తెలుగులో కొందరు నటులు అప్పుడప్పుడు నోరు జారేస్తుంటారు. హీరో బాలకృష్ణ ఇలా చాలాసార్లు టంగ్ స్లిప్ అయి బుక్కైపోయాడు. అయితే సీనియర్ నటుడు చలపతి రావు కూడా గతంలో ఓ సినిమా ప్రీ రిలీజ్ ఈవెంట్‌లో మాట్లాడుతూ అమ్మాయిల గురించి దారుణమైన వ్యాఖ్యలు చేశారు. ఓ ప్రశ్నకు బదులిస్తూ 'పక్కలోకి వస్తారు' అని ఏదేదో వాగారు. అప్పట్లో ఇది పెద్ద వివాదమైంది. ఆ తర్వాత ఆయన క్షమాపణ కూడా చెప్పారు. దీని గురించి ఇన్నాళ్ల తర్వాత ఆయన కొడుకు దర్శకనటుడు రవిబాబు స్పందించాడు.(ఇదీ చదవండి: ఈ వారం ఓటీటీల్లోకి ఏకంగా 22 సినిమాలు.. అవి ఏంటంటే?)'మా నాన్న చేసిన ఆ కామెంట్స్ గురించి ఇంతవరకు నేను ఎక్కడా స్పందించలేదు. కానీ నేను ఇదివరకే మాట్లాడినట్లు ఎవరో ఫేక్ థంబ్ నెయిల్స్ పెట్టి యూట్యూబ్‌లో పోస్ట్ చేస్తున్నారు. నిజానికి నేను ఆ టాపిక్ గురించి నాన్నతో అస్సలు మాట్లాడలేదు. అలానే బయట మీడియాతో కూడా అస్సలు మాట్లాడలేదు. కానీ నాన్నతో మాత్రం దీని గురించి.. 'మీరు మాట్లాడిన ఈ మాట కొందరిని నొప్పించి ఉంటే వాళ్లకు సారీ చెప్పడం మీ బాధ్యత అది మీకే వదిలేస్తున్నా' అని అన్నాను. ఆ తర్వాత ఆయన క్షమాపణలు చెప్పారు. ఎందుకంటే మనందరం ఎప్పుడో ఓసారి నోరు జారుతుంటాం. లూజ్‌గా మాట్లాడేస్తుంటాం. కానీ వాటిని గుర్తించి సారీ చెప్పడం సంస్కారం. మా నాన్న మీడియా ముందు టంగ్ స్లిప్ అవ్వడం ఆయన బ్యాడ్ లక్. సారీ చెప్పేశారు కాబట్టి ఆ టాపిక్ అక్కడితో అయిపోయింది.ఇకపోతే రవిబాబు విషయానికొస్తే.. తండ్రిలానే తొలుత నటుడిగా కెరీర్ ప్రారంభించాడు. కానీ 'అల్లరి' సినిమాతో దర్శకుడిగా మారాడు. అలా అప్పుడప్పుడు సినిమాలు తీస్తూ, నటిస్తూ గుర్తింపు తెచ్చుకున్నాడు. రీసెంట్‌గా విజయ్ దేవరకొండ 'ద ఫ్యామిలీ స్టార్'లో విలన్‌గా చేశాడు. తాజాగా 'రష్' అనే మూవీతో ప్రేక్షకుల్ని పలకరించబోతున్నాడు. ఈ క్రమంలోనే ఇంటర్వ్యూలు ఇస్తూ తన వ్యక్తిగత విషయాలపై క్లారిటీ ఇచ్చేస్తున్నాడు.(ఇదీ చదవండి: అనుమానాస్పద రీతిలో నటి మృతి.. పట్టించుకోని కుటుంబ సభ్యులు)

గోపీచంద్‌... కెరీర్‌ ప్రారంభంలో హిట్ల మీద హిట్లు కొట్టాడు. హీరోగా, విలన్‌గా ఫుల్‌ క్రేజ్‌ తెచ్చుకున్నాడు. కానీ రానురానూ ఈ హీరోకు అవకాశాలు తగ్గాయి. చేసిన నాలుగైదు సినిమాలు కూడా చెప్పుకోదగ్గ స్థాయిలో ఆడలేదు. అయితే ఇటీవల గోపీచంద్‌ హీరోగా నటించిన భీమా మూవీ మాత్రం పాజిటివ్‌ టాక్‌ అందుకుంది. బాక్సాఫీస్‌ దగ్గర కూడా పర్వాలేదనిపిస్తోంది.  చూడగానే నచ్చేసింది తాజాగా సినిమా ప్రమోషన్స్‌లో భాగంగా ఈ హీరో ఓ ఇంటర్వ్యూలో పాల్గొన్నాడు. ఈ సందర్భంగా తనది ప్రేమ వివాహమని తెలిపాడు. గోపీచంద్‌ మాట్లాడుతూ.. 'ఒకసారి రేష్మ ఫోటో చూశాను. చూడగానే నచ్చేసింది. పెళ్లి చేసుకుంటే ఈ అమ్మాయినే చేసుకోవాలని ఫిక్సయ్యాను. తర్వాత ఆమె శ్రీకాంత్‌ మేనకోడలు అని తెలిసింది. అప్పటికే నాకు శ్రీకాంత్‌తో పరిచయం ఉంది కానీ ఈ విషయం డైరెక్ట్‌గా మాట్లాడటానికి ఇబ్బందిగా అనిపించింది. ఆయనే మధ్యవర్తిత్వం అందుకే నటుడు చలపతిరావు అంకుల్‌కు విషయం చెప్పాను. ఆయన మధ్యవర్తిత్వం చేశారు. శ్రీకాంత్‌తో మాట్లాడి పెళ్లి సెట్‌ చేశారు. ఆయనే పెళ్లికి సంబంధించిన పనులను దగ్గరుండి చూసుకున్నారు. రేష్మ నాకు ఇచ్చిన మొట్టమొదటి గిఫ్ట్‌.. టీషర్ట్‌' అని చెప్పుకొచ్చాడు. కాగా 2013లో వీరి వివాహం వైభవంగా జరిగింది. ఈ పెళ్లికి సినీతారలతో పాటు రాజకీయప్రముఖులు సైతం హాజరయ్యారు. ప్రస్తుతం గోపీచంద్‌- రేష్మ దంపతులకు ఇద్దరు కుమారులు ఉన్నారు.  చదవండి: ఆమె ఎక్కడుంటే అక్కడ నాశనమే.. రెండో పెళ్లితో సంతోషంగా ఉన్నా..

సినిమాకు కామెడీ అనేది ప్రధానం. ఎంత పెద్దసినిమా అయినా సరే కాసింతైనా కామెడీ లేకపోతే అభిమానులు నిరాశ చెందడం ఖాయం. కథ ఎంత బలంగా ఉన్నప్పటికీ.. కామెడీ కనిపించకపోతే అబ్బే ఏదో సినిమాలో లోపించందండి అంటుంటారు. పెద్ద హీరోల సినిమాలైనా సరే కామెడీకి అంత ప్రాధాన్యత ఉంటుంది. అలా తెలుగు సినిమాలో 1990ల్లో కడుపుబ్బా నవ్వించిన వారిలో ఠక్కున వినిపించే పేర్లు బాబు మోహన్, కోట శ్రీనివాసరావు జోడీ. వీరిద్దరు చేసిన కామెడీ తెలుగు ప్రజలను బాగా ఆకట్టుకుంది. ఆ తర్వాత కోట శ్రీనివాసరావు, తనికెళ్ల భరణి, ఎంఎస్ సత్యనారాయణ, బ్రహ్మనందం లాంటి వాళ్లు తెలుగు సినిమా కామెడీని ఓ రేంజ్‌కు తీసుకెళ్లారు. ఇప్పట్లో కమెడియన్ అంటే వెంటనే గుర్తుకొచ్చే పేరు బ్రహ్మనందమే. ఆయన లేకుండా సినిమా లేదంటే ఓ వెలితి ఉన్నట్లే అనిపిస్తుంది. అలా తన కామెడీతో సినీ అభిమానులను అలరిస్తూనే ఉన్నాడు.  (ఇది చదవండి:  సినిమాల్లో స్టార్ హీరోయిన్.. కానీ ఆమె జీవితమే ఓ విషాదగాథ!) అయితే ఒక్క కమెడియన్‌ సినిమాలో ఉంటేనే కడుపు చెక్కలయ్యేలా నవ్వడం ఖాయం. అలా ఏకంగా ఐదుగురు స్టార్ కమెడియన్స్ ఓకే ఫోటోలో కనిపిస్తే అక్కడ పరిస్థితి ఎలా ఉంటుంది. ఇక నవ్వులే నవ్వులు.  అలాంటి అరుదైన సన్నివేశం కూడా చోటు చేసుకుంది. దాదాపు 30 ఏళ్ల క్రితమే తెలుగులో స్టార్ కమెడియన్స్‌గా పేరొందిన ఆ ఐదుగురి ఫోటో సోషల్ మీడియాలో తెగ వైరలవుతోంది.  అప్పటి ఐదుగురు తెలుగు స్టార్ కమెడియన్స్‌ ఫోటోను నెటిజన్‌ ట్వీట్‌ చేయగా.. ప్రముఖ నటుడు, రచయిత తనికెళ్ల భరణి తన ‍అనుభవాన్ని ట్విట్టర్‌లో పంచుకున్నారు. ఇది మా పాతికేళ్ల కామెడీ కుటుంబం అంటూ నెటిజన్‌కు రిప్లై ఇచ్చాడు. ఓకే ఫోటోలో బ్రహ్మనందం, బాబు మోహన్, తనికెళ్ల భరణి, కోట శ్రీనివాసరావు, చలపతిరావు నవ్వుతూ కనిపించారు.  అయితే ఈ ఫోటో చూసిన అభిమానులు సైతం తెలుగు సినిమా కామెడీ కుటుంబం అంటూ కామెంట్స్ చేస్తున్నారు. కొందరైతే ఏకంగా ఆ జోక్ ఏంటో మాకు కూడా చెప్పండి సార్ అంటూ ఫన్నీ పోస్టులు పెడుతున్నారు. ఏది ఏమైనా కమెడియన్ సినిమాకు ప్రాణం అనడంలో ఎలాంటి సందేహం లేదు.  (ఇది చదవండి: Kutty Padmini: కమల్‌, వాణి గురించి చెప్పినా శ్రీవిద్య నమ్మలేదు.. పాపం!) పాతికేళ్ల క్రితం మా కామెడీ కుటుంబం! 🥰 https://t.co/WW2dmgePOl — Tanikella Bharani (@TanikellaBharni) August 7, 2023

సాక్షి, విశాఖపట్నం: బీజేపీ సీనియర్‌ నేత, ఉమ్మడి ఆంధ్రప్రదేశ్‌ మాజీ అధ్యక్షుడు, మాజీ ఎమ్మెల్సీ పీవీ చలపతిరావు (87) కన్నుమూశారు.  విశాఖ నగరంలోని పిఠాపురం కాలనీ లో ఉంటున్న ఆయన కొంతకాలంగా వృద్ధాప్య, అనారోగ్య సమస్యలతో బాధపడుతున్నారు. ఆదివారం మధ్యాహ్నం తీవ్ర అస్వస్థతకు గురవడంతో నగరంలోని ఓ ప్రైవేటు ఆస్పత్రికి తరలించారు. అక్కడ చికిత్స పొందుతూ తుదిశ్వాస విడిచారు. ఆయనకు భార్య రాధమ్మ, ఇద్దరు కుమార్తెలు, ఒక కుమారుడు ఉన్నారు. కుమారుడు పి.వి.ఎన్‌.మాధవ్‌ ఉత్త రాంధ్ర పట్టభద్రుల నియోజకవర్గ ఎమ్మెల్సీగా కొసాగుతున్నారు. 1935 జూన్‌ 26న జన్మించిన చలపతిరావు పదేళ్ల వయసులోనే ఆర్‌ఎస్‌ఎస్‌లో చేరి చురుకైన పాత్ర పోషించారు. 1956 నుంచి 1966 వరకు పారిశ్రామిక విస్తరణ అధికారిగా ఉన్న ఆయన ఎన్నికల్లో పోటీచేసేందుకు ఉద్యోగానికి రాజీనామా చేశారు. 1967 నుంచి విశాఖ ఉక్కు ఉద్యమంలో పాల్గొన్నారు. 1973లో ప్రత్యేకాంధ్ర ఉద్యమానికి నాయకత్వం వహించి పలుమార్లు అరెస్టయ్యారు. ఎమర్జెన్సీ కాలంలో లోక సంఘర్షణ సమితి రాష్ట్ర కార్యదర్శిగా ఉన్న ఆయన 19 నెలలు అజ్ఞాతంలో గడిపారు. ట్రేడ్‌ యూనియన్ల నేతగాను  పనిచేసి కార్మికులు, పారిశ్రామిక సంబంధాలను సమన్వయం చేసినందుకు ప్రభుత్వం నుంచి శ్రమశక్తి అవార్డు పొందారు. 1980 నుంచి 1986 వరకు బీజేపీ రాష్ట్ర అధ్యక్షుడిగా వ్యవహరించిన ఆయన ఉత్తర సర్కారు జిల్లాల గ్రా డ్యుయేట్‌ నియోజకవర్గం నుంచి 1974లోను, 1980లోను శాసనమండలికి ఎన్నికయ్యారు. చలపతిరావు పార్ధివదేహాన్ని ఆయన స్వగృహంలో ఉంచారు. సోమవారం అంత్యక్రియలు నిర్వహించనున్నారు. చలపతిరావు మృతికి హరియాణ గవర్నర్‌ బి.దత్తాత్రేయ, బీజేపీ రాష్ట్ర అధ్యక్షుడు సోము వీర్రాజు, ఎంపీ జి.వి.ఎల్‌.నరసింహారావు సంతాపం ప్రకటించారు.

నటుడు చలపతిరావు అంత్యక్రియలు మహా ప్రస్థానంలో పూర్తయ్యాయి. కుమారుడు రవిబాబు చలపతిరావు కు అంతిమ సంస్కారాలు నిర్వహించారు.కుటుంబ సభ్యులతో పాటు హీరో మంచు మనోజ్, నిర్మాత సురేష్ బాబు, నిర్మాత దామోదర ప్రసాద్, రచయిత పరుచూరి గోపాల కృష్ణ, దర్శకుడు బోయపాటి శ్రీను, దర్శకుడు శ్రీవాస్, నటుడు గౌతమ్ రాజు మరియు పలువురు సినీ ప్రముఖులు పాల్గొన్నారు. ఈనెల 24 గుండెపోటుతో చలపతి రావు మృతి చెందిన సంగతి తెలిసిందే. విదేశాల్లో ఉన్న కుమార్తెలు రాక ఆలస్యం కావడంతో చలపతిరావు భౌతికకాయాన్ని మహాప్రస్థానంలోని ఫ్రిజర్ బాక్స్ ఉంచారు. బుధవారం ఉదయం 9 గంటల ప్రాంతంలో కుటుంబసభ్యులు అంత్యక్రియలు నిర్వహించారు. కుమారుడు రవిబాబు చలపతిరావు అంతిమ సంస్కారాలు నిర్వహించారు. దాదాపు 1200 పైగా చిత్రాల్లో పలు రకాల పాత్రల్లో నటించి విలక్షణ నటుడిగా పేరు తెచ్చుకున్నారు చలపతిరావు.

బల్లిపర్రు (పామర్రు) : ప్రముఖ సినీనటుడు తమ్మారెడ్డి చలపతిరావు (78) మృతి ఆయన స్వగ్రామం కృష్ణాజిల్లా పామర్రు మండలం బల్లిపర్రులో తీవ్ర విషాదం నింపింది. ఆయన మృతిపట్ల గ్రామస్తులు దిగ్భ్రాంతికి గురయ్యారు. ఆయన మృతి చిత్ర పరిశ్రమకు తీరని లోటని, మంచి మిత్రుణ్ణి కోల్పోయామని గ్రామస్తులు చెప్పారు. గ్రామంలో తనకున్న స్థలంలో ఒక చిన్న ఇల్లుని నిర్మించారని దానిని తన సోదరి అయిన భ్రమరాంబకు ఇచ్చారన్నారు. ఏటా గ్రామానికి వచ్చి స్థానికులు, బంధువులతో ఆయన ముచ్చటించే వారని, గ్రామంలో ఉన్న 1.40 ఎకరాల పొలాన్ని చలపతిరావే సాగు చేస్తుండేవారని వారు తెలిపారు. స్థానిక గంగానమ్మ ఆలయ అభివృద్ధికి రూ.లక్ష విరాళం అందజేశారని వారు గుర్తుచేశారు. అత్తవారి ఇల్లు కూడా పామర్రు మండల పరిధిలోని జమీగొల్వేపల్లి గ్రామం కావడంతో అక్కడి వారితో కూడా సత్సంబంధాలున్నాయని తెలిపారు.   

పన్నెండు వందలకు పైగా చిత్రాల్లో నటించి హీరోలకు సమానమైన గుర్తింపు తెచ్చుకున్నారు సీనియర్‌ నటుడు చలపతిరావు. ఆయన మొదటగా సీనియర్‌ ఎన్టీఆర్‌ 'కథానాయకుడు' సినిమాలో నటించారు. కానీ ఆ సినిమా అనివార్య కారణాల వల్ల ఆగిపోయింది. తర్వాత ఆయన 'గూఢచారి 116' సినిమా చేశారు, తర్వాత 'సాక్షి' సినిమాలోనూ కనిపించారు. ఇక ఆగిపోయిన 'కథానాయకుడు' సినిమాను తిరిగి తెరకెక్కించడంతో అందులోనూ భాగమయ్యారు చలపతిరావు. తర్వాత వరుస సినిమాలు చేస్తూ తనకంటూ ప్రత్యేక గుర్తింపు సంపాదించుకున్నారు. ఇకపోతే చలపతిరావుది ప్రేమ వివాహం. ఆయన సతీమణి పేరు ఇందుమతి. వీరికి ముగ్గురు పిల్లలు సంతానం. వీళ్లు చెన్నైలో ఉంటున్నప్పుడు వేకువజామున మంచినీళ్లు పట్టేందుకు వెళ్లిన ఇందుమతి చీరకు నిప్పంటుకుంది. ఆమె కేకలు విన్న చలపతి రావు వెళ్లి మంటలార్పారు. తీవ్రగాయాలతో ఆస్పత్రిలో మూడురోజులపాటు మృత్యువుతో పోరాడి చివరకు ప్రాణాలు విడిచిందావిడ. ఆమె మరణంతో కుంగిపోయిన చలపతిరావు ఆత్మహత్య చేసుకుందామనుకున్నారట. ఈ విషయాన్ని ఆయనే స్వయంగా గతంలో ఓ ఇంటర్వ్యూలో వెల్లడించారు. 'మాది లవ్‌ మ్యారేజ్‌. పెళ్లయ్యాక మద్రాసు వెళ్లిపోయాం. మాకు ముగ్గురు పిల్లలు పుట్టారు. రవి బాబుకు ఆరేళ్లు, రెండో అమ్మాయికి నాలుగేళ్లు, మూడో అమ్మాయికి రెండేళ్లు వయసున్నప్పుడు నా భార్య చనిపోయింది. ఎంతో బాధపడ్డాను. పిల్లలు చాలా చిన్నవాళ్లు.. ఓ చిన్న ఇంట్లో ఉండేవాడిని. నేను తెచ్చుకున్న డబ్బులు అయిపోయాయి. అప్పుడు ఛాన్సులు కూడా లేవు. చాలామంది పెళ్లి చేసుకోమని, పిల్లల్ని మేము చూసుకుంటామని ముందుకు వచ్చారు. ఎన్టీఆర్‌ సతీమణి తారకమ్మ కూడా పెళ్లి చేసుకోమంది. లేటు వయసులో నీతో మాట్లాడటానికి కూడా ఎవరూ ఉండరు. పిల్లలు పెళ్లి చేసుకుని వెళ్లిపోతారు. నీకంటూ ఓ తోడు ఉండాలి కదా అని నచ్చజెప్పారిద్దరూ. కానీ పెళ్లి చేసుకుంటే వచ్చే వ్యక్తి నా పిల్లల్ని బాగా చూసుకుంటుందో లేదో! అందుకని నేను మెంటల్‌గా ఒకటే డిసైడయ్యా.. నా పిల్లల్ని బాగా చదివించాలనుకున్నాను. నా పిల్లల్ని చూడటానికి మా అమ్మను రమ్మన్నాను. ఆమె కూడా పెళ్లి చేసుకోమని పోరు పెడితే సరేలే అని అప్పటికి సర్ది చెప్పాను. కానీ ఓ రోజు ఒక వ్యక్తి మా ఇంటికొచ్చి తన కూతుర్ని నా దగ్గర వదిలేసి వెళ్లిపోతానన్నాడు. వద్దుబాబూ అని దండం పెట్టి వేడుకున్నాను. కొందరు ఆర్టిస్టులు కూడా పెళ్లి చేసుకోమని గొడవపెట్టారు. నేను మాత్రం పిల్లల్ని పెంచి పెద్ద చేయాలని మెంటల్‌గా ఫిక్సయ్యాను. కానీ నా దగ్గర చిల్లి గవ్వ లేకపోవడంతో డిప్రెషన్‌లో ఉండిపోయాను. అప్పుడు ఆత్మహత్య చేసుకుందామనుకున్నా. అయితే రేపు పొద్దున నేను చనిపోతే నా పిల్లలు అడుక్కుతింటారని ఆలోచించి ఆ ఆలోచన విరమించుకున్నా. నిజానికి మద్రాసు వెళ్లేటప్పుడు లక్ష రూపాయలు పట్టుకొచ్చాను. చివరికి బస్సెక్కడానికి పది పైసలు లేని హీనస్థితికి వచ్చాను. అలాంటి స్థితిలో పిల్లల్ని ఎలా చదివిస్తానో అనుకున్నా.. మళ్లీ వేషాల కోసం తిరిగి ఛాన్సులు సంపాదించాను. అనుకున్నట్లుగానే పిల్లల్ని బాగా చదివించాను' అని గతంలో ఓ ఇంటర్వ్యూలో పేర్కొన్నారు చలపతిరావు. చదవండి: చలపతిరావు లవ్‌ మ్యారేజ్‌.. ఇంట్లో చెప్పకుండా పెళ్లి చికెన్‌ బిర్యానీ తిని అలా వెనక్కు వాలిపోయారు: రవిబాబు

టాలీవుడ్‌కు ఈ ఏడాది అస్సలు కలిసిరాలేదు. ఎందరో దిగ్గజ నటులు శాశ్వత వీడ్కోలు తీసుకున్నారు. రెబల్‌ స్టార్‌ కృష్ణం రాజు, సూపర్‌ స్టార్‌ కృష్ణ, విలక్షణ నటుడు కైకాల సత్యనారాయణ ఇక సెలవంటూ తిరిగి రాని లోకాలకు వెళ్లిపోయారు.. ఈ విషాదాల నుంచి కోలుకోకముందే తాజాగా చలపతిరావు మృతి చెందడంతో టాలీవుడ్‌ శోకసంద్రంలో ముగినిపోయింది. మధ్య తరగతి కుటుంబంలో పుట్టిన ఆయన మొదట నాటకాలు వేసేవారు. ఎన్టీ రామారావు చొరవతో వెండితెరపై అడుగుపెట్టారు. నటనలో విజృంభించి తనకంటూ ప్రత్యేక గుర్తింపు తెచ్చుకున్నారు. అయితే సినిమాల్లోకి రావడానికంటే ముందు ఒక అమ్మాయి తన దగ్గరకు వచ్చి ప్రపోజ్‌ చేయగా ఆమెనే పెళ్లి చేసుకున్నానని గతంలో ఓ ఇంటర్వ్యూలో చెప్పుకొచ్చారు చలపతి. 'నేను బందరులో ఇంటర్మీడియట్‌ చదువుతున్న రోజులవి. అక్కడే నా ప్రేమకథ మొదలైంది. ఇందుమతి నా క్లాస్‌మేట్‌, చాలా మంచిది. నాలో ఏం చూసిందో, నేనెందుకు నచ్చానో తెలియదు కానీ ఒకరోజు సరాసరిగా నా దగ్గరకు వచ్చి పెళ్లి చేసుకుంటావా? అని అడిగింది. నేను ఆశ్చర్యంతో.. నీకు నేనంటే ఇష్టమా? అని అడిగాను, అవునని తలూపింది. అప్పుడు నాకు 19 ఏళ్లు. మా మధ్య ప్రేమలేఖలు లాంటివి ఏమీ లేవు. ఇంట్లో చెప్తే ఒప్పుకోలేదు. నీకంటే పెద్దవాడు ఇంట్లో ఉండగా అప్పుడే నీకెలా పెళ్లి చేస్తామన్నారు. కానీ వారం రోజుల్లో ఫ్రెండ్స్‌ అంతా కలిసి బెజవాడలో మా పెళ్లి జరిపించారు. ఈ విషయం తెలిసి మా అన్నయ్య ఒకటే ఏడుపు. ఎందుకంటే పల్లెటూర్లలో పెద్దవాళ్లకు పెళ్లి చేయకుండా చిన్నవాళ్లకు చేయరు. అలాంటిది నాకు పెళ్లైపోందని తెలిస్తే తనకెవరు పిల్లనిస్తారని ఒకటే శోకం పెట్టాడు. తర్వాత నేనే అతడికి మంచి సంబంధం చూసి వివాహం జరిపించా. అనంతరం మేము బెజవాడకు షిఫ్ట్‌ అయ్యాం. అప్పటికి నేను ఓపక్క చదువుతూనే నాటకాలు వేసేవాడిని. ఓసారి తస్మాత్‌ జాగ్రత్త నాటకానికి హీరోయిన్‌ దొరక్కపోతే మా ఆవిడతో చేయించా. ఆమె ఏకంగా ఉత్తమనటి అవార్డు దక్కించుకుంది. తర్వాత మద్రాసు వెళ్లిపోయాం. నా జీవితంలో జరిగిన సంఘటనల స్ఫూర్తితో ఈవీవీ సత్యనారాయణ 'మా నాన్నకు పెళ్లి' సినిమా తీశారు. అది నా కథే' అని గతంలో చలపతిరావు ఓ ఇంటర్వ్యూలో పేర్కొన్నారు. చదవండి: చలపతిరావు రెండో పెళ్లికి రవిబాబు ప్రయత్నాలు.. కానీ! సీనియర్‌ నటుడు చలపతిరావు కన్నుమూత

నటుడు చలపతిరావు మృతి పట్ల మెగాస్టార్‌ చిరంజీవి దిగ్భ్రాంతి వ్యక్తం చేశారు. చలపతిరావు తనకు మంచి మిత్రుడని అన్నారు. చలపతి రావు భౌతిక కాయనికి నివాళులు అర్పించిన అనంతరం చిరంజీవి మీడియాతో మాట్లాడుతూ.. ‘చలపతిరావుని కోల్పోవడం చాలా బాధాకరం. మద్రాస్‌లోమద్రాసులో ఉన్నప్పటి నుంచి మాకు అనుబంధం ఉంది. ఎప్పుడూ అందరూ నవ్వుతూ ఉండాలని కోరుకునే వ్యక్తి చలపతి రావు. అన్ని రకాల పాత్రలు పోషించిన గొప్ప నటుడు’అని కొనియాడాడు. అతను వేసిన వేషాలు,జోకులు..వ్యక్తిగతంగా ఉండే అలవాట్లకు ఏమాత్రం సంబంధం లేదు. చాలా ఆరోగ్యకరమైన అలవాట్లు ఉన్న మనిషి అతను. కాఫీ, టీలు కూడా తాగేవారు కాదు. ఎప్పటికప్పుడు ఆరోగ్య పరీక్షలు చేయించుకొనే ఆయన..ఇలా గుండెపోటుతో మరణించడం బాధాకరం. చలపతిరావు కుటుంబ సభ్యులకు ఆత్మ స్థైర్యం ఇవ్వాలని ఆ భగవంతున్ని కోరుకుంటున్నాను’అని చిరంజీవి అన్నారు. 

ఇండస్ట్రీలో ప్రతి ఒక్కరూ నాన్న(చలపతిరావు)ను ‘బాబాయ్’ అని ముద్దుగా పిలుచుకుంటారు. అందరితో సరదాగా  ఉంటూ.. జోక్స్‌ వేస్తూ మాట్లాడేవాడు. అందుకేనేమో సరదాగా ఎలాంటి నొప్పిలేకుండా ప్రశాంతంగా వెళ్లిపోయారు’ అని చలపతిరావు కుమారుడు రవిబాబు అన్నారు. అనారోగ్యంతో కొంతకాలంగా నటనకు దూరంగా ఉంటున్న సీనియర్‌ నటుడు చలపతిరావు.. ఆదివారం తెల్లవారుజామున గుండెపోటుతో మరణించిన సంగతి తెలిసిందే. బుధవారం ఆయన అంత్యక్రియలు జరగనున్నాయి. ఈ విషయాన్ని ఆయన కుమారుడు రవిబాబు మీడియాకు తెలియజేశారు. ‘నాన్న నిన్న రాత్రి భోజనం చేసేవరకు బాగానే ఉన్నారు. చికెన్‌ బిర్యానీ, చికెన్‌ కూర తిని..ఆ ప్లేట్‌ అలా ఇచ్చి..వెనక్కి వాలిపోయారు. ఇంత సింపుల్‌గా వెళ్లిపోయారాయన.  ఈ  రోజు అంత్యక్రియలు చేద్దామనుకున్నాం. కానీ మా అక్కలు ఇద్దరూ అమెరికా లో ఉన్నారు. వాళ్ళు మంగళవారం రాత్రి కి వస్తారు. మంగళవారం వరకు మహా ప్రస్థానం లో ఫ్రీజర్ లో ఉంచుతాం. బుధవారం అంత్యక్రియలు నిర్వహిస్తాం’ అని రవిబాబు అన్నారు. తన తండ్రికి ఎన్టీఆర్‌, మంచి భోజనం, జోక్స్‌ అంటే చాలా ఇష్టమని, ఎంతో అభిమానించే ఎన్టీఆర్‌తో కలిసి నటించే అవకాశం తన తండ్రికి దక్కిందని రవిబాబు అన్నారు. 

ప్రముఖ నటుడు చలపతిరావు హఠాన్మరణం పట్ల హీరో జూ.ఎన్టీఆర్‌ దిగ్భ్రాంతి వ్యక్తం చేశాడు. ప్రస్తుతం ఆయన అమెరికాలో ఉన్నాడు. అక్కడి నుంచి వీడియో కాల్‌లో మాట్లాడుతూ..చలపతి రావు గారి అకాల మరణం నన్ను ఎంతగానో కలచివేసిందన్నారు. ‘మీరు మరణించారనే వార్త జీర్ణించుకోలేకపోతున్నాం.. ‘లే బాబాయ్‌..లే’ అంటూ భావోద్వేగానికి గురయ్యారు. ట్విటర్‌ వేదికగా ఆయన కుటుంబ సభ్యులకు సానుభూతి తెలియచేశారు. ‘చలపతి రావు గారి అకాల మరణం నన్ను ఎంతగానో కలచివేసింది. నందమూరి కుటుంబం ఇవాళ ఒక కుటుంబ సభ్యుడిని కోల్పోయింది. తాత గారి రోజుల నుంచి మా కుటుంబానికి అత్యంత ఆప్తుడైన చలపతి రావు గారి మృతి మా అందరికీ తీరని లోటు. ఆయన ఆత్మకు శాంతి చేకూరాలని నా ప్రార్ధన’ అని ఎన్టీఆర్‌ ట్వీట్‌ చేశాడు. కాగా, ఆది సినిమాలో ఎన్టీఆర్‌, చలపతిరావు కలిసి నటించిన సంగతి తెలిసిందే.  .@tarak9999 Video Call to Ravi Babu due to Sudden demise of #ChalapathiRao garu :) May his soul Rest In Peace 🙏 pic.twitter.com/PuOmNfWOFi — Dhanush 🧛 (@Always_kaNTRi) December 25, 2022 చలపతి రావు గారి అకాల మరణం నన్ను ఎంతగానో కలచివేసింది. నందమూరి కుటుంబం ఇవాళ ఒక కుటుంబ సభ్యుడిని కోల్పోయింది. తాత గారి రోజుల నుండి మా కుటుంబానికి అత్యంత ఆప్తుడైన చలపతి రావు గారి మృతి మా అందరికీ తీరని లోటు. ఆయన ఆత్మకు శాంతి చేకూరాలని నా ప్రార్ధన. — Jr NTR (@tarak9999) December 25, 2022

టాలీవుడ్‌ సీనియర్‌ నటుడు చలపతి రావు మృతిపట్ల హీరో నందమూరి బాలకృష్ణ దిగ్భ్రాంతి వ్యక్తం చేశారు. తెలుగు చిత్ర పరిశ్రమ ఓ మంచి నటుడిని కోల్పోయిందని ఆవేదన వ్యక్తం చేశారు. ‘చలపతిరావు గారి హఠాన్మరణం తీవ్రంగా కలిచివేసింది. తన విలక్షణమైన నటనతో తెలుగు ప్రేక్షకులని అలరించారు. నిర్మాతగా కూడా మంచి చిత్రాలని నిర్మించారు. మా కుటుంబంతో చలపతిరావు గారికి అవినాభావ సంబంధం ఉంది. నాన్నగారితో కలసి అనేక చిత్రాల్లో నటించారు. నా చిత్రాల్లో కూడా మంచి పాత్రలు పోషించారు. చలపతిరావు గారి ఆత్మకు శాంతి కలగాలని భగవంతుణ్ణి కోరుకుంటూ.. ఆయన కుటుంబ సభ్యులకు నా ప్రగాఢ సానుభూతి తెలియజేస్తున్నాను’అని బాలకృష్ణ అన్నారు.  విలక్షణమైన నటుడు,తనదైన శైలి తో తెలుగు ప్రేక్షకుల అభిమానాన్ని చూరగొన్న శ్రీ చలపతి రావు గారి అకాల మరణ వార్త నన్ను కలచివేసింది.ఎన్నో చిత్రాల్లో ఆయన తో నేను కలిసి నటించడం జరిగింది. ఆయన ఆత్మకు శాంతి చేకూరాలని కోరుకుంటూ, రవి బాబు కి, ఆయన కుటుంబ సభ్యులందరికీ నా ప్రగాఢ సానుభూతి.- మెగాస్టార్‌ చిరంజీవి ‘అందరి ఆప్తుడు.. చలపతిరావు బాబాయ్ మరణం చిత్ర పరిశ్రమకు తీరని లోటు.. ఆయన ఆత్మకు శాంతి చేకూరాలని.. నా మిత్రుడు రవిబాబుకి ఆ భగవంతుడు ధైర్యం ప్రసాదించాలని కోరుకుంటూ.. ‘తెలుగు దర్శకుల సంఘం’ తరపున.. ప్రగాఢ సానుభూతి తెలియజేస్తున్నాను - వై. కాశీ విశ్వనాధ్, టీఎఫ్‌డీఏ ప్రెసిడెంట్‌

చలపతిరావు జీవితంలో విషాదాలు : సీనియర్‌ నటుడు చలపతి రావు మృతితో టాలీవుడ్‌లో తీవ్ర విషాదం నెలకొంది. అనారోగ్యంతో గతకొంతకాలంగా నటనకు దూరమైన ఆయన ఇవాళ తెల్లవారుజామును కన్నూమూశారు. కుమారుడు రవిబాబు ఇంట్లో గుండెపోటుతో తుదిశ్వాస విడిచారు. విభిన్న పాత్రలతో తనదైన ముద్ర వేసిన చలపతిరావుకు ఇండస్ట్రీలో బాబాయ్‌గా పేరుంది. ఎప్పుడూ చిరునవ్వుతో కనిపించే చలపతిరావు జీవితంలో ఎన్నో విషాదాలున్నాయి. ఈయన సతీమణి పేరు ఇందుమతి. ప్రేమించి పెళ్లి చేసుకున్నారు. ఆ తర్వాత కుటుంబాన్ని ఒప్పించారు. వీరికి ఇద్దరు కుమార్తెలు, ఒక కొడుకు. చెన్నైలో నివాసం ఉన్న సమయంలో ఇందుమతి చీరకు అనుకోకుండా నిప్పు అంటుకోవడంతో ఆమె తీవ్రంగా గాయపడ్డారు. మూడు రోజుల చికిత్స అనంతరం ఆమె కన్నుమూశారు. అప్పటికే కొడుకు రవిబాబు వయస్సు ఏడేళ్లు మాత్రమేనట. ఆ తర్వాత చలపతిరావును మళ్లీ పెళ్లిచేసుకోవాలని కుటుంబసభ్యులు ఎంతగానో ఒత్తిడి చేసినప్పటికీ ఆయన మాత్రం మరో పెళ్లి చేసుకోలేదు. రవిబాబు కూడా తండ్రికి మళ్లీ పెళ్లి చేయాలని చాలా ప్రయత్నాలు చేశారు కానీ చలపతిరావు మాత్రం ససేమిరా ఒప్పుకోలేదట. ఇదిలా ఉంటే సిల్లీ ఫెలోస్‌ అనే సినిమా షూటింగ్‌ సమయంలో ఆయనకు ఒక ఒక మేజర్ ఆక్సిడెంట్ కి గురయ్యారు. దాదాపు 8నెలలపాటు చక్రాల కుర్చీకే పరిమితం అయ్యారు. ఆ సమయంలో కంటిచూపు కూడా కోల్పోయే పరిస్థితి ఏర్పడిందట. ఇలా జీవితంలో ఎన్ని విషాదాలు ఎదురైనా పైకి మాత్రం ఎప్పుడూ నవ్వుతూ అందరిని పలకరిస్తారని ఆయన సన్నిహితులు గుర్తు చేసుకుంటున్నారు.

రెండురోజుల వ్యవధిలోనే టాలీవుడ్‌లో మరో విషాదం నెలకొంది. కైకాల సత్యనారాయణ అంత్యక్రియలు ముగిసి 24 గంటలు కూడా గడవక ముందే మరో సీనియర్ నటుడు మృతి చెందడంతో తెలుగు సినీ పరిశ్రమ విషాదంలో మునిగిపోయింది. సీనియర్‌ నటుడు చలపతి రావు కన్నుమూశారు. హైదరాబాద్‌లోని కొడుకు రవిబాబు నివాసంలో తెల్లవారుజామున గుండెపోటుతో ఆయన హఠాన్మరణం చెందారు. గత కొంతకాలంగా అనారోగ్యంతో భాదపడుతున్న ఆయన నటనకు కూడా దూరంగానే ఉంటున్నారు. 1200కు పైగా సినిమాల్లో నటుడిగా, విలన్‌గా, క్యారెక్టర్‌ ఆర్టిస్టుగా రాణించారు. చలపతి రావు వయస్సు 78 ఏళ్లు. ఆయనకు ఒక కుమారుడు రవిబాబు (నటుడు దర్శకుడు) ఇద్దరు కుమార్తెలు ఉన్నారు. అమెరికాలో ఉంటున్న కూమార్తెలు రాగానే బుధవారం మహాప్రస్థానంలో చలపతిరావు అంత్యక్రియలు నిర్వహించనున్నట్లు ఆయన కుటుంబసభ్యులు తెలిపారు. అభిమానుల సందర్శనార్థం ఆయన భౌతికకాయాన్ని రవిబాబు ఇంట్లోనే ఉంచనున్నారు. మధ్యాహ్నం 3 గంటల తర్వాత మహాప్రస్థానం ఫ్రీజర్‌లో ఉంచి బుధవారం అంత్యక్రియలు నిర్వహించనున్నారు.

సాక్షి,హైదరాబాద్‌: టాలీవుడ్ సీనియర్ నటుడు చలపతిరావు(78) గుండెపోటుతో హఠాన్మరణం చెందడం ఇండస్ట్రీలో తీవ్ర విషాదాన్ని నింపింది. ఐదున్నర దశాబ్దాల సీనిప్రస్థానంలో 1200లకు పైగా సినిమాల్లో నటించి టాలీవుడ్‌లో తనకంటూ ప్రత్యేక గుర్తింపు తెచ్చుకున్న ఆయన జీవిత విశేషాలు ఇప్పుడు చూద్దాం. చలపతిరావు పూర్తి పేరు తమ్మారెడ్డి చలపతిరావు. కృష్ణా జిల్లా పామర్రు మండలంలోని బలిపర్రులో 1944 మే 8న జన్మించారు. 22 ఏళ్లకే 1966లో సీనిరంగంలోకి అడుగుపెట్టారు. సూపర్‌స్టార్ కృష్ణ సూపర్‌హిట్ చిత్రం గూఢచారి 116.. చలపతిరావు మొదటి సినిమా. ఆ తర్వాత 1967లో సాక్షి చిత్రంలో ఓ పాత్ర పోషించారు. ఆ తర్వాత రెండేళ్లు అవకాశాలు రాలేదు. మళ్లీ 1969లో బుద్ధిమంతుడులో నటించారు. ఇక అప్పటినుంచి వెనుదిరిగి చూసుకోలేదు. వరుస చిత్రాలు చేస్తూ దూసుకుపోయారు. విలనిజంలో తనదైన శైలితో ప్రత్యేక గుర్తింపు తెచ్చుకున్నారు. ఇలా మొత్తం 1200కు పైగా సినిమాల్లో ఆయన నటించారు. విలన్‌గానే కాకుండా అన్ని రకాల పాత్రల్లో చలపతిరావు ప్రేక్షకులను మెప్పించారు. నిన్నేపెళ్లాడతా చిత్రంలో నాగార్జునకు తండ్రిగా నటించడం ఆయన కెరీర్‌ను మలుపుతిప్పిందని చెబుతారు. చలపతిరావు ఏడు సినిమాలకు నిర్మాతగాను వ్యవహరించారు. కలియుగ కృష్ణుడు, కడపరెడ్డమ్మ, జగన్నాటకం, పెళ్లంటే నూరేళ్ల పంట, ప్రెసిడెంటుగారి అల్లుడు, అర్ధరాత్రి హత్యలు, రక్తం చిందిన రాత్రి చిత్రాలు ఆయన నిర్మించినవే. ఫ్యామిలీ.. చలపతిరావు తండ్రిపేరు మణియ్య. తల్లి పేరు వియ్యమ్మ.  భార్యపేరు ఇందుమతి. వీరికి ముగ్గురు సంతానం. కుమారుడు రవిబాబు టాలీవుడ్‌లో నటుడిగా, దర్శకుడిగా గుర్తింపు తెచ్చుకున్నారు. ఇద్దరు కుమార్తెలు అమెరికాలో స్థిరపడ్డారు. ముగ్గురు పిల్లలు పుట్టిన కొన్నేళ్లకే చలపతిరావు సతీమణి ఇందుమతి అగ్నిప్రమాదంలో చనిపోయారు. వీళ్లు చెన్నైలో ఉన్నప్పుడు ఇంట్లోనే ఈ ఘటన జరిగింది. వేకువజామున మంచినీళ్లు పట్టేందుకు వెళ్లిన ఇందుమతి చీరకు నిప్పంటుకుంది. కేకలు వేయడంతో చలిపతిరావు వెళ్లి మంటలార్పారు. ఆస్పత్రిలో మూడు రోజులు మృత్యువుతో పోరాడి ఆమె మరణించింది. దీంతో కుటుంబం తీవ్ర విషాదంలో మునిగిపోయింది. ఆ తర్వాత చలపతిరావు రెండో పెళ్లి చేసుకోలేదు. చదవండి: టాలీవుడ్‌లో తీవ్ర విషాదం.. నటుడు చలపతిరావు హఠాన్మరణం

ప్రతి నాయకుడిగా, సహాయ నటుడిగా, హాస్య నటుడిగా ప్రేక్షకులను మెప్పించిన సీనియర్‌ నటుడు తమ్మారెడ్డి చలపతిరావు (78) ఇక లేరు. శనివారం రాత్రి హైదరాబాద్‌లోని తన స్వగృహంలో గుండెపోటుతో తుదిశ్వాస విడిచారాయన. 1200 పైగా చిత్రాల్లో నటించిన చలపతిరావు ఇంకా నటుడిగా కొనసాగుతున్నారు. చనిపోయే ఐదు రోజుల ముందు కూడా నటుడిగా మేకప్‌ వేసుకున్నారాయన. కృష్ణా జిల్లా పామర్రు మండలంలోని బల్లిపర్రులో మణియ్య, వియ్యమ్మ దంపతులకు 1944 మే 8న చలపతిరావు జన్మించారు. నందమూరి తారక రామారావు అంటే ఎంతో ఇష్టం. ఎన్టీఆర్‌ స్ఫూర్తితో తాను కూడా హీరో కావాలని అవకాశాల్ని వెతుక్కుంటూ మద్రాస్‌ (చెన్నై) వెళ్లారు చలపతిరావు. సూపర్‌ స్టార్‌ కృష్ణ నటించిన ‘గూఢచారి 116’ (1966) ద్వారా వెండితెరకు పరిచయం అయ్యారు చలపతిరావు. ఆ తర్వాత ‘సాక్షి, బుద్ధిమంతుడు, టక్కరి దొంగ చక్కని చుక్క’ వంటి చిత్రాల్లో నటించారు. ఎన్టీఆర్‌ ప్రోత్సాహంతో ‘కథానాయకుడు’ (1969) సినిమాలో మున్సిపల్‌ కమిషనర్‌ పాత్ర చేశారు. ఎన్టీఆర్‌తో ఉన్న స్నేహం కారణంగా కెరీర్‌ ఆరంభంలో ఐదారేళ్ల పాటు ఆయన సినిమాల్లోనే నటించారు చలపతిరావు. హీరో కావాలని వెళ్లిన చలపతిరావుకి ఎక్కువగా విలన్‌ పాత్రలే వచ్చేవి. అయితే ‘దాన వీర శూర కర్ణ’ చిత్రం ఆయన కెరీర్‌ను మలుపు తిప్పింది. ఆ సినిమాలో ఐదు పాత్రల్లో నటించారాయన. కెరీర్‌ ఆరంభంలో ఎక్కువగా మానభంగం సన్నివేశాల్లో నటించారు చలపతిరావు. దాదాపు 90కి పైగా రేప్‌ సీన్స్‌లో నటించారాయన. అప్పటివరకు విలన్‌ పాత్రలు చేసిన చలపతిరావుని ‘నిన్నే పెళ్లాడతా’ (1996) సినిమా నటుడిగా ఆయనలోని కొత్త కోణాన్ని ఆవిష్కరించింది. సాఫ్ట్‌ క్యారెక్టర్స్‌కు ఆయన న్యాయం చేయగలరనే నమ్మకం దర్శక–నిర్మాతల్లో కలిగించింది ఆ సినిమా. దీంతో ‘నిన్నే పెళ్లాడతా’ తర్వాత మంచి తండ్రి, బాబాయ్‌ పాత్రలు కూడా ఆయన్ని వరించాయి. ఎన్టీఆర్, ఏఎన్‌ఆర్, కృష్ణంరాజు, కృష్ణ, చిరంజీవి, బాలకృష్ణ, నాగార్జున, వెంకటేశ్‌లతో పాటు నేటి తరం యువ హీరోల సినిమాల్లోనూ ఆయన వివిధ పాత్రల్లో నటించి ప్రేక్షకులను అలరించారు. ఆయన ఈ ఏడాది వెండితెరపై కనిపించిన చిత్రం ‘బంగార్రాజు’ (2022). ఐదు దశాబ్దాల సినీ కెరీర్‌లో దాదాపు 1200లకుపైగా సినిమాల్లో నటించారు చలపతిరావు. తనయుడు రవిబాబు దర్శకత్వం వహిస్తున్న ఓ చిత్రంలో నటిస్తున్నారాయన. అయితే అనుకోని విధంగా హఠాన్మరణం పొందారు. చలపతిరావు భౌతికకాయాన్ని అభిమానుల సందర్శనార్థం ఆదివారం మధ్యాహ్నం 3 గంటల వరకు తనయుడు రవిబాబు ఇంట్లోనే ఉంచారు. ఆ తర్వాత ఫిల్మ్‌నగర్‌లోని మహాప్రస్థానానికి తరలించారు. అమెరికాలో ఉంటున్న చలపతిరావు ఇద్దరు కుమార్తెలు రాగానే బుధవారం అంత్యక్రియలు నిర్వహించనున్నారు. చలపతిరావు మరణవార్త తెలిసిన తర్వాత పలువురు సినీ, రాజకీయ ప్రముఖులు ఆయన స్వగృహానికి చేరుకుని నివాళులు అర్పించారు. చలపతిరావు భౌతిక కాయానికి నివాళులర్పించినవారిలో మంత్రి తలసాని శ్రీనివాస యాదవ్, చిరంజీవి, వెంకటేశ్, గోపీచంద్, సురేష్‌బాబు తమ్మారెడ్డి భరద్వాజ తదితర ప్రముఖులు ఉన్నారు. సినీ పరిశ్రమ ‘బాబాయ్‌’ అంటూ ఆప్యాయంగా పిలుచుకునే చలపతిరావు ఇలా హఠాత్తుగా దూరం కావడం బాధాకరం అని పేర్కొన్నారు. నటుడిగా ప్రత్యేక గుర్తింపు తెచ్చుకున్న చలపతిరావు ఆర్‌సీ క్రియేషన్స్‌ అనే బ్యానర్‌ స్థాపించి నిర్మాతగా మారారు. తొలి చిత్రంగా బాలకృష్ణతో ‘కలియుగ కృష్ణుడు’ నిర్మించారు. ఆ తర్వాత ‘కడప రెడ్డమ్మ, జగన్నాటకం, పెళ్లంటే నూరేళ్ల పంట, ప్రెసిడెంట్‌గారి అల్లుడు, అర్ధరాత్రి హత్యలు, రక్తం చిందిన రాత్రి’ వంటి చిత్రాలు నిర్మించారు.    చలపతిరావుకు 19 ఏళ్లకే ఇందుమతితో పెళ్లయింది. వీరిది ప్రేమ వివాహం. ఈ దంపతులకు ఇద్దరు అమ్మాయిలు, ఒక అబ్బాయి. తన 28వ ఏట జరిగిన ఓ ప్రమాదంలో భార్య ఇందుమతిని కోల్పోయారు చలపతిరావు. ఆ తర్వాత ఆయన మళ్లీ పెళ్లి చేసుకోలేదు. ఇద్దరు కుమార్తెలు అమెరికాలో స్థిరపడగా, కుమారుడు రవిబాబు నటుడిగా, దర్శకుడిగా కొనసాగుతున్నారు.  మా నాన్న సంతోషంగా వెళ్లిపోయారు శనివారం రాత్రి సుమారు 8.30 గంటలకు మా నాన్న కన్నుమూశారు. నిజ జీవితంలో సంతోషంగా ఉంటూ, అందర్నీ ఎలా నవ్వించారో అంతే సంతోషంగా వెళ్లిపోయారు. చికెన్‌ బిర్యాని, చికెన్‌ కూర తిన్నాక  ప్లేట్‌ని అలా చేతికి అందించి వెనక్కి వాలిపోయి సింపుల్‌గా, సంతోషంగా, ఎలాంటి నొప్పి లేకుండా కొన్ని క్షణాల్లో తుదిశ్వాస విడిచారు. నాన్నగారి అంత్యక్రియలు ఆదివారం చేద్దామనుకున్నాం.. కానీ, నా సిస్టర్స్‌ అమెరికాలో ఉన్నారు. వారు మంగళవారానికి హైదరాబాద్‌ చేరుకుంటారు. ఆరోజు అంత్యక్రియలు నిర్వహించకూడదంటున్నారు కాబట్టి బుధవారం నిర్వహిస్తాం. నాన్నగారికి ఇష్టమైనవి మూడు. ఎన్టీఆర్‌గారు, మంచి భోజనం, జోక్స్‌ చెప్పడం అంటే ఇష్టం. నేను తీస్తున్న ఓ సినిమాలో ఆయనకి మంచి పాత్ర రాశాం. ఐదు రోజుల క్రితమే ఆ షూటింగ్‌లో సంతోషంగా నటించారు. అదే ఆయన ఆఖరి సినిమా. – రవిబాబు చలపతిరావు మృతిపట్ల ఎన్టీఆర్‌ తీవ్ర దిగ్భ్రాంతి వ్యక్తం చేశారు. ప్రస్తుతం అమెరికాలో ఉన్న ఆయన రవిబాబుకి వీడియో కాల్‌ చేసి, చలపతిరావు భౌతిక కాయాన్ని చూసి ‘మీరు మరణించారనే వార్తని జీర్ణించుకోలేకపోతున్నాం.. లే బాబాయ్‌.. లే’ అంటూ భావోద్వేగానికి గురయ్యారు. ఆయనవన్నీ మంచి అలవాట్లే ఈ డిసెంబర్‌ ఆవేదనని కలిగించింది. కైకాల గారు దూరం అయ్యారు. వెంటనే చలపతిరావుగారిని కోల్పోవడం చాలా బాధాకరం. మద్రాసు (చెన్నై)లో ఉన్నప్పటి నుంచే ఆయనతో నాకు మంచి అనుబంధం ఉంది. చలపతిరావుగారితో ఎన్నో సినిమాల్లో కలిసి నటించాను. అందరూ సంతోషంగా ఉండాలని కోరుకునే మంచి వ్యక్తి ఆయన. అన్ని రకాల పాత్రలు చేసిన గొప్ప నటుడు. ఆయన వేసిన పాత్రలకు, వ్యక్తిగత అలవాట్లకు అస్సలు సంబంధం ఉండదు. ఆయనకు ఉన్న అలవాట్లన్నీ మంచివే. ఆరోగ్యం పట్ల శ్రద్ధ తీసుకునే ఆయన ఎప్పటికప్పుడు వైద్య పరీక్షలు చేయించుకునేవారు. అలాంటిది అకస్మాత్తుగా ఇలా గుండెపోటుతో మృతిచెందడం బాధాకరం.   – చిరంజీవి ఆయన సెట్లో ఉంటే ఎనర్జీయే నా తొలి సినిమా నుంచి ఎన్నో సినిమాలకు చలపతిరావుగారితో కలిసి పని చేశాను.. మేమొక ఫ్యామిలీలా ఉండేవాళ్లం. ఆయన ఇంత అకస్మాత్తుగా వెళ్లిపోవడం చాలా బాధగా ఉంది. అయితే చాలా ప్రశాంతంగా పోవడం ఆయన అదృష్టం. అద్భుతమైన వ్యక్తిత్వం ఉన్నవారు. ప్రతి ఒక్కరితో చాలా సరదాగా ఉండేవారు. మనం హ్యాపీగా ఉండాలంటే ఆయనతో ఉండాలి.. సెట్‌లో ఆయన ఉంటే ఎంత రిలాక్స్‌గా ఉంటామో మాకందరికీ తెలుసు.. సెట్స్‌లో అందరికీ ఆయన మంచి ఎనర్జీ ఇచ్చేవారు. చిన్నా పెద్దా అని కాకుండా ప్రతి ఒక్కరూ ఆయన కంపెనీని బాగా ఎంజాయ్‌ చేసేవారు. అలాంటి మనిషి సడన్‌గా దూరమవడం చాలా బాధగా ఉంది. – వెంకటేశ్‌ నివాళులర్పిస్తున్న వెంకటేశ్, చిరంజీవితో రవిబాబు చదవండి: (Sneha- Prasanna: వివాహ బంధానికి గుడ్‌ బై!.. వదంతులకు నటి స్నేహ సమాధానం) 

రిజ్వాన్‌ కల్‌షాన్, సుమన్, చలపతిరావు, హరి, తరుణ్‌ కుమార్‌ ప్రధాన పాత్రల్లో తెరకెక్కిన చిత్రం ‘ఓమనిషి నీవెవరు’. కృష్ణమూర్తి రాజ్‌కుమార్‌ నాయుడు దర్శ కత్వం వహించారు. స్వర్ణ కుమారి దొండపాటి నిర్మించిన ఈ సినిమా డిసెంబర్‌లో విడుదల కానుంది. సుమన్‌ మాట్లాడుతూ– ‘‘ఈ సినిమాలో పాత్ర ఉందని స్వర్ణకుమారిగారు చెప్పగానే అదృష్టంగా భావించి చేశాను’’ అన్నారు. ‘‘మా నిర్మాత నమ్మకాన్ని వమ్ము చేయకుండా ఎంతో పరిశోధన చేసి, ఈ సినిమా తీశా’’ అన్నారు కృష్ణమూర్తి రాజ్‌కుమార్‌ నాయుడు.  ఈ చిత్రానికి సంగీతం: ప్రభాకర్, కెమెరా: సూర్య భగవాన్‌ మోటూరి, సహ నిర్మాత: జంపన దుర్గా భవానీ.

రిజ్వాన్‌ కల్‌షాన్, సుమన్, చలపతిరావు, హరి, తరుణ్‌ కుమార్‌ ప్రధానపాత్రల్లో కృష్ణమూర్తి రాజ్‌కుమార్‌ నాయుడు దర్శకత్వంలో తెరకెక్కుతోన్న చిత్రం ‘ఓ మనిషీ నీవెవరు’. గాడ్‌ మినిస్ట్రీస్‌ సమర్పణలో స్వర్ణ క్రియేషన్స్‌ పతాకంపై స్వర్ణకుమారి దొండపాటి నిర్మిస్తున్నారు. ప్రభాకర్‌ సంగీతం అందించిన ఈ చిత్రం పాటలను నటులు కృష్ణ విడుదల చేశారు. అనంతరం మొదటి వీడియో సాంగ్‌ను నటులు తనికెళ్ల భరణి, సంగీత దర్శకుడు అనూప్‌ రూబెన్స్‌ రిలీజ్‌ చేశారు. తనికెళ్ల భరణి మాట్లాడుతూ– ‘‘జీసస్‌ అంటే ప్రేమ, శాంతి. ఇలాంటి సినిమా వేడుకల్లో పాల్గొనడం సంతోషంగా ఉంటుంది’’ అన్నారు. ‘‘ఇలాంటి చిత్రాలు చేయాలంటే చాలా ధైర్యం కావాలి’’ అన్నారు అనూప్‌ రూబెన్స్‌. ‘‘ఈ సినిమాలో పాత్ర గురించి చెప్పగానే ఆలోచించకుండా చేస్తానని చెప్పాను. చాలా వైవిధ్యంగా, కష్టంగా ఉండే పాత్ర కూడా’’ అన్నారు సుమన్‌. ‘‘గోపాలకృష్ణగారికి నేను వేరే కథ చెప్పాను. కానీ ఆయన ఈ కథ చెప్పి సినిమా తీయించారు. శివప్రసాద్‌గారి సహకారం లేకపోతే ఈ సినిమా పూర్తి చేసేవాణ్ణి కాను’’ అని కృష్ణమూర్తి రాజ్‌కుమార్‌ నాయుడు అన్నారు. సీనియర్‌ దర్శకులు సాగర్, నటి కవిత, రిజ్వాన్‌ కులషాన్, స్క్రీన్‌ ప్లే రచయిత గోపాలకృష్ణ దొండపాటి, కెమెరామేన్‌ సూర్యభగవాన్‌ మోటూరి, ఎమ్మెల్సీ రాజేశ్వరరావు తదితరులు పాల్గొన్నారు. ఈ చిత్రానికి కెమెరా: సూర్య భగవాన్‌ మోటూరి, సహ నిర్మాత: జంపన దుర్గా భవాని.

రిజ్వాస్‌ కలసిస్‌ ప్రధాన పాత్రలో కృష్ణమూర్తి రాజ్‌కుమార్‌ దర్శకుడిగా పరిచయం అవుతున్న చిత్రం ‘ఓ మనిషి నీవు ఎవరు..?’. సుమన్, చలపతిరావు, జూనియర్‌ రేలంగి, బి.హెచ్‌.ఇ.ఎల్‌ ప్రసాద్‌ ముఖ్య తారలుగా నటిస్తున్నారు. స్వర్ణ కుమారి దొండపాటి నిర్మిస్తున్నారు. కె. దుర్గా భవాని సహ నిర్మాత. ఈ చిత్రం తొలి షెడ్యూల్‌ హైదరాబాద్‌లో ముగిసింది. ప్రస్తుతం విజయవాడలో చిత్రీకరణ జరుగుతోంది. ‘‘తొలి షెడ్యూల్‌లో కీలక తారాగణంపై ముఖ్య  సన్నివేశాలను చిత్రీకరించాం’’ అన్నారు దర్శకుడు. ‘‘అవుట్‌పుట్‌ బాగా వస్తుంది. సంతోషంగా ఉంది. త్వరలో ఆడియో వేడుకను, గుడ్‌ ఫ్రైడే రోజున సినిమా రిలీజ్‌ను ప్లాన్‌ చేస్తున్నాం’’అన్నారు నిర్మాత.

ఇన్‌స్పెక్టర్‌ విజయ్‌కుమార్‌ సంఘటనా స్థలాన్ని నిశితంగా పరిశీలించాడు. అదొక పడకగది. అందులోని సామాన్లన్నీ పొందికగానే ఉన్నాయి. గది మధ్యలోని మంచంపై ఇంటి యజమాని చలపతిరావు వెల్లకిలా పడుకుని ఉన్నాడు. కాని ఆయన నిద్రపోవడం లేదు. శాశ్వత నిద్రలో ఉన్నాడు. చలపతిరావుకి డెబ్బయ్యేళ్లు ఉంటాయి. నగరంలో ఆయనకు రెండు రెడీమేడ్‌ బట్టల షాపులు ఉన్నాయి. నగర శివార్లలో ఉన్న ఈ ఇల్లు ఆయన స్వార్జితం.చలపతిరావు భార్య రెండేళ్ల కిందటే క్యాన్సర్‌తో చనిపోయింది. భార్య పోయాక ఆయన తన రెండు షాపుల్నీ ఇద్దరు కొడుకులకు అప్పగించి, తాను ఇంటికే పరిమితమయ్యాడు. పెద్దకొడుకు రాజేష్‌కి ఐదేళ్ల కిందట పెళ్లయింది. ఇద్దరు పిల్లలు ఉన్నారు. రాజేష్‌కి తాగుడు అలవాటు ఉంది. ఇదే విషయమై తండ్రీ కొడుకుల మధ్య నెల్లాళ్ల కిందట పెద్ద గొడవే జరిగింది. రాజేష్‌ తండ్రి మీద అలిగి, ఇల్లు వదిలేసి భార్యాపిల్లలతో అద్దె ఇంటికి వెళ్లిపోయాడు. చిన్నకొడుకు రమేష్‌కి ఇంకా పెళ్లి కాలేదు. ప్రస్తుతం తండ్రికి తోడుగా అతనొక్కడే ఉన్నాడు.  ఆ రోజు ఉదయం ఏడుగంటలకు చలపతిరావు ఫ్యామిలీ డాక్టర్‌ ఫోన్‌ చేసి, చలపతిరావు అనుమానాస్పద స్థితిలో మరణించాడని చెప్పడంతో ఇన్స్‌పెక్టర్‌ విజయ్‌ సిబ్బందితో సహా వెంటనే సంఘటనా స్థలానికి చేరుకున్నాడు.మృతదేహాన్ని ఫోరెన్సిక్‌ నిపుణులు పరీక్షిస్తుండగా, ఓ మూల కూర్చుని వెక్కివెక్కి ఏడుస్తున్న రమేష్‌ని ఇన్‌స్పెక్టర్‌ విజయ్‌ పలకరించాడు. ఏం జరిగిందో చెప్పమన్నాడు. ‘‘సార్‌! నిన్న రాత్రి పనిమనిషి వంట చేసి వెళ్లిపోయాక నేను, నాన్నగారు భోజనాలు చేశాం. నాన్నగారు పది గంటలకల్లా తన గదిలోకి వెళ్లి పడుకున్నారు. నేనొక అరగంట టీవీ చూసి నా గదిలోకి వెళ్లి పడుకున్నాను. తెల్లవారాక పనిమనిషి వచ్చి కాలింగ్‌ బెల్‌ కొడితే నేను లేచి వెళ్లి తలుపు తెరిచాను. నిజానికి రోజూ నాన్నగారే తలుపు తెరిచేవారు. ఆయన ఎందుకు లేవలేదో చూడ్డానికి నేను ఆయన గదిలోకి వెళ్లాను. నాన్నగారిని ఎంత లేపినా లేవలేదు. నేను ఆందోళన చెంది మా ఫ్యామిలీ డాక్టర్‌కి ఫోన్‌ చేశాను. ఆయన వచ్చి పరీక్షించి, నాన్నగారు పోయారన్నారు. తర్వాత ఆయనే ఫోన్‌ చేసి మిమ్మల్ని పిలిచారు. ’’ అన్నాడు రమేష్‌.అక్కడే ఉన్న డాక్టర్, పనిమనిషి రమేష్‌ మాటల్ని సమర్థించారు. ‘‘మృతుని శరీరం కొద్దిగా రంగు మారింది. ఆయనపై విషప్రయోగం జరిగి ఉండవచ్చనే అనుమానంతో నేను మీకు ఫోన్‌ చేశాను’’ అన్నాడు డాక్టర్‌. విజయ్‌కి ఒక విషయం అర్థం కాలేదు. ఇంటి ముఖద్వారానికీ, పెరటి వాకిలికీ లోపలి నుంచి గొళ్లెం వేసి ఉంది. అలాంటప్పుడు హంతకుడు ఇంట్లోకి ఎలా ప్రవేశించాడు? హత్య చేసి బయటకు ఎలా వెళ్లాడు? అసలిది హత్య కాదేమో! చలపతిరావు గుండెపోటు వల్ల మరణించి ఉంటాడేమో అనుకున్నాడు. తండ్రి మరణవార్త తెలియగానే చలపతిరావు పెద్దకొడుకు రాజేష్‌ తన భార్యతో కలసి అక్కడకు వచ్చాడు. తండ్రి శవం పక్కన కూర్చుని భోరున ఏడవసాగాడు. తర్వాత తమ్ముడు రమేష్‌ని చూడగానే కోపంగా లేచాడు. ‘‘ఈ దుర్మార్గుడే నా తండ్రిని చంపాడు. వీడు నా సొంత తమ్ముడు కాదు. వీడొక అనాథ. నాన్నగారు జాలిపడి వీణ్ణి దత్తత తీసుకున్నారు. పెంచిన తండ్రినే పొట్టన పెట్టుకున్నాడు. వీణ్ణి ప్రాణాలతో వదలను’’ అంటూ రాజేష్‌ రమేష్‌ని కొట్టబోయాడు. పోలీసులు జోక్యం చేసుకుని రాజేష్‌ని బలవంతంగా బయటకు తీసుకువెళ్లారు.  ఫోరెన్సిక్‌ నిపుణులు శవాన్ని పరీక్షించడం ముగించి, విషప్రయోగం వల్ల చలపతిరావు మరణించాడని ధ్రువీకరించారు. ఇన్‌స్పెక్టర్‌ విజయ్‌ ఇల్లంతా గాలించాడు. స్టోర్‌రూమ్‌లో ఒక క్లోరోఫాం బాటిల్‌తో పాటు దూది, విషం సీసా, వాడిన సిరంజీ దొరికాయి. హత్య ఎలా జరిగిందో విజయ్‌కి బోధపడింది. హంతకుడెవరో అర్థమైంది. వెంటనే రమేష్‌ని అదుపులోకి తీసుకున్నాడు.∙∙ పోస్ట్‌మార్టం రిపోర్టులో హత్య రాత్రి రెండు గంటల ప్రాంతంలో జరిగినట్లు తెలిసింది. ముందుగా క్లోరోఫాంతో స్పృహ తప్పించి, తర్వాత సిరంజ్‌తో విషాన్ని ఇంజెక్ట్‌ చెయ్యడం వల్ల మరణం సంభవించింది. సంఘటనా స్థలంతో పాటు ఇంట్లోని మిగతా చోట్ల చలపతిరావు, రమేష్, పనిమనిషి వేలిముద్రలు తప్ప ఇంకెవరి వేలిముద్రలూ లభించలేదు. మరోపక్క ఇన్‌స్పెక్టర్‌ విజయ్‌ ఇన్వెస్టిగేషన్‌లో రమేష్‌ నిజంగానే చలపతిరావు దత్తపుత్రుడని తెలిసింది. ఒకప్పుడు రమేష్‌ తల్లిదండ్రులు చలపతిరావు ఇంట్లో పనిచేసేవారు. రమేష్‌ చిన్నతనంలో వారిద్దరూ కరెంట్‌ షాక్‌ వల్ల మరణించారు. అనాథగా మిగిలిన రమేష్‌ని చలపతిరావు దత్తత తీసుకున్నాడు. తన సొంత కొడుకు రాజేష్‌తో సమానంగా రమేష్‌ని చదివించాడు. తన భార్య పోయాక తనకు ఉన్న ఆస్తుల్ని ఇద్దరికీ చెరిసగం చెందేట్లు వీలునామా రాశాడు. ఇన్‌స్పెక్టర్‌ విజయ్‌ రమేష్‌పై ఎంత బలప్రయోగం చేసినా అతడు నేరాన్ని అంగీకరించలేదు. ‘‘నాలాంటి అనాథకి జీవితాన్ని ప్రసాదించిన దేవుడులాంటి మనిషిని నేనెందుకు చంపుతాను సార్‌! పైగా హత్య చేశాక అంత నిర్లక్ష్యంగా ఆధారాలు వదులుతానా?’’ అని వాదించాడు. విజయ్‌కి రమేష్‌ మాటల్లో నిజాయతీ కనిపించింది. ఎక్కడో పొరపాటు జరిగింది. మరోసారి సంఘటనా స్థలాన్ని పరిశీలిస్తే ఏదైనా క్లూ దొరకొచ్చు అనుకుని మళ్లీ చలపతిరావు ఇంటికి వెళ్లాడు. ఇల్లంతా పరిశీలించాక పెరటి వాకిలి దగ్గరకొచ్చాడు. ఆ వాకిలి పక్కన ఒక పెద్ద కిటికీ ఉంది. పెరట్లోకి వెళ్లి ఆ కిటికీని పరిశీలించాడు. కిటికీకి ఉన్న చెక్కల ఫ్రేమ్‌ మధ్య మెటల్‌ గ్రిల్‌ బిగించి ఉంది. ఆ గ్రిల్‌కి నాలుగు మూలల్లో నాలుగు బోల్టులు ఉన్నాయి. విజయ్‌ కానిస్టేబుల్‌ చేత స్పానర్‌ తెప్పించి ఆ బోల్టుల్ని విప్పించాడు. బోల్టులు విప్పగానే గ్రిల్‌ మొత్తం కిటికీ ఫ్రేమ్‌ నుంచి వేరయిపోయింది. ఇప్పుడా ఫ్రేమ్‌ మధ్యలోంచి ఒక మనిషి సునాయాసంగా లోపలికి దూరవచ్చు. హంతకుడు ఇంట్లోకి ఎలా దూరాడో విజయ్‌కి ఇప్పుడు బోధపడింది. హంతకుడు ఎవరో కూడా తెలిసిపోయింది. ఇన్‌స్పెక్టర్‌ విజయ్‌ వెంటనే రాజేష్‌ని అరెస్ట్‌ చేసి థర్డ్‌ డిగ్రీ ప్రయోగించాడు. దెబ్బలకు తాళలేక రాజేష్‌ నిజం కక్కేశాడు. ‘‘నాకు చిన్నప్పటి నుంచి రమేష్‌ అంటే ద్వేషం. వాడు పెంపుడు కొడుకు అయినా నాన్న వాణ్ణి నాతో సమానంగా ప్రేమించేవాడు. చివరికి తన ఆస్తిపాస్తుల్లో సగం వాడికి చెందేలా వీలునామా రాశాడు. దాంతో నాకు రమేష్‌ని చంపాలన్నంత కోపం వచ్చింది. రమేష్‌ని చంపితే ఆస్తి మొత్తం నాకే వచ్చేస్తుంది. కానీ వాణ్ణి చంపితే పోలీసులు ముందు నన్నే అనుమానిస్తారు. అందుకే నాన్నని చంపేసి ఆ నేరం రమేష్‌ మీదపడేలా పథకం పన్నాను. ఒకే దెబ్బకి రెండు పిట్టలన్నట్టు రమేష్‌ హత్యానేరంపై జైలుకెళితే నా పగ చల్లారుతుంది. ఆస్తి మొత్తం నాకే వచ్చేస్తుంది. అందుకే పథకం ప్రకారం విషప్రయోగంతో నాన్నని చంపేశాను. నిజానికి మా ఇంటి వెనుక కిటికీ గ్రిల్‌ని నేను చాలా కాలం కిందటే బోల్టులతో విప్పడానికి అనువుగా మార్పించాను. నేను తాగి ఆలస్యంగా ఇంటికెళ్లినప్పుడు నాన్న నన్ను చెడామడా తిట్టేవాడు. ఆ బాధ పడలేక ఆ కిటికీని అలా మార్పించి, రాత్రిళ్లు రహస్యంగా కిటికీ తెరిచి, ఇంట్లోకి వచ్చేవాణ్ణి. ఈ రహస్యం నా భార్యకు తప్ప ఇంకెవరికీ తెలీదు. ఆ రోజు రాత్రి ఆ కిటికీలోంచే ఇంట్లోకెళ్లి క్లోరోఫాంతో నాన్నకు స్పృహ తప్పించి, ఆయనకు విషాన్ని ఇంజెక్ట్‌ చేశాను. తర్వాత విషం సీసా, సిరంజిని స్టోర్‌రూమ్‌లో ఉంచి, వచ్చిన దారిలోనే వెళ్లిపోయాను. నా చేతులకు గ్లౌజ్‌ ఉండటం వల్ల ఎక్కడా నా వేలిముద్రలు పడలేదు. మూసిన తలుపుల వెనుక జరిగిన ఈ హత్యా రహస్యాన్ని పోలీసులు ఎన్నటికీ ఛేదించలేరనుకున్నాను. కానీ మీరు ఆ రహస్యం తెలుసుకున్నారు’’ నిరాశగా అన్నాడు రాజేష్‌?    

రిజ్వాన్‌ కలసిన్, సుమన్, చలపతిరావు, జూనియర్‌ రేలంగి, బి.హెచ్‌.ఇ.ఎల్‌. ప్రసాద్, జెన్నీ ముఖ్య తారలుగా కృష్ణమూర్తి రాజ్‌ కుమార్‌ దర్శకత్వంలో స్వర్ణకుమారి దొండపాటి నిర్మిస్తోన్న చిత్రం ‘ఓ మనిషి నీవు ఎవరు?’. హైదరాబాద్‌లో ఈ చిత్రం ప్రారంభమైన సందర్భంగా నటులు చలపతిరావు, సుమన్‌ ముఖ్య అతిథులుగా హజరయ్యారు. చలపతిరావు కెమెరా స్విచాన్‌ చేయగా, సుమన్‌ క్లాప్‌ ఇచ్చారు. కృష్ణమూర్తి రాజ్‌కుమార్‌ దర్శకత్వం వహించారు. ‘‘ఇప్పటివరకూ వచ్చిన ఏసుక్రీస్తు సినిమాల్లో ప్రేక్షకులకు తెలియని ఎన్నో విషయాలు ఈ చిత్రంలో ఉంటాయి. ఇందులో నేను చైతన్‌ అనే పాత్ర పోషిస్తున్నాను’’ అన్నారు చలపతిరావు. ‘‘ఇది ఆధ్యాత్మిక చిత్రంలా కనిపించినప్పటికీ కమర్షియల్‌ సినిమాలా కథ, కథనం ఉంటాయి. ఇందులో నేను యోహాన్‌ పాత్ర చేస్తున్నందుకు ఆనందంగా ఉంది’’ అన్నారు సుమన్‌. ‘‘రాజ్‌కుమార్‌గారు చెప్పిన కథ నచ్చి ఈ సినిమాను నిర్మిస్తున్నాను. సంక్రాంతి తర్వాత షూటింగ్‌ ప్రారంభిస్తాం. వచ్చే ఏడాది గుడ్‌ ఫ్రైడే సందర్భంగా విడుదల చేస్తాం’’ అన్నారు నిర్మాత. ‘‘ఈ సినిమాలో నటించే అవకాశం ఇచ్చిన దర్శక–నిర్మాతలకు ధన్యవాదాలు’’ అన్నారు రిజ్వాన్‌ కకలసిన్.  

సాక్షి, హైదరాబాద్‌ : టాలీవుడ్‌ సీనియర్ నటుడు చలపతిరావుకు స్వల్ప గాయాలయ్యాయి. ఫిల్మ్‌సిటీలోని ఓ షూటింగ్‌లో పాల్గొన్న ఆయన బస్సు వెనుక నిచ్చెన ఎక్కుతుండగా ప్రమాదవశాత్తు కిందపడ్డారు. దీంతో ఆయన్ను వెంటనే ఆసుపత్రికి తరలించారు. ప్రస్తుతం చలపతిరావు ఆపోలో ఆసుపత్రిలో చికిత్స పొందుతున్నారు. అల్లరి నరేష్‌ సినిమా షూటింగ్‌ సమయంలో ఈ ప్రమాదం జరిగినట్లు తెలుస్తోంది. చలపతిరావు ఆరోగ్యంపై ఆందోళన చెందవద్దని, చికిత్స అందిస్తున్నామని వైద్యులు తెలిపారు. చలపతిరావు ఆరోగ్య పరిస్థితిని చిత్ర నిర్మాత డాక్టర్లను అడిగి తెలుసుకుంటున్నారు. చలపతిరావు ఆరోగ్యంపై హీరో నరేష్‌ కూడా వాకబు చేశారని సమాచారం. 

అభిమన్యుసింగ్, సుమన్, చలపతిరావు, తనాశ్రీ, ‘తాగుబోతు’ రమేశ్‌ ప్రధాన పాత్రల్లో నటిస్తోన్న చిత్రం ‘శివ ప్రళయం’. ఎం.ఏ. చౌదరి దర్శకత్వంలో శ్రీపాద నిర్మిస్తున్న ఈ సినిమా టైటిల్‌ లోగోని హీరో రాజశేఖర్, దర్శకుడు మారుతి రిలీజ్‌ చేశారు. రాజశేఖర్‌ మాట్లాడుతూ–‘‘శివప్రళయం’ మంచి టైటిల్‌. టైటిల్‌ ఇంత బాగుందంటే సినిమా ఎంత బాగుంటుందో ప్రత్యేకించి చెప్పక్కరలేదు. దర్శక–నిర్మాతలు ఈ సినిమాతో మంచి హిట్‌ అందుకుంటారు’’ అన్నారు. ‘‘ఈ సినిమా రష్‌స్‌ కొంత చూశా. కొత్త తరహా కథలా ఉంది. గ్రాఫిక్స్‌ బాగున్నాయి’’ అన్నారు మారుతి. ‘‘సరికొత్త జానర్‌లో రూపొందిస్తోన్న చిత్రమిది. గంటపాటు సాగే గ్రాఫిక్స్‌ సినిమాకి హైలెట్‌. ఓ ప్రముఖ హీరోయిన్‌పై త్వరలో చివరి షెడ్యూల్‌ షూటింగ్‌ చేయనున్నాం’’ అన్నారు చౌదరి. ఈ చిత్రానికి సంగీతం: వందేమాతరం శ్రీనివాస్, కెమెరా: ఎస్‌. మహి. 


 బంజారాహిల్స్‌: మహిళల మనోభావాలు దెబ్బతీసే విధంగా వ్యాఖ్యలు చేసిన సినీనటుడు చలపతిరావు కేసును చాదర్‌ఘాట్‌ పోలీసులు శనివారం  జూబ్లీహిల్స్‌ పోలీస్‌స్టేషన్‌కు బదిలీ చేశారు. గత మే నెల 18వ తేదీన బంజారాహిల్స్‌ రోడ్‌ నెం2లోని అన్నపూర్ణ స్టూడియోలో ఏర్పాటు చేసిన రారండోయ్‌ వేడుక చూద్దాం ఆడియో వేడుకలో పాల్గొన్న చలపతిరావు ఓ యాంకర్‌ అడిగిన ప్రశ్నకు బదులిచ్చే క్రమంలో మహిళలను కించపరిచేలా మాట్లాడారు.
  
 ఈ సంఘటనపై అదే రోజు చాదర్‌ఘాట్‌ పోలీస్‌స్టేషన్‌లో ఫిర్యాదు అందడంతో పోలీసులు కేసు నమోదు చేశారు. అయితే ఈ ఘటన జూబ్లీహిల్స్‌ పీఎస్‌ పరిధిలో జరిగింది. దీంతో చాదర్‌ఘాట్‌ పోలీసులు కేసును జూబ్లీహిల్స్‌కు బదిలీ చేశారు. జూబ్లీహిల్స్‌పోలీసులు విచారణ ప్రారంభించారు.


 అమెరికా వెళ్లిన ఇండియన్స్‌ గ్రీన్‌కార్డ్‌ కోసం ఎన్ని తిప్పలు పడతారనే కథతో తెరకెక్కిన సినిమా ‘గ్రీన్‌కార్డ్‌’. శతృఘ్న రాయపాటి, స్టెఫానీ, జోసెలిన్, చలపతిరావు ముఖ్య తారలుగా రమ్స్‌ దర్శకత్వంలో శ్రీనివాస్‌ గుప్తా, మోహన్‌. ఆర్, నరసింహ, నాగ శ్రీనివాసరెడ్డి నిర్మించిన ఈ సినిమా ఆగస్టు 4న విడుదల కానుంది. ‘‘ఈ సినిమాను 80 శాతం అమెరికాలోనే చిత్రీకరించారు.
 
 నేను హీరో తండ్రిగా చేశా. అమెరికాలో మనవాళ్లు పడే కష్టాలను వివరిస్తూ, ప్రణయ్‌కుమార్‌ ఈ సినిమాలో మంచి పాట రాశారు’’ అన్నారు సీనియర్‌ నటుడు చలపతిరావు. ‘‘అమెరికాకు వెళ్తే ఎక్కువ డాలర్లు సంపాదించవచ్చని, ఎన్నారైలు సంతోషంగా ఉంటారనని అందరూ అనుకుంటారు. కానీ, వారు కన్నీళ్లతో బతుకుతున్నారు. వారి కష్టాలను ఎవరూ పట్టించుకోవడం లేదు’’ అన్నారు దర్శకుడు రమ్స్‌. ఈ చిత్రానికి  కెమెరా: నవీన్‌–నాగ శ్రీనివాస్‌రెడ్డి, సంగీతం: కు, హెన్నీ ప్రిన్స్, ప్రణయ్‌కుమార్‌. సమర్పణ: దేవాన్ష్‌.


 బంజారాహిల్స్(హైదరాబాద్)‌: మహిళలను కించపరుస్తూ వారి మనోభావాలను దెబ్బతీసేలా వ్యవహరించిన యాంకర్‌ రవిపై జూబ్లీహిల్స్‌ పోలీస్‌ స్టేషన్‌లో క్రిమినల్‌ కేసు నమోదైంది. ఇటీవల అన్నపూర్ణ స్టూడియోలో జరిగిన ఓ సినిమా వేడుకలో నటుడు చలపతిరావు మహిళలను కించపరుస్తూ చేసిన వ్యాఖ్యలను ఆ షోకు యాంకర్‌గా వ్యవహరించిన రవి సూపర్‌ అంటూ సమర్థించాడన్నారు.
 
 చలపతిరావుతో పాటు యాంకర్‌ రవిపై కేసు నమోదు చేయాలని ఈ నెల 23న  మహిళా, ప్రజాసంఘాల ప్రతినిధులు జూబ్లీహిల్స్‌ పోలీసులకు ఫిర్యాదు చేశారు. ఈ మేరకు చలపతిరావుపై అదే రోజు కేసు నమోదు చేయగా, న్యాయ సలహా అనంతరం యాంకర్‌ రవిపై కూడా పోలీసులు కేసు నమోదు చేశారు.
 
 చలపతిరావు, రవిపై ఇప్పటికే సరూర్‌నగర్ పోలీస్‌ స్టేషన్‌లో నమోదైంది. బండ్లగూడకి చెందిన మహిళా సంఘం నేత దెయ్యాల కల్పనా కుమారి ఇచ్చిన ఫిర్యాదు మేరకు ఐపీసీ 354 ఏ (IV), 509 సెక్షన్ల కింద పోలీసులు కేసు నమోదు చేశారు.


 హైదరాబాద్‌: మహిళలపై అనుచిత వ్యాఖ్యలు చేసిన సీనియర్ నటుడు చలపతిరావును క్షమించాలని నటి హేమ కోరారు. చేసిన తప్పుకు పశ్చాత్తాపం వ్యక్తం చేస్తూ క్షమాపణ చెప్పినందున ఆయనపై పెట్టిన కేసులు ఉపసంహరిం​చుకోవాలని విజ్ఞప్తి చేశారు. ఆడియో ఫంక్షన్‌లో మహిళలకు చలపతిరావు మాట్లాడింది తప్పేనని, ఆయనపై పోలీస్‌ స్టేషన్‌లో ఫిర్యాదు చేసి మంచి పనిచేశారని పేర్కొన్నారు. ఇక నుంచి ఎవరైనా మహిళలపై అనుచిత వ్యాఖ్యలు చేయాలంటే ఒకటికి వందసార్లు ఆలోచించుకుంటారన్నారు.
 
 సీనియర్‌ నటుడైన చలపతిరావు సరదాగా మాట్లాడతాడు కానీ, ఎప్పుడూ నోరు జారలేదని తెలిపారు. ఆడవాళ్లపై అనుచిత వ్యాఖ్యలు చేసినందుకు సంస్కారవంతంగా క్షమాపణలు అడిగారని, ఆయనపై పెట్టిన కేసులు వెనక్కు తీసుకోవాలని హేమ కోరారు. సోషల్‌ మీడియాలో రాసేటప్పుడు కూడా అప్రమత్తంగా ఉండాలని, ఆడవాళ్ల గురించి పిచ్చిరాతలు మానుకోవాలని సూచించారు. వెబ్‌ మీడియా తీరు మారాలని ఆమె ఆకాంక్షించారు. మహిళలను కించే పరిచేలా మాట్లాడడం సరికాదని  హేమ అభిప్రాయపడ్డారు.


 ‘రారండోయ్‌ వేడుక చూద్దాం’ ఆడియో ఫంక్షన్‌.
 ఏం జరిగింది: ‘అమ్మాయిలు మనశ్శాంతికి హానికరం’ అని సినిమాలోని డైలాగ్‌పై ‘మీ ఒపీనియన్‌ ఏంటి?’ అంటూ విచ్చేసిన అతిథులను యాంకర్స్‌ అడగడం మొదలు పెట్టారు. అందరూ ఎవరికి తోచినట్లు వాళ్లు కామెడీగా చెబుతున్నారు. నటుడు చలపతిరావు ముందు మైక్‌ పెట్టి, ‘అమ్మాయిలు మనశ్శాంతికి హానికరమా’ అనడిగారు యాంకర్‌.. దానికి సమాధానంగా ‘‘హానికరం కాదు కానీ, పక్కలోకి పనికొస్తారు’’ అని క్యాజువల్‌గా అనేశారు.  అంతే.. దుమారం రేగింది. నలుగురూ నానా రకాలుగా చలపతిరావుని విమర్శించడం మొదలుపెట్టారు. ఆదివారం సాయంత్రం మొదలైన ఈ వివాదం మంగళవారానికి ఊపందుకుంది. చివరికి తాను అలా వ్యాఖ్యలు చేయడం తప్పేనని మంగళవారం చలపతిరావు స్వహస్తాలతో రాసిన లెటర్‌ని మీడియాకు విడుదల చేశారు. ఆ లేఖ సారాంశం ఇది.
 
 73 ఏళ్ళ వయసులో, 50 సంవత్సరాల సినీజీవితంలో అనాలోచితంగా, అన్యోపదేశంగా నేను చేసిన ఒక వ్యాఖ్య దురదృష్టకరం. ఒక మహిళా వ్యాఖ్యాత అడిగిన ప్రశ్న ఇది. ‘‘ఆడవాళ్ళు హానికరమా’’. దానికి జవాబుగా నేను ‘‘ఆడవాళ్ళు హానికరం కాదు’’. ఆ తర్వాత నేను చేసిన ఒక వ్యాఖ్యను టీవీల్లో పదే పదే ప్రచారం చేసి, నన్ను ఒక ‘‘చరిత్రహీనుడిగా’’ మార్చేసిన పరిస్థితి పట్ల నేను బాధపడుతున్నాను. నిజమే... నా వ్యాఖ్యలు నాకే వెగటు పుట్టించాయి. అవి నేను చెయ్యకుండా ఉండాల్సింది.
 ఈ వ్యాఖ్యలు అభ్యంతరమే కాదు, ఆక్షేపణీయం కూడా. అందుకే నేను ఎటువంటి షరతులు లేకుండా క్షమాపణలు చెబుతున్నాను. ఇదే సందర్భంలో నాదో చిన్న మనవి. సినిమాల్లో, టీవీల్లో చివరికి ఇప్పటి సామాజిక మాధ్యమాల్లో మహిళల్ని కించపరిచే మాటలకు, దృశ్యశ్రవంగాలకు మనమందరం బాధ్యులమే! పరోక్షంగా, ప్రత్యక్షంగా కూడా! ఆ విషయం మనందరికీ తెలుసు.నాతోపాటు అందరం దీనికి బాధ్యత వహించాల్సిందే. సినిమాల్లో చూపించే దృశ్యాలు, చెప్పే మాటలకు పరిశ్రమలోని రచయితలు, నిర్మాతలు, దర్శకులు, నటులు అందరం బాధ్యత వహించాలి. ఇకముందు నేనే కాదు, మరెవ్వరూ ఇటువంటి దురదృష్టకరమైన పరిస్థితికి కారణం కాకూడదు.
 నా మాటలకు, వ్యాఖ్యలకు అందరికీ మరోసారి క్షమాపణలు చెబుతున్నాను. మన్నించండి!
 – మీ చలపతిరావు


 ఇండియా నుంచి అమెరికా వెళ్లిన వారు గ్రీన్‌కార్డ్‌ కోసం ఎన్ని తిప్పలు పడతారనే కథతో తెరకెక్కిన చిత్రం ‘గ్రీన్‌కార్డ్‌’. శతృఘ్న రాయపాటి, స్టెఫానీ, జోసెలిన్, చలపతిరావు ముఖ్య తారలు. రమ్స్‌ దర్శకత్వంలో మాస్టర్‌ దేవాన్ సమర్పణలో శ్రీనివాస్‌ గుప్తా, మోహన్‌.ఆర్, నరసింహ, నాగ శ్రీనివాసరెడ్డి నిర్మించారు.
 
 కు, హెన్నీ ప్రిన్స్, ప్రణయ్‌కుమార్‌ స్వరపరచిన ఈ చిత్రం పాటలను హైదరాబాద్‌లో విడుదల చేశారు. ‘‘వీసా తీసుకుని అమెరికా వెళ్లిన ఓ కుర్రాడి కథే గ్రీన్‌కార్డ్‌. పిల్లలను అమెరికా పంపాలనుకునే తల్లిదండ్రులు చూడాల్సిన సినిమా. 90 శాతం అమెరికాలో తీశాం’’ అన్నారు రమ్స్‌.


 ‘వియ్‌ లవ్‌ అమెరికా.. వియ్‌ హేట్‌ గన్స్‌’ అనే కథతో తెరకెక్కిన చిత్రం ‘గ్రీన్‌కార్డ్‌’. శతృఘ్న రాయపాటి, స్టెఫానీ, జోసెలిన్, చలపతిరావు ముఖ్య పాత్రల్లో రమ్స్‌ దర్శకత్వం లో శ్రీనివాస్‌ గుప్తా, మోహన్‌. ఆర్, నరసింహ, నాగ శ్రీనివాసరెడ్డి నిర్మిం చిన ఈ సినిమా టీజర్‌ను విడుదల చేశారు. ‘‘అమెరికాలో ఎవరు ఎవర్ని కాల్చినా అడిగేవాడుండడు.
 
  అమెరికాను ఇష్టపడదాం.. కానీ గన్స్‌ కల్చర్‌కు దూరంగా ఉండాలని చెప్పే చిత్రమిది’’ అన్నారు చలపతి రావు . ‘‘2004లో 10 డాలర్ల బీర్‌ కోసం నా మీద ఓ అమెరికన్‌ గన్‌ గురిపెట్టాడు. నాతో పాటు మరికొందరికి ఎదురైన ఇలాంటి అనుభవాల ఆధారంగా ‘గ్రీన్‌కార్డ్‌’ తెరకెక్కించాం. త్వరలో సినిమా విడుదల చేసేందుకు సన్నాహాలు చేస్తున్నాం’’ అని రమ్స్‌ చెప్పారు.


 ‘జయం’ చిత్రంతో నటుడిగా పరిచయమైన ప్రణీత్ పండగ పలు చిత్రాల్లో నటించారు. తాజాగా ఆయన దర్శకునిగా మారారు. వరం, తన్యారెడ్డి జంటగా ప్రణీత్ దర్శకత్వంలో వైష్ణవి నిరంజన్ నిర్మిస్తున్న చిత్రం హైదరాబాద్‌లో ప్రారంభమైంది. సీనియర్ నటుడు చలపతిరావు, సుమన్‌శెట్టి ప్రధాన పాత్రల్లో నటిస్తున్నారు. హీరో, హీరోయిన్లపై చలపతిరావు క్లాప్ ఇచ్చారు.
 
 అనంతరం ఆయన మాట్లాడుతూ.. ‘‘ప్రణీత్‌లో మంచి ప్రతిభ ఉంది’’ అన్నారు. ‘‘పల్లెటూరి నేపథ్యంలో ఈ చిత్రం ఉంటుంది. హైదరాబాద్, వైజాగ్, చిక్ మంగళూరు ప్రాంతాల్లో షూటింగ్ జరుపుతాం’’ అని దర్శకుడు అన్నారు. ఈ చిత్రానికి సంగీతం: మహేష్ ధీర, కెమేరా: రాహుల్ మాచినేని, సమర్పణ: పరమ గీత.


 కడ్తాల : మహబూబ్‌నగర్ జిల్లా ఆమనగల్లు మండలం కడ్తాల గ్రామంలో తెలుగు సినిమా నటుడు చలపతిరావు సోమవారం సందడి చేశారు. కుటుంబ సమేతంగా శ్రీశైలం వెళ్లి మల్లిఖార్జున స్వామిని దర్శించుకుని తిరుగు ప్రయాణంలో హైదరాబాద్ వెళ్తూ.. కడ్తాల గ్రామ సమీపంలో కాసేపు ఆగారు. అక్కడ తాటి ముంజలు విక్రయిస్తుండటంతో వాటిని తిని, కాసేపు సరదగా గడిపారు. ఈ సందర్భంగా ఆయనను గమనించిన స్థానికులు ఆయనతో పోటోలు దిగడానికి ఉత్సాహం చూపారు. అనంతరం ఆయన హైదరాబాద్ బయలుదేరి వెళ్లారు.


 ఈరోజు మీతో పాటు పుట్టిన రోజు జరుపుకుంటున్న ప్రముఖులు:
 రెమో ఫెర్నాండెజ్ (గాయకుడు), చలపతిరావు (నటుడు)
  
 ఈరోజు పుట్టిన రోజు జరుపుకునేవారి మాట ఈ సంవత్సరమంతా తిరుగులేని రీతిలో చలామణి అవుతుంది. వీరి వ్యక్తిగత సంవత్సర సంఖ్య 3 కావడం వల్ల వీరికి లలితకళలు, సంగీతం, సాహిత్యం వంటివాటిపై అభిరుచి, ఆసక్తి పెరుగుతాయి. ఈ రంగాలలో ఉన్న వారికి మంచి పేరు ప్రఖ్యాతులు వస్తాయి.
 
 ఇది గురు గ్రహానికి సంబంధించిన అంకె కావడం వల్ల సైన్స్, వైద్యరంగాలలో ఉన్న వారికి అభివృద్ధికరంగా ఉంటుంది. అయితే వీరు ఎంత శ్రమ చేస్తే అంత మంచి ఫలితం కనిపిస్తుంది. లక్కీ నంబర్స్: 1,3,5,6,8. లక్కీ కలర్స్: బ్లూ, క్రీమ్, శాండల్, లెమన్ ఎల్లో. అనాథలకు అన్నదానం, దక్షిణామూర్తి ఆరాధన వల్ల మరిన్ని మంచి ఫలితాలు పొందవచ్చు.
  - రహిమాన్ దావూద్, ఆస్ట్రో న్యూమరాలజిస్ట్