ఫేస్బుక్ పోస్ట్ మూల్యం.. అరకోటి!!

చేతులు ఖాళీగా ఉన్నాయి కదాని ఏం చేయాలో తోచక ఫేస్బుక్లో నోటికి వచ్చింది పోస్ట్ చేసేస్తే చాలా ఇబ్బందులలో పడతారు జాగ్రత్త. ఎందుకంటే, అమెరికాలో ఓ అమ్మాయి ఇలాగే ఫేస్బుక్లో అభ్యంతరకర వ్యాఖ్యలు చేసినందుకు ఆమె తండ్రి అక్షరాలా అరకోటి జరిమానా చెల్లించుకోవాల్సి వచ్చింది. పాట్రిక్ స్నే (69) అనే పెద్దాయన ఫ్లోరిడాలోని గలివర్ ప్రిపరేటరీ స్కూలుకు గతంలో హెడ్మాస్టరుగా పనిచేశారు. ఆయన కుమార్తె డానా ఈ పాఠశాలను ఉద్దేశించి అభ్యంతరకరమైన వ్యాఖ్యలను తన ఫేస్బుక్ పేజీలో రాసింది.

వేసవిలో తాను వెళ్లబోయే యూరప్ పర్యటనకు గలివర్ స్కూలు డబ్బు చెల్లిస్తుందని అంటూ.. అక్కడే బూతులు కూడా రాసింది. ఇది ఆ స్కూలు ఫేస్బుక్ పేజీకి ఉన్న 1200 మందికి ఆ సందేశం వెళ్లిపోయింది. దాంతో, సదరు పాఠశాల దీనిపై భగ్గుమంది. పాఠశాలకు చెందిన మాజీ ఉద్యోగి, ఆయన కుమార్తె కలిసి నిబంధనలను ఉల్లంఘించారని కేసు వేసింది. కేసు నుంచి బయటపడేందుకు సదరు మాజీ హెడ్మాస్టారు దాదాపు అరకోటి రూపాయలు పరిహారంగా చెల్లించుకోవాల్సి వచ్చింది.