అనంతపురం : పుట్టపర్తిలో సత్యసాయి శత వర్ష జయంతి వేడుకలు కనుల పండువగా జరుగుతున్నాయి.
బుధవారం ఉదయం సాయికుల్వంత్ సభా మందిరంలో సత్యసాయి మహాసమాధి చెంత సీతారామ లక్ష్మణ సమేత హనుమంతుడు, వేణుగోపాలస్వామి, సత్యసాయి స్వామివార్ల ఉత్సవ విగ్రహాలు ఉంచి ప్రత్యేక పూజలు నిర్వహించారు.
అనంతరం వేద పండితులు వేద మంత్రోచ్ఛారణల నడుమ సీతారాముల కల్యాణాన్ని జరిపించారు.
పూజా క్రతువులో గణపతి పూజ, కుంకుమ పూజ, దేవీ అషో్టత్తర నామం, కలష పూజ నిర్వహించారు.
అనంతరం వేద పండితులు సత్యసాయి సత్యనారాయణ వ్రతాన్ని భక్తిశ్రద్ధలతో చేయించారు.
దేశ విదేశాల నుంచి తరలివచ్చిన 1100 మంది జంటలు సత్యసాయి సత్యనారాయణ వ్రతాల్లో పాల్గొన్నారు.
పుట్టపర్తి పురవీధులలో రథోత్సవం సాగుతుండగా కళాకారులు తమ కళావైభవంతో భక్తులను అలరించారు.
సత్యసాయి విద్యాసంస్థలకు చెందిన విద్యార్థులు చెక్కభజనలో ముందుకు సాగారు.
వివిధ ప్రాంతాల నుంచి తరలిచ్చిన కళాకారులు గిరగ నృత్యం, డ్రమ్స్ వాయిద్యాలు, గురవయ్యలు, గుర్రపు డెక్కలు, దేవతామూర్తుల రూపాలు, కోలాటం తదితర కళలతో రథోత్సవంలో సందడి చేశారు.
ప్రముఖ సినీ గాయని శ్వేతా మోహన్ బృందం సంగీత కచేరీ భక్తులను మైమరపింపజేసింది.


