కోల్‌కతా తడాఖా

సొంతగడ్డపై కోల్‌కతా ‘ఫైట్‌’ రైడర్స్‌లా మారింది. ఢిల్లీ డేర్‌డెవిల్స్‌ను చిత్తుచిత్తుగా చితకబాదింది. మొదట బ్యాటింగ్‌లో సిక్స్‌లతో కొట్టేసింది, బౌలింగ్‌లో స్పిన్‌తోకట్టేసింది. నితీశ్‌ రాణా, రస్సెల్‌ సిక్సర్ల జడివాన కురిపించారు. తర్వాత స్పిన్నర్లు కుల్దీప్, నరైన్‌ డెవిల్స్‌ ఆటను 15 ఓవర్లలోపే ముగించారు. దీంతో ఢిల్లీ  తొలుత ఆపలేక... తర్వాత ఆడలేక విలవిలలాడింది.  

కోల్‌కతా: కోల్‌కతా అసాధారణ ప్రదర్శనతో చెలరేగింది. ఆల్‌రౌండ్‌ షోతో ఢిల్లీని అల్లకల్లోలం చేసింది. ఐపీఎల్‌లో రెండో విజయాన్ని నమోదు చేసింది. సోమవారం జరిగిన పోరులో నైట్‌రైడర్స్‌ 71 పరుగుల తేడాతో ఢిల్లీ డేర్‌డెవిల్స్‌పై జయభేరి మోగించింది. మొదట బ్యాటింగ్‌ చేసిన కోల్‌కతా నైట్‌రైడర్స్‌ 20 ఓవర్లలో 9 వికెట్ల నష్టానికి 200 పరుగులు చేసింది. నితీశ్‌ రాణా (35 బంతుల్లో 59; 5 ఫోర్లు, 4 సిక్సర్లు), రస్సెల్‌ (12 బంతుల్లో 41; 6 సిక్సర్లు) భారీ షాట్లతో విరుచుకుపడ్డారు. తర్వాత కష్టసాధ్యమైన లక్ష్యాన్ని ఛేదించేందుకు బరిలోకి దిగిన ఢిల్లీ డేర్‌డెవిల్స్‌ 14.2 ఓవర్లలో 129 పరుగులకే కుప్పకూలింది. మ్యాక్స్‌వెల్‌ (22 బంతుల్లో 47; 3 ఫోర్లు, 4 సిక్సర్లు), రిషభ్‌ పంత్‌ (26 బంతుల్లో 43; 7 ఫోర్లు, 1 సిక్స్‌) రాణించారు. కుల్దీప్‌ యాదవ్, నరైన్‌ చెరో 3 వికెట్లు తీశారు. నితీశ్‌ రాణాకు ‘మ్యాన్‌ ఆఫ్‌ ద మ్యాచ్‌’ అవార్డు దక్కింది. 

రాణా మెరుపులు... 
టాస్‌ నెగ్గిన ఢిల్లీ ఫీల్డింగ్‌ ఎంచుకోగా, కోల్‌కతా ఇన్నింగ్స్‌ను లిన్, నరైన్‌ ప్రారంభించారు. తమ కెప్టెన్‌ నిర్ణయం సబబేనన్నట్లు బౌల్ట్‌ ఆరంభ ఓవర్లలో ప్రత్యర్థి ఓపెనర్లను కట్టడి చేశాడు. నరైన్‌ (1)ను బౌన్సర్‌తో దెబ్బతీశాడు. తర్వాత కథ కోల్‌కతావైపు మొగ్గింది. లిన్‌కు జతయిన ఉతప్ప ఉన్నంతసేపు ధాటిగా ఆడాడు. దీంతో 3 ఓవర్లకు 12/1గా ఉన్న స్కోరు మరో మూడు ఓవర్లలో 50/1కి చేరింది. నదీమ్‌ వేసిన ఇన్నింగ్స్‌ ఆరో ఓవర్లో ఉతప్ప 2 సిక్సర్లు, బౌండరీతో మొత్తం 18 పరుగులు చేశాడు. తర్వాత తేవటియా ఓవర్లో మరో సిక్సర్‌ బాదాడు. అయితే నదీమ్‌ తన మరుసటి ఓవర్లో గుడ్‌లెంగ్త్‌ డెలివరీతో ఉతప్పను బోల్తా కొట్టించాడు. నితీశ్‌ రాణా వచ్చిరాగానే సిక్స్‌లు, ఫోర్లతో పరుగుల వేగం పెంచాడు. లిన్‌ (29 బంతుల్లో 31; 4 ఫోర్లు, 1 సిక్స్‌)ను షమీ ఔట్‌ చేయగా, కెప్టెన్‌ దినేశ్‌ కార్తీక్‌ (10 బంతుల్లో 19; 2 ఫోర్లు, 1 సిక్స్‌) ఉన్న కాసేపు భారీషాట్లపైనే కన్నేశాడు. అతడిని మోరిస్‌ పెవిలియన్‌ చేర్చగా... ఈ దశలో వచ్చిన రస్సెల్‌ సిక్సర్ల మోత మోగించాడు. ఇతని అండతోనే రాణా (30 బంతుల్లో 3 ఫోర్లు, 4 సిక్స్‌లు) అర్ధసెంచరీ పూర్తిచేసుకున్నాడు. వీరి మెరుపులతో స్కోరు వేగం ఒక్కసారిగా పుంజుకుంది. రస్సెల్‌ విధ్వంసం మరింత పెరుగుతున్న దశలో బౌల్ట్‌ చక్కని డెలివరీతో బౌల్డ్‌ చేశాడు. దీంతో ఊపిరిపీల్చుకున్న గంభీర్‌ సేన స్లాగ్‌ ఓవర్లలో మిగతా బ్యాట్స్‌మెన్‌ను సమర్థంగా కట్టడి చేయగలిగింది. 20వ ఓవర్‌ వేసిన తేవటియా కేవలం ఒక పరుగే ఇచ్చి శుభ్‌మన్‌ గిల్‌ (6), చావ్లా (0), కరన్‌ (2)లను ఔట్‌ చేశాడు.  

ఫటాఫట్‌... ధనాధన్‌... 
ఢిల్లీ ఇన్నింగ్స్‌ టపటపా... ధనాధన్‌... ఫటాఫట్‌ అన్నట్లు ముగిసింది. టాపార్డర్‌ వైఫల్యంతో ఆరంభం నుంచే కష్టాల్లో కూరుకుపోయింది. ఓవర్‌కు ఒకరు చొప్పున తొలి మూడు ఓవర్లలో వరుసగా జాసన్‌ రాయ్‌ (1), శ్రేయస్‌ అయ్యర్‌ (4), కెప్టెన్‌ గంభీర్‌ (8) ఔటయ్యారు. ఈ దశలో రిషభ్‌ పంత్, మ్యాక్స్‌వెల్‌ వికెట్‌ పడకుండా... రన్‌రేట్‌ తగ్గకుండా వేగంగా పరుగులు జతచేశారు. ఓవర్‌కు పది పరుగుల రన్‌రేట్‌తో ఢిల్లీ స్కోరు 8 ఓవర్లలో 80కి చేరింది. కానీ ఇదంతా ఐదు ఓవర్లకే పరిమితమైంది. కుల్దీప్‌ ఊరించే బంతులతో రిషభ్, మ్యాక్స్‌వెల్‌ల కథ ముగించడంతో కోల్‌కతా విజయం ఖాయమైంది.   

సిక్సర్ల మోత... 
నైట్‌రైడర్స్‌ స్కోరు 200. ఇందులో బౌండరీని దాటివెళ్లి తెచ్చిన పరుగులు 146. కేవలం సిక్సర్లతోనే 90 పరుగులొచ్చాయి. కోల్‌కతా బ్యాట్స్‌మెన్‌ ఏకంగా 15 సిక్సర్లు బాదేశారు. నితీశ్‌ రాణా పరిపక్వత చెందిన ఇన్నింగ్స్‌తో అదరగొట్టగా... రస్సెల్‌ తనదైన శైలిలో చితగ్గొట్టాడు. అతని ఖాతాలో ఒక్క ఫోరు లేదు. అన్నీ (6) సిక్సర్లే. రాణా (4) కూడా తక్కువేం కాదని బ్యాట్‌తో చాటగా... వన్‌డౌన్‌లో దిగిన రాబిన్‌ ఉతప్ప మూడు సిక్స్‌లు కొట్టాడు. ఈ సిక్సర్ల జడివానలో ఎక్కువగా బలైంది మాత్రం షమీనే. ఈ ఢిల్లీ సీమర్‌ ఆరు సిక్సర్లు సమర్పించుకొని 53 పరుగులిచ్చుకున్నాడు.