రంజీ ట్రోఫీ క్వార్టర్స్‌లో హైదరాబాద్‌

లక్నో: బ్యాట్స్‌మెన్‌ బద్రీనాథ్‌ (84 బంతుల్లో 14 నాటౌట్‌), కొల్లా సుమంత్‌ (59 బంతుల్లో 10 నాటౌట్‌) సంయమనంతో ఆడటంతో... ఆంధ్రతో జరిగిన రంజీ ట్రోఫీ గ్రూప్‌ ‘సి’ చివరి లీగ్‌ మ్యాచ్‌ను హైదరాబాద్‌ ‘డ్రా’ చేసుకుంది. 219 పరుగుల లక్ష్యంతో బరిలోకి దిగిన హైదరాబాద్‌ రెండో ఇన్నింగ్స్‌లో 47 ఓవర్లలో 5 వికెట్లకు 56 పరుగులు చేసింది. పొగమంచు, వెలుతురులేమి కారణంగా చివరిరోజు లంచ్‌ తర్వాతే ఆట మొదలైంది.

మ్యాచ్‌ ‘డ్రా’గా ముగిసినా... తొలి ఇన్నింగ్స్‌ ఆధిక్యం దక్కినందుకు ఆంధ్రకు 3 పాయింట్లు లభించగా... హైదరాబాద్‌ ఖాతాలో ఒక పాయింట్‌ చేరింది. లీగ్‌ దశ మ్యాచ్‌లు ముగిశాక హైదరాబాద్‌ (నాలుగు విజయాలు) 31 పాయింట్లతో గ్రూప్‌ ‘సి’ టాపర్‌గా నిలిచి క్వార్టర్‌ ఫైనల్‌కు అర్హత పొందింది. హరియాణా కూడా 31 పాయింట్లతో (మూడు విజయాలు) రెండో స్థానంలో నిలిచి ఈ గ్రూప్‌ నుంచి క్వార్టర్‌ ఫైనల్‌కు చేరింది.