పోలీసుల సేవలు అభినందనీయం

సాక్షి, హైదరాబాద్‌: కరోనా నియంత్రణలో పోలీసుల సేవలు అభినందనీయమని హైదరాబాద్‌ సీపీ అంజనీకుమార్‌ అన్నారు. శుక్రవారం ఆయన లాక్‌డౌన్‌ నేపథ్యంలో విధులు సమర్థవంతంగా నిర్వర్తించిన పోలీసులకు ప్రోత్సాహకాలు, గుర్తింపు ప్రతాలు అందజేశారు. ఈస్ట్‌జోన్‌కు సంబంధించిన పోలీసులను ఆయన సత్కరించారు. ఈ సందర్భంగా సీపీ మాట్లాడుతూ.. కరోనా నుంచి ప్రజలను రక్షించేందుకు పోలీసు శాఖ  నిరంతరం కృషి చేస్తుందన్నారు. పోలీసులను సత్కరించడం ద్వారా వారి కుటుంబ సభ్యులకు కూడా గౌరవం దక్కుతుందన్నారు. అన్ని జోన్లలో పనిచేస్తున్న పోలీసులందరిని సత్కరిస్తామని పేర్కొన్నారు. చెక్‌పోస్ట్‌ విధులు నిర్వహించడం చాలా కష్టతరమని.. ఒక్కో షిఫ్ట్‌లో 4 వేలకు పైగా పోలీసులు విధులు నిర్వహిస్తున్నారని సీపీ అంజనీకుమార్‌ తెలిపారు.