యోగాతో మంచి తండ్రి కావచ్చు

వాషింగ్టన్: యోగాతో మంచి శరీర దారుఢ్యంతోపాటు, చక్కటి మానసిక ఆరోగ్యం వస్తుందని మనకు ఇప్పటి వరకు తెలిసిన విషయమే. అయితే, యోగా ద్వారా మంచి సంరక్షక నైపుణ్యాలు పెరుగుతాయని, దానివల్ల మంచి తండ్రిగా భవిష్యత్తులో గుర్తింపు పొందే అవకాశం మెండుగా ఉంటుందని ఓ అధ్యయనంలో వెల్లడైంది.

14 గ్రూపులపై మొత్తం మూడేళ్లపాటు ఈ అధ్యయనం నిర్వహించి ఈ విషయాలను పరిశోధకులు వెల్లడించారు. వారి పరిశోధనకు ఎంచుకున్న చోటు ఓ జైలు. వాషింగ్టన్లోని వానాచ్చిలోగల చిలాన్ రీజినల్ జైలులోని ఖైదీలతో ఈ ప్రయోగం నిర్వహించారు. ఖైదీల్లో తండ్రులుగా ఉన్నవారినే తమ పరిశోధనకు తీసుకుని వారికి రోజూ ఓ గంటపాటు యోగా కార్యక్రమం మూడేళ్లు నిర్వహించి వారి ప్రవర్తన తీరును అంచనా వేశారు. ముందు చిన్నపిల్లల పెంపకానికి సంబంధించిన కార్యక్రమాలను పరిచయం చేసిన తర్వాత యోగా నిర్వహించేవారు.