‘డ్రా’ దిశగా రెండో టెస్టు

సాక్షి, విశాఖపట్నం: భారత్ ‘ఎ’, న్యూజిలాండ్ ‘ఎ’ మధ్య జరుగుతున్న రెండో అనధికారిక టెస్టు డ్రా దిశగా సాగుతోంది. భారత బ్యాట్స్‌మన్ మన్‌ప్రీత్ జునేజా (336 బంతుల్లో 178 బ్యాటింగ్; 19 ఫోర్లు, 1 సిక్స్) అద్భుత సెంచరీతో జట్టు ఇన్నింగ్స్‌ను నిలబెట్టాడు.
 
  అతనికి జగదీశ్ (200 బంతుల్లో 91; 9 ఫోర్లు), అభిషేక్ నాయర్ (55 బంతుల్లో 57; 8 ఫోర్లు, 1 సిక్స్) అండగా నిలిచారు. ఫలితంగా బుధవారం మూడో రోజు ఆట ముగిసే సరికి భారత్ ‘ఎ’ తమ తొలి ఇన్నింగ్స్‌లో 124 ఓవర్లలో 7 వికెట్ల నష్టానికి 408 పరుగులు చేసింది. జునేజాతో పాటు ధావల్ కులకర్ణి (4) క్రీజ్‌లో ఉన్నాడు. మూడు వికెట్లు చేతిలో ఉన్న భారత్ ప్రస్తుతం మరో 29 పరుగులు మాత్రమే వెనుకబడి ఉంది. గురువారం మ్యాచ్‌కు ఆఖరి రోజు.