్ ఎక్సైజ్ శాఖ మంత్రి కొల్లు రవీంద్రకు తృటిలో ప్రమాదం తప్పింది. ఎయిర్‌ బెలూన్స్‌ తెరుచుకోవడంతో పెద్ద ప్రమాదం తప్పింది. గురువారం అర్థరాత్రి గుంటూరు నుంచి విజయవాడకు వెళుతుండగా ఆయన ప్రయాణిస్తున్న కారు మంగళగిరి మండలం టోల్‌ప్లాజా వద్ద పల్టీలు కొట్టింది.
 
 ఈ రోడ్డు ప్రమాదంలో మంత్రి కొల్లు రవీంద్రకు స్వల్పగాయాలు అయినట్టు తెలిసింది. ఆయనతో పాటు మరో నలుగురికి కూడా గాయాలు కావడంతో వారికి తాడేపల్లి మణిపాల్‌ ఆస్పత్రిలో చికిత్స అందిస్తున్నట్టు సమాచారం. పూర్తి వివరాలు తెలియాల్సి ఉంది.


 అతడు జీవితాన్ని ఎంత ఆరాధించాడో తెలియదు కానీ,  చనిపోతూ ఆరిపోతున్న దీపాలకు ఆరో ప్రాణమయ్యాడు. అతడు అతడ్ని ఎంతగా ప్రేమించాడో తెలియదు గానీ, నలుగురికి పునర్జన్మ ప్రసాదించి ప్రాణానికి అసలైన అర్థం చెప్పాడు. కళ్ల ముందు తిరుగుతున్న బిడ్డ కుప్పకూలిపోతే.. మరణానికి చేరువైతే.. కూలబడి కూర్చోకుండా కన్నీటిని దిగమింగుతూనే కొడుకు అవయవాలను దానంచేసి ఆదర్శమూర్తులుగా నిలిచారు ఆ తల్లిదండ్రులు. కన్నీటికే కన్నీరు తెప్పించే ఈ విషాద గాథ గుంటూరు నెహ్రూనగర్‌లో జరిగింది. వివరాల్లోకి వెళితే..
  
 గుంటూరు నెహ్రూనగర్ తొమ్మిదో లైనుకు చెందిన సూరగాని శివలక్ష్మయ్య, గోవర్ధన లక్ష్మికి ఇద్దరు సంతానం. పెద్దకుమారుడు మహేష్‌కుమార్ హైదరాబాద్‌లో సాఫ్ట్‌వేర్ ఉద్యోగం చేస్తుండగా, చిన్న కుమారుడు అశోక్‌కుమార్ (25) అసిస్టెంట్ ప్రొఫెసర్‌గా ఆర్‌వీఆర్ ఇంజినీరింగ్ కళాశాలలో విధులు నిర్వహిస్తున్నారు. కుమారులిద్దరూ మంచి భవిష్యత్తు పొందడం ఆ తల్లిదండ్రులకు ఎనలేని సంతోషాన్ని ఇచ్చింది. కానీ, ఇంతలోనే విధి వక్రించింది. గత మంగళవారం తమ చిన్న కుమారుడు నిద్రలోనే పెద్దగా గురకపెడుతూ అపస్మారక స్థితిలోకి చేరు        కున్నాడు. భయాందోళనతో ఆస్పత్రికి తీసుకువెళ్లిన ఆ తల్లిదండ్రులు చేదువార్త విన్నారు. అశోక్ కోమాలోకి వెళ్లిపోయాడని  డాక్టర్లు స్పష్టం చేశారు.
 
 
 అయితే, మెరుగైన వైద్యం కోసం తాడేపల్లి మణిపాల్ ఆస్పత్రిలో చేర్పించారు. నాలుగు రోజుల అనంతరం  శస్త్ర చికిత్సల వల్ల స్పందన లేదని, అశోక్ బ్రెయిన్‌డెడ్ అయ్యాడని అక్కడి వైద్యులు ధ్రువీకరించారు. దీంతో ఉబికి వస్తున్న కన్నీటిని దిగమింగుకుని అవయవదానానికి ముందుకొచ్చారు ఆ తల్లిదండ్రులు. ఈ క్రమంలో జీవన్ దాన్‌ను ఆశ్రయించారు. జీవన్             దాన్‌లో అప్పటికే అవయవాల కోసం నమోదు చేసుకున్న వారి జాబితాను అనుసరించి అశోక్ అవయవాలను దానం చేశారు. ఆదివారం వేకువజామున ఈ అవయవ దాన ప్రక్రియను మణిపాల్ వైద్యులు పూర్తిచేశారు. లివర్, ఒక కిడ్నీ మణిపాల్ ఆస్పత్రిలోని ఇద్దరు రోగులకు అమర్చగా, కళ్లు శంకర్ కంటి ఆస్పత్రికి, మరొక కిడ్నీ ఆయుష్ ఆస్పత్రికి అందజేశారు. తాను చనిపోతూ నలుగురిలో తిరిగి జీవించాడు అశోక్. ఈ సందర్భంగా అశోక్   తల్లిదండ్రులు మాట్లాడుతూ అవయవ దానానికి ప్రతి ఒక్కరూ ముందుకు రావాలని చెప్పడం విశేషం.      - తాడేపల్లి రూరల్


 ఓ వ్యక్తికి ప్రాణదానం
  
 విశాఖ మెడికల్ :  కేవలం ఐదు గంటల వ్యవధిలో గుంటూరు నుంచి విశాఖకు కిడ్నీ తరలించి నగరవాసి ప్రాణాన్ని నిలిపారు పోలీసులు. మణిపాల్ ఆసుపత్రిలో ఈనెల 31న జరిగిన ఈ కిడ్నీ మార్పిడి శస్త్ర చికిత్సలో పోలీసులు పోషించిన పాత్ర అమోఘమని ఆసుపత్రి యాజమాన్యం బుధవారం ఒక ప్రకటనలో తెలిపింది. గుంటూరుకు చెందిన 54 సంవత్సరాల వ్యక్తి గత నెల 31న మరణించాడు.
 
 అవయవధానం చేసిన అతని నుంచి అదే రోజు కిడ్నీని సేకరించి అంబులెన్స్ ద్వారా గుంటూరు-విజయవాడ మీదుగా విశాఖ నగరానికి కేవలం ఐదు గంటల వ్యవధిలో పోలీసులు ట్రాఫిక్ నియంత్రణ చేసి రప్పించారు. ఆ కిడ్నీని విశాఖకు చెందిన 51 సంవత్సరాల వ్యక్తికి మణిపాల్ ఆసుపత్రి వైద్యులు శస్త్ర చికిత్స ద్వారా అమర్చి కొత్త జీవితాన్ని ప్రసాదించారు. ఇందుకు సహకరించిన పోలీసు విభాగానికి కిడ్నీ గ్రహీత కుటుంబ సభ్యులు, మణిపాల్ ఆసుపత్రి యాజమాన్యం కృతజ్ఞతలు తెలిపింది.
  
  


 మూఢాచారాలపై పోరాడిన కన్నడ సాహిత్య దిగ్గజం
  
 బెంగళూరు: కాలంచెల్లిన కట్టుబాట్లపై కత్తిలాంటి కలంతో పోరాడిన కన్నడ సాహితీ దిగ్గజం, జ్ఞానపీఠ్ పురస్కార గ్రహీత ప్రొఫెసర్ యూఆర్. అనంతమూర్తి(82) ఇకలేరు. ఆయన శుక్రవారం సాయంత్రం ఇక్కడి మణిపాల్ ఆస్పత్రిలో అనారోగ్యంతో కన్నుమూశారు. కొన్నేళ్లుగా మూత్రపిండాల వ్యాధితో బాధపడుతున్న ఆయన వారం కిందట ఊపిరితిత్తులకు ఇన్ఫెక్షన్ సోకడంతో ఆస్పత్రిలో చేరారు. ఐసీయూలో చికిత్స పొందుతూ గుండెపోటుతో మృతి చెందా రు. ఆయనకు భార్య, కుమారుడు, కుమార్తె ఉన్నారు. మూర్తి మృతిపై ప్రధాని మోడీ, యూపీఏ చైర్మన్ సోనియా, కాంగ్రెస్ ఉపాధ్యక్షుడు రాహుల్‌గాంధీ, కర్ణాటక సీఎం సిద్ధరామయ్య, ఆంధ్రప్రదేశ్ సీఎం చంద్రబాబు నాయుడు సంతాపం తెలిపారు. కర్ణాటక ప్రభుత్వం మూడు రోజులను సంతాప దినాలుగా ప్రకటించింది. 1932లో సంప్రదాయ బ్రాహ్మణ కుటుంబంలో జన్మించిన ఉడిపి రాజగోపాలాచార్య అనంతమూర్తి బర్మింగ్‌హామ్ వర్సిటీ నుంచి ఇంగ్లీష్‌లో డాక్టరేట్ పుచ్చుకున్నారు. ఐదు నవలలు, ఒక నాటకంతో పాటు కథలు, కవిత్వం రాశారు. ఆయన రచనలు పలు యూరప్ భాషల్లోకి అనువాదమయ్యాయి.
 
 బ్రాహ్మణత్వ మూఢాచారాలను ఖండించిన ఆయన ప్రసిద్ధ వివాదాస్పద రచన ‘సంస్కార’ (1965) ఆధారంగా అదే పేరుతో వచ్చిన సినిమా కన్నడ సమాంతర చిత్రాల్లో మేటిగా వాసికెక్కింది. మూర్తి జ్ఞాన్‌పీఠ్(1994), పద్మభూషణ్(1998) వంటి ఎన్నో పురస్కారాలు అందుకున్నారు. కేరళలోని మహాత్మాగాంధీ వర్సిటీ వైస్ చాన్స్‌లర్‌గా, నేషనల్ బుక్‌ట్రస్ట్, కేంద్ర సాహిత్య అకాడమీల అధ్యక్షులుగా పనిచేశారు. లోక్‌సభ, రాజ్యసభ ఎన్నికల్లో పోటీ చేసి ఓడిపోయారు. సోషలిస్టు అయిన మూర్తి బీజేపీ, సంఘ్‌పరివార్‌లను తీవ్రంగా వ్యతిరేకించి వివాదాలు తెచ్చుకున్నారు. నరేంద్ర మోడీ ప్రధాని అయితే దేశం నుంచి వెళ్లిపోతానని ఇటీవల లోక్‌సభ ఎన్నికలప్పుడు ప్రకటించారు. అయితే భావోద్వేగంతో అలా అన్నానని తర్వాత వివరణ ఇచ్చారు. గత ఏడాది మాన్ బుకర్ అంతర్జాతీయ బహుమతి పోటీలో నిలిచి పాశ్చాత్య పాఠకుల దృష్టిని ఆకర్షించారు.