ఆర్బీఐపై నమ్మకాన్ని ఇది దెబ్బకొట్టింది!

 

చలామణిలో ఉన్న 86 శాతం కరెన్సీ నోట్లను రద్దు చేస్తూ ప్రభుత్వం తీసుకున్న నిర్ణయం, దాని అమలులో లోటుపాట్ల వల్ల కేంద్రం తీవ్ర విమర్శలు ఎదుర్కొంటున్న సంగతి తెలిసిందే. ఈ నేపథ్యంలో రిజర్వు బ్యాంకు ఆఫ్‌ ఇండియాపైనా పలు కామెంట్లు వస్తున్నాయి. పాత కరెన్సీ నోట్లను రద్దు చేసినప్పటికీ, కొత్త కరెన్సీ నోట్లు ప్రజలకు సరిపడ రీతిలో అందుబాటులోకి రావడం లేదని ఆందోళనలు వ్యక్తమవుతున్నాయి. నెల రోజులు దాటినా ప్రజలు ఇంకా బ్యాంకులు, ఏటీఎం వద్ద క్యూలైన్లోనే నిల్చువాల్సిన పరిస్థితి ఏర్పడింది. ఈ నగదు కొరతతో ఆర్థికవ్యవస్థలో చాలా రంగాలు దెబ్బతిన్నాయి. అయితే సరిపడ నగదు అందుబాటులో ఉందని, త్వరలోనే ఈ సమస్య పరిష్కారం అవుతుందని ఆర్బీఐ, ప్రభుత్వం ప్రకటనలు గుప్పిస్తోంది. అయితే ఆర్బీఐ ముందస్తు ఎలాంటి ప్రణాళికలు చేసుకోకుండానే ప్రభుత్వం ఈ నిర్ణయం తీసుకుందని, ఈ నేపథ్యంలో ఆర్బీఐ స్వాతంత్య్రం ఎక్కడుందని పలువురు ఆర్థికవేత్తలు ప్రశ్నిస్తున్నారు.